1 ดอ กอย เฆ ดูอี อีซาเรลัะ ดี ฆลัง ซีดีม เฆ อีมาย บอ วี ฮาว ลาย ลูต ลาย ลาย ดี อีบึณ เฆ ดูอี โมวอาบ. 2 อีบึณ เฆ ตี บอ แดะ ดูอี เฆ ตี ฮาว กรึบ เฌา ปี กรึบ เฆ. ปาย ตี เฆ ดูอี อีซาเรลัะ แฮะ กืน บอ โฮม ยัง ปี หลู เฆ บอ กรึบ เฌา ปี กรึบ เฆ. 3 เฆ ดูอี อีซาเรลัะ อาบ โดว เฆ ดี เฌา บาลัะ อี กอย แคง มืง เบออรัะ. ปาย ตี เฌาพรา บอ รู กาเซา ดี เฆ ดูอี อีซาเรลัะ.

4 เฌาพรา วี ต็อห ดี อาโมวแซ, “เฆ อี มูห ดา ตาง อี แยต เฆ ดูอี อีซาเรลัะ ตึอน บอกาเฆลียด, แม โลว แตห เฆ ยัม, ปัก ฮอย เฆ, ราย เฆ ดี ซอดาด. เซ แม โบง ปาย ตี อึณ ดี แตห น็อห รู โอว ดี เฆ ดูอี อีซาเรลัะ แกร ดี วี เยน.”

5 แฮะ ฮอต, อาโมวแซ วี กาลาง ดี ดา ตาง อี ซูงพยาด อามู เฆ ดูอี อีซาเรลัะ. อัน ต็อห, “แคง ดูอี ปี อึบ เบ, เซ อึณ มึห ดูอี อี แฮะ ฮาว กรึบ เฌา บาลัะ อี กอย แคง มืง เบออรัะ, เบ โลว ง็อห ยัม ดอน อี.”

6 ดอ อัน ตี อึณ มึห ดูอี อีซาเรลัะ อู วี, อัน บอ ดึห ตัห อีบึณ อี มูห ดูอี อาโมยว มีดีอาน อู วี ตัห ลึบ แคง ทึบ อัน, แตห บอ อาโมวแซ บอ เฆ ดูอี กืน ยึร. เฆ บอกาเฆลียด ซีงยา กลึร, งยา ยาม นา อาต มาโลห ทึบ บีก บอด ตึอน. 7 อึณ บอ มูห อาพีเนฮาด อี มูห ฆอน อาเลอาซา บอ มูห หลาน อาโรน อี มูห ดา อี หลู ดี เฌาพรา ตึอน. อัน บอ ยึร ดูอี วี ตี แฮะ โบง ปาย ตี อัน บอ เลห นา เรต โดง กอย กาฌูะ เฆ ดูอี กืน 8 บอ ดึห บลา เลียห อัน, วี โดบ ดูอี ฆาย ตึอน, ลึบ แคง ทึบ โดง กอย ฆาย. อัน บอ บลูห วัต ฆาย, แตห อึณ กอ กาหลัน บอ อา วี. โกบ ปี โบง อัน ตี, อาเพ อาเร ปี โลว คัม เฆ ดูอี อีซาเรลัะ ตึอน, อึณ บอ วี เยน. 9 มาแล, ดูอี อี แฮะ ยัม ดี อาเพ อาเร ตี, เฆ บอกาเฆลียด แฮะ มูห อา หมึณ ดี พวน แหรณ วี.

10 เฌาพรา ปี วี ต็อห ดี อาโมวแซ, 11 “โกบ ปี โบง อาพีเนฮาด อี มูห ฆอน อาเลอาซา, โอว อาว ฮู บอ รู กาเซา ดี เฆ ดูอี อีซาเรลัะ. อัน แฮะ นับ, โอว ซี แตห เฆ ดูอี อีซาเรลัะ โรวเซ มี โอว. โคว อัน ตี, อัน แฮะ ออน ดี แวน โตต ดอน โมยว อี ตู โรวเซ มี โอว อู กาดัง. โกบ อึณ ปาย ตี โอว อาว ฮู รู ฮู จาว ดี เฆ. โอว อาว ฮู ปยาต แวน เฆ. 12 โคว, แตห แม กาลาง ดี อัน, โอว ดี ดัว กาดีก ซัดฌา ดี อัน, แตห อัน มึห น็อห เฆียด เยน. 13 กาดีก ซัดฌา ตี, โอว ดี คัม เซเซ, บอ โจว อัน บอ โจว หลูกหลาน อัน บอกาเฆลียด ดอน โจว ดอน บาน. เฆ ดี แบน ดา อี หลู ดี เฌาพรา เซเซ. โกบ ตู คัม อัน อี โบง กาบัห ดี โอว, อัน แฮะ โบง แตห ดูอี อีซาเรลัะ วี กาล็อะ ดี โอว.”

14 ดูอี อีซาเรลัะ อี แฮะ ยัม โกบ ดึห ตัห อัน อีบึณ ดูอี มีดีอาน ตึอน, อัน จืร อาฌีมารี. อัน มูห ฆอน อาซาลู อี มูห ดา ตาง อี แยต ครึร อาซีเมโอน. 15 อีบึณ มีดีอาน อี ยัม ตี, อัน จืร นาง กอจาพี. ฆูณ อัน จืร อาฌูรา อี มูห ดา ตาง แคง ดูอี อาโมยว มีดีอาน.

16 เฌาพรา ปี วี กาลาง ดี อาโมวแซ ปอ อึณ ปัว ต็อห, 17 “แตห แม มาด เฆ ดูอี มีดีอาน มูห รันซู แม. แตห แม กาโฆห ปยาต แวน เฆ. 18 โคว, เฆ แฮะ กาโลว เบ บอ ปีหล็อก ดี เบ, แตห เบ วี กาดึก กาด็อะ ดี เฌา บาลัะ อี กอย แคง มืง เบออรัะ. บอ นาง กอจาพี อี มูห ฆอน ดา ตาง เฆ แฮะ โบง นา ตู หมึอม ดี เบ ดอ คัม เบ อาเพ อาเร ตึอน.”