1 วาย แฮะ ฮอต คัม เฆ ดูก ตาง ตึอน, เฌาพรา วี กาลาง ดี อาโมวแซ ฆาย ดา อี หลู ดี เฌาพรา อี จืร อาเลอาซา อี มูห ฆอน อาโรน ตึอน. อัน ต็อห, 2 “แตห บาย ดึห ฌาราง เฆ ดูอี อีซาเรลัะ ครึร เหมา ครึร อัน. แตห บาย แดม โตต จืร เฆ อาซาก อี แฮะ โนะ อา ฆึร ซีนัม โฮะ นา แดง, เฆ อี แฮะ ปึอน กาโฆห.” 3 อาโมวแซ ฆาย ดา อี หลู ดี เฌาพรา อี จืร อาเลอาซา บอ กาลาง ดี เฆ ดูอี กืน ดอ กอย เฆ แคง ฆลัง โมวอาบ อี กอย โคบ แบลง อึม ยอดาน, อี วี ลาย กาซืร ดี มืง เยรีโคว ตึอน. ฆาย ต็อห, 4 “เบ โลว ดึห โตต ฌาราง ดูอี อาซาก อี แฮะ โนะ อา ฆึร ซีนัม โฮะ นา แดง. เฌาพรา แฮะ กาลาง ดี อาโมวแซ ปาย ตี.”

อานี อึณ มูห ฌาราง เฆ ดูอี อีซาเรลัะ อี เลห แคง มืง แอฆึบ ตึอน.

5 แคง ครึร อารูเบน อี มูห ฆอน ฆีณ อาอีซาเรลัะ ตึอน, อึณ บอ มูห เฆ ดูอี อาฮาน, ดูอี อาพาลู,

6 ดูอี อาเฮฌาโรน บอ ดูอี อาคามี. ดูอี เฆ ตี เฆ มูห โตต ครึร อารูเบน.

7 เฆ บอกาเฆลียด กอย พวน หมึณ ดี โอย แหรณ ดี บู มาย็อห ดี โอย ฆึร วี.

8 ฆอน อาพาลู บอ มูห อาเอลีอาบ. 9 ฆอน อาเอลีอาบ บอ มูห อาเนมูลา, อาดาทาน บอ อาพีรัม. อาดาทาน ฆาย อาพีรัม ฆาย บอ มูห ดูอี ปี ร็อห เฆ ดูอี อีซาเรลัะ, แตห เฆ โบง กาบัห ดี อาโมวแซ ฆาย อาโรน ดอ โบง กาบัห ดูอี อาโควรา ดี เฌาพรา. 10 ดอ อัน ตี กาดาย บอ ดัห บอ หณอด เฆ, แตห เฆ ยัม โดบ พึง ดูอี อาโควรา ตึอน. บอ เงา แฮะ กาซึม ดูอี อา มาย็อห ดี พัน ฆึร วี. ลอง อัน ตี อึณ แบน อูพามา ดี ดูอี ดอน อี. 11 มาแล, หลูกหลาน อาโควรา ตี ยี ซี มึห.

12 แคง ครึร อาซีเมโอน, อึณ บอ มูห ดูอี อาเนมูลา, ดูอี อายามีน, ดูอี อายาคีน,

13 ดูอี อาเฌนรา บอ ดูอี อาซาอูน.

14 ดูอี เฆ ตี, เฆ บอกาเฆลียด กอย อา หมึณ ดี อา แหรณ ดี อา มาย็อห วี.

15 แคง ครึร อาฆัด, อึณ บอ มูห ดูอี อาเนพอนี, ดูอี อาฮาฆี, ดูอี อาซูนี,

16 ดูอี อาออจานีด, ดูอี อาเอรีด,

17 ดูอี อาโรวดี บอ ดูอี อาเรลี.

18 ดูอี เฆ ตี เฆ มูห หลูกหลาน อาฆัด. เฆ บอกาเฆลียด กอย พวน หมึณ ดี พัน มาย็อห วี.

19 แคง ครึร อายูดา อึณ มูห ฆอน อายูดา อา วี อี จืร อาเอรา ฆาย อาโอวนาน, ฆาย แฮะ ฮอต ยัม ดอ ซี กอย ฆาย แคง มืง กานัณ ตึอน.

20 แคง ครึร อายูดา เฆ อี ซี กอย, อึณ บอ มูห ดูอี อาเฌนรา, ดูอี อาเพเรด บอ ดูอี อาเซลา.

21 เฆ หลูกหลาน อาเพเรด บอ มูห อึณกรึห อาเฮฌาโรน ฆาย อึณกรึห อาฮามูลัะ.

22 ดูอี เฆ ตี อี มูห อาโมยว อายูดา, เฆ บอกาเฆลียด กอย บู หมึณ ดี เดา แหรณ ดี พัน มาย็อห วี.

23 แคง ครึร อาอีซาคา, อึณ บอ มูห ดูอี อาโทวลา, ดูอี อาพูวา,

24 ดูอี อายาโซบ บอ ดูอี อาซีมารูน.

25 ดูอี เฆ ตี อี มูห ครึร อาอีซาคา, เฆ บอกาเฆลียด กอย เดา หมึณ ดี พวน แหรณ ดี โอย มาย็อห วี.

26 แคง ครึร อาเฌบูโลน, อึณ บอ มูห ดูอี อาเซราตี, ดูอี อาเอโลน บอ ดูอี อายาเลน.

27 ดูอี เฆ ตี อี มูห ครึร อาเฌบูโลน เฆ บอกาเฆลียด กอย เดา หมึณ ดี พัน มาย็อห วี.

28 แคง ครึร อาโยว, อึณ บอ มึห ฆอน อีมาย อา วี อี จืร อามานาเซ ฆาย อาเอพารีม.

29 เฆ หลูกหลาน อามานาเซ ตี บอ มูห ดูอี อามาคีรา. อามาคีรา บอ มูห ฆูณ อาฆีเลอาด อี แฮะ วี แบน ฆูณ ดัง เฆ ดูอี อาฆีเลอาด.

30 อาฆีเลอาด บอ มูห ฆูณ ดัง เฆ ดูอี อาเยเจรี บอ ดูอี อาเฮเลก,

31 ดูอี อาซารีเอน, ดูอี อาเซเคม,

32 ดูอี อาซามีดา บอ ดูอี อาเฮพา.

33 ฆอน อีมาย อาเฮพา อี จืร อาจาลอพัด, อัน ตู มึห ฆอน อีมาย. อัน มึห มี ฆอน อีบึณ ดี ดีโลย. ฆอน อีบึณ อัน เฆ จืร นาง มาลา, นาง นออา, นาง ฮอกาลา, นาง แมก บอ นาง ดีราจา.

34 เฆ ดูอี ครึร อามานาเซ บอกาเฆลียด กอย พัน หมึณ ดี อา แหรณ ดี บู มาย็อห วี.

35 แคง ครึร อาเอพารีม อึณ มูห ดูอี อาซูเทลา, ดูอี อาเบคารา, ดูอี อาทาฮาน.

36 ฆอน อาซูเทลา บอ มูห อาเอราน.

37 ดูอี เฆ ตี อี มูห ครึร อาเอพารีม, เฆ บอกาเฆลียด กอย โอย หมึณ ดี อา แหรณ ดี พัน มาย็อห วี. เฆ ดูอี แคง ครึร ตี มูห โตต หลูกหลาน อาโยว.

38 แคง ครึร อาเบนยาม อึณ มูห ดูอี อาเบนลา, ดูอี อาจาเบน, ดูอี อาฮีรามี,

39 ดูอี อาซูพา บอ ดูอี อาฮูพามา.

40 เฆ อาเนมาน บอ มูห ดูอี อาราอัด ฆาย ดูอี อานามาน.

41 ดูอี เฆ ตี อี มูห ครึร อาเบนยาม, เฆ บอกาเฆลียด กอย พวน หมึณ ดี พัน แหรณ ดี เดา มาย็อห วี.

42 แคง ครึร อาดาน อึณ มูห ดูอี อาซูฮามี. 43 ดูอี เฆ ตี อี มูห อาโมยว อาซูฮามี, เฆ บอกาเฆลียด กอย เดา หมึณ ดี พวน แหรณ ดี พวน มาย็อห วี.

44 แคง ครึร อาเซน อึณ มูห ดูอี อาอีมานาฮา, ดูอี อาอีซาวี บอ ดูอี อาเบรียา.

45 เฆ หลูกหลาน อาเบรียา บอ มูห ดูอี อาเฮบา ฆาย ดูอี อามาลาคีลา.

46 อึณ ยี มูห อาเซน ตี, อัน บอ มึห ฆอน อีบึณ อู วี อี จืร นาง เซรา.

47 ดูอี เฆ ตี อี มูห ครึร อาเซน, เฆ บอกาเฆลียด กอย พัน หมึณ ดี โอย แหรณ ดี พวน มาย็อห วี.

48 แคง ครึร อานาบทาลี, อึณ บอ มูห ดูอี อายาเฌเอน, ดูอี อาฆูนี,

49 ดูอี อาเยเฌน บอ ดูอี อาซีเลม.

50 ดูอี เฆ ตี อี มูห ครึร อานาบทาลี, เฆ บอกาเฆลียด กอย พวน หมึณ ดี พัน แหรณ ดี พวน มาย็อห วี.

51 เฆ อีมาย ดูอี อีซาเรลัะ บอกาเฆลียด, เฆ กอย เดา แซน ดี อู แหรณ ดี บู มาย็อห ดี โอย ฆึร วี.

52 เฌาพรา วี ต็อห ดี อาโมวแซ, 53 “แม โลว กาย็อห กาดาย แคง มืง ตี, ดัว ดี ดูอี เฆ ตี, แตห อึณ โดบ เปรต โดบ กืน เฆ, แตห อึณ แบน คาฆูน เฆ เซเซ. 54-56 ดอ ดี กาย็อห แม กาดาย ดี เฆ ตี, แตห เฆ กาตาม. เซ อึณ บอ มูห พึง ดูอี กืน, แตห แม บอ กาย็อห กืน, ดัว ดี เฆ. เซ อึณ บอ มูห พึง ดูอี เปรต, แตห แม บอ กาย็อห เปรต, ดัว ดี เฆ. แคะ ปี ปึอน เฆ ดอน พึง, แม โลว แตห อึณ โดบ ครึร บรีม เฆ.”

57 แคง ครึร อาเลวี อึณ บอ มูห ดูอี อาเฆนราโซน, ดูอี อาโควฮาด บอ ดูอี อาเมนรารี.

58 แคง ครึร เฆ ตี, อึณ บอ มูห อึณกรึห อาลีบานี, อึณกรึห อาเฮโบรว, อึณกรึห อามาลี, อึณกรึห อามูซี, บอ อึณกรึห อาโควรา. อาโควฮาด บอ มูห ฆูณ อามารัม.

59 อามารัม ตี บอ คัด ดึห นาง โยวเคเบด อี มูห ฆอน ดูอี อาเลวี. อัน แฮะ ฆึอด แคง มืง แอฆึบ ตึอน. ฆอน นาง โยวเคเบด ตี บอ มูห อาโรน, อาโมวแซ บอ นาง มีรียัม อี มูห อีกัด อาโรน ฆาย อาโมวแซ.

60 อาโรน ปี วี มึห ฆอน พวน วี. อึณ บอ มูห อานาดาบ, อาบีฮู, อาเลอาซา บอ อาอีทามา.

61 อานาดาบ ฆาย อาบีฮู ยี แฮะ ยัม ดอ หลู ฆาย ดี เฌาพรา ปี ตู กาอาบ หลู ดอ กอย เฆ แคง แปร กาฮ็อห โคบ นอน ซีนาย ตึอน.

62 เฆ อีมาย อี มูห ดูอี อาเลวี แปะ แฮะ ฮอต ตีห, จูห ซีณ อาซาก อู มาเฆียน โฮะ นา แดง, เฆ กอย อา หมึณ ดี โอย แหรณ วี. ฌาราง เฆ ตี อาว ฮับ โดบ ฌาราง เฆ ดูอี อีซาเรลัะ. โคว, เฆ ตู ปึอน คาฆูน ปี ปึอน เฆ ดูอี อีซาเรลัะ.

63 แคะ กอย ฌาราง เฆ ดูอี บอกาเฆลียด ตี, อาโมวแซ ฆาย อาเลอาซา แฮะ แดม ดอ กอย เฆ ดูอี อีซาเรลัะ ดี ฆลัง โมวอาบ อี กอย โคบ แบลง อึม ยอดาน, อี ลาย กาซืร ดี มืง เยรีโคว. 64 คา อาต อาโมวแซ ฆาย อาโรน อี มูห ดา อี หลู ดี เฌาพรา, ฆาย แฮะ ดึอม แดม ฌาราง เฆ ดูอี อีซาเรลัะ ดอ กอย เฆ แคง แปร กาฮ็อห ดี นอน ซีนาย ตึอน. จืร เฆ ดูอี อี แฮะ แดม แคง ฌาราง พืน ตี, อาว ลึบ แคง ฌาราง กามาย นี คอ อู วี. 65 โคว, เฌาพรา แฮะ ดึอม ต็อห, “ดูอี เฆ ตี, เฆ ดี ยัม โตต แคง แปร กาฮ็อห.” อึณ ลอด มี อาฆาลีบ อี มูห ฆอน อาเยโพวนา บอ อาโยวซูอา อี มูห ฆอน อานูน ตึอน. แดง ตี, อู วี มืร อาว ฮู มึห.