1 อาโมวแซ แฮะ วี ต็อห, “บู ซีนัม อู เฌณ เบ โลว ควาง นี ปี ทูก อี เฮา ดี เบ.

2 ปี ดี โลว โบง เบ อึณ ปาย นี. ดา กาณา นี ดอน อี โลว ควาง แปะ แฮะ ดัว อัน อี เฮา การ็อห ดี อัน. เซ อี การ็อห ตี มูห ดูอี อีซาเรลัะ อี มูห บีนอง อัน, อัน ตู ปึอน หมาณ นี ตี. โคว, เฌาพรา แฮะ ฮอต กาลาง อูน อาคราว ดี ควาง นี ตี. 3 เบ ยี แฮะ ปึอน หมาณ นี เบ ดี ดูอี อาโมยว เฮา. เซ อึณ ยี มูห บีนอง เบ อี แฮะ การ็อห ดี เบ, เบ โลว ควาง นี อัน ตี. 4 แกวะ แตห อึณ มึห ดูอี ฆีน ดูอี เอต คอ อู วี กาแต เบ. โคว, เฌาพรา ดี ม็องการา ดัว ดี เบ แคง มืง ปี ดี อาบ อัน ดี เบ อี ดี แบน คาฆูน เบ. 5-6 เซ เบ โทม โฆรห ปี กาลาง เฌาพรา ดี เบ บอ โบง โดบ ดารา ดอน โมยว ปี กาลาง โอว ดี เบ อาตึร นี, เฌาพรา ปี กรึบ เบ ดี ม็องการา ดัว ดี เบ, แตห อึณ โดบ แปะ แฮะ ดึอม กาแซณ อัน ดี เบ. เบ ดี บอ ปึอน ดัว ดี ดูอี กืน วี การ็อห กาวาย ดี เบ. เบ ยี ตู โลว วี การ็อห กาวาย ดี อาเซ. เบ ดี บอ ปึอน ดี อึบ อาโมยว ดูอี กืน, ยี ตู มึห ดูอี โมยว เฮา อี ดี วี อึบ เบ.

7 แคง มืง ปี ดี อาบ เฌาพรา ดี เบ ตี, อึณ บอ มูห มืง เหมา อาว ต็อห, เซ อึณ มึห ดูอี อีซาเรลัะ อี เอต, อี ตู มึห มาเซ, แกวะ แตห เบ เฆรียะ, เบ วัห ดี จอย อัน. 8 แตห เบ มึห น็อห ซี ป็อห, น็อห ฮาง, ดัว อัน การ็อห กาวาย ดี เบ. แตห อึณ กอ โฆรว แคะ โลว อัน. 9 เซ ซีนัม อึณ บู ปี โลว ควาง เบ นี ดี อี เฮา ตี แฮะ กาตัด ดี ฌัม, แกวะ แตห เบ มึห น็อห ตู ซี ดัว อี เฮา การ็อห กาวาย ดี เบ. แกวะ แตห อี ฮาย ฌึร ตี ปึอน ดี ลึบ แคง น็อห เบ. เซ เบ ยี ปีลึบ ปีเลห งาย เบ ลอง อัน, บอ ตู ดัว อัน การ็อห กาวาย มาเซ, เซ อัน ฮี ซาคึร กาลาง ดี เฌาพรา, อึณ ดี แบน หมาบ ดี เบ. 10 แกวะ แตห เบ หลัยะ โกรว เบ, แตห เบ ดัว ดี อัน. เซ เบ โบง ปาย ตี เฌาพรา ปี กรึบ เบ ดี ม็องการา ดัว ดี ฆาน ปี โบง ปี รัณ เบ ดอน โมยว. 11 ดูอี ดูก ดูอี ฆีน บอ ดูอี อี ฌูด ลูด ดี บอ มึห เซเซ แคง มืง เบ. โคว, โอว ดัม เบ, แตห เบ มึห น็อห ดีฮาง ดี เฆ.

12 เซ อึณ มึห ดูอี แฮแบร กาแต เบ อี แฮะ ย็อง โดว อัน แบน หมาย เบ, บอ มูห อีบึณ บอ มูห อีมาย, เซ เบ แฮะ ซูต แฮะ จัร อัน อาดา เดา ซีนัม, ปัน ดี ฌัม ซีนัม อึณ บู, เบ โลว เบลห หมาย เบ, แตห เฆ เลห. 13 เซ เบ แฮะ ฮอต เบลห แตห เฆ เลห, เบ แกวะ แตห เฆ เลห ฮาว โดว ดีโลย ดีลาย. 14 แคะ ปี ม็องการา ดัว เฌาพรา ดี เบ, บอ มูห พึง มาบู เบ บอ โหงว เบ บอ อึม มางูน เบ แตห เบ มึห น็อห ดาคึย, น็อห ฌอนโฌม ดี ดัว ดี เฆ. 15 แตห เบ โหลห, บอ เบ แฮะ ดึอม แบน หมาย อี เฮา แคง มืง แอฆึบ ตึอน. เฌาพรา ยี แฮะ คยอด เลห เบ. โกบ อึณ ปาย ตี โอว ดัว ดารา นี ดี เบ อาตึร นี.

16 มาแล, เซ หมาย อู วี ยี ตู ซี เลห ตู ซี ฮาว, เซ อัน มืร ร็อก เบ บอ ดูอี แคง อึณโฮม เบ, เซ อัน ต็อห ดี เบ, อัน ซี กอย รึม โดบ เบ, 17 แตห เบ ดึห ฮาว อัน ดี บาง มาโลห กาง เบ, บอ ดึห กาล็อง, บลูห โหยะ อัน. ปาย ตี อัน ดี แบน หมาย เบ บอ โจว อัน. บอ ดี หมาย อีบึณ โลว โบง ปาย ตี.

18 เซ เบ แฮะ ฮอต เบลห หมาย เบ แตห อัน เลห, แกวะ แตห เบ วี หลัยะ. โคว, อัน แฮะ คัม ดี แบน แดเจณ เบ เดา ซีนัม, ฆาน แปะ แฮะ โบง อัน แฮะ ฮอต กาดาน อาดา อา บูน หลึอม ฆาน ปี โบง ดูอี อี ฌาง ดี เบ. เซ เบ โบง ปาย ตี เฌาพรา ปี กรึบ เบ ดี ม็องการา ดัว ดี ฆาน ปี โบง ปี รัณ เบ ดอน โมยว.

19 แคง พึง มาบู บอ พึง มามัก เบ อี มึห ฆอน ฆีณ โดว อาโล็ง, เบ โลว ดึห ดอน โดว, อูน อาดา เฌาพรา ปี กรึบ เบ. ฆอน มามัก ตี เบ มืร ตู ปึอน จัร โบง ฆาน เบ. ฆอน มาบู ตี มืร, เบ ตู ปึอน กับ ฮึก อัน. 20 ดอน ซีนัม บอ เบ บอ ดูอี แคง อึณโฮม เบ, เบ โลว ดึห ฆอน มาบู บอ ฆอน มามัก ตี, ฮาว ดี โดง ร็อห อูน เฌาพรา แตห เบ กรึบ อัน. เบ บอ โลว ง็อห โฮม โดว ตี ดี อาต เฌาพรา. 21 มาแล, เซ ฆอน มาบู ฆอน มามัก เบ ตู ซีคยา, เปลา มืร โฆะ แฆะ, งาย อับ บอ มึห โดง เช, อาว ปึอน หลู ดี เฌาพรา. 22 เซ โดว อัน ปาย ตี เบ แฮะ ปึอน ง็อห โฮม ดี กาง เบ. บอ เบ อี ซีงา โดบ ปี ดัม ดารา บอ อี ตู ซีงา โดบ ปี ดัม ดารา แฮะ ปึอน โฮม ดอน อี, แตห อึณ ปี เบ โฮม ยัง มังเฆียห เฆ ยัง มาฌัะ. 23 มาแล, เบ แกวะ โฮม หนาม อัน. เบ โลว ฮูห แวน หนาม อัน ตี แดง กาดาย, แตห อึณ ปี เบ ฮูห แวน อึม.”