1 ครึร อารูเบน ฆาย ครึร อาฆัด ตึอน เฆ มึห โดว ซัดดาวา กืน กาเซา. เฆ บอ ยึร มืง ยาเฌรา ฆาย มืง ฆีเลอาด แฮะ หมึอม เฮียง โดว ซัดดาวา เฆ ดี ตี. 2 เฆ บอ ฮาว โดง กอย อาโมวแซ ฆาย อาเลอาซา อี มูห ดา อี หลู ดี เฌาพรา บอ เฆ ดา ตาง อี อึบ เฆ ดูอี กืน. เฆ ต็อห, 3 “มืง อาตาราด บอ มืง ตีโพน, มืง ยาเฌรา, มืง นีมรา, มืง เฮซาโพน, มืง เอเลอาเล บอ มืง เซพาม, มืง เนปอ, มืง พอนา 4 อี มูห มืง แปะ แฮะ กาโฆห เฌาพรา ดัว ดี เอ ดูอี อีซาเรลัะ, อึณ มูห มืง อี หมึอม ฮาว เฮียง โดว ซัดดาวา. เย อี มูห แดเจณ แม เฆ นี, เย มืร แฮะ มึห กืน โดว ซัดดาวา. 5 เซ อึณ บอ ปึอน, เย หมาณ, แตห เย กอย แคง มืง ตี, แตห อึณ แบน มืง เย. อาว โลว แตห เย กาโลห ฮาว นา ดอย อึม แบลง ยอดาน.”

6 อาโมวแซ วี ต็อห ดี เฆ, “เฆ บีนอง เบ ยี ซี โลว ฮาว กาโฆห ดี ดา ซึก. เบ ซี กอย ดี นี ตู จอย มาเซ? 7 เหมา อึณ ปาย ปี ปยาต เบ น็อห ดูอี อีซาเรลัะ, แกวะ แตห เฆ มึห น็อห ซี กาโลห แบลง อึม ยอดาน, ฮาว ฌัม แคง มืง ปี ดี อาบ เฌาพรา ดี เอ? 8 ฆูณ ดัง เบ มืร แฮะ โบง ปาย ตี ดอ จัร โอว เฆ ฮาว คยอง ดี ยอด แคง มืง นี, ดอ กอย เฆ ดี กาเดบานา ตึอน. 9 โคว, ดอ ฮาว ฌัม เฆ ดี ดีลัยะ เอโคน, วาย แฮะ ยึร เฆ มืง ตี, เฆ แฮะ วี ปยาต น็อห ดูอี อีซาเรลัะ, แกวะ แตห เฆ มึห น็อห ซี ฮาว ลึบ แคง มืง ปี ดัว เฌาพรา ดี เฆ. 10 ดอ อัน ตี เฌาพรา บอ รู กาเซา ดี เฆ บอ ดืง เฆ ต็อห, 11 ‘เฆ ดูอี อี เลห ตัห แคง มืง แอฆึบ, จูห ซีณ อาซาก อา ฆึร โฮะ นา แดง, อู วี มืร เฆ ตู ปึอน ดี ลึบ แคง มืง แปะ แฮะ ต็อห โอว ดี ดัว ดี เฆ. เฆ มืร ตู ปึอน แคะ ปี ดัว โอว กาดีก ซัดฌา ดี อาบราฮัม, อาแซก บอ อาโกบ ตึอน. โคว, เฆ ตู มึห น็อห ซี โดบ โอว. 12 อึณ ยี มึห มี อาฆาลีบ อี มูห ฆอน อาเยโพวนา อี มูห ดูอี อาโมยว เกเนซีด บอ อาโยวซูอา อี มูห ฆอน อานูน ตึอน อี ปึอน ดี ลึบ. ฆาย แฮะ มึห น็อห ซี โดบ ซีคยา โอว.’ 13 โคว อัน ตี, เฌาพรา แฮะ รู กาเซา ดี เฆ บอ แตห เฆ ฮาว วีว ฮาว เวณ แคง แปร กาฮ็อห, แตห อึณ กอ โนะ พวน ฆึร ซีนัม, แตห เฆ อี โบง นา ฮาย นา มืก ดี อาต เฌาพรา ตี กอ ยัม โตต.

14 ดอ ตี นี, เบ แปะ แฮะ วี กาดาง ฆูณ ดัง เบ. เบ ยี โบง แตห พึง เฆ ดูอี ฮาย แว แบร กืน. เบ โบง แตห เฌาพรา แว รู กาเซา ดี ดูอี อีซาเรลัะ. 15 โคว, เซ เบ วัห เฌาพรา, เซ เฌาพรา วี แวน ดูอี บอกาเฆลียด แตห เฆ ชึม แคง แปร กาฮ็อห นี ปอ อู เฌณ, อึณ มูห โกบ เบ.”

16 อาโมวแซ แฮะ ฮอต กาลาง โฆรห ตี, เฆ วี ตัห กอย เครียะ อาโมวแซ ต็อห, “เย หมาณ ดี โบง อูน กาปึม มาบู เย บอ แด อูน มืง แตห ฆอน เย ปึอน ดี กอย. 17 ยี มูห เย, เย ดี ฮาว รึม โดบ เฆ บีนอง เย ดูอี อีซาเรลัะ. เย ดี แบน ดา อี กาโฆห แยต ดี อาต, แตห เบ กอ ฌัม แคง มืง โดง ดี กอย เบ ตี. เซ อึณ ปาย ตี ฆอน เฆ หลูกหลาน เย, เฆ ดี ปึอน ดี กอย แคง มืง อี แฮะ มึห แรง อี แฮะ มัน ซีคยา. เฆ ดี ลอด อาเพ อาเร ดี ดูอี อี กอย แคง มืง นี. 18 เย มืร ตู วี ตัห ดี กาง เย อาต ฌัม โตต เฆ ดูอี อีซาเรลัะ แคง มืง อี ดี แบน คาฆูน เฆ ตี. 19 เย มืร ตู ดึห คาฆูน คอ อี แจก อี กอย นา ดอย แบลง อึม ยอดาน. โคว, เย แฮะ ปึอน คาฆูน อี มูห บลาก นา นี อึม แบลง ยอดาน อี มูห นา เลห ซีแง อึม นี.”

20 เฆ แฮะ ฮอต กาลาง โฆรห ตี, อาโมวแซ วี ต็อห ดี เฆ, “เซ เบ ดี โบง ปี ต็อห เบ ตี, เซ เบ แรน ครึง กาโฆห เบ, ฮาว กาโฆห นา อาต เฌาพรา, 21 เซ เฆ ดา ซึก เบ ดี บอ กาโลห อึม แบลง ยอดาน, เซ เฆ ดี บอ กาโฆห ดี รันซู เอ นา อาต เฌาพรา, แตห เฌาพรา กอ แป โตต, แตห อัน ณอน เตา โตต รันซู อัน, 22 เซ เฌาพรา แฮะ แตห เฆ ดูอี อีซาเรลัะ ปึอน ดี อึบ โตต มืง ตี, เบ แฮะ ปึอน วี วีว โดง กอย เบ. เซ เบ โบง ปาย ตี เบ ตู ลูต เฌาพรา บอ เฆ บีนอง เบ อี มูห ดูอี อีซาเรลัะ บอกาเฆลียด. ปาย ตี มืง อี กอย นา เลห ซีแง แบลง อึม ยอดาน นี, อึณ ดี แบน มืง ปี อาบ เฌาพรา ดี เบ, แตห เบ กอย.

23 มาแล, เซ เบ ตู โบง โดบ ปี กาแซณ เบ, เบ ดี ลูต เฌาพรา. แตห เบ นับ, หมาบ ปี โบง เบ ตี, อึณ ดี โดบ ดี รัน เบ. 24 เซ อึณ ปาย ตี แตห เบ โบง โดบ ปี กาแซณ เบ ตี, แตห เบ แด มืง อาดา ฆอน เบ บอ โบง กาปึม อาดา มาบู เบ ตี.”

25 เฆ ดูอี ครึร อาฆัด บอ ดูอี ครึร อารูเบน วี ต็อห, “อึร, เย ดี โบง โดบ ปี ต็อห แม ตี. 26 อี มูห อีบึณ เย เฆ ฆอน เย บอกาเฆลียด บอ พึง มาบู, พึง มามัก เย, เย ดี อูน โตต ดี มืง เฆ นี, อี กอย แคง กาดาย มืง ฆีเลอาด. 27 อี มูห เย แดเจณ แม นี, เย ดี ดึห ครึง กาโฆห เย. เย ดี กาโลห ฮาว ฌัม นา ดอย แบลง อึม ยอดาน, กาโฆห ดี อาต เฌาพรา บอ โบง โดบ ปี ต็อห แม ตี.”

28 ปาย ตี อาโมวแซ วี กาลาง ดี อาเลอาซา อี มูห ดา อี หลู ดี เฌาพรา บอ ดี อาโยวซูอา อี มูห ฆอน อานูน ตึอน บอ ดี เฆ ดา ตาง อี อึบ เฆ ดูอี อีซาเรลัะ. อัน ต็อห ดี เฆ, 29 “เซ ดูอี อาโมยว อาฆัด บอ ดูอี อาโมยว อารูเบน แฮะ โฆ็ง ครึง กาโฆห, ฮาว รึม โดบ เบ, กาโลห แบลง อึม ยอดาน, วี กาโฆห ดี อาต เฌาพรา, เซ เบ แฮะ ฮอต แป โตต มืง ตี, เบ โลว วี อาบ มืง ฆีเลอาด, ดัว ดี เฆ, แตห อึณ แบน มืง เฆ. 30 มาแล, เซ เฆ ตู กาโลห ฮาว ฌัม นา ดอย แบลง ยอดาน, ตู กาโฆห โดบ เบ, เฆ ดี ปึอน คาฆูน แคง มืง กานัณ ปี เบ.”

31 เฆ ดูอี อาโมยว อาฆัด บอ ดูอี อาโมยว อารูเบน วี กาโพรม ดี ต็อห, “เย อี มูห แดเจณ แม, เย ดี โบง โดบ แคะ ปี จัร เฌาพรา เย โบง. 32 เย ดี กาโลห ฮาว ฌัม นา ดอย แบลง อึม ยอดาน, กาโฆห นา อาต เฌาพรา, แตห เย ปึอน คาฆูน อี กอย นา เลห ซีแง แบลง อึม ยอดาน นี.”

33 ปาย ตี อาโมวแซ บอ ดึห มาน มืง คูนดีคัม อาซีโฮน อี มูห ดูอี อาโมวรีด บอ มาน มืง คูนดีคัม อาออคัะ อี กอย แคง มืง บาซัน บอ มืง เฮา บอ เรา อี กอย กาเครียะ ดี มืง เฆ ตี. อัน ดึห บอ วี อาบ มืง เฆ ตี ดี ดูอี ครึร อาฆัด บอ ดี ดูอี ครึร อารูเบน บอ ดี ดูอี ครึร อามานาเซ อาดา อู กาแต.

34 เฆ ดูอี ครึร อาฆัด บอ แด มืง เฆ อี มูห มืง ดีโพน, มืง อาตาราด บอ มืง อารอ, 35 มืง อาตาราซอพาน, มืง ยาเฌรา, มืง ยอเพฮา, 36 มืง เบดนีมารา บอ มืง เบฮาราน. มืง เฆ ตี บอกาเฆลียด บอ มูห มืง อี มัน ซีคยา. เฆ บอ โบง กาปึม มาบู เฆ.

37 เฆ ดูอี อารูเบน วี แด มืง เฆ อี มูห มืง เฮซาโพน, มืง เอเลอาเล, มืง กีรียาซีม, 38 มืง เนปอ บอ มืง บาลัะมอง. มืง เฆ ตี เฆ วี กาปลูะ กามาย. เฆ แด บอ มืง ซีบามา. เฆ บอ วี ดัว จืร กามาย ดี มืง ปี วี แด กามาย เฆ ตี.

39 เฆ ดูอี อามาคีรา อี มูห ฆอน อามานาเซ ตึอน, เฆ บอ ฮาว กาโฆห ดี มืง ฆีเลอาด. เฆ บอ ปึอน มืง ตี บอ โฮว เตา ดูอี อาโมวรีด อี กอย แคง มืง ตี. 40 อาโมวแซ บอ อาบ มืง ตี ดี เฆ ดูอี อามาคีรา, แตห เฆ กอย แคง มืง ตี. 41 อายาอีรา อี มูห ฆอน อามานาเซ ตึอน ปี วี ฮาว กาโฆห บอ ปึอน เรา อี กอย นา เรต มืง ตี มัง เรา. เฆ บอ แตห โดง ตี จืร ฮาโวดยาอีรา. 42 อี มูห อานอบัะ, อัน ปี วี ฮาว กาโฆห ปึอน บอ มืง เกนาด บอ เรา อี กอย นา เรต มืง ตี. เฆ บอ ต็อห, มืง ตี จืร มืง นอบัะ.