ปาย ตี อาบาลาอัม บอ นับ, เฌาพรา อึง แตห อัน ม็องการา ดัว ดี เฆ ดูอี อีซาเรลัะ, อัน มืร อาว ฮู ต็อห ดี เหรต อางยาน อี โบง มยัะหลัยะ ปี คา อาต. อัน บอ วี มางัห ยอด โลง แคง แปร กาฮ็อห. 2 อัน วี ยึร เฆ ดูอี อีซาเรลัะ แฮะ คยัะ โดง กอย เฆ แบน อึณแปรง แบน อึณแปรง, โดบ ครึร เหมา ครึร อัน. ดอ อัน ตี น็อห พึอม เฌาพรา บอ ตัห ปลึก อัน. 3 อัน บอ กาลาง โฆรห อางยาน ต็อห,

“โฆรห ปี กาลาง อาบาลาอัม อี มูห ฆอน อาปอซอ ตึอน, อึณ มูห โฆรห ดูอี อี แฮะ ปึอน ยึร ซีคยา.

4 อึณ มูห ดูอี อี แฮะ ยึร โฆรห เฌาพรา, อี แฮะ มูด ฆึบ, งาย อัน ยี บลาง. อัน มืร ยึร ซีคยา ปี บยัะ เฌาพรา อี อึบ โตต ดอน โมยว.

5 ทึบ เบ ดูอี อาโมยว อาโกบ แฮะ ดี ชีด กาเซา. โดง แฮะ คยัะ เบ ดูอี อีซาเรลัะ แฮะ หมึอม ยอด กาเซา.

6 เฆ กอย ปี ดีลัยะ อี แฮะ อึณบลัห ดาคึย. เฆ บอ ปี บอ กาปึม แปะ แฮะ ซัม แบน โมยว แบน โมยว อี กอย โคบ แบลง อึม. เฆ ปี เดา อาโลว แปะ แฮะ ซัม เฌาพรา. แฮะ ปี บอ เฮ อารีด อี ลัต โคบ แบลง โคบ โหนง.

7 เฆ ดี บอ มึห อึม อี ปึอน ฮูห ปึอน โหลว แคง ปูง เฆ. ปี ซัม เฆ ดอน โมยว ดี มึห อึม กืน, อึม ลึง. คูนดีคัม เฆ ดี บอ มึห ปวน หลึอม คูนดีคัม อากาด. อี เฮา ดี บอ อืบ มยูก มาน มืง เฆ.

8 เฌาพรา อี แยต เลห เฆ แคง มืง แอฆึบ ตึอน, อัน ดี จอย เฆ กาโฆห, แตห เฆ มึห แฮณ กืน ปี แฮณ มัก แปร. เฆ ดี บอ กาบัก กาอาง รันซู เฆ บอ ปยาต อัะ เฆ.

9 เฆ ดี ปี มาครังซี อี มึห โปลม ตาง. ดอ ปีเกห อีด อัน, อาว มึห อาเซ อี วี ยัะ บยีต อัน. อาเซ ม็องการา ดัว ดี เบ ดูอี อีซาเรลัะ, แตห อัน โบยว ดาคึย. อาเซ ยี ดืง ยี เอห เบ ดูอี อีซาเรลัะ, แตห อัน วี คัม โฆรห ดืง โฆรห เอห อัน ตี.”

10 อัน แฮะ ฮอต กาลาง โฆรห ตี, คูนดีคัม อาบาลาก บอ รู กาเซา ดี อาบาลาอัม. อัน บอ กาทัะ แด อัน บอ กาลาง ดี อาบาลาอัม ต็อห, “โอว แฮะ แดะ ตัห แม, ต็อห แตห แม ดืง รันซู โอว. แม บอ วี ม็องการา ดัว ดี เฆ กอ โนะ โอย เฌณ. 11 แตห แม วี เวณ ดี กาง แม ดอ ตี นี. โอว แฮะ กาแซณ ดี ดัว รูห อัน กืน ดี แม. มาแล, เฌาพรา แฮะ วี ดึห แวน, ตู แตห แม ปึอน.”

12 อาบาลาอัม วี ต็อห ดี อัน, “โอว แฮะ ฮอต กาลาง ดี เฆ ดาลาม ปี จัร แม, แตห เฆ ฮาว แดะ โอว. โอว แฮะ ฮอต ต็อห ดี แม. 13 ‘เซ คูนดีคัม ปี บอ ดัว ดี โอว รึอน เฆ ครีว กอ โนะ แคง โฮว อัน มืร, โอว ตู ปึอน หลึร โฆรห เฌาพรา.’ โอว ตู ปึอน โบง คอ อู โมยว โดบ น็อห โอว. อึณ ปี บอ มูห นา หมึอม ตู หมึอม, โอว โลว กาลาง มี ปี จัร เฌาพรา โอว กาลาง. 14 ดอ ตี นี โอว ดี วี เวณ โดง กอย ดูอี อาโมยว โอว. อาต ฮาว โอว, แตห โอว วี กาลาง ดี แม ลอง เฆ ดูอี อีซาเรลัะ, เฆ ดี โบง มาเซ ดี เฆ ดูอี อาโมยว แม นา อาต นี ฮาว.”

15 อาบาลาอัม บอ วี กาลาง โฆรห เฌาพรา. อัน ต็อห, “โฆรห ปี กาลาง อาบาลาอัม อี มูห ฆอน อาปอซอ นี, อึณ มูห โฆรห อี แฮะ ปึอน ยึร ซีคยา.

16 อึณ มูห โฆรห ดูอี อี แฮะ ยึร โฆรห เฌาพรา. อัน แฮะ ปึอน อางยาน แปะ แฮะ ดัว เฌาพรา อี อึบ โตต ดอน โมยว. อัน แฮะ มูด ฆึบ, งาย อัน ยี บลาง.

17 โอว แฮะ ยึร อัน. มาแล, อึณ หณัม มูห ดอ ตี นี. โอว แฮะ ยอด อัน, อึณ ยี หณัม หงึย ดี ฌัม. อึณ ดี มึห คูนดีคัม อี ปี ซีมัณ. อัน ดี ฆึอด แคง ดูอี อาโกบ. อัน ดี มึห ดูอี อี โฆ็ง บลา เลียห. อัน ดี ฆึอด แคง ครึร ดูอี อีซาเรลัะ. อัน ดี บอ มัห กาต็อห เฆ อามู อามาด อี อึบ มืง โมวอาบ. อัน ดี บอ มัห กาลาต ฆีณ เฆ ดูอี อี มูห หลูกหลาน อาเจด.

18 อัน ดี บอ กาโฆห แป รันซู อัน อี กอย แคง มืง เอโดม. มืง เซอี ดี บอ แบน มืง ปี อึบ อัน. เฆ ดูอี อีซาเรลัะ, เฆ ดี บอ มึห น็อห ยัะ กาเซา.

19 เฆ ดูอี อีซาเรลัะ ตี, เฆ ดี บอ แณต บอ ปยาต แวน เฆ ดูอี อี ซี ฆืด, ซี กอย แคง มาน มืง ตี.”

20 อาบาลาอัม แฮะ ฮอต กาลาง โฆรห ตี, อัน วี ยึร โฆรห เฌาพรา บอ ลอง ดูอี อามาเลก, อัน วี กาลาง โฆรห ตี ต็อห, “ดอ ตี นี เฆ ดูอี อามาเลก แฮะ แบน อี ตาง หลึอม อาโมยว ดูอี บอกาเฆลียด. มาแล, ดี กาแดะ อัน, เฆ ดี ลึร ชึม โตต ดอน อี.”

21 อัน แฮะ ฮอต กาลาง ปาย ตี อัน วี ยึร บอ ลอง ดูอี อาโมยว เคนีด. อัน วี กาลาง โฆรห ตี ต็อห, “โดง กอย เบ แฮะ มัน ซีคยา. โดง กอย เบ แฮะ ปี กาฮูน มาซีม อี กอย แดง มาว เฆ แดง ดาอาง.

22 มาแล, เบ ดูอี อาโมยว เคนีด, เบ ดี ลึร ชึม ปัน ดี ตัห เหมต คูนดีคัม อาซูรา ดี เบ, แตห เบ วี แบน หมาย อัน.”

23 อาบาลาอัม แฮะ ฮอต กาลาง โฆรห ตี, อัน ปี วี กาลาง โฆรห ปอ อึณ ปัว. อัน ต็อห, “อาลึร, เซ เฌาพรา ฮี โบง ปาย ตี อาว มึห อาเซ อี ปึอน กอย ฆัด เฆียด.

24 ดูอี อี ซี กาโฆห ดี มืง อี เฮา, เฆ ดี ป็อะ รึร ซังโพว, ตัห แคง มืง คีทีม. เฆ ดี บอ กาโฆห แป มืง อาซูรา บอ มืง เอบา. มาแล, บอ เฆ ดี วี ลึร ชึม โตต บอกาเฆลียด.”

25 อาบาลาอัม แฮะ ฮอต กาลาง ปาย ตี อัน บอ วี เวณ ดี กาง อัน. บอ คูนดีคัม อาบาลาก บอ เวณ โดง กอย บรีม อัน.