1 เฌาพรา ปี วี จัร อาโมวแซ, 2 แตห อัน กาลาง ดี เฆ ดูอี อีซาเรลัะ ต็อห, “เซ เบ ฮี ฌัม แคง มืง ปี ดี ดัว โอว ดี เบ, 3 เบ โลว ดึห มามัก. เซ อาว มูห มามัก, เบ โลว ดึห มาบู, หลู ดี เฌาพรา, แตห อึณ แบน ปี หลู อี โดะ ดี เงา. เซ อาว มูห ปาย ตี แตห อึณ แบน ปี หลู อี โดบ ปี กาแซณ เบ. เซ อาว มูห ปาย ตี แตห อึณ แบน ปี ซี หลู เบ แบน โมยว แบน โมยว. เซ อาว มูห ปาย ตี แตห อึณ แบน ปี หลู ดอ โบง เบ บลอย. เบ โลว หลู ฌึร ตี, แตห อูห หงูน ปี หลู เบ ตี บอ ล็อะ น็อห เฌาพรา. 4 วี อี หลู ดีฆาว แบน โมยว แบน โมยว ดี เฌาพรา, อัน โลว แตห อึณ แบน ปี หลู อี โดะ ดี เงา. อัน โลว วี ดึห กาแปะ เคาคยูง อาดา อู โอวมา อี มูห อู แบล ดี อู ควาก. อัน โลว กาวัร บอ นามัน อู กาเปา. 5 เบ โลว ดึห บอ อึม มางูน อู กาเปา, แตห อึณ แบน ปี ดี หลู ปี ดี เดียง, แตห เบ หลู โดบ ปี ดี หลู อี โดะ ดี เงา บอ โดบ ปี ดี หลู อี มูห มาบู ดอน โดว.

6 เซ เบ หลู มาบู อาโล็ง, เบ โลว ฮับ บอ ปี ดี หลู ดีฆาว แบน โมยว แบน โมยว. เบ โลว ดึห กาแปะ เคาคยูง อา โอวมา อี มูห โอย แบล บอ นามัน อู กาเปา ดี อู กาแต. 7 เบ โลว กาวัร บอ อึม มางูน อู กาเปา ดี อู กาแต, แตห อึณ แบน ปี หลู ปี ดี เดียง, แตห อูห หงูน ปี หลู ตี ล็อะ น็อห เฌาพรา.

8 เซ เบ หลู มัก อาโล็ง ดี เฌาพรา, แตห อึณ แบน ปี หลู อี โดะ ดี เงา. เซ อาว ปาย ตี แตห อึณ แบน ปี หลู อี โดบ แปะ แฮะ กาแซณ เบ ดี เฌาพรา. เซ อาว มูห ปาย ตี แตห อึณ แบน ปี หลู อี กอย กาฌูะ โฮม รึม, 9 แตห เบ ดึห บอ ปี หลู ดีฆาว อี มูห กาแปะ เคาคยูง อาดา โอย โอวมา อี มูห พวน แบล ดี อู ควาก, กาวัร กาซู นามัน อา กาเปา บอ หลู โดบ มามัก ตี. 10 แตห เบ วี กาวัร บอ ปี หลู ปี ดี เดียง อี มูห อึม มางูน อา กาเปา, แตห อูห หงูน ปี หลู เบ ตี ล็อะ น็อห เฌาพรา. 11 เบ โลว โบง ปาย ตี เซ เบ หลู มัก อาโล็ง, มาบู อาโล็ง บอ มาแป ดอน โดว. 12 เซ เบ บอ หลู โดว ซัดดาวา ดอน โมยว, เบ โลว ฮับ แคะ ตี อาดา ดอน โดว.

13 เบ ดูอี อีซาเรลัะ ดอน อี โลว โบง ปาย ตี ดอ หลู เบ ปี หลู อี โดะ ดี เงา, แตห อูห หงูน ปี หลู เบ ตี บอ ล็อะ น็อห เฌาพรา. 14 เฆ ดูอี อาโมยว เฮา อี ตัห กอย กาแต เบ, อึณ บอ มูห อี กอย เซเซ, บอ มูห อี กอย อู กาจัน อู กาบรึห, เซ อัน มึห น็อห ซี หลู ปี ดี หลู อี โดะ ดี เงา, แตห อูห หงูน อัน ล็อะ น็อห เฌาพรา, อัน โลว โบง โดบ ปี ปี โบง เบ ตี. 15 ซีณ ดอ ตี นี ฮาว นา อาต, แตห อึณ กอ ฌัม บอ โจว หลูกหลาน เบ ดอน โจว ดอน บาน, เบ โลว โดบ ดารา อู โมยว ตี. บอ เบ บอ ดูอี อาโมยว เฮา มูห อู โมยว ดี อาต เฌาพรา. 16 บอ เบ บอ ดูอี เฆ ตี โลว โดบ ดารา อู โมยว บอ ฮีด อู โมยว ตี.”

17 แฮะ ฮอต, เฌาพรา ปี วี จัร อาโมวแซ แตห อัน กาลาง ดี เฆ ดูอี อีซาเรลัะ ต็อห, 18 “เซ เบ ฮี ฮาว ฌัม แคง มืง ปี ดี แยต ฮาว โอว ดี เบ, 19 เซ เบ ดี โฮม ปี ดี โฮม แปะ แฮะ ปึอน เบ แคง มืง ตี, แตห เบ อาบ หลู มัง กาล็อะ ดี เฌาพรา. 20 ดอ ดี โดะ เบ คามูน อี มูห กาแปะ เคาคยูง แปะ แฮะ โซะ เบ ดี อาต, แตห เบ ดึห อาดา อู ดีแคลบ, หลู ดี เฌาพรา, แตห อึณ แบน ปี ดาง เบ ดี เฌาพรา อี ตัห ดี โอ็ง กางน็อห เบ. 21 ปาย ตี เบ โลว หลู ดี เฌาพรา ซีณ ดอ โฮม เบ คามูน ดอ โฆว, แตห อึณ กอ ฌัม บอ โจว หลูก โจว หลาน เบ ดอน โจว ดอน บาน.

22 เซ เบ ยี โบง กาลึบ, ตู โบง โดบ ปี กาลาง เฌาพรา ดี อาโมวแซ ตี ดอน โมยว, 23 บอ นา อาต นี ฮาว, เซ พึง เบ ดูอี กืน ตู โดบ ดารา ปี กาลาง เฌาพรา ดี อาโมวแซ ตี ดอน โมยว, 24 เซ เฆ ดูอี กืน ตู นับ ลอง อัน ตี, ยี โบง กาลึบ, ดอน เฌณ เฆ โลว ดึห มัก อาโล็ง อู โดว วี หลู, แตห อึณ แบน ปี หลู อี โดะ ดี เงา, แตห อูห หงูน อัน ล็อะ น็อห เฌาพรา. แตห เฆ หลู บอ ปี ดี หลู ดีฆาว บอ อึม มางูน. แตห เบ ดึห บอ มาแป อาโล็ง อู โดว วี ปัว, แตห อึณ แบน ปี ดี หลู อี ฆ็อห แวน หมาบ. 25 ดา อี หลู ดี เฌาพรา โลว โบง แตห เฆ ดูอี อีซาเรลัะ บอกาเฆลียด วี กาล็อะ ดี เฌาพรา. ปาย ตี เฌาพรา มืร ดี ฆ็อห แวน หมาบ เฆ. แปะ แฮะ โบง ลูต เฆ ตี, เฆ ตู นับ ลอง ดาง อัน. เฆ แฮะ กาลึบ ดี โบง. โคว, เฆ โลว วี หลู ปี หลู อี โดะ ดี เงา บอ ปี หลู อี ฆ็อห แวน หมาบ ดี เฌาพรา. 26 เซ เฆ โบง ปาย ตี, แคะ กอย เฆ ดูอี อีซาเรลัะ บอกาเฆลียด, บอ เฆ ดูอี อาโมยว เฮา อี กอย กาแต เฆ, เฆ มืร ดี ลอด คัม หมาบ เฆ. โคว, แปะ แฮะ โบง กาลึบ เฆ ตี, อาว มูห เฆ อูน น็อห ดี โบง.

27 เซ อึณ มึห ดูอี อู วี อี แฮะ กาลึบ ดอ ตู โหลห ตู นับ อัน ลอง อัน ตี, อัน โลว วี หลู มาแป อาหยาง อู โดว อี โนะ อู ซีนัม, แตห อึณ แบน ปี หลู อี ฆ็อห แวน หมาบ. 28 ดา อี หลู ดี เฌาพรา โลว โบง แตห ดูอี วี ตี วี กาล็อะ ดี เฌาพรา. เฌาพรา มืร ดี ฆ็อห แวน หมาบ อัน. 29 เซ เบ แฮะ กาลึบ ดอ ตู นับ เบ ลอง อัน ตี, บอ มูห ดูอี อีซาเรลัะ บอ มูห ดูอี อาโมยว เฮา อี กอย กาแต เบ, เบ โลว โดบ ปี จัร โอว อู โมยว ตี.

30 อึณ บอ มูห ดูอี อาโมยว เบ, บอ มูห ดูอี อาโมยว เฮา, เซ ดูอี อู วี แฮะ อูน น็อห ดี โบง แตห อัน ลูต, แตห อัน กาลึบ, อัน ตู โรวเซ เฌาพรา. โคว, เบ โลว แวน ดูอี วี ตี, ตู มาด อัน มูห ดูอี อีซาเรลัะ. 31 โกบ แฮะ ลูกตาย อัน ดี โฆรห เฌาพรา บอ หลึร ดารา เฌาพรา, เบ โลว แวน อัน, แกวะ ฮู มาด อัน มูห ดูอี อาโมยว เบ. อัน มืร โลว วี คัม หมาบ อัน ตี.”

32 ดอ กอย ดูอี อีซาเรลัะ แคง แปร กาฮ็อห ตึอน, อาดา อู ซีแง เฆ บอ ยึร ดูอี อู วี, อี แฮะ ฮาว แฆบ อูน เฮ ดอ มูห ซีแง ดีเหลา. 33 เฆ บอ แดะ ตัห อัน โดง กอย อาโมวแซ ฆาย อาโรน, แตห บอ ฆาย ดูอี กืน ยึร. 34 เฆ บอ คร็อง อัน แคง กาปึม โกบ หณัม นับ เฆ ปี ดี ปาย ดี ซูงพยาด อามู อัน. 35 เฌาพรา บอ วี กาลาง ดี อาโมวแซ ต็อห, “ดูอี วี ตี เบ โลว ง็อห ยัม. เบ โลว ดึห เลห อัน นา เรต โดง คยัะ เบ, แตห ดูอี บอกาเฆลียด ดึห มาว, วึณ ยัม อัน.” 36 ปาย ตี พึง เฆ ดูอี กืน ตึอน บอ ดึห เลห อัน นา เรต โดง คยัะ เฆ. เฆ บอ กาโพรม ดี ดึห มาว, วึณ, แตห อัน ยัม, แตห อึณ โดบ ปี กาลาง อูน เฌาพรา.

37 เฌาพรา ปี วี จัร อาโมวแซ แตห อัน กาลาง ดี เฆ ดูอี อีซาเรลัะ ต็อห, 38 “เบ โลว โบง ดูย อี มึห เซณ เงียน, ฮอย ดี ซีโตว เบ พวน กาโตะ. เบ โลว โบง ปาย ตี แตห อึณ กอ ฌัม โจว หลูกหลาน เบ ดอน โจว ดอน บาน. 39 เซ เบ ยอด ดูย ตี, อึณ ดี แตห เบ โหลห ดารา เฌาพรา บอกาเฆลียด, แตห เบ ปึอน ดี โบง โดบ, แกวะ แตห เบ โบง ปี อึง เบ บอ ปี ยึร เบ อี แตห เบ กาลึบ. 40 ดูย ตี ดี ดัม ซาดีก ดี เบ, แตห เบ โบง โดบ ดารา โอว, แตห เบ แบน ดูอี ปี อึบ โอว. 41 โอว มูห เฌาพรา ปี กรึบ เบ, เฌาพรา อี แฮะ ทูด เลห เบ แคง มืง แอฆึบ. โอว มืร มูห อัน เฌา, อี มูห เฌาพรา ปี กรึบ เบ.”