1 เฌาพรา วี กาลาง ดี อาโรน ต็อห, “เซ อึณ มึห วี อี โบง กาลึบ แคง ทึบ บีก บอด, บอ แม บอ ฆอน อีมาย แม ดอน อี บอ เฆ ดูอี อาโมยว อาเลวี ตึอน โลว คัม หมาบ ตี. เซ อึณ ยี มูห ดา อี หลู ดี เฌาพรา อี โบง กาลึบ ฆาน เฆ, อึณ บอ มูห แม เฆ ฆอน แม, เบ โลว คัม หมาบ ตี. 2 แตห แม แดะ บีนอง แม อี มูห อาโมยว อาเลวี เฆ ตึอน, แตห เฆ โบง รึม ฆาน โดบ แม, แตห เฆ จอย แม ดอ โบง เบ ฆอน แม ฆาน ดี อาต ทึบ บีก บอด ตึอน. 3 ดูอี เฆ ตี, เฆ โลว โบง ปี จัร เบ, บอ ยอด ลึมลา โตต ดอน โมยว แคง ทึบ บีก บอด. มาแล, แกวะ แตห เฆ ตัห เครียะ ครึง ตา อี ซีงา บอด บอ กาโช็ง หลู ดอ เหมา, แกวะ แตห เบ โลว ยัม. 4 เฆ โลว โบง รึม ฆาน โดบ เบ, โลว ยอด ลึมลา มี ฆาน อี กอย แคง ทึบ บีก บอด. เฆ อี เฮา อี ตู กาอาบ โบง ฆาน แม, แกวะ แตห เฆ ตัห เครียะ เบ.

5 อึณ มึห มี แม บอ ฆอน แม อี ปึอน ยอด ลึมลา โดง ซีงา บอด, ยอด ลึมลา กาโช็ง หลู. เซ อึณ ปาย ตี วาย นี, โอว อาว ฮู โลว รู ดี เฆ ดูอี อีซาเรลัะ. 6 โอว มูห ดา กาณา อี แฮะ ร็อห เฆ ดูอี อาโมยว อาเลวี, แตห เฆ กาย็อห ดี ดูอี อีซาเรลัะ. โอว แฮะ อาบ เฆ ดี แม. แตห เบ ปึอน ดี โบง ฆาน แคง ทึบ บีก บอด. อึณ ปี เฆ ดูอี อาโมยว อาเลวี แฮะ แบน คาฆูน ปี ดัว โอว ดี แม. 7 มาแล, อึณ มึห มี แม บอ ฆอน แม อี ปึอน แบน ดา อี หลู ดี เฌาพรา, ปึอน โบง ฆาน ดี กาโช็ง หลู บอ ดี โดง ซีงา บอด หลึอม โตต ตึอน. ฌึร ตี มูห เบ อี โลว ยอด ลึมลา. โคว, โอว แฮะ เฆฌู เบ, แตห เบ ปึอน ดี แบน ดา อี หลู ดี เฌาพรา. เซ อึณ ยี มึห อี เฮา, อี ตู กาอาบ ตัห, เซ อัน ตัห เครียะ ครึง ตา อี ซีงา บอด ตี, อัน โลว ยัม อาคัร หมาน.”

8 เฌาพรา ปี วี กาลาง ดี อาโรน ต็อห, “โอว แฮะ ดึห ดัว ดี แม โกรว อี ซีงา บอด อี มูห ปี หลู ปี ดาง เฆ ดูอี อีซาเรลัะ ดี เฌาพรา. โอว แฮะ ดัว ดี แม บอ อี ซีงา บอด แบน โมยว แบน โมยว อี มูห ปี หลู เฆ, แตห อึณ วี แบน โกรว แม บอ โกรว เฆ หลูกหลาน แม เซเซ. 9 แคะ กอย โกรว ปี หลู อี แดง กาโช็ง หลู ปี ตู โดะ ดี เงา, อึณ แบน โกรว แม. อึณ บอ มูห ปี หลู ดีฆาว แบน โมยว แบน โมยว, ปี หลู อี ฆ็อห แวน หมาบ บอ ปี หลู อี แตห ดูอี วี กาล็อะ ดี เฌาพรา, อี แฮะ ซีงา บอด, ปี วาก เลห เฆ ดี ปี หลู เฆ ตี, แฮะ วี แบน โกรว แม บอ โกรว เฆ ฆอน อีมาย แม. 10 เบ อีมาย ดอน อี โลว โฮม ดี โดง ซีงา บอด. เบ โลว มาด อึณ มูห อี ซีงา บอด กาเซา.

11 บอ ปี วาก เลห เบ ดี ปี หลู เฆ ดูอี อีซาเรลัะ, อี มูห ปี หลู อี มาวัด วีว มาวัด เวณ, โอว แฮะ วี ดัว ดี แม, แตห บอ แม บอ ฆอน อีบึณ เฆ ฆอน อีมาย แม ดอน อี ปึอน ดี โฮม. ดูอี แคง อึณโฮม แม อี ซีงา บอด โดบ ปี ดัม ดารา แฮะ ปึอน โฮม ดอน อี.

12 บอ นามัน เฆ อึม มางูน อี แฮะ หมึอม หลึอม โตต บอ กาแปะ เคาคยูง ปี โซะ เฆ ดี อาต, อี แฮะ หมึอม หลึอม โตต, อี มูห ปี หลู เฆ ดี โอว อู ซีนัม อู เฌณ, โอว แฮะ อาบ ดัว โตต ดี แม. 13 แคะ กอย เบล ดอน โมยว อี มูห เบล ดัง ปี ตัห หลู เฆ ดี เฌาพรา, โอว แฮะ อาบ ดัว ดี แม. ดูอี แคง อึณโฮม แม อี ซีงา บอด โดบ ปี ดัม ดารา แฮะ ปึอน โฮม ดอน อี.

14 บอ ปี ดืง ปี กาแซณ เฆ ดูอี อีซาเรลัะ ดี หลู ดี โอว, อึณ แฮะ แบน โตต โกรว แม. 15 แคะ กอย ฆอน ฆีณ, บอ มูห ฆอน ดูอี บอ มูห ฆอน โดว ซัดดาวา, แคะ ปี หลู เฆ ดี โอว แฮะ แบน โตต โกรว แม. มาแล, เซ อึณ มูห ฆอน ดูอี บอ ฆอน โดว ซัดดาวา โดว อี ตู ซีงา, แม โลว วี ทูด วีว เฆ ดี แม. 16 อี มูห ฆอน ฆีณ ดูอี, เซ แฮะ โนะ อู มาเฆียน, เบ กอ ปึอน วี ทูด วีว. เบ โลว ทูด ตา รึอน พัน เซเคน อี มูห มอก โอย กยาบ. เบ โลว ซัะ ตา เบล ซัะ อี กอย แคง ทึบ บีก บอด.

17 มาแล, อี มูห ฆอน ฆีณ มามัก, มาบู เฆ มาแป อี มูห โดว อาโล็ง ดอน โดว, เบ ตู ปึอน วี ทูด วีว. อึณ แฮะ แบน มี โกรว โอว. แม โลว โบง แตห อึณ แบน ปี ดี หลู, โลว ดึห หนาม อัน, คร็อห ดี กาโช็ง หลู. อี มูห เบรียง อัน, โลว โดะ แคง เงา, แตห อึณ แบน ปี หลู อี โดะ ดี เงา, แตห อึณ บอ อูห หงูน ดี อาต เฌาพรา. 18 อี มูห ยัง อัน, อึณ แบน โกรว แม. อึณ บอ ปี โดว ปี ดี หลู อี มาวัด วีว มาวัด เวณ ตึอน. ยัง ดี บังน็อห โดว ตี บอ ฆึม ปัน อัน บลาก อาอัห แฮะ แบน โกรว แม. 19 โกรว แปะ แฮะ วาก เลห โอว ดี ปี หลู เฆ ดี โอว บอกาเฆลียด, อี แฮะ ซีงา บอด ตึอน, โอว แฮะ วี อาบ ดัว ดี แม, แตห อึณ แบน โกรว แม บอ โกรว ฆอน อีบึณ เฆ ฆอน อีมาย แม เซเซ. อึณ มูห กาดีก ซัดฌา ปี ดัว โอว ดี แม บอ ดี เฆ หลูกหลาน แม. โอว ดี บอ โหลห กาดีก ซัดฌา ตี เซเซ, แกวะ แตห อึณ ลึร ดอ เหมา.”

20 เฌาพรา ปี วี ต็อห ดี อาโรน, “แม ตู ปึอน กาดาย อี ดี แบน คาฆูน ดี แม. แม มืร ตู ปึอน ดี บึง คอ อู โปละ. อึณ มูห มี โอว เฌาพรา อี แบน โดง ดี บึง แม.”

21 “โกรวกราม ปี หลู เฆ ดูอี อีซาเรลัะ ดี โอว อี มูห ฆึร บูน อู บูน ตึอน, โอว แฮะ วี ดัว ดี เฆ ดูอี ครึร อาเลวี โกบ ลึมลา โตต เฆ ดอน โมยว แคง ทึบ บีก บอด. 22 ปาย ตี ซีณ ดอ ตี นี ฮาว, เฆ ดูอี อีซาเรลัะ อาว ฮู ปึอน ตัห กาตัด ทึบ บีก บอด. อึณ ดี แบน หมาบ ดี เฆ อี แตห เฆ โลว ยัม. 23 มี เฆ ดูอี อาโมยว อาเลวี ปึอน ดี ลึมลา ทึบ บีก บอด, ปึอน ดี โบง ฆาน นา แคง. ปาย ตี เซ อี กาลึบ, บอ มูห โมยว เหมา อาว ต็อห, อึณ แบน หมาบ ดี เฆ. แตห เบ โบง ปาย ตี แตห อึณ กอ ฌัม โจว หลูกหลาน เบ ดอน โจว ดอน บาน. เฆ ดูอี อาโมยว อาเลวี ตู ปึอน คาฆูน ปี ดัว เฌาพรา ดี เฆ ดูอี อีซาเรลัะ. 24 โอว ยี ดึห ปี หลู เฆ ดูอี อีซาเรลัะ ฆึร บูน อู บูน อี มูห ปี หลู ปี ดาง เฆ ดี เฌาพรา, วี ดัว ดี เฆ. โคว อัน ตี โอว ต็อห, เฆ ตู ปึอน คาฆูน แคะ ปี ปึอน เฆ ดูอี อีซาเรลัะ.”

25 เฌาพรา ปี วี จัร อาโมวแซ, แตห อัน กาลาง ดี เฆ ดูอี อาโมยว อาเลวี ต็อห, 26 “เซ เบ แฮะ ปึอน ฆึร บูน อู บูน ปี หลู เฆ ดูอี อีซาเรลัะ, เบ ปี วี โลว หลู ฆึร บูน อู บูน แคง ปี หลู ตี, แตห อึณ แบน ปี หลู อี มาวัด วีว มาวัด เวณ ดี เฌาพรา. 27 ปี หลู เบ ตี, เบ โลว มาด แตห อึณ ปี ปี หลู เฆ ดูอี อี รัณ มาน เฆ โดง นา, อี หลู โหงว กามาย เฆ อึม มางูน. 28 ปาย ตี บอ เบ โลว วี ดึห ฆึร บูน อู บูน แคง แปะ แฮะ ปึอน เบ ดี เฆ ดูอี อีซาเรลัะ ตี, วี หลู ดี เฌาพรา, แตห อึณ แบน ปี หลู อี ดาง ดี อัน. ปี หลู ตี, เบ โลว วี ดัว ดี อาโรน อี มูห ดา อี หลู ดี เฌาพรา. 29 แปะ แฮะ ปึอน เบ ตี, เบ โลว ดึห อี หมึอม หลึอม โตต, วี ดัว ดี เฌาพรา.

30 เซ เบ แฮะ ฮอต หลู อี หมึอม หลึอม โตต ตี, เฌาพรา ดี มาด อึณ ปี ดีฆาว แปะ แฮะ มัห เบ ดี โอ็ง กางน็อห บอ อึม มางูน แปะ แฮะ เนียะ เบ. 31 อี ซี ฆืด ตึอน บอ เบ บอ ดูอี แคง อึณโฮม เบ แฮะ ปึอน โฮม ดอน อี ดี โดง กอย เบ ดอน โปละ. อึณ บอ มูห รูห โกบ โบง เบ ฆาน แคง ทึบ บีก บอด. 32 เซ เบ แฮะ ฮอต หลู ดี เฌาพรา อี แฮะ หมึอม หลึอม โตต ตี, แคะ ปี โฮม เบ ตี, อาว ฮู แบน หมาบ ดี เบ. มาแล, เบ โลว ซาดีก, แกวะ แตห เบ โบง มาเซ อี ตู รีมาด ปี หลู เฆ ดูอี อีซาเรลัะ ตี, โยว เบ กาดูห ดี ยัม.”