คาน 17
ลอง อึณกรวน อาโรน
1 เฌาพรา ปี วี กาลาง ดี อาโมวแซ ปอ อึณปัว ต็อห,
2 “แม กาลาง ดี เฆ ดูอี อีซาเรลัะ, แตห เฆ โบง อึณกรวน ฆึร ดี อา ณ็อง, แตห เฆ อี มูห ดา ตาง อี แยต ครึร เฆ ปึอน อู วี อู ณ็อง. แตห แม แดม ดึก จืร เฆ ดี อึณกรวน ตี, วี เหมา วี อัน. 3 จืร อาโรน แตห แม แดม ดึก ดี อึณกรวน ดา ตาง อี แยต ครึร ดูอี อาเลวี. โคว, ดา ตาง อี แยต ดอน ครึร โลว มึห อึณกรวน วี เหมา วี อัน. 4 แฮะ ฮอต, แม โลว วี ดึห อึณกรวน เฆ ตี, ฮาว อูน แคง ทึบ บีก บอด นา อาต ฌีดืก โดง กาตูณ โอว ดี แม ตึอน. 5 อี มูห อึณกรวน วี ปี ร็อห โอว, อึณ ดี วี มึห อึณโลห. เซ เฆ ดูอี กืน ยึร ลอง อัน ตี, อึณ ดี แตห ปี ปึณ ปี เอห เฆ บอ แปะ แฮะ โบง กาบัห เฆ ดี แม วี เยน.”
6 ปาย ตี อาโมวแซ บอ กาลาง ดี เฆ ดา ตาง อี แยต ครึร เหมา ครึร อัน. เฆ บอ ดึห ตัห อึณกรวน เฆ, อู วี อู ณ็อง อู ณ็อง. อึณกรวน เฆ ดา ตาง บอกาเฆลียด เฆ กอย ฆึร ดี อา ณ็อง. แฮะ บา บอ อึณกรวน อาโรน ตึอน. 7 อาโมวแซ บอ ดึห อึณกรวน เฆ ตี, วี ฮาว อูน แคง ทึบ บีก บอด นา อาต ฌีดืก เฌาพรา.
8 ปา แคหณา อาโมวแซ บอ วี ฮาว ลึบ แคง ทึบ บีก บอด ตึอน. อัน บอ ยึร อึณกรวน อาโรน อี แฮะ กาดาง ครึร เฆ ดูอี อาเลวี ตึอน, อึณ แฮะ วี มึห อึณโลห, มึห บอ โบห ดึม บอ โบห บรัห. แฮะ วี มึห บอ เบล ซาแดด มัง กาล็อะ อี แฮะ ซีน. 9 อาโมวแซ บอ วี ดึห อึณกรวน เฆ อี กอย ดี อาต เฌาพรา ตี, วี บยัะ ดี เฆ ดูอี อีซาเรลัะ, แตห เฆ ยึร. แฮะ ฮอต, เฆ บอ วี ดึห อึณกรวน เฆ, ราง อาเซ ราง อัน.
10 เฌาพรา ปี วี ดัม อาโมวแซ ต็อห, “แตห แม วี ดึห อูน อึณกรวน อาโรน ตี นา อาต ฌีดืก เฌาพรา, แตห เฆ ดูอี อีซาเรลัะ, เฆ อี ออน ดี ปีรู เฆ ดี โอว ปึอน ดี ยึร เซเซ. อึณ ดี แตห เฆ จู ปึณ, จู เอห, แกวะ แตห เฆ โลว ยัม.” 11 อาโมวแซ บอ โบง โดบ ปี กาลาง เฌาพรา ตี ดี อัน.