1 เฌาพรา วี ต็อห ดี อาโมวแซ, 2 “แตห แม กาลาง ดี เฆ ดูอี อีซาเรลัะ ลอง หลู ปี ดี โฮม อี โดะ ดี เงา, แตห อูห หงูน อัน บอ ล็อะ น็อห โอว, แตห เฆ บอ หลู โดบ อาคราว อัน. 3 อาดา ปี ดี โลว หลู อี โดะ ดี เงา, แตห เบ ดึห ฆอน มาบู, อาซาก อี โนะ อู ซีนัม, อี ตู มึห โดง เช โดง แน. แตห เบ หลู อู ซีแง อา โดว. แตห เบ หลู ปาย ตี ดอน ซีแง, แกวะ แตห อึณ มึห ดอ กาดัด. 4 มาบู อาดา อู โดว, แตห เบ หลู เจว หณา. อาดา ปอ อู โดว, แตห เบ หลู บา ดี อับ. 5 ดอน เฌณ เบ ปี วี โลว ดึห บอ กาแปะ เคาคยูง อี แฮะ กามอต ซีคยา อาดา อู โอวมา อี มูห อู แบล ดี อู ควาก, วี กาวัร กาซู นามัน อี ซีคยา อาดา อู กาเปา, แตห อึณ แบน ปี ดี หลู ดีฆาว. 6 ปาย ตี เบ โลว หลู อี โดะ ดี เงา ดอน ซีแง ดอน ซีแง. อึณ มูห แปะ แฮะ ดัม อูน โอว เฌาพรา ดอ กอย เบ ดี นอน ซีนาย ตึอน. อูห หงูน อัน ตี ดี บอ ล็อะ น็อห โอว. 7 ปี หลู ปี ดี เดียง, อึณ บอ มูห อึม มางูน อาดา อู กาเปา อี แฮะ ฮอต มอง แบน ป็อห. เบ โลว หลู อาตี โดบ ฆอน มาบู อาดา ดอน โดว. เบ โลว ดึห อึม มางูน ตี, ฮูห ดี โดง ซีงา บอด ดี ทึบ บีก บอด. 8 ฮี ฌัม บา ดี อับ, แตห เบ วี หลู ฆอน มาบู อาดา ปอ อู โดว ตึอน, แตห อึณ ปี แปะ แฮะ หลู เบ เจว หณา อี แฮะ ฮับ บอ ปี หลู ดีฆาว บอ ปี หลู ปี ดี เดียง. อึณ บอ มูห ปี ดี หลู อี โดะ ดี เงา. อูห หงูน อัน ดี บอ ล็อะ น็อห โอว อี มูห เฌาพรา. 9 ฮี ฌัม ซีแง ดีเหลา, เบ โลว ดึห ฆอน มาบู อาโล็ง อา โดว, อาซาก อี แฮะ โนะ อู ซีนัม, อี ตู มึห โดง เช โดง แน. เบ บอ โลว หลู บอ กาแปะ อี แฮะ กามอต ซีคยา อาดา อา โอวมา อี มูห โอย แบล, อี แฮะ ฮอต กาวัร กาซู นามัน. 10 อึณ บอ มูห ปี ดี หลู อี โดะ ดี เงา ดอ ฌัม ซีแง ดีเหลา. เบ โลว หลู อา โดว ตี แดง ปี ดี หลู เบ ดอน ซีแง อี มูห ปี ดี หลู อี โดะ ดี เงา บอ ปี หลู ปี ดี เดียง.

11 ดอน มาเฆียน ดอ มูห ซีแง เหลห, เบ โลว วี หลู ปี ดี หลู อี โดะ ดี เงา. เบ โลว ดึห มัก อาโล็ง อี ซี หนึม อา โดว, มาบู อาโล็ง อู โดว บอ ฆอน มาบู อาโล็ง อี แฮะ โนะ อู ซีนัม อาดา บู โดว, หลู ดี โอว. เบ โลว ยอด, แกวะ แตห อึณ มึห โดง เช โดง แน. 12 อี มูห ปี ดี หลู ดีฆาว ตึอน, เบ โลว ดึห กาแปะ เคาคยูง อี แฮะ กาวัร กาซู นามัน อาดา โอย โอวมา อี มูห พวน แบล ดี อู ควาก. เบ โลว หลู ฌึร ตี โดบ มามัก อู โดว. อาดา มาบู อาโล็ง อู โดว, เบ โลว ดึห กาแปะ อู โอวมา. 13 อี มูห ฆอน มาบู เฆ ตึอน, เบ โลว ดึห กาแปะ อู โอวมา อี มูห อู แบล ดี อู ควาก อาดา ดอน โดว. แคง กาแปะ ตี เบ โลว กาวัร บอ นามัน, แตห อึณ แบน โตต ปี ดี หลู อี โดะ ดี เงา, แตห อูห หงูน อัน บอ ล็อะ น็อห โอว. 14 อาดา ปี หลู ปี ดี เดียง, เบ โลว ดึห อึม มางูน อา กาเปา อาดา มัก อาโล็ง อู โดว บอ อึม มางูน อู กาเปา ดี อู กาแต อาดา มาบู อาโล็ง อู โดว บอ อึม มางูน อู กาเปา อาดา ฆอน มาบู ดอน โดว. อานี อึณ มูห ปี โลว หลู เบ อี โดะ ดี เงา ดอ ฌัม มาเฆียน กามาย, ซีแง เหลห. เบ โลว หลู ปาย ตี ดอน มาเฆียน, แตห อึณ กอ หลูห ซีนัม. 15 แดง ปี หลู อี โดะ ดี เงา บอ ปี หลู ปี ดี เดียง ตี, เบ โลว หลู บอ ปี ดี หลู อี ฆ็อห แวน หมาบ. เบ โลว วี ดึห มาแป อาโล็ง อู โดว วี หลู, แตห อึณ ฆ็อห แวน หมาบ เบ.

16 ฮี ฌัม มาเฆียน เหลห, ซีแง ฆึร ดี อึณพวน, อึณ มูห ซีแง โลว โบง เบ บลอย โหลห เบ เฌาพรา ดอ กาโลห อัน กาง เบ. 17 ฮี ฌัม ซีแง ฆึร ดี อึณพัน, อึณ มูห ซีแง ดอ จูห บลอย ปอ อู โมยว. บลอย ตี, เบ โลว โฮม คามูน อี ตู ฮับ ซีนัม บรัห อาดา บู ซีแง. 18 ซีแง กาจูห เบ ดี โบง บลอย ตี, เบ โลว ตัห กาฌูะ, กรึบ เฌาพรา. ซีแง ตี อาว ปึอน โบง ฆาน มาเซ. 19 เบ โลว หลู อี โดะ ดี เงา ดี เฌาพรา. อึณ บอ มูห มัก อาโล็ง อี ซี หนึม อา โดว, มาบู อาโล็ง อู โดว บอ ฆอน มาบู อาโล็ง อี แฮะ โนะ อู ซีนัม, อี ตู มึห โดง เช โดง แน อาดา บู โดว. 20 อี มูห ปี ดี หลู ดีฆาว ตึอน, เบ โลว ดึห กาแปะ เคาคยูง โอย โอวมา อี มูห พวน แบล ดี อู ควาก อาดา มัก อู โดว. เบ โลว กาวัร กาซู บอ นามัน 21 อาดา มาบู อาโล็ง ตึอน, เบ โลว ฮับ กาแปะ อา โอวมา อี มูห โอย แบล. อาดา ฆอน มาบู เฆ ตึอน, เบ โลว ฮับ อู โดว กาแปะ อู โอวมา อี มูห อู แบล ดี อู ควาก. เบ โลว โบง ปาย ตี อาดา ดอน โดว. 22 เบ ปี วี โลว ดึห บอ มาแป อาโล็ง อู โดว, หลู, แตห อึณ แบน ปี ดี หลู อี ฆ็อห แวน หมาบ, แตห เฆ ดูอี กืน วี กาล็อะ ดี เฌาพรา. 23 เบ โลว หลู ฌึร ตี ดอน โมยว แดง ปี ดี หลู เบ อี โดะ ดี เงา ดอน ซีแง ตึอน. 24 ปาย ตี อึณ แบน ปี หลู อี ปี ปี ดี โฮม โอว. อาดา บู ซีแง เบ โลว หลู ปาย ตี แตห อูห หงูน อัน บอ ล็อะ น็อห โอว. เบ โลว หลู ฌึร ตี แดง ปี ดี หลู เบ ดอน ซีแง อี มูห ปี หลู อี โดะ ดี เงา บอ ปี หลู ปี ดี เดียง ตึอน. 25 ดอ แฮะ โนะ บู ซีแง ตึอน, เบ โลว ตัห กาฌูะ, กรึบ เฌาพรา. อาว ปึอน โบง ฆาน มาเซ ซีแง ตี.

26 เซ อึณ ฌัม ซีแง โบง เบ บลอย โซะ โหงว, ดอ หลู เบ โหงว ปี โซะ เบ ดี อาต, เบ โลว ตัห กาฌูะ, กรึบ เฌาพรา. อาว ปึอน โบง ฆาน มาเซ ซีแง ตี. 27 แตห เบ หลู ปี ดี หลู อี โดะ ดี เงา, แตห อูห หงูน อัน ล็อะ น็อห เฌาพรา. เบ โลว หลู บอ มัก อาโล็ง อา โดว, มาบู อาโล็ง อู โดว, ฆอน มาบู อาโล็ง บู โดว อี แฮะ โนะ อู ซีนัม. 28 อึณ ยี มูห ปี หลู ดีฆาว อี โดบ ปี ดี หลู อี โดะ ดี เงา. อาดา มัก อาโล็ง อู โดว, เบ โลว ดึห กาแปะ เคาคยูง โอย โอวมา อี มูห พวน แบล ดี อู ควาก. อาดา ฆอน มาบู อู โดว ตึอน, เบ โลว ดึห กาแปะ อา โอวมา อี มูห โอย แบล. เบ โลว กาวัร บอ นามัน. 29 อาดา ฆอน มาบู บู โดว ตึอน, เบ โลว ดึห อู โดว อู โอวมา อี มูห อู แบล ดี อู ควาก. ดอน โดว เบ โลว โบง ปาย ตี. 30 แดง ตี เบ ปี วี โลว ดึห บอ มาแป อาโล็ง อู โดว. เบ โลว หลู โดว ตี, แตห อึณ แบน ปี ดี หลู อี ฆ็อห แวน หมาบ, แตห เฆ ดูอี กืน วี กาล็อะ ดี เฌาพรา. 31 เบ โลว ดึห ปี ดี หลู เฆ ตี บอ ฮับ ปี หลู ปี ดี เดียง ตึอน, วี หลู แดง ปี หลู อี โดะ ดี เงา บอ แดง ปี หลู ดีฆาว อี มูห ปี โลว หลู เบ เซเซ ดอน ซีแง. โดว ปี หลู เบ ตี ดอน โดว, เบ โลว ซาดีก, แกวะ แตห อึณ มึห โดง เช โดง แน.