1 เฌาพรา วี จัร อาโมวแซ ฆาย อาโรน, 2 แตห ฆาย วี กาลาง ปี หมาณ ดารา ดี เฆ ดูอี อีซาเรลัะ. เฌาพรา ต็อห, “แตห เฆ ดูอี อีซาเรลัะ ดึห ตัห มามัก โดว มา อี เรณ อู โดว, ดัว ดี บาย. แกวะ แตห อึณ มึห โดง เช โดง แน. โลว ดึห อี หณัม ดึอม ดาง คอ อู เฌณ. 3 บาย โลว ดึห มามัก ตี, วี ดัว ดี ดา อี หลู ดี เฌาพรา อี จืร อาเลอาซา. อัน โลว ดึห มามัก ตี, เลห นา เรต โดง คยัะ เบ, วี จัร ดูอี อู วี ง็อห โดว ตี ดี อาต อัน. 4 แฮะ ฮอต, อาเลอาซา โลว ดึห กานู อัน, วี จึบ แคง หนาม มามัก ตี, วี มางัห ยอด นา กอย ทึบ บีก บอด, วี กาเทต หนาม ตี อาดา บู เฌณ. 5 ดูอี วี อี ง็อห มามัก ตึอน โลว วี ดึห มามัก ตี, บอ โดว บอ ยัง อัน บอ ฮูน อัน บอ หนาม อัน เฆ ณ็อง วัต อัน, วี โดะ นา อาต ดา อี หลู ดี เฌาพรา ตึอน. 6 ดา อี หลู ดี เฌาพรา โลว วี ดึห เฮ อารีด มัง กาล็อะ บอ เดา ฮูโซบ, บอ เซณ อี เรณ แฆ, วี โดะ แคง เงา โดบ มามัก ตี. 7 เซ แฮะ ฮอต ปาย ตี ดา อี หลู ดี เฌาพรา โลว วี ตา อึม, วี ลัห บอ ครึง ปี ตา อัน. วาย ตี, อัน แฮะ ปึอน วี ลึบ ตัห แคง โดง คยัะ เบ. อัน ยี ตู ซีงา โดบ ปี ดัม ดารา กอ ฌัม บา ดี อับ. 8 บอ ดูอี อี โดะ มามัก ตึอน, บอ อัน โลว วี ตา อึม บอ ลัห ครึง ปี ตา อัน. อัน มืร ตู ซีงา กอ ฌัม บา ดี อับ.

9 แฮะ ฮอต ปาย ตี ดูอี อี แฮะ ซีงา อู วี, โลว วี ฮาว แฆบ กาฌูะ เบรา กาฟาง โดง โดะ เฆ มามัก ตี, แตห อัน วี ฮาว อูน นา เรต โดง คยัะ เบ อี มูห โดง ซีงา บอด โดบ ปี ดัม ดารา. เบรา ตี, เบ โลว แฆบ อูน อาดา เฆ ดูอี อีซาเรลัะ, โลว ฮับ แคง อึม, แตห อึม ตี บาย แวน อี ตู หมึอม. อึณ ดี แบน อึม อี บาย แวน หมาบ. 10 ดูอี อี แฆบ อูน เบรา ตี, อัน มืร โลว วี ลัห ครึง ปี ตา อัน. อัน มืร ตู ซีงา กอ ฌัม บา ดี อับ. อานี อึณ มูห ดารา ปี โลว โดบ เฆ ดูอี อีซาเรลัะ บอ เฆ ดูอี อาโมยว เฮา อี กอย รึม โดบ เฆ เซเซ.

11 เซ อึณ มึห ดูอี อี แฮะ ตา ดึร ตา ปา ดูอี ยัม, อัน ตู ซีงา อาดา บู ซีแง. 12 อัน โลว วี โบง แตห โดว อัน ซีงา. อัน โลว วี ตา อึม ตึอน ดอ แฮะ โนะ โอย ซีแง บอ ดอ แฮะ โนะ บู ซีแง. เซ อัน ยี ตู โบง ปาย ตี อัน ตู ซีงา. 13 เซ อึณ มึห อี แฮะ ตา ปา ดูอี ยัม, เซ อัน ตู โบง แตห โดว อัน ซีงา, อัน ยี กอย ปาย ตี อัน มืร ตู ดึห อึม อี แตห อี ซีงา ตึอน, ตู คร็อห ดี อัน, อึณ ปี อัน ตู โรวเซ ทึบ บีก บอด, โบง แตห อึณ คย็อะ. ดูอี วี ตี เบ ตู ปึอน มาด อัน มูห ดูอี อีซาเรลัะ.

14 เซ อึณ มึห อี ยัม แคง ทึบ, บอ เฆ อี กอย แคง ทึบ, บอ เฆ อี ตัห ลึบ แคง ทึบ ตี, เฆ ตู ซีงา กอ โนะ บู ซีแง. 15 บอ กาโละ เฆ อึณปาน อี ตู ซีบลึก ดอน โมยว อาว ฮู ซีงา.

16 เซ อึณ มึห ดูอี อี ยัม ดีฆลัะ, บอ มูห ยัม ดี มาปัวะ ลาง, ยัม ดี เซา รอฆา อาว ต็อห, เซ อึณ มึห อี ตา ดึร ตา ปา ดูอี ยัม ตี, ตา ดึร กาอาง ดูอี ยัม บอ อวน ดูอี ยัม, บอ อัน ตู ซีงา อาดา บู ซีแง.

17 ดูอี อี ตู ซีงา เฆ ตี, เฆ โลว ดึห เบรา มามัก ตึอน มัง กาล็อะ, วี ฮับ แคง กาโละ, วี ฮับ บอ อึม อี ต็อะ ตัห กามาย. 18 แฮะ ฮอต, ดูอี อู วี อี แฮะ ซีงา โดบ ปี ดัม ดารา, โลว วี ดึห เดา ฮูโซบ วี จึบ แคง อึม ตี, วี คร็อห ดี ทึบ บีก ดูอี อี ยัม ตี, คร็อห บอ ดี ครึง ตา ดอน โมยว อี กอย แคง ทึบ ตี. อัน โลว คร็อห บอ ดี เฆ ดอน อี ดูอี อี แฮะ ตา ปา กาอาง ดูอี ยัม, ปา โดว ดูอี ยัม บอ อวน ดูอี ยัม เฆ ตึอน. บอ มูห ดูอี ยัม จาว, บอ มูห ดูอี ยัม ดาคึย อาว ต็อห, เบ โลว โบง ปาย ตี. 19 ดูอี อี แฮะ ซีงา ตี, อัน โลว ดึห อึม ตึอน, คร็อห ดี ดูอี อี ตู ซีงา ดอ แฮะ โนะ โอย ซีแง บอ ดอ แฮะ โนะ บู ซีแง. เซ แฮะ ฮอต โนะ บู ซีแง, อัน โลว โบง แตห ดูอี วี ตึอน วี ซีงา. ดูอี อี ตู ซีงา วี ตี มืร, อัน โลว วี ตา อึม, ลัห บอ ครึง ปี ตา อัน. แฮะ ฮอต, บา ดี อับ อัน แฮะ วี ซีงา โดบ ปี ดัม ดารา. 20 ดูอี อี ตู ซีงา ตึอน, เซ อัน ตู โบง แตห อัน วี ซีงา ปาย ตี เซ อัน ตู คัม ดี ดึห อึม อี แตห อี ซีงา ตึอน, ตู คัม อี คร็อห ดี อัน, ดูอี วี ตี ปี อัน ตู โรวเซ ทึบ บีก บอด. อัน โบง แตห อึณ คย็อะ. อาว ฮู ปึอน มาด อัน มูห ดูอี อีซาเรลัะ. 21 ดารา ตี เบ โลว โดบ แตห อึณ กอ ฌัม โจว หลูก โจว หลาน เบ ดอน โจว ดอน บาน. อึณ ยี มูห ดูอี วี อี ซีงา ตึอน, อี แฮะ ฮอต ดึห อึม, คร็อห ดี วี อี ตู ซีงา, บอ อัน โลว วี ตา อึม, ลัห บอ ครึง ปี ตา อัน. วี อี ตา อึม อี บาย แวน อี ตู หมึอม ตี, บอ อัน อาว ฮู ซีงา ฌัม บา ดี อับ. 22 เซ อึณ มึห ดูอี อี ตู ซีงา ปาย ตี ปี ตา ดึร อัน ดอน โมยว, อึณ แบน โตต อี ตู ซีงา. บอ ดูอี อี วี ตา ดึร ฌึร ตี, อัน อาว ฮู ซีงา กอ ฌัม บา ดี อับ.”