1 อาโมวแซ แฮะ วี ต็อห, “ดอน เฌณ เซ ฌัม มาเฆียน อาบีบ, เบ โลว อืบ มยูก เฌาพรา บอ โบง บลอย โหลห เบ เฌาพรา ดอ กาโลห อัน กาง เบ. โคว, ดอ กอย เบ แคง มืง แอฆึบ ตึอน, แคง หมึร อัน เฌา แฮะ คยอด เลห เบ แคง มืง แอฆึบ ดอ มูห มาเฆียน อาบีบ ตี. 2 เบ โลว ฮาว ดี โดง ปี ร็อห อูน เฌาพรา, แตห เบ กรึบ อัน เฌา. แตห เบ ง็อห มาบู. เซ อาว มูห มาบู, แตห เบ ง็อห มามัก เฆ มาแป, แตห เบ โหลห เฌาพรา ดอ กาโลห อัน กาง เบ. 3 ดอ โฮม เบ ยัง ตี, เบ แกวะ โฮม บอ คามูน อี แฮะ ฮับ ซีนัม บรัห. อาดา บู ซีแง, เบ ตู ปึอน โฮม คามูน อี ฮับ ซีนัม บรัห. คามูน ตี แตห เบ โหลห ดูก. โคว, ดอ เลห เบ แคง มืง แอฆึบ ตี, เบ โลว เลห ฮาว กาเตา กาตืด.^a บอ โจว อาซาก เบ เบ โลว โหลห ซีแง เลห เบ แคง มืง แอฆึบ อี มูห โดง แฮะ คัม เบ ดูก ตาง. 4 อาดา บู ซีแง ตี, อาว ปึอน มึห ซีนัม บรัห คามูน แคง มืง บอ มืง. บา ดี อับ ซีแง ดอ โฆว, เซ เบ ตู โฮม โตต ยัง ปี หลู เบ, เบ แกวะ อูน กาโลย อัน แตห อึณ วี ฌัม ปา แคหณา.

5 เบ ตู ปึอน ง็อห หลู โดว ซัดดาวา ดอ โบง เบ บลอย แคง มืง ดอน มืง ปี ดี อาบ เฌาพรา ดี เบ. 6 เบ โลว ง็อห มี ดี โดง ร็อห อูน เฌาพรา แตห เบ กรึบ อัน เฌา. แตห เบ ง็อห บา ดี อับ ดอ แฮะ เฆต ซีแง, อี มูห อาคราว ดอ ดึอม เลห เบ แคง มืง แอฆึบ ตึอน. 7 แตห เบ ตาด ยัง บลอย ตี แดง เงา, โฮม ดี โดง ร็อห อูน เฌาพรา แตห เบ กรึบ อัน. ซีณวัห เบ โลว วี เวณ ดี กาง เบ. 8 อาดา เดา ซีแง, เบ โลว โฮม คามูน อี ตู ฮับ ซีนัม บรัห. ซีแง อึณ บู, แตห เบ ตัห กาฌูะ กรึบ เฌาพรา ปี กรึบ เบ. ซีแง ตี เบ ตู ปึอน โบง ฆาน มาเซ.

9 ซีแง ดี จูห เบ ดี โซะ โหงว, เบ โลว จูห ดี ตีห ฮาว, แตห อึณ กอ โนะ บู คาหนา ตึง. 10 แฮะ ฮอต, แตห เบ วี โบง บลอย โซะ โหงว. แตห เบ วี อืบ มยูก เฌาพรา ปี กรึบ เบ. แตห เบ หลู แคะ ซี หลู เบ, แตห อึณ กาดาน แคะ ปี ม็องการา ดัว เฌาพรา ดี เบ. 11 แตห เบ โคย ดาคึย ดี อาต เฌาพรา ดี โดง ร็อห เฌาพรา. บอ เบ บอ ฆอน อีมาย เฆ ฆอน อีบึณ เบ บอ หมาย เบ อี มูห อีมาย อีบึณ บอ เฆ ดูอี อาเลวี บอ แคต อี กอย โดบ เบ บอ ฆอน ซีปรัห เฆ ยา ซีปรัห อี กอย โดบ เบ, แตห เบ บอกาเฆลียด โบง บลอย ตี. 12 แตห เบ โหลห ดอ แบน เบ หมาย อี เฮา แคง มืง แอฆึบ ตึอน. แตห เบ ซาดีก, แตห เบ โบง โดบ ดารา อัน เฌา ฌึร ตี.

13 วาย แฮะ ฮอต มัห เบ ดี โหงว บอ แฮะ ฮอต เนียะ เบ เบล มางูน, เบ โลว วี โบง บลอย กอย แคง ทึบ อาดา บู ซีแง. 14 บอ เบ บอ ฆอน อีมาย เฆ ฆอน อีบึณ เบ บอ หมาย เบ อี มูห อีบึณ อีมาย บอ เฆ ดูอี อาเลวี บอ แคต อี กอย โดบ เบ บอ ฆอน ซีปรัห เฆ ยา ซีปรัห อี กอย แคง มืง โดบ เบ, เบ โลว โบง แตห อึณ กอ โบยว โบยว เกยา เกยา. 15 ดอ โบง เบ บลอย กอย แคง ทึบ อาดา บู ซีแง ตี, แตห เบ อืบ มยูก เฌาพรา ปี กรึบ เบ. แตห เบ โบง บลอย ตี ดี โดง ร็อห เฌาพรา แตห เบ กรึบ อัน. แตห เบ โคย ดาคึย โคว, เฌาพรา ดี ม็องการา แตห ฆาน ปี โบง เบ บอ ปี ปีด ปี ซัม เบ.

16 แคะ กอย อีมาย ดูอี อาโมยว เบ บอกาเฆลียด, เฆ โลว ตัห กรึบ เฌาพรา อู ซีนัม โอย เฌณ. แตห เฆ กรึบ เฌาพรา ดี โดง ร็อห เฌาพรา ตึอน. บลอย โอย โมยว ตี, อึณ บอ มูห บลอย โหลห ดอ กาโลห เฌาพรา กาง เบ, บลอย โซะ โหงว บอ บลอย กอย แคง ทึบ. เบ ตู ปึอน ฮาว โดง กอย เฌาพรา โดว ดีโลย ดีลาย. 17 ดูอี ดอน อี โลว ดึห ตัห ปี ดี หลู, แตห อึณ กาดาน แคะ แปะ แฮะ ม็องการา ดัว เฌาพรา ดี อัน.

18 เบ โลว ดาง แตห อึณ มึห ดา ตาง อี ซูงพยาด ดารา บอ ดา ตาง อี อึบ มืง. แตห เฆ อึบ แคง มืง ดอน มืง ปี ดี อาบ เฌาพรา ดี เบ. ดา ตาง เฆ ตี, เฆ บอ โลว ซูงพยาด ซืร ซืร หมาน หมาน ดี เฆ ดูอี กืน. 19 ดา ตาง ตี อาว ปึอน มึห น็อห โฆะ. อาว ปึอน มึห โดง ร็อก โดง ฌ็อง. อาว ปึอน ปรา ดี โฮม รึอน ปี หมอน อี เฮา. รึอน ปี หมอน อี เฮา ตี, อึณ บอ นับ ดี โบง แตห ดูอี อี มึห อางยาน ปี ดูอี งาย อับ, แตห บอ ดูอี น็อห ซืร น็อห หมาน วี ซูงพยาด กาลึบ. 20 เซ เบ ซูงพยาด ซืร ซืร หมาน หมาน บอ โดบ ดารา เซเซ, อึณ ดี แตห อาซาก เบ โต็ง, แตห เบ บอ ปึอน ดี บึง เหลณ คาฆูน แปะ แฮะ อาบ ดัว เฌาพรา ดี เบ.

21 เซ เบ ดี โบง กาโช็ง หลู ดี เฌาพรา, แกวะ แตห เบ ซัม เฮ ดี กรึบ นาง กานัม เอซูรา โคบ กาโช็ง หลู ตี. 22 แกวะ แตห เบ ซัม ร็อง มาว อี แตห เบ นัมโหลห นาง กานัม ตี. โคว, เฌาพรา ปี กรึบ เบ บอ กาอีห กาเซา ฌึร ตี.”