1 เฌาพรา วี ต็อห ดี อาโมวแซ, 2 “แตห แม วี โบง เวียะ ดี เฆ ดูอี มีดีอาน แปะ แฮะ โบง เฆ ดี ดูอี อีซาเรลัะ. วาย แฮะ ฮอต โบง เวียะ แม ดี เฆ ตี, แม ดี ยัม.”

3 อาโมวแซ วี กาลาง ดี เฆ ดูอี กืน ต็อห, “แตห เอ แรน ดา ซึก เอ, แตห เอ ฮาว กาโฆห ดี ดูอี มีดีอาน, แตห เอ ปึอน ดี วี โบง เวียะ ดี เฆ หมาบ แปะ แฮะ โบง เฆ ดี เฌาพรา. 4 แคง ครึร ดูอี อีซาเรลัะ ดอน ครึร, วี โลว ตึย ตัห ดา ซึก อู ครึร อู แหรณ วี.” 5 เฆ บอ ร็อห ดา ซึก อู ครึร อู แหรณ อู แหรณ. ดา ซึก อี แฮะ โฆ็ง ครึง กาโฆห แปะ แฮะ แรน อูน เฆ บอกาเฆลียด, เฆ กอย อู หมึณ ดี อา แหรณ วี. 6 อาโมวแซ บอ จัร ดา ซึก เฆ ตี ฮาว โดบ อาพีเนฮาด อี มูห ฆอน ดา อี หลู ดี เฌาพรา อี จืร อาเลอาซา ตึอน. อาพีเนฮาด ตี แบน ดา อี โฆ็ง โกรว อี ซีงา บอด บอ เวา ปี โลว บูด เฆ ดอ กาโฆห เฆ.

7 เฆ บอ กาโฆห ดี ดูอี มีดีอาน, แตห อึณ โดบ ปี กาลาง เฌาพรา ดี อาโมวแซ ตึอน. เฆ บอ ง็อห ยัม โตต แคะ กอย อีมาย บอกาเฆลียด. 8 เฆ บอ ง็อห ยัม บอ คูนดีคัม แคง มืง มีดีอาน ตี พัน กาดัง. อึณ บอ มูห คูนดีคัม อาเอวี, คูนดีคัม อาเรเคม, คูนดีคัม อาฌูรา, คูนดีคัม อาฮูรา บอ คูนดีคัม อาเรพา. เฆ บอ ดึห มาปัวะ ลาง, แดบ ยัม บอ อาบาลาอัม อี มูห ฆอน อาปอซอ ตึอน. 9 เฆ ดูอี อีซาเรลัะ บอ เหมต อีบึณ ดูอี มีดีอาน เฆ ตี บอ ฆอน เฆ. เฆ บอ ดึห บอ มามัก เฆ บอ มาบู เฆ มาแป บอ โกรวกราม เฆ บอกาเฆลียด. 10 เฆ บอ โดะ กาซึม บอ มืง เฆ บอ โดง กอย ดา ซึก ดอน โปละ.

11 เฆ บอ ดึห ตัห โกรวกราม เฆ ตี บอ เหมต ดูอี บอ โดว ซัดดาวา เฆ บอกาเฆลียด. 12 เฆ บอ ดึห เวณ โดง กอย อาโมวแซ ฆาย อาเลอาซา บอ เฆ ดูอี อีซาเรลัะ อี กอย ดี ฆลัง โมวอาบ โคบ แบลง อึม ยอดาน อี วี ลาย กาซืร ดี มืง เยรีโคว ตึอน.

13 อาโมวแซ ฆาย อาเลอาซา บอ เฆ ดา ตาง อี อึบ เฆ ดูอี กืน ตึอน, เฆ บอ เลห ฮาว บัร ดี รวห เฆ ดา ซึก อี แฮะ ฮาว ตี. 14 ปาย ตี อาโมวแซ บอ รู ดี เฆ ดา ตาง อี อึบ ดา ซึก อู แหรณ บอ ดา ตาง อี อึบ ดา ซึก อู มาย็อห อี แฮะ วี ตัห ตี.

15 อาโมวแซ วี ต็อห ดี เฆ, “เหมา อึณ ปาย ปี อูน เบ อีบึณ เฆ นี? 16 เบ ตู ยึร, อึณ มูห อีบึณ เฆ นี อี โบง โดบ อากยาม อางยาน อาบาลาอัม ตึอน, อี แตห ดูอี อีซาเรลัะ ลูต เฌาพรา ดอ กรึบ เฆ เฌา เบอูรา ตึอน. อึณ บอ แตห เฆ ดูอี ปี อึบ เฌาพรา กาดูห อาเพ อาเร ตาง. 17 เซ อึณ ปาย ตี ดอ ตี นี แตห เบ ง็อห แวน โตต แคะ กอย ฆอน อีมาย. ง็อห แวน บอ เฆ อีบึณ ดอน อี อี แฮะ ดึอม อีด รึม, กอย รึม โดบ อีมาย. 18 มาแล, เฆ อีบึณ อี หณัม ดึอม อีด รึม กอย รึม โดบ อีมาย, แตห เบ อูน, แตห เบ ปึอน ดี ดึห.

19 อึณ ยี มูห เบ อี แฮะ ง็อห ยัม ดูอี, อี แฮะ ตา ปา ดูอี ยัม ตี, แตห เบ บอกาเฆลียด กอย นา เรต โดง คยัะ เอ อาดา บู ซีแง. เซ ฮี ฌัม โอย ซีแง บอ บู ซีแง, บอ เบ บอ เฆ อีบึณ แปะ แฮะ เหมต ตัห เบ ตี, แตห เบ โบง แคะ ปี โลว โบง, แตห เบ วี ซีงา โดบ ปี ดัม ดารา. 20 เบ โลว โบง แตห ครึง ตา เบ วี ซีงา โตต ดอน โมยว. อึณ บอ มูห ครึง อี มูห ฮูน โดว ซัดดาวา, ครึง ปี ด็อะ เฆ ตา ฮึก มาแป, ครึง ปี เดต ปี โบง เฆ ตา เฮ.”

21 อาเลอาซา อี มูห ดา อี หลู ดี เฌาพรา, อัน วี กาลาง ดี เฆ ดา ซึก อี แฮะ ตัห กาโฆห ตี. อัน ต็อห, “เฌาพรา แฮะ เบลห อูน ดารา ดี อาโมวแซ ต็อห, 22 แคะ กอย โกรวกราม อาโมยว อี คัม เงา, 23 อี มูห ครีว เฆ รึอน, บ็อง เฆ ฮีน, ซาดูะ เฆ มีเจต, ฌึร ตี ดอน โมยว อี ดี คัม เงา, เบ โลว บลึบ แคง เงา, แตห อึณ ซีงา. โกรวกราม อาโมยว อี ตู คัม เงา, เบ โลว บลึบ แคง อึม, แตห อึณ ซีงา. 24 เซ แฮะ โนะ บู ซีแง, เบ โลว ตา อึม, ลัห ครึง เบ, แตห เบ ซีงา. แฮะ ฮอต ปาย ตี เบ แฮะ ปึอน วี ตัห ลึบ แคง โดง คยัะ เอ.”

25 เฌาพรา วี กาลาง ดี อาโมวแซ ต็อห, 26 “บอ แม บอ อาเลอาซา อี มูห ดา อี หลู ดี เฌาพรา บอ เฆ ดา ตาง อี แยต เฆ ดูอี กืน ตึอน, แตห เบ แดม ฌาราง โกรวกราม แปะ แฮะ ปึอน ดึห ตัห เบ ตี. ฮับ บอ ดูอี บอ โดว ซัดดาวา 27 แตห เบ กาย็อห, แตห อึณ การัม แบน อา บูน. อาดา อู บูน ดัว ดี เฆ ดา ซึก. อาดา ปอ อู บูน ดัว ดี เฆ ดูอี กืน. 28 อี มูห โกรว เฆ ดา ซึก ตี, เบ โลว วี แฆบ จึง, ดัว ดี เฌาพรา. แคง ดูอี พัน มาย็อห วี โลว ดึห เลห อู วี. อี มูห โดว ซัดดาวา, บอ มูห มัก อาโล็ง, มาลา, มาบู เฆ มาแป บอ โดว ซัดดาวา ดอน โมยว, แคง พัน มาย็อห โดว, เบ โลว ดึห เลห อู โดว. 29 แปะ แฮะ แฆบ เบ ตี, เบ โลว วี ดัว ดี อาเลอาซา อี มูห ดา อี หลู ดี เฌาพรา, แตห อึณ แบน ปี ดี หลู อี ดาง ฆูง เฆฌู ดี เฌาพรา. 30 อี มูห โกรว เฆ ดูอี กืน มืร, เบ โลว แฆบ จึง. เซ อึณ มึห ดูอี พัน ฆึร วี, โลว ดึห เลห อู วี. บอ มามัก เฆ มาลา, มาบู เฆ มาแป บอ โดว ซัดดาวา ดอน โมยว, เซ อึณ มึห พัน ฆึร โดว, เบ โลว ดึห เลห อู โดว. เบ โลว วี ดัว ดี เฆ ดูอี อาเลวี อี ลึมลา ทึบ บีก บอด ตึอน.” 31 เฌาพรา แฮะ ฮอต กาลาง ปาย ตี อาโมวแซ ฆาย อาเลอาซา อี มูห ดา อี หลู ดี เฌาพรา บอ โบง โดบ ปี กาลาง เฌาพรา ดี อาโมวแซ ตี.

32 ฌาราง โกรวกราม แปะ แฮะ ปึอน ตัห เฆ ดา ซึก ตึอน, อี มูห มาบู เฆ มาแป, อึณ กอย เดา แซน ดี บู หมึณ ดี พัน แหรณ โดว. 33 มามัก, อึณ กอย บู หมึณ ดี อา แหรณ โดว. 34 มาลา อึณ กอย เดา หมึณ ดี อู แหรณ โดว. 35 อีบึณ อี หณัม ดึอม อีด รึม กอย รึม โดบ อีมาย อึณ กอย โอย หมึณ ดี อา แหรณ วี.

36 แคะ ปี ปึอน เฆ ดา ซึก, อึณ บอ มูห มาบู เฆ มาแป โอย แซน ดี โอย หมึณ ดี บู แหรณ ดี พัน มาย็อห โดว. 37 เดา มาย็อห ดี บู ฆึร ดี พัน โดว บอ แบน จึง ปี โลว ฮับ เฆ ดี เฌาพรา.

38 อี มูห มามัก, อึณ กอย โอย หมึณ ดี เดา แหรณ โดว. อาดา บู ฆึร ดี อา โดว บอ แบน จึง ปี โลว ฮับ เฆ ดี เฌาพรา.

39 มาลา, อึณ กอย โอย หมึณ ดี พัน มาย็อห โดว. อาดา เดา ฆึร ดี อู โดว บอ แบน จึง ปี โลว ฮับ เฆ ดี เฌาพรา.

40 ดูอี ปี เหมต ตัห เฆ ตึอน, อึณ กอย อู หมึณ ดี เดา แหรณ วี. โอย ฆึร ดี อา วี บอ แบน จึง ปี โลว ฮับ เฆ ดี เฌาพรา.

41 อาโมวแซ บอ ดึห จึง ปี ฮับ เฆ ดี เฌาพรา ตี, วี อาบ ดัว ดี ดา อี หลู ดี เฌาพรา อาเลอาซา, แตห อึณ วี แบน ปี หลู อี ดาง ฆูง เฆฌู ดี เฌาพรา. แตห อึณ โดบ ปี กาลาง เฌาพรา ดี อาโมวแซ ตึอน.

42 แคะ ปี ปึอน เฆ ดูอี กืน ตึอน มืร, อึณ บอ การัม ฆาย ปี ปึอน เฆ ดา ซึก ตึอน. 43 อึณ มูห มาบู เฆ มาแป โอย แซน ดี โอย หมึณ ดี บู แหรณ ดี พัน มาย็อห โดว. 44 มัก อาโล็ง โอย หมึณ ดี เดา แหรณ โดว, 45 มาลา โอย หมึณ ดี พัน มาย็อห โดว 46 บอ ดูอี อู หมึณ ดี เดา แหรณ วี. 47 แคะ ปี ปึอน เฆ ตี บอกาเฆลียด, บอ ดูอี บอ โดว ซัดดาวา, อาโมวแซ บอ ดึห แคง พัน ฆึร โดว อู โดว, บอ แคง พัน ฆึร วี อู วี. อาโมวแซ วี ดัว โตต ดี เฆ ดูอี อาเลวี อี ลึมลา ทึบ บีก บอด ตึอน.

48 วาย อัน ตี เฆ อี มูห ดา ตาง อี อึบ ดา ซึก อู แหรณ วี, บอ ดา ตาง อี อึบ อู มาย็อห วี, เฆ วี ตัห โดง กอย อาโมวแซ. 49 เฆ ต็อห, “อึย แม ดา กาณา เย, เย แดเจณ แม แฮะ วี ตีห แคะ กอย ดา ซึก ปี อึบ เย. อาว มึห อี โยม อี หราย คอ อู วี. 50 โคว อัน ตี, เย แฮะ วี ดึห ตัห บอ โกรวกราม เย อี มูห ครีว. อึณ บอ มูห กันแด, ซีกานู, บีโหยะ บอ มากาแวะ, เย แฮะ ปึอน ตัห ราง อาเซ ราง อัน. เย ดี วี หลู ดี เฌาพรา, แตห อึณ แตห เย วี กาล็อะ ดี เฌาพรา.”

51 อาโมวแซ ฆาย ดา อี หลู ดี เฌาพรา อาเลอาซา ตึอน บอ ดึห แคะ กอย ครีว ปี ตัห หลู เฆ ตี. อึณ มูห โตต โกรว แปะ แฮะ โบง เฆ แตห อึณ ชีด. 52 ครีว ปี ตัห หลู เฆ ดา ตาง อี อึบ ดา ซึก เฆ ตี, อึณ จัน อู หมึณ ดี เดา แหรณ ดี บู มาย็อห ดี พัน ฆึร เซเคน อี มูห มอก อู มาย็อห ซัะ. 53 ดา ซึก เฆ ตี บอ หลู โกรวกราม แปะ แฮะ ปึอน ตัห เฆ ราง อาเซ ราง อัน. 54 ปาย ตี อาโมวแซ ฆาย อาเลอาซา ตึอน บอ ดึห ครีว เฆ ตี, วี ฮาว อูน แคง ทึบ บีก บอด, แตห อึณ แตห เฌาพรา โหลห เฆ ดูอี อีซาเรลัะ.