1 อึณ ยี มูห นาง มีรียัม ฆาย อาโรน, ฆาย วี ซี พยาก อาโมวแซ โกบ แฮะ คัด ดึห อัน อีบึณ อี มูห ดูอี อาโมยว กูซา ตึอน. 2 ฆาย ต็อห, “อาว มูห, เฌาพรา กาลาง โฆรห มี ดี อาโมวแซ อู วี. อัน นับ ดี กาลาง บอ ดี ยาย.” เฌาพรา มืร แฮะ ยึร โฆรห ฆาย ตี.

3 อี มูห อาโมวแซ ตึอน, อัน ยี มึห น็อห โฆม น็อห เตียม หลึอม ดูอี บอกาเฆลียด แดง กาดาย นี.

4 ดอ อัน ตี อู เฌณ, เฌาพรา วี กาลาง ดี อาโมวแซ บอ อาโรน บอ นาง มีรียัม ต็อห, “แตห เบ ฮาว โดง กอย ทึบ บีก บอด.” เฆ มืร ฮาว. 5 เฌาพรา มืร โลง โดบ ร็อง อึณอูะ, วี กอย ดี บาง มาโลห ทึบ บีก บอด ตึอน บอ แดะ อาโรน ฆาย นาง มีรียัม. ฆาย มืร บอ ตัห ดี อาต เฌาพรา. 6 เฌาพรา วี ต็อห ดี ฆาย, “แตห บาย โทม โฆรห โอว. เซ แฮะ มึห ดูอี อี บยาน โฆรห เฌาพรา กาแต เบ, โอว ดี แตห อัน นับ ลอง โอว ดอ ยึร อัน อาโรง ปี บยัะ โอว ดี อัน. โอว ดี บอ กาลาง โฆรห ดี อัน ดอ อีด อึณบาว อัน. 7 อึณ ยี มูห อาโมวแซ อี มูห แดเจณ โอว, โอว ตู โบง ปาย ตี ดี อัน. อัน บอ มูห ดูอี อี โบง ซีคยา ฆาน แคง กาง โอว ดอน โมยว. 8 โคว, เซ โอว กาลาง โฆรห ดี อัน, โอว กาลาง ซืร ดี อัน. โอว แตห อัน นับ ซีคยา. โอว ตู กาลาง โฆรห อี หณาบ โทม. โอว แตห อัน ยึร ปี ปาย โอว อี มูห เฌาพรา. โคว อึณ ปาย ตี เหมา อึณ ปาย ปี วี ยัะ กาลาง กาบัห บาย ดี อาโมวแซ อี มูห แดเจณ โอว ตี?”

9 ปาย ตี เฌาพรา บอ รู กาเซา ดี ฆาย บอ เลห โดง กอย ฆาย ตี. 10 ร็อง อึณอูะ ตึอน มืร, อึณ บอ กาฆ็อห ดี ทึบ บีก บอด ตึอน. นาง มีรียัม บอ มึห เซา ดูะ อู เฌณ, กอ ลูย ปี เบรีย. ดอ ยึร อาโรน นาง มีรียัม แฮะ แบน ดูะ ปาย ตี 11 อัน วี กาลาง ดี อาโมวแซ ต็อห, “อึย แม ดา กาณา โอว, โอว หมาณ, แกวะ แตห ยาย โลว คัม ดูก โกบ หมาบ แปะ แฮะ กาลึบ ยาย ตี. 12 แกวะ แตห นาง มีรียัม ยัม ปี ดูอี อี แฮะ ยัม ซีณ อาต ฆึอด เลห อัน แคง วัต มา อัน, ยัง อี แฮะ อัม ลาต มัง กาล็อะ.”

13 อาโมวแซ บอ วี ต็อห ดี เฌาพรา, “อึย แม เฌาพรา, โอว หมาณ, แตห เซา ดูะ อัน ตี วี หราย.”

14 เฌาพรา วี ต็อห ดี อาโมวแซ, “เซ ฆูณ อัน ปัต นา อัน, อัน โลว ซาย อี เฮา อาดา บู ซีแง, มูห? เซ อึณ ปาย ตี โอว แตห อัน เลห กอย นา เรต โดง คยัะ เบ อาดา บู ซีแง. แฮะ ฮอต, อัน ปึอน วี ตัห ลึบ แคง บาง โดง คยัะ เบ.” 15 ปาย ตี นาง มีรียัม บอ กาดูห ดี เลห ฮาว กอย นา เรต โดง คยัะ เฆ, แตห อึณ กอ โนะ บู ซีแง ตี. ดูอี เฆ ตึอน มืร ตู กาโทะ บาง โดง คยัะ เฆ. เฆ บอ บัร แตห นาง มีรียัม กอ วี ตัห.

16 วาย อัน ตี เฆ บอ กาโทะ เลห โดง กอย เฆ อี จืร ฮาจารูด ตึอน, วี ฮาว แคง แปร กาฮ็อห, วี คยัะ โดง จืร พาราน.