1 เฌาพรา ปี วี กาลาง ดี อาโมวแซ ต็อห, 2 “แตห แม ดึห ลาน รึอน อา ดีพลัะ, จึม เวา อา เลา, แตห เฆ บูด ดอ แดะ กาฌูะ แม เฆ ดูอี บอ ดอ โลว กาโทะ เบ บาง โดง คยัะ เบ. 3 เซ ฮี บูด เวา บอ อา เลา ตี, แคะ กอย ดูอี บอ พึง โลว ตัห กาฌูะ โดง กอย แม ดี อาต มาโลห ทึบ บีก บอด ตึอน. 4 เซ เฆ ยี บูด มี อู เลา, อึณ มูห มี เฆ ดา ตาง อี อึบ แคง ครึร เฆ โลว ตัห กาฌูะ โดง กอย แม. 5 เซ เฆ ยี บูด ดีเยณ ดีเยณ, อึณ มูห เฆ ดูอี อี กอย บลาก นา เลห ซีแง, เฆ โลว กาโทะ ฮาว. 6 เซ ฮี บูด ดีเยณ ดีเยณ ปอ อู เฌณ, อึณ มูห เฆ ดูอี อี กอย บลาก นา เตต อี โลว กาโทะ ฮาว. ปาย ตี เซ ฮี บูด ดีเยณ ดีเยณ, อึณ แตห ดูอี นับ, เฆ โลว กาโทะ บาง โดง คยัะ เฆ. 7 เซ อึณ โลว แดะ ดูอี ตัห กาฌูะ, โลว บูด แตห ฮัม โต็ง, ยี ตู โลว บูด ดีเยณ ดีเยณ.

8 เฆ ดา อี หลู ดี เฌาพรา อี มูห ฆอน อาโรน ตึอน, เฆ โลว บูด เวา ตี. ลอง อัน ตี, แตห เบ โบง แตห อึณ กอ ฌัม โจว หลูก โจว หลาน เบ ดอน โจว ดอน บาน. 9 เซ อึณ มึห ดา ซึก อี ตัห กาโฆห แคง มืง เบ, เซ เบ โลว กาโฆห ดี เฆ, เบ โลว บูด เวา นี, แตห อึณ ดัว ซาดีก ดี โอว. โอว มูห เฌาพรา ปี กรึบ เบ, โอว ดี จอย เบ, แตห เบ ลอด ดี รันซู เบ ตี. 10 ดอ มูห ซีแง โบยว ซีแง เกยา เบ, ซีแง โบง เบ บลอย, บอ ซีแง ลืนโมน, แตห เบ บูด เวา ตี. บอ เซ เบ หลู ปี ดี หลู อี โดะ ดี เงา บอ ปี หลู อี กอย กาฌูะ โฮม รึม, เบ โลว บูด เวา ตี. ดอ อัน ตี โอว ดี บอ โหลห เบ บอ โทม ฮัม เวา ตี บอ จอย เบ. โอว มูห เฌาพรา ปี กรึบ เบ.”

11 เฆ ดูอี อีซาเรลัะ แฮะ เลห แคง มืง แอฆึบ อาดา อู ซีนัม, ดอ ฌัม ซีนัม ฮาอา, มาเฆียน ฮาอา, ซีแง อา ฆึร, อึณอูะ ตึอน บอ กาฆ็อห ดี ทึบ บีก บอด ตึอน. 12 เฆ ดูอี อีซาเรลัะ มืร กาโทะ โดง กอย เฆ ดี นอน ซีนาย ตึอน. อึณอูะ ตี บอ วี ฮาว ฆืด แคง แปร กาฮ็อห โดง จืร พาราน. 13 อึณ มูห ดอ โฆว ดอ กาโทะ ฮาว เฆ โดบ ปี กาลาง เฌาพรา ดี อาโมวแซ ตึอน.

14 ปาย ตี เฆ บอ กาโทะ ฮาว ดอ เหมา, เฆ มืร ฮาว ลาย ดาม ดอน เฌณ ปี คา นี. เฆ ดูอี ครึร อายูดา, เฆ บอ โฆ็ง อาลาม เฆ, แยต ดี อาต อี เฮา. อานาโซน อี มูห ฆอน อามีนาดาบ, อัน บอ แบน อี อึบ อี แยต ครึร อายูดา ตี. 15 อาเนทาเนลา อี มูห ฆอน อาจูอา, อัน บอ แยต ดูอี แคง ครึร อาอีซาคา. 16 อาเอลีอาบ อี มูห ฆอน อาเฮโลน บอ แยต ดูอี แคง ครึร อาเฌบูโลน. 17 เฆ บอ ย็อห เลห บอ ดึห โลง ทึบ บีก บอด ตึอน. หลูกหลาน อาเฆนราโซน ฆาย อาเมนรารี, เฆ บอ กาฆอด ฮาว ครึง ทึบ บีก บอด.

18 วาย ตี ดูอี แคง ครึร อารูเบน อึณโฮม เหมา อึณโฮม อัน บอ โฆ็ง ฮาว อาลาม เฆ. อาเอลีจู อี มูห ฆอน อาเซตูรัะ, อัน บอ แยต ครึร อารูเบน ตี. 19 อาเซลูเมน อี มูห ฆอน อาฌูรีซาเด, อัน บอ อึบ บอ แยต ดูอี ครึร อาซีเมโอน. 20 อาเอลาซาบ อี มูห ฆอน อาตูลา, อัน บอ แบน อี อึบ อี แยต ดูอี ครึร อาฆัด. 21 แฮะ ฮอต ปาย ตี ดูอี อาโมยว อาโควฮาด บอ กาฆอด ครึง แบน โมยว แบน โมยว อี ซีงา บอด ตึอน. นี ดี ฮาว ฌัม เฆ โดง คยัะ กามาย, ดูอี เฆ อี แฮะ แยต ตึอน โลว วี ซัม อูน ทึบ บีก บอด, แตห อึณ ฮอต.

22 วาย ตี ดูอี แคง ครึร อาเอพารีม บอ โฆ็ง อาลาม เฆ ฮาว แบน พึง แบน พึง. อาเอลีซามา อี มูห ฆอน อามีฮูด บอ แบน อี อึบ อี แยต เฆ. 23 อาฆามาเลน อี มูห ฆอน อาเปตาจูรัะ บอ แบน อี อึบ อี แยต ดูอี แคง ครึร อามานาเซ. 24 อาพีดาน อี มูห ฆอน อากีตอนี บอ แบน อี อึบ อี แยต ดูอี แคง ครึร อาเบนยาม.

25 ดูอี แคง ครึร อาดาน บอ เลห ฮาว โฆ็ง อาลาม เฆ แบน พึง แบน พึง. เฆ บอ แบน อี โดบ ดี ปัน ซืด อี ดอน พึง. อาเฮจา อี มูห ฆอน อามีซาเด บอ แบน อี อึบ อี แยต ดูอี ครึร อาดาน ตี. 26 อาบาเฆลา อี มูห ฆอน อาออคารา, อัน บอ แบน อี อึบ อี แยต ดูอี ครึร อาเซน. 27 อาฮีรัะ อี มูห ฆอน อาเอนัน บอ แบน อี อึบ อี แยต ดูอี ครึร อานาบทาลี. 28 อาตี บอ มูห ลอง เฆ ดูอี อีซาเรลัะ กาโทะ บาง โดง คยัะ เฆ. เฆ บอ คยัะ ลาย ดาม พึง เหมา พึง อัน, ครึร เหมา ครึร อัน.

29 อาโมวแซ วี กาลาง ดี อาโฮวบา อี มูห ฆอน อาเรอูเอน. อารูเบน มูห บึร อาโมวแซ ตึอน อี กอย แคง มืง มีดีอาน. อาเรอูเอน บอ จืร อาเยทาโรว. อาโมวแซ ต็อห ดี อัน, “เย ดี ฮาว โดง แปะ แฮะ กาแซณ เฌาพรา ดี ดัว ดี เย. ฮาว แม ฮาว โดบ เย, เย ดี โบง นา หมึอม ดี แม. โคว, เฌาพรา แฮะ ต็อห ดี โบง นา หมึอม ดี เย.”

30 อาโฮวบา วี ต็อห, “โอว ตู ฮาว, โอว ดี วี เวณ แคง มืง บรีม โอว, โดง กอย บีนอง วอแว โอว.”

31 อาโมวแซ ปี วี ต็อห ดี อัน, “แม แกวะ แวน เย, แม มูห อี แฮะ นับ ปี ดี ปาย โลว กอย แคง แปร กาฮ็อห นี. แม แฮะ ปี งาย เย, แฮะ นับ ดี มาโนว เย ลอง อัน ตี. 32 เซ แม ฮาว โดบ เย, แคะ บอ มึห นา บอด ปี ดัว เฌาพรา ดี เย, เย ดี วี กาซาง ดัว บอ ดี แม.”

33 เฆ ดูอี อีซาเรลัะ บอกาเฆลียด แฮะ ฮอต เลห ดี นอน ซีนาย อี มูห นอน โดง กอย เฌาพรา ตี, เฆ บอ ฮาว โดบ อึณเตณ อาดา โอย ซีแง. ฌีดืก เฌาพรา ตึอน บอ แยต ดี อาต เฆ เซเซ, แตห เฆ เหรต โดง ดี คยัะ เฆ. 34 ดอ ฮาว เฆ โดบ อึณเตณ ตี, อึณอูะ เฌาพรา ตึอน บอ กอย กาโรย เฆ ดอ กาแต ซีแง.

35 ดอ กาจูห เฆ ดี ดึห ฮาว ฌีดืก เฌาพรา ตี, อาโมวแซ วี ต็อห, “อึย แม เฌาพรา, โอว หมาณ, แตห แม แยต เย. แตห เฆ รันซู แม เฌา เตา กาย็อห กาเรห ฮาว ดอน บลาก. แตห เฆ อี ฌ็อง แม เฌา เตา แม.”

36 ดอ แฮะ วี ฆืด กอย ฌีดืก เฌาพรา ตี, อาโมวแซ ปี วี ต็อห, “อึย แม เฌาพรา, โอว หมาณ, แตห แม วี ตัห กอย โดง กอย เฆ ดูอี อีซาเรลัะ อี แฮะ กืน แบน หมึณ แบน แซน นี.”