1 วาย อัน ตี อึณ มึห อาโควรา อี มูห ฆอน อาอีฌาฮา อี มูห ฆอน อาโควฮาด แคง ครึร อาเลวี. อึณ บอ มึห บอ ดูอี อารูเบน โอย วี อี จืร อาดาทาน บอ อาพีรัม อี มูห ฆอน อาเอลีอาบ บอ อาโอน อี มูห ฆอน อาเบเลด. เฆ วี แคณ, วี กาบัห ดี อาโมวแซ. 2 เฆ บอ แดะ ดูอี อีซาเรลัะ อี มูห ดา ตาง แปะ แฮะ ดาง เฆ แตห ดา ดาง เฆ ตี แบน ดา อี อึบ อี แยต เฆ. เฆ กอย อา มาย็อห ดี พัน ฆึร วี. 3 เฆ บอ ฮาว โดง กอย อาโมวแซ ฆาย อาโรน, กาลาง ดี ฆาย ต็อห, “ปี โบง บาย, อึณ แฮะ ปวน แฮะ หลึอม แคะ กาอาบ โบง. ดูอี เฆ นี, เฆ ดอน อี บอ มูห ดูอี ปี อึบ เฌาพรา. เฌาพรา มืร กอย รึม โดบ เฆ บอกาเฆลียด. แม อาโมวแซ, เหมา อึณ ปาย ปี วี ปีคึก ปีพูง แม โดว บรีม แม แดง ดูอี ปี อึบ เฌาพรา เฆ นี?”

4 อาโมวแซ แฮะ ยึร โฆรห เฆ ตี, อัน บอ วี มูด ฆึบ ดี กาดาย อู เฌณ. 5 อัน บอ วี กาลาง ดี อาโควรา บอ ดี ดูอี เฆ ตึอน ต็อห, “แคหณา ซีณวัห, เฌาพรา ดี บยัะ แตห เอ ยึร, อาเซ แฮะ มูห ดูอี ปี จัร เฌาพรา, อาเซ แฮะ ซีงา บอด, อาเซ ปึอน ตัห กอย ดี อาต เฌาพรา. วี ปี ร็อห เฌาพรา, เฌาพรา ดี แตห อัน ตัห กอย กาเครียะ ดี อัน. 6-7 แคหณา บอ แม บอ เฆ ดูอี อี โดบ แม, แตห เบ ดึห อึบ แปะ แฮะ ฮับ เบ อึณกึร เงา, วี ดึห บอ ซีนัม อูห หงูน, วี ฮับ นา แดง. แฮะ ฮอต, เฌาพรา ดี บยัะ อาเซ มูห ดูอี ปี ร็อห อัน. เบ อี มูห ดูอี อาโมยว อาเลวี นี, ปี โบง เบ คา นี แฮะ ปวน, แฮะ หลึอม แคะ ปี กาอาบ โบง.”

8 อาโมวแซ ปี วี กาลาง ดี อาโควรา ปอ อึณ ปัว ต็อห, “เบ อี มูห ดูอี อาโมยว อาเลวี, แตห เบ โทม. 9 เบ ตู นับ ลอง แปะ แฮะ ร็อห เฌาพรา ดี เบ แคง พึง ดูอี อีซาเรลัะ ตึอน อี อาเร ตาง กาเซา. อัน เฌา แฮะ แตห เบ ปึอน ดี กอย กาตัด อัน, แฮะ อาบ แตห เบ โบง ฆาน อัน แคง ทึบ บีก บอด กาดาง เฆ ดูอี กืน. 10 เฌาพรา แฮะ อาบ บอ แม บอ บีนอง แม อี มูห ดูอี อาเลวี, แตห เบ มึห ซาเร. มาแล, อึณ ปี เบ ซี วี พาด บอ ปวน ดา อี หลู ดี เฌาพรา. 11 ลอง ปี ปึณ ปี กาลาง เบ นา ตู หมึอม ดี อาโรน ตี, อึณ ปี บอ แม บอ พึง แม, เบ กาบัห ดี เฌาพรา.”

12-13 อาโมวแซ วี จัร อี เฮา ฮาว แดะ อาดาทาน บอ อาพีรัม อี มูห ฆอน อาเอลีอาบ ตึอน. มาแล, ฆาย วี ต็อห, “ยาย ตู ตัห. แม แฮะ แยต เลห เย แคง มืง แอฆึบ อี มูห มืง บอด มืง หมึอม, แฮะ แตห เย วี ตัห ยัม แคง แปร กาฮ็อห นี. แคะ ปี โบง แม ตี, อึณ หณัม เบระ ดี น็อห แม. แม ซี วี แบน บอ ดา ตาง อี อึบ เย เซเซ. 14 แดง ตี, แม แฮะ ต็อห ดี แยต ฮาว เย ดี มืง บอด, มืง หมึอม. แม ยี ตู แยต แตห เย ฮาว. โดง นา เฆ มาน มางูน มืร, แม ตู กาซาง ดัว ดี เย. ดอ ตี นี อึณ ปี แม ซี วี ฆวัยะ เลห บอ งาย ดูอี เฆ ตี, แกวะ แตห เฆ ยึร ปี คาหนาบ แม ดี เฆ. โคว, เย ตู ตัห โดง กอย แม.”

15 ปาย ตี อาโมวแซ บอ รู กาเซา. อัน วี กาลาง ดี เฌาพรา ต็อห, “แกวะ แตห แม เฌา รับ ปี หลู เฆ ตี. โอว แดเจณ แม เฌา ตู ดึอม มึห ดี กาลูต ดี เฆ คอ อู วี. บอ มาลา เฆ แคะ อู โดว, โอว ตู ดึอม ดึห.”

16 แฮะ ฮอต, อาโมวแซ วี ต็อห ดี อาโควรา, “แคหณา บอ แม บอ เฆ ดูอี อี โดบ แม อาดา อา มาย็อห ดี พัน ฆึร วี ตึอน, แตห เบ บอกาเฆลียด ฮาว ดี ทึบ บีก บอด. อาโรน มืร ดี กอย ดี ตี. 17 แตห เบ ดอน อี โฆ็ง อึบ เงา, แตห เบ ฮับ บอ ซีนัม อูห หงูน ราง อาเซ ราง อัน, วี ฮาว หลู ดี เฌาพรา. อึณ ดี บอ มึห อึบ อา มาย็อห ดี พัน ฆึร โบ็ง, บอ อึบ อาโรน บอ อึบ แม.” 18 แฮะ ฮอต ปาย ตี เฆ ดอน อี โฆ็ง อึบ เงา เฆ, ฮับ บอ ซีนัม อูห หงูน. ดอน วี กอย บาง มาโลห ทึบ บีก บอด. อาโมวแซ ฆาย อาโรน มืร แฮะ กอย ดี ตี. 19 อาโควรา ตึอน, อัน แฮะ แดะ ดูอี เฆ ตึอน บอกาเฆลียด, แตห เฆ ตัห กาฌูะ นา อาต อาโมวแซ ฆาย อาโรน ดี บาง มาโลห ทึบ บีก บอด ตึอน. ดอ อัน ตี อู เฌณ, ดูอี เฆ ตึอน บอกาเฆลียด บอ ยึร ซีคยา บลาง อาพูง ดังโคว เฌาพรา. 20 เฌาพรา วี ต็อห ดี อาโมวแซ ฆาย อาโรน, 21 “แตห บาย กาย็อห ดี ดูอี เฆ ตี, แตห โอว ปึอน ดี โบง แตห เฆ ชึม โตต อู เฌณ.”

22 ฆาย มืร วี มูด ฆึบ ดี กาดาย ซาคึร ต็อห, “อึย แม เฌาพรา, แม มูห เฌาพรา อี อึบ อาซาก ดูอี บอ น็อห พึอม ดูอี บอกาเฆลียด. แกวะ แตห แม เฌา รู ดี เฆ ดูอี บอกาเฆลียด โกบ ปี ลูต ดูอี อู วี ตี.”

23 เฌาพรา วี ต็อห ดี อาโมวแซ, 24 “แตห แม กาลาง ดี ดูอี อีซาเรลัะ บอกาเฆลียด, แตห เฆ กาย็อห ดี ทึบ บีก อี มูห โดง กอย อาโควรา, อาดาทาน, บอ อาพีรัม.”

25 อาโมวแซ บอ เฆ ดา ตาง ดูอี อีซาเรลัะ, เฆ บอ ฮาว โดง กอย อาดาทาน บอ อาพีรัม. 26 อาโมวแซ บอ กาลาง ดี เฆ ดูอี กืน ตี ต็อห, “แตห เบ กาย็อห ทึบ เบ ดี ทึบ ดูอี ฮาย ดูอี มืก เฆ นี. แกวะ แตห เบ ปา โกรวกราม เฆ คอ อู โมยว. โยว บอ เบ ดี บอ ลึร ชึม โกบ หมาบ ปี โบง เฆ.” 27 ปาย ตี เฆ บอ กาย็อห บอ วัห ทึบ โดง กอย อาโควรา, อาดาทาน บอ อาพีรัม เฆ ตึอน. อาดาทาน ฆาย อาพีรัม บอ อีบึณ เฆ ฆอน ฆาย แฮะ เลห กอย นา อาต ทึบ เฆ.

28 อาโมวแซ วี กาลาง ดี ดูอี กืน ต็อห, “เบ โลว นับ, อึณ มูห เฌาพรา อี แฮะ แตห โอว โบง ฌึร นี ดอน โมยว. เบ โลว นับ, อาว มูห โอว โบง โดบ ปี อึง โดว บรีม โอว. 29 เซ ดูอี เฆ นี ยี ตู ยัม โกบ ดัม เฌาพรา หมาบ ดี เฆ, เซ เฆ ยัม ดาคึย ปี ดูอี เฮา, อาว มูห เฌาพรา แฮะ จัร โอว ตัห. 30 มาแล, เซ เฌาพรา ยี โบง ปี ตู ดึอม ยึร อี คอ อู เฌณ, เซ กาดาย ยี ดัห หณอด โลง เฆ แคง มืง มารานัะ บอ อีม, เบ ดี นับ ซีคยา, ดูอี เฆ นี, เฆ แฮะ แวน เฌาพรา.”

31 อาโมวแซ แฮะ ฮอต กาลาง โฆรห ตี, กาดาย โดง กอย เฆ ตึอน บอ ดัห อู เฌณ. 32 อึณ บอ หณอด เฆ, บอ หณอด เฆ อี โดบ ดูอี อาโควรา บอกาเฆลียด, บอ อึณโฮม เฆ บอ โกรวกราม เฆ บอ โตต. 33 ปาย ตี เฆ แฮะ โลง มืง มารานัะ บอ อีม. บอ โกรวกราม เฆ แฮะ โลง โดบ. แฮะ ฮอต, กาดาย วี กางี นา แดง เฆ ปี บรีม. อี มูห เฆ, เฆ แฮะ หราย อู เฌณ, อาว ฮู กอย กาแต เฆ ดูอี กืน. 34 เฆ ดูอี อีซาเรลัะ บอ ยึร ดัด เฆ, เฆ บอ กาแบลบ เตา อู เฌณ. เฆ ต็อห, “กาแบลบ เตา เอ, โยว กาดาย หณอด บอ เอ.”

35 วาย ตี เฌาพรา ปี วี แตห เงา กาซึม ดูอี อา มาย็อห ดี พัน ฆึร วี ดอ หลู เฆ ซีนัม อูห หงูน ตึอน.

36 แฮะ ฮอต, เฌาพรา วี กาลาง ดี อาโมวแซ ต็อห, 37 “แตห แม กาลาง ดี อาเลอาซา อี มูห ฆอน ดา อี หลู ดี เฌาพรา อี จืร อาโรน ตึอน. แตห อัน แฆบ อูน อึบ เงา เฆ ดูอี อี แฮะ กาซึม ตี. อึณกึร เงา อี กอย แคง อึบ ตี, แตห อัน ฮาว ฮูห แวน โต็ง โต็ง. โคว, อึบ ปี ฮับ เฆ อึณกึร เงา ตี แฮะ ฮอต ซีงา. 38 อึบ เงา ตี แฮะ แบน อี ซีงา โกบ แฮะ หลู เฆ ดี เฌาพรา. โคว, แตห อัน แฆบ อูน อึบ เงา เฆ ดูอี อี แฮะ โบง หมาบ อาโมยว อี วี แตห เฆ ยัม. แตห อัน วี มัห ดีพลัะ, แตห อึณ วี แบน ซีบลึก แดง กาโช็ง หลู. ซีบลึก กาโช็ง หลู ตี ดี แบน อี แตห เฆ ดูอี อีซาเรลัะ โหลห เซเซ ลอง อัน ตี.”

39 ดา อี หลู ดี เฌาพรา อาเลอาซา ตึอน, อัน บอ แฆบ อูน อึบ เงา เฆ ตี. อัน บอ มัห ดีพลัะ, แตห อึณ แบน ซีบลึก กาโช็ง หลู. 40 ลอง อัน ตี, อึณ แตห เฆ ดูอี อีซาเรลัะ โหลห เซเซ. เซ อึณ ตู มูห หลูกหลาน อาโรน, เฆ ตู ปึอน หลู ซีนัม อูห หงูน ดี อาต เฌาพรา. เซ อึณ ยี มึห อี ซี หลู, บอ อัน ดี บอ ลึร ชึม ปี อาโควรา บอ พึง อัน เฆ ตึอน. ปาย ตี อาเลอาซา โบง โดบ ปี กาลาง เฌาพรา ดี อาโมวแซ ตี ดอน โมยว.

41 ปา แคหณา พึง เฆ ดูอี อีซาเรลัะ บอกาเฆลียด ปี วี ปึณ เอห อาโมวแซ ฆาย อาโรน. เฆ ต็อห, “บาย แฮะ ปียัม ดูอี ปี อึบ เฌาพรา.”

42 ดูอี เฆ ตึอน มืร แฮะ ตัห กอย กาฌูะ, แตห เฆ ปึอน ดี กาแทณ ดี อาโมวแซ ฆาย อาโรน. ดอ อัน ตี เฆ บอ วี ยึร อึณอูะ อี แฮะ ตัห ปลึก ทึบ บีก บอด ตึอน, แตห อาพูง ดังโคว เฌาพรา บอ ลึห ซีคยา ดี เฆ. 43 อาโมวแซ ฆาย อาโรน บอ ฮาว จ็อง นา อาต ทึบ บีก บอด ตี. 44 แฮะ ฮอต, เฌาพรา วี ต็อห ดี อาโมวแซ, 45 “แตห แม กาย็อห เลห ดี พึง ดูอี กืน เฆ ตี. โอว ดี แตห เฆ ลึร ชึม โตต อู เฌณ.” ปาย ตี ฆาย มืร วี มูด ฆึบ ดี กาดาย.

46 อาโมวแซ วี กาลาง ดี อาโรน ต็อห, “แตห แม ดึห อึบ เงา แม, วี ดึห ฮับ อึณกึร เงา อี กอย แดง กาโช็ง หลู, วี ฮับ บอ ซีนัม อูห หงูน นา แดง, แตห แม ฮาว ครัน ครัน โดง กอย ดูอี เฆ ตึอน, แตห แม วี หลู, แตห เฆ ดูอี อีซาเรลัะ วี กาล็อะ ดี เฌาพรา. โคว, เฌาพรา แฮะ รู กาเซา ดี เฆ. อาเพ อาเร อี แตห ดูอี ยัม มืร, แฮะ ฮอต ตัห.” 47 อาโรน บอ โบง ปาย ตี อู เฌณ. อัน บอ ดึห อึบ เงา อัน กาแบลบ ฮาว โดง กอย ดูอี เฆ ตึอน. อัน บอ ยึร อาเพ อาเร แฮะ ฮอต ตัห. โคว, อัน บอ ดึห ซีนัม อูห หงูน, ฮับ นา แคง อึบ อัน, โบง แคะ ปี โลว โบง อัน, แตห ดูอี อีซาเรลัะ วี กาล็อะ ดี เฌาพรา. 48 แฮะ ฮอต ปาย ตี อาเพ อาเร ตี บอ วี เยน อู เฌณ. ดอ ตัห กอย อัน ดี กาแต เฆ ดูอี อี ซี อีม บอ เฆ อี แฮะ ฮอต ยัม, อึณ แฮะ จู อู เฌณ. 49 เฆ ดูอี อี แฮะ ยัม ดี อาเพ อาเร ตี บอกาเฆลียด แฮะ แบน อู หมึณ ดี พวน แหรณ ดี บู มาย็อห วี. แดง ตี, อึณ บอ มึห บอ เฆ อี แฮะ ยัม โกบ อาโควรา เฆ ตึอน. 50 ดูก ตาง ตี แฮะ ฮอต วี เยน, อาโรน บอ วี ตัห โดง กอย อาโมวแซ ดี บาง มาโลห ทึบ บีก บอด ตึอน.