1 ดอ อัน ตี เฆ ดูอี อีซาเรลัะ บอกาเฆลียด แฮะ กาจูห ดี ปึณ ดี เฌาพรา โกบ แฮะ คัม เฆ ดูก. เฌาพรา บอ ยึร โฆรห เฆ ตี, อัน บอ รู กาเซา ดี เฆ. อัน บอ แตห เงา ตัห กาซึม มัง โปละ กาแต เฆ บอ ปยาต ดี โคบ ซืด โดง คยัะ เฆ. 2 ปาย ตี เฆ บอ วี กาโพรม ดี ดัด แดะ อาโมวแซ. อาโมวแซ บอ วี ซาคึร ดี เฌาพรา. แฮะ ฮอต, เงา ตี บอ วี เยน. 3 โกบ แฮะ แตห เฌาพรา เงา กาซึม กาแต เฆ ตี, เฆ บอ แตห โดง ตี จืร ดาบีรา.^a

4 วาย อัน ตี อึณ มูห เฆ ดูอี อาโมยว เฮา อี โดบ ตัห เฆ ดูอี อีซาเรลัะ, เฆ มืร มึห น็อห ซี โฮม กาเซา ยัง. บอ เฆ ดูอี อีซาเรลัะ วี ปึณ ต็อห, “เหมา อึณ ปาย ปี เอต เอ ยัง ปาย นี? 5 ดอ กอย เอ แคง มืง แอฆึบ, เอ ปึอน ดี ฮาบ แพ มาฆา, ตู โลว จึห. เอ แฮะ นัมโหลห บอ ดีเฆีย แบน โมยว แบน โมยว, หมี บอ มาโปว ลูย, มาโปว เรณ. 6 ดอ ตี นี, เย แฮะ ปึร กาเซา. ดอน ซีแง, ดอน ซีแง บอ มูห มี คามูน มานา. อาโมยว เฮา คอ อู โมยว มืร อาว มึห.”

7 คามูน มานา ตี, อึณ ปี กาอาง พูฆี. อึณ เดณ ลูย ปี กาณัน เฮ เบดาโลง. 8 ดูอี เฆ ตึอน บอ ฮาว ดึห ตัห กรีด, ตัห ดูห แคง อึณเบา แด. แฮะ ฮอต, เฆ บอ วี ดัง แคง กาโละ, โบง แตห อึณ แบน คามูน อี ดีแคลบ. ปี ปาย ดี ซีแงห, อึณ ปี คามูน แปะ แฮะ ฮับ อี แคง นามัน. 9 คามูน มานา ตี โจห โลง โคบ โดง กอย เฆ ตึอน แคง หมึร. อึณ บอ โจห โดบ อึม ดีงาน.

10 อาโมวแซ แฮะ ยึร เฆ ดอน อึณโฮม, เฆ แฮะ กอย แบน พึง แบน พึง นา อาต ทึบ เฆ. อึณโฮม เหมา มืร แฮะ ปึณ ดี เฌาพรา. อึณ บอ แบน น็อห ดีแตด ดี อาโมวแซ โกบ แฮะ รู เฌาพรา ดี เฆ. 11 อัน วี ต็อห ดี เฌาพรา, “เหมา อึณ ปาย ปี คาหนาบ แม เฌา ดี โอว ปาย นี? เหมา อึณ ปาย ปี แตห แม เฌา โอว แยต ดูอี เฆ นี, แตห อึณ หณาบ กาเซา ตืก ดี โอว? เหมา อึณ ปาย ปี ตู กาเว แม เฌา ดี โอว? 12 ยี ฮู มูห โอว อี โบง แตห เฆ ฆึอด. โอว มืร ตู กาดูห ดี ตู อัห ดี เฆ. เหมา อึณ ปาย ปี วี แตห แม เฌา โอว วี โจะ เงียะ เฆ ปี ฆอน งัะ เรณ? เหมา อึณ ปาย ปี วี แตห แม โอว แยต ฮาว เฆ ดี มืง แปะ แฮะ กาแซณ แม เฌา ดี ดัว ดี ฆูณ ดัง เฆ? 13 โอว ดี ดึห ยัง ดี เหมา, เฮียง ดูอี เฆ นี? เฆ แฮะ กาปราณ กาเซา ยัง. เฆ แฮะ หมาณ, แตห โอว ดัว เฆ โฮม ยัง. 14 โอว อู วี อาว ฮู แป ดี ยอด โตต เฆ. อึณ แฮะ กาเซา ตืก ดี โอว. 15 เซ แม เฌา ซี โบง ปาย ตี โอว หมาณ, แตห แม กาเว โอว, ง็อห ยัม โอว ครัน ครัน, แกวะ แตห โอว ซี ยึร อี ดูก ดี น็อห โอว ปาย ตี.”

16 เฌาพรา วี กาลาง ดี อาโมวแซ ต็อห, “แตห แม แดะ ตัห เฆ ดูอี แปะ แฮะ นับ แม, เฆ อี มูห ดา ตาง อี แยต อี เฮา. แตห แม แดะ ดูอี ฌึร ตี อาดา บู ฆึร วี, แตห เฆ ตัห กอย รึม โดบ แม ดี อาต ทึบ บีก บอด ตึอน. 17 โอว ดี ตัห โลง กาลาง โฆรห ดี แม ดี ตี. โอว ดี ดึห น็อห พึอม โอว แปะ แฮะ ดัว โอว ดี แม ตึอน, วี กาซาง บอ ดี เฆ, แตห เฆ ปึอน ดี จอย แม ยอด แมน ดูอี บอกาเฆลียด, แกวะ แตห อึณ มูห แม อู วี อี โลว ยอด แมน เฆ ดูอี กืน.

18 แตห แม บอ กาลาง ดี ดูอี กืน เฆ ตี ต็อห, ‘แคหณา แตห เบ ปีซีงา โดว เบ. โคว, เบ ดี ปึอน ดี โฮม ยัง. เฌาพรา แฮะ ฮอต ยึร ปี ปึณ เบ ดอ แฮะ หมาณ เบ ดี โฮม ยัง. เบ แฮะ ต็อห ดอ กอย เบ แคง มืง แอฆึบ, อึณ แฮะ หมึอม หลึอม กอย เบ ดี นี. โคว อัน ตี, เฌาพรา ดี ดัว ยัง ดี เบ, แตห เบ ปึอน ดี โฮม แพ. 19 อาว มูห เบ ดี ปึอน ดี โฮม มี อู ซีแง, อา ซีแง. อาว มูห มี แคะ พัน ซีแง, ฆึร ซีแง บอ อา ฆึร ซีแง. 20 เบ ดี ปึอน ดี โฮม อาดา อู มาเฆียน บรี บรี, แตห เบ กอ แพ, กอ วี ปึร, แตห เบ กอ วี กาอีห. อึณ ดี แบน ปาย ตี ดี เบ โกบ แฮะ แวน เบ เฌาพรา อี แฮะ กอย รึม โดบ เบ. เบ แฮะ ยาม ดี อาต อัน เฌา บอ ดัด ต็อห, ดอ กอย เย แคง มืง แอฆึบ, อึณ หมึอม หลึอม กอย เย ดี นี.’”

21 วาย อัน ตี อาโมวแซ วี ต็อห ดี เฌาพรา, “ดูอี ปี แยต โอว นี, เฆ แฮะ กอย เดา แซน วี. แม เฌา ยี ต็อห, ‘โอว ดี เฮียง แตห เฆ โฮม ยัง อาดา อู มาเฆียน.’ 22 แม ซี แตห เย ดึห พึง มามัก, พึง มาบู เฆ พึง มาแป, วี ง็อห วี เฮียง เฆ? เซ อาว ปาย ตี มืร, แม ซี แตห เย ดึห กาฌูะ โตต แคะ กอย มาฆา แคง อึม นัมมูกซารา นี, แตห เย วี เฮียง เฆ, แตห เฆ กอ แพ?”

23 เฌาพรา วี ต็อห ดี อาโมวแซ, “แม ทาง โอว ตู ปึอน โบง แคะ ปี กาลาง โอว ตี? อึณ ดี แบน ตู แบน, แม ดี ยึร ครัน ครัน.”

24 อาโมวแซ บอ วี เลห โดง กอย อัน, วี กาลาง โฆรห เฌาพรา ตี ดี เฆ ดูอี กืน. อัน มืร วี จัร อี แตห เฆ แดะ เฆ อี มูห ดา ตาง บู ฆึร วี, แตห เฆ ตัห กอย โรบ ทึบ บีก บอด. 25 ปาย ตี เฌาพรา บอ โลง โดบ อึณอูะ บอ กาลาง โฆรห ดี อาโมวแซ. เฌาพรา บอ ดึห น็อห พึอม อี กอย แคง น็อห อัน มัง กาล็อะ, วี ดัว ดี เฆ ดา ตาง บู ฆึร วี ตึอน. ดอ แฮะ ลึบ น็อห พึอม เฌาพรา แคง น็อห เฆ ตี, เฆ บอ นับ ดี กาลาง โฆรห ปี ดา อี บยาน โฆรห เฌาพรา. มาแล, เฆ ยี ตู โบง ปาย ตี ปอ อู เฌณ.

26 กาแต เฆ ดูอี บู ฆึร วี ตึอน, อึณ ยี มูห อาเอลาดาด ฆาย อาเมดาด. น็อห พึอม เฌาพรา ลึบ แคง โดว ฆาย. ฆาย ยี ตู กอย ดี อาต ทึบ บีก บอด. ฆาย ซี กอย แคง โดง คยัะ เฆ ตึอน. ฆาย บอ บยาน โฆรห เฌาพรา แคง โดง คยัะ เฆ ตี. 27 อึณ วี มึห กาโณม อู วี, อัน วี กาแบลบ ฮาว กาลาง ดี อาโมวแซ ลอง อาเอลาดาด ฆาย อาเมดาด แฮะ บยาน โฆรห เฌาพรา แคง โดง คยัะ เฆ.

28 อึณ ยี มูห อาโยวซูอา อี มูห ฆอน อานูน, อัน แฮะ แบน แดเจณ อาโมวแซ ซีณ ดอ หนึม อัน. อัน ต็อห ดี อาโมวแซ, “อึย แม ดา กาณา โอว, โอว หมาณ, แตห แม แคร ฆาย.”

29 อาโมวแซ วี ต็อห ดี อัน, “แม ซี แน ฆาย โกบ ตู กอย รึม ฆาย โดบ โอว? โอว แฮะ ซี แตห ดูอี ปี อึบ เฌาพรา ดอน อี แบน โตต ดูอี บยาน โฆรห เฌาพรา. โอว ซี หมาณ บอ น็อห พึอม อัน เฌา แตห อึณ อึบ ดอน อี.” 30 แฮะ ฮอต ปาย ตี อาโมวแซ บอ เฆ อี มูห ดา ตาง บู ฆึร วี ตึอน, เฆ บอ วี เวณ โดง คยัะ เฆ.

31 ปัน ตี เฌาพรา บอ โบง แตห คูน ตัห นา กอย อึม นัมมูกซารา, แตห อึณ บูด ตัห มา อาโบร็ง กืน กาเซา, แตห เฆ ตัห โจห โคบ โดง คยัะ เฆ ตึอน ดอน บลาก. เฆ บอ จูห โรบ โดง คยัะ เฆ ตี บอ โต็ง แคะ ปึอน ฮาว อาดา คราว อึณเตณ อู ซีแง. แดง กาดาย ตี ดอน โปละ, อึณ บอ เฮต อา กานีห. 32 ดูอี เฆ ตึอน บอ แฆบ อูน มา อาโบร็ง ตี ดอง คืน ดอง วัน, บอ ปา แคหณา ดอง วัน. เฆ อี ปึอน เปรต หลึอม อี เฮา, เฆ ซี บอ ปึอน พัน ฆึร คอน. เฆ บอ ราย โคบ ทึบ โดง คยัะ เฆ ตึอน, กอ โรบ ดอน นา ดอน โปละ. 33 มาแล, ดอ ซีงยา โฮม เฆ ยัง ตี, เฌาพรา บอ รู กาเซา ดี เฆ บอ โบง แตห เฆ คัม ดูก เซา รอฆา อี ตาง กาเซา. 34 โคว, เฆ บอ แตห โดง ตี จืร, ฆีบารูดฮาตาวา. โคว, อึณ มูห โดง ดีบ เฆ ดูอี อี มึห น็อห ลามาก ดี โฮม.

35 วาย อัน ตี เฆ บอ วี กาโทะ ฮาว โดง อี จืร ฮาจารูด. เฆ บอ วี ฮาว คยัะ ดี ตี.