1 วาย แฮะ เลห เฆ ดูอี อีซาเรลัะ แคง มืง แอฆึบ, อึณ แฮะ โนะ อู ซีนัม ดี อู มาเฆียน. ดอ อัน ตี เฌาพรา วี กาลาง ดี อาโมวแซ แคง แปร กาฮ็อห ดี โคบ นอน ซีนาย. 2 อัน ต็อห, “เซ ฮี ฌัม อาคราว อัน, แตห เฆ ดูอี อีซาเรลัะ โบง บลอย โหลห เฆ เฌาพรา ดอ กาโลห อัน กาง เฆ. 3 มาเฆียน ตี ฮี ฌัม ฆึร ดี พวน ซีแง, นา บา ดี อับ, แตห เฆ โบง บลอย ตี, แตห อึณ โดบ แคะ ปี ดัม อูน โอว ดี เบ ลอง บลอย ตี ดอน โมยว.”

4 แฮะ ฮอต, อาโมวแซ วี กาลาง ดี เฆ ดูอี อีซาเรลัะ, แตห เฆ โบง บลอย ตี. 5 ปาย ตี ดอ กอย เฆ แคง แปร กาฮ็อห ดี โคบ นอน ซีนาย ตึอน, ดอ แฮะ ฌัม มาเฆียน ดอ โฆว, ซีแง ฆึร ดี พวน, นา บา ดี อับ, เฆ บอ โบง บลอย ตี. เฆ ดูอี อีซาเรลัะ มืร โบง โดบ โตต ดอน โมยว แคะ ปี จัร เฌาพรา ดี อาโมวแซ.

6 มาแล, อึณ ยี มึห เฆ ดูอี มัง อี อี ตู ปึอน ลึบ บลอย ตี โกบ ตู ซีงา เฆ โมยว อี โดบ ดารา. โคว, เฆ แฮะ ตา ดึร โดว ดูอี ยัม. ซีแง อัน ตี เฆ บอ วี ฮาว โดง กอย อาโมวแซ ฆาย อาโรน, 7 วี ดีหมอด ฆาย ต็อห, “โดว เย ตู ซีงา โกบ แฮะ ตา ดึร เย ดี ดูอี ยัม. เย ยี ซี โดบ เฆ ดูอี อีซาเรลัะ บอกาเฆลียด, หลู ดี เฌาพรา. เหมา อึณ ปาย ปี ตู ปึอน เย โบง ปาย ตี?”

8 อาโมวแซ วี ต็อห ดี เฆ, “แตห เบ หน็อะ, โอว ดี ดีหมอด เฌาพรา, โยว เฌาพรา ดี ต็อห มาเซ ดี เบ.”

9-10 เฌาพรา วี กาลาง ดี อาโมวแซ, แตห อัน กาลาง ดี เฆ ดูอี อีซาเรลัะ ต็อห, “บอ เบ บอ หลูกหลาน เบ, เซ อึณ มึห ดูอี อี ตู ซีงา โกบ แฮะ ตา ดึร อัน โดว ดูอี ยัม, เซ อึณ บอ มึห ดูอี อี ตู ปึอน ดี ลึบ บลอย ตี โกบ แฮะ ฮาว อัน โดบ อึณเตณ, โกบ แฮะ กอย โต็ง อัน, เซ เฆ ยี ซี ลึบ บลอย ตี, 11 แตห เฆ วี โบง บลอย ตี ดอ แฮะ ฌัม ปอ อู มาเฆียน. ดอ ฌัม มาเฆียน ฮาอา, ซีแง ฆึร ดี อึณพวน, นา บา ดี อับ, แตห เฆ โฮม มาบู บอ คามูน อี ตู ฮับ ซีนัม บรัห บอ เดา ซ็อง. 12 ปี ดี โฮม ตี ดอน โมยว, แกวะ แตห อึณ กาโลย ฌัม ปา แคหณา. กาอาง โดว ซัด ตี มืร, เฆ ตู ปึอน กาบัก คอ อู โบ็ง. แตห เฆ โบง บลอย ตี, แตห อึณ โดบ โตต ดอน โมยว แคะ ปี จัร โอว. 13 เซ อึณ ยี มึห ดูอี อี แฮะ ซีงา บอด โดบ ปี ดัม ดารา, อัน มืร ตู ว็อะ ดี เหมา, อัน ยี ตู ซี ลึบ บลอย ตี, อาว ปึอน มาด อัน มูห ดูอี อีซาเรลัะ. โคว, อัน ตู หลู ปี ดี หลู ดี โอว ดอ ฌัม อาคราว อัน. อัน โลว วี คัม หมาบ อัน.

14 เซ อึณ มึห ดูอี อาโมยว เฮา อี กอย กาแต เบ, เซ อัน ซี ลึบ บลอย ตี, แตห อัน โบง โดบ โตต ดอน โมยว แคะ ปี จัร โอว เบ โบง, อึณ บอ มูห แคต บอ มูห ดูอี อาโมยว โอว อาว ต็อห, แคะ ปี โลว โบง เฆ, อึณ บอ มูห อู โมยว.”

15 วาย แฮะ ฮอต เฆ ซัม ทึบ บีก บอด ตึอน, ซีแง ตี อึณ บอ มึห อึณอูะ ตัห ปลึก ทึบ บีก บอด ตี. จูห ซีณ บา ดี อับ กอ ฌัม ปา แคหณา ซีณวัห อึณอูะ ตี ปี เงา. 16 กาแต ซีแง อึณ แบน อึณอูะ อี ปลึก. แคง หมึร อึณ ยี วี แบน ปี เงา. อึณอูะ ยี ปลึก ปาย ตี เซเซ. 17 ดอน เฌณ, เซ อึณอูะ ตี กาฆ็อห ดี ทึบ บีก บอด, เฆ ดูอี อีซาเรลัะ มืร ดี ดีเฆรียบ ดีโฆรม ทึบ บีก เฆ ดอน โมยว, ฮาว โดบ อึณอูะ ตี. อึณอูะ ตี ฮาว ฆืด ดี เหมา. เฆ มืร วี ซัม ทึบ บีก เฆ ดี ตี. 18 ปาย ตี เฆ ดูอี อีซาเรลัะ โบง โดบ ปี จัร เฌาพรา เฆ โบง. เฆ บอ ฮาว บอ คยัะ, แตห อึณ โดบ ปี กาลาง เฌาพรา ดี เฆ. เซ อึณอูะ ตี แฮะ ปลึก ทึบ บีก บอด ตึอน, เฆ มืร วี ลึบ กอย แคง ทึบ เฆ. 19 เซ อึณอูะ ตี ปลึก ทึบ บีก บอด ตึอน, อึณ ปี บอ เหลณ มืร, เฆ ดูอี อีซาเรลัะ ตู กาโทะ ฮาว นา เหมา. อึณ บอ เหลณ แคะ เหมา, เฆ มืร บัร ดี โทม ปี กาลาง เฌาพรา ดี เฆ. 20 มัง เฌณ อึณอูะ ตี ปลึก ทึบ บีก บอด ตึอน อาดา มี อา โอย ซีแง. เฆ ยี คยัะ ดอ กาลาง เฌาพรา บอ กาโทะ ดอ กาลาง เฌาพรา ดี เฆ. 21 มัง เฌณ อึณอูะ ตี ปลึก ทึบ บีก บอด มี บา ดี อับ ฌัม ซีณวัห, แฮะ ฮอต วี อึณโจะ โฮะ. เซ อึณ ปาย ตี เฆ มืร กาโทะ บาง โดง คยัะ เฆ โดบ อึณอูะ ตี อู เฌณ. บอ มูห แคง หมึร, บอ มูห กาแต ซีแง, อึณอูะ ตี โจะ โฮะ ดอ เหมา, เฆ มืร กาโทะ ดอ อัน ตี. 22 อึณ บอ มูห อาดา อา ซีแง, บอ มูห อาดา อู มาเฆียน, บอ มูห อาดา อู ซีนัม, อึณ ปี บอ เหลณ แคะ เหมา อาว ต็อห, เซ อึณอูะ ยี ปลึก ทึบ บีก บอด ตี, เฆ มืร ตู กาโทะ บาง โดง คยัะ เฆ. เซ อึณอูะ แฮะ กาฆ็อห, โจะ โฮะ ดอ เหมา, เฆ มืร กาโทะ บาง โดง คยัะ เฆ ดอ อัน ตี. 23 ปาย ตี เฆ มืร โทม ปี จัร เฌาพรา เฆ โบง ดอน โมยว. ดอ จัร เฌาพรา เฆ กอย, เฆ มืร คยัะ กอย. ดอ จัร เฌาพรา เฆ ฮาว, เฆ มืร กาโทะ ฮาว. เฆ โบง โตต ดอน โมยว แคะ ปี ดัม อูน เฌาพรา ดี อาโมวแซ.