1-2 ดอ อัน ตี เฆ ฆอน อีบึณ อาจาลอพัด อี มูห ฆอน อาเฮพา ตึอน บอ วี ตัห กอย นา อาต อาโมวแซ บอ นา อาต ดา อี หลู ดี เฌาพรา อี มูห อาเลอาซา. เฆ ตัห บอ นา อาต เฆ ดา ตาง บอ เฆ ดูอี กืน อี กอย โคบ บาง มาโลห ทึบ บีก บอด ตึอน. อาจาลอพัด ตี บอ มูห ฆอน อาฆีเลอาด, อาฆีเลอาด วี มูห ฆอน อามาคีรา. อามาคีรา วี มูห ฆอน อามานาเซ. อามานาเซ วี มูห ฆอน อาโยว. ฆอน อีบึณ เฆ ตี บอ มูห นาง มาลา, นาง นออา, นาง ฮอกาลา, นาง แมก, บอ นาง ดีราจา. 3 เฆ ต็อห, “ฆูณ เย แฮะ ฮอต ยัม แคง แปร กาฮ็อห ตึอน. อึณ ยี ตู มูห โกบ กอย รึม อัน โดบ พึง อาโควรา อี ลาย กาแคณ ดี เฌาพรา. อัน แฮะ ยัม โกบ หมาบ แปะ แฮะ โบง อัน. อัน ยี ตู มึห ฆอน อีมาย. 4 เบ ทาง อึณ แฮะ หมาน, เซ จืร ฆูณ เย ตี ดี บอ หราย กาแต เฆ ดูอี อีซาเรลัะ โกบ ตู มึห อัน ฆอน อีมาย? เย มืร หมาณ, แตห เย มึห คาฆูน, มึห กาดาย โดบ อีกัด วา ฆูณ เย ตี.”

5 อาโมวแซ วี กาลาง ดี เฌาพรา ลอง ปี กาลาง เฆ ตี. 6 เฌาพรา วี ต็อห ดี อาโมวแซ, 7 “โฆรห ปี ต็อห ปี หมาณ เฆ ฆอน อีบึณ อาจาลอพัด ตี แฮะ กางยา, แฮะ มูห แฮะ หมาน. บอ เฆ แฮะ กาอาบ มึห กาดาย, แตห อึณ แบน คาฆูน ดี เฆ โดบ อีกัด วา ฆูณ เฆ. แม โลว ดึห คาฆูน ฆูณ เฆ ตี, วี ดัว ดี เฆ.

8 แตห แม วี กาลาง บอ ดี เฆ ดูอี อีซาเรลัะ ต็อห, ‘เซ อึณ มึห อีมาย อี แฮะ ยัม, เซ อัน ยี ตู มึห ฆอน อีมาย, เบ โลว ดัว คาฆูน อัน ดี เฆ ฆอน อีบึณ อัน. 9 เซ อัน ยี ตู มึห ฆอน อีบึณ, เบ โลว ดัว คาฆูน ตี ดี อีกัด วา อัน. 10 เซ อัน ยี ตู มึห อีกัด วา, แตห เบ ดัว คาฆูน ตี ดี บีนอง วอแว อี กาเครียะ ดี อัน. 11 เฆ ดูอี อีซาเรลัะ โลว โดบ ดารา, โดบ อามีง ปี เบลห อูน โอว เฌาพรา นี.’”

12 วาย อัน ตี เฌาพรา ปี วี ต็อห ดี อาโมวแซ, “แตห แม โฮะ ดี นอน อาบารีม, แตห แม ยึร มืง ปี ดี ดัว โอว ดี เฆ ดูอี อีซาเรลัะ. 13 เซ แม แฮะ ฮอต ยึร, แม ดี ยัม ปี อีกัด แม อี จืร อาโรน ตึอน. 14 โคว, ดอ กอย เบ แคง แปร กาฮ็อห อี จืร จีนา ตึอน, เฆ ดูอี อีซาเรลัะ แฮะ ปึณ, แฮะ ต็อห โฆรห ตู หมึอม ดี โอว โกบ ตู มึห เฆ อึม. บาย ยี ตู โบง ปี จัร โอว เบ โบง, แตห อาพูง ดังโคว โอว ลึห ซีคยา ดี เฆ ดูอี อีซาเรลัะ ดอ กอย เบ ดี โดง โตห อึม ตี.” โดง เลห อึม แคง ดาอาง มาว ตี, อึณ จืร เมรีบา อี กอย ดี โดง จืร ซาเดด แคง แปร กาฮ็อห อี จืร จีนา ตึอน.

15 เฌาพรา แฮะ ฮอต กาลาง โฆรห ตี, อาโมวแซ บอ วี ซาคึร ดี เฌาพรา ต็อห, 16 “อึย แม เฌาพรา, แม มูห เฌาพรา อี อึบ โตต ดอน โมยว บอ อาซาก บอ น็อห พึอม ดูอี. โอว หมาณ, แตห แม เฌา วี ร็อห อีมาย ปอ อู วี, แตห อัน ปึอน ดี แยต ดูอี เฆ นี, 17 แตห อัน แบน อี แยต เฆ ฮาว ลึบ ฮาว เลห โดง กอย เฆ. แกวะ แตห ดูอี ปี อึบ แม เฌา ปี มาบู อี ตู มึห ดา กาณา อี ยอด แมน เฆ.”

18 เฌาพรา วี ต็อห ดี อาโมวแซ, “แตห แม แดะ ตัห อาโยวซูอา อี มูห ฆอน อานูน ตึอน. อัน มูห วี อี แฮะ ปึอน น็อห พึอม เฌาพรา. แตห แม ดาง แด แม แดง ฆีณ อัน. 19 แตห อัน ตัห จ็อง นา อาต ดา อี หลู ดี เฌาพรา อี มูห อาเลอาซา บอ นา อาต เฆ ดูอี กืน, แตห อัน แบน ดา อี แยต เฆ, แตห ดูอี บอกาเฆลียด กอ ยึร. 20 แตห แม แตห ปวน แม ดี อัน, แตห เฆ ดูอี อีซาเรลัะ บอกาเฆลียด บอ โทม โฆรห อัน. 21 อัน ยี โลว บึง อาเลอาซา อี มูห ดา อี หลู ดี เฌาพรา. อาเลอาซา โลว จัร มาว อูรีม อี แตห อัน นับ ปี อึง เฌาพรา. ปาย ตี อาโยวซูอา บอ เฆ ดูอี อีซาเรลัะ โลว โทม โฆรห ปี จัร อาเลอาซา เฆ โบง. เซ อัน ต็อห, แตห เฆ เลห, เฆ โลว เลห. เซ อัน ต็อห, แตห เฆ ตัห ลึบ, เฆ บอ โลว ตัห ลึบ.”

22 อาโมวแซ บอ โบง โดบ ปี กาลาง เฌาพรา ตี ดี อัน. อัน บอ จัร อาโยวซูอา ตัห ฌัม นา อาต อาเลอาซา อี มูห ดา อี หลู ดี เฌาพรา บอ นา อาต เฆ ดูอี กืน. 23 อัน บอ ดาง แด อัน แดง ฆีณ อาโยวซูอา, แตห อึณ โดบ ปี ต็อห เฌาพรา ดี อัน. ปาย ตี อัน ดาง อาโยวซูอา แบน ดา อี แยต เฆ ดูอี อีซาเรลัะ, แตห อัน แบน อี วี ปลูะ อาโมวแซ.