1 เฌาพรา วี กาลาง ดี อาโมวแซ ต็อห, 2 “อานี มูห ดารา ลอง ปี ดี โลว โบง ดูอี อี มึห รอฆา, แตห อัน วี ซีงา. เซ อัน ทาง, รอฆา ตี แฮะ หราย, เฆ โลว ดึห ฮาว อัน โดง กอย ดา อี หลู ดี เฌาพรา. 3 ดา อี หลู ดี เฌาพรา โลว ดึห เลห อัน นา เรต โดง คยัะ เบ, โลว วี ยอด แคม โดว อัน. 4 เซ รอฆา อัน อี นับ ดี แบร, นับ ดี ลาย โฮะ แฮะ หราย, ดา อี หลู ดี เฌาพรา โลว จัร ดูอี อู วี, แตห อัน ดึห มาซีม อีม อี ซีงา อาดา อา โดว บอ เฮ อารีด บอ เซณ เรณ แฆ บอ กาแดะ เดา ฮูโซบ, แตห ดา อี หลู ดี เฌาพรา ปึอน ดี โบง ปี โลว โบง อัน, แตห ดูอี เซา ตี วี ซีงา. 5 ดา อี หลู ดี เฌาพรา โลว วี ดัม อู วี, แตห อัน ซัวะ แมง มาซีม อาดา อู โดว แดง กาโละ กาดาย ปี ฮับ เฆ อึม ซีงา ปี ต็อะ ตัห เฆ แคง อึม คึม. 6 ดา อี หลู ดี เฌาพรา โลว วี ดึห มาซีม อี หณัม ยัม ตึอน บอ เฮ อารีด บอ เซณ เรณ แฆ บอ กาแดะ เดา ฮูโซบ ตึอน, วี จึบ แคง หนาม มาซีม อี มูห โดว แปะ แฮะ ง็อห เฆ ตึอน. 7 อัน บอ โลว วี คร็อห หนาม ตี ดี ดูอี อี ดึอม มึห รอฆา อาดา บู เฌณ. แฮะ ฮอต ปาย ตี แฮะ ปึอน ต็อห, ดูอี ตี แฮะ ซีงา. มาซีม อี ซี อีม ตึอน โลว เบลห แตห อัน บึณ ฮาว แคง กาฆลัะ.

8 แฮะ ฮอต, ดูอี วี ตี โลว ลัห ครึง อัน, ฆาะ โตต ฮึก ฆีณ อัน บอ ตา อึม. ฮี ฮอต ปาย ตี อัน แฮะ ซีงา. วาย ตี อัน แฮะ วี ปึอน ลึบ โดง คยัะ เฆ ดูอี อีซาเรลัะ. มาแล, อัน โลว กอย นา เรต ทึบ อัน อาดา บู ซีแง. 9 ดอ ฌัม ซีแง อึณบู, อัน โลว ฆาะ ฆีณ, ฆาะ ดีโมห, ฆาะ ฮึก งาย อัน. ฆาะ ฮึก ดอน โมยว แคะ มึห ดี โดว อัน, ตา บอ อึม, แตห อัน วี ซีงา.

10 ฮี ฌัม ซีแง อึณดา, อัน โลว ดึห ฆอน มาบู อาโล็ง อา โดว อี ตู มึห โดง เช โดง แน, บอ มาบู อาหยาง อี หณัม โนะ อู ซีนัม, อี ตู มึห โดง เช โดง แน. อัน โลว ดึห บอ กาแปะ เคาคยูง อี แฮะ ฮอต กาวัร นามัน อาดา โอย โอวมา อี มูห กาบัก พวน แบล ดี อู ควาก. อัน โลว ดึห ตัห บอ นามัน อู คัน, ดัว โตต ดี ดา อี หลู ดี เฌาพรา. 11 ดา อี หลู ดี เฌาพรา โลว ตึย ดูอี ตี บอ ปี ดี หลู อัน ตี, ฮาว ดี บาง มาโลห ทึบ บีก บอด, อาบ โตต ดี เฌาพรา.

12 ปัน ตี ดา อี หลู ดี เฌาพรา โลว ดึห ฆอน มาบู อี มูห ฆอน อาโล็ง อาดา อู โดว บอ นามัน อู คัน ตึอน, หลู ดี เฌาพรา, แตห อึณ แบน ปี หลู อี ดี ฆ็อห แวน แปะ แฮะ กาลึบ ดูอี ตึอน. อัน โลว มาวัด วีว มาวัด เวณ ปี หลู ตี, แตห อึณ แบน ปี หลู อี มาวัด วีว มาวัด เวณ ดี เฌาพรา. 13 ดา อี หลู ดี เฌาพรา โลว ซัวะ แมง มาบู ตี ดี โดง ซีงา บอด, อี มูห โดง ง็อห เฆ โดว ปี หลู อี แตห เฌาพรา ฆ็อห แวน หมาบ บอ ปี หลู เฆ อี โดะ ดี เงา. ปี หลู อี ฆ็อห แวน แปะ แฮะ กาลึบ อี บอ ปี หลู อี แตห เฌาพรา ฆ็อห แวน หมาบ อี, อึณ มูห อู โมยว. อึณ แฮะ แบน อาดา ดา อี หลู ดี เฌาพรา. แฮะ ซีงา บอด กาเซา. 14 ดา อี หลู ดี เฌาพรา โลว ดึห หนาม มาบู ตี มัง กาล็อะ, วี พ็อห ดี อาโหยะ บอ กานู มา เจณ, กานู มา แด บลาก อาอัห ดูอี อี ดึอม มึห รอฆา ตึอน. 15 แฮะ ฮอต, ดา อี หลู ดี เฌาพรา โลว ดึห นามัน อู คัน ตึอน มัง กาล็อะ, วี ฮูห แดง แด อัน บลาก อาฆัะ. 16 อัน โลว วี ดึห กานู ปูต อัน บลาก อาอัห, วี จึบ แคง นามัน อี กอย แคง กาบา แด อัน, วี กาเทต นา อาต เฌาพรา บู เฌณ. 17 อัน โลว วี ดึห นามัน อี ซี กอย แคง กาบา แด อัน มัง กาล็อะ, บอ หนาม ฆอน มาบู ตึอน มัง กาล็อะ, วี พ็อห ดี อาโหยะ บอ ดี กานู มา แด, กานู มา เจณ บลาก อาอัห ดูอี อี แฮะ ดึอม มึห รอฆา ตึอน. 18 นามัน อี ซี ฆีด แคง กาบา แด อัน, อัน โลว วี ฮูห แดง ฆีณ ดูอี ตึอน. ดา อี หลู ดี เฌาพรา โลว โบง ปาย ตี ดี อาต เฌาพรา, แตห ดูอี ตึอน วี กาล็อะ ดี เฌาพรา.

19 วาย อัน ตี ดา อี หลู ดี เฌาพรา โลว หลู ปี หลู อี แตห เฌาพรา ฆ็อห แวน หมาบ, แตห ดูอี อี ดึอม มึห รอฆา วี แบน ดูอี อี ซีงา โดบ ปี ดัม ดารา. วาย ตี, อัน โลว วี ซัวะ แมง โดว อี แบน ปี หลู อี โดะ ดี เงา. 20 อัน โลว วี หลู โดว ตี โดบ ปี หลู อี มูห ดีฆาว แบน โมยว แบน โมยว, หลู โตต แดง กาโช็ง หลู ตึอน. ดา อี หลู ดี เฌาพรา โลว โบง ฌึร ตี, แตห ดูอี เซา ตึอน วี กาล็อะ ดี เฌาพรา. แฮะ ฮอต, ดูอี ตึอน แฮะ แบน ดูอี ซีงา.

21 มาแล, เซ ดูอี วี ตี มูห ดูอี ฆีน, เซ อัน ตู มึห แคะ ปี โลว หลู ฌึร ตี ดอน โมยว, แตห อัน ดึห มี ฆอน มาบู อาโล็ง อู โดว, แตห อึณ แบน ปี หลู อี ฆ็อห แวน ปี กาลึบ อัน. อัน โลว ดึห บอ กาแปะ เคาคยูง อี แฮะ ฮอต กาวัร นามัน อาดา อู โอวมา.^a อัน โลว ดึห บอ นามัน อู คัน. ปี ดี หลู ตี ดา อี หลู ดี เฌาพรา โลว มาวัด วีว มาวัด เวณ ดี อาต เฌาพรา. 22 อัน โลว ดึห บอ มาโบลย อา โดว. เซ อาว มูห มาโบลย มืร, ปึอน ดึห มาโบลย แปร อา โดว. อู โดว แตห อึณ แบน ปี หลู อี ฆ็อห แวน หมาบ. ปอ อู โดว แตห อึณ แบน ปี หลู อี โดะ ดี เงา.

23 ดอ ฌัม ซีแง อึณดา, ดูอี ตี โลว ดึห ตัห ฌึร ตี ดอน โมยว นา อาต มาโลห ทึบ บีก บอด. 24 ดา อี หลู ดี เฌาพรา โลว ดึห ฆอน มาบู บอ นามัน ตึอน หลู, แตห อึณ แบน ปี หลู อี มาวัด วีว มาวัด เวณ. 25 อัน โลว ซัวะ แมง ฆอน มาบู ตี, วี ดึห หนาม อัน มัง กาล็อะ, วี พ็อห ดี อาโหยะ บอ ดี กานู มา แด, กานู มา เจณ บลาก อาอัห ดูอี ตึอน. 26 อัน โลว ดึห นามัน ตึอน มัง กาล็อะ, ฮูห แคง กาบา แด อัน บลาก อาฆัะ, 27 วี ดึห กานู ปูต อัน, จึบ แคง หนาม อี กอย แคง กาบา แด อัน ตี, วี กาเทต ดี อาต เฌาพรา บู เฌณ. 28 แฮะ ฮอต ปาย ตี อัน โลว ดึห นามัน มัง กาล็อะ, พ็อห ดี อาโหยะ บอ ดี กานู มา แด, กานู มา เจณ บลาก อาอัห ดูอี ตึอน.

29 นามัน อี ซี ฆีด แคง กาบา แด อัน ตึอน, อัน โลว ฮูห แดง ฆีณ ดูอี ตี. อัน โลว โบง ปาย ตี แตห ดูอี ตึอน วี กาล็อะ ดี เฌาพรา. 30 ปัน ตี อัน บอ โลว ดึห มาโบลย. เซ อาว มูห มาโบลย, โลว ดึห มาโบลย แปร, ตัห หลู แคะ แป อัน ดี หลู. 31 อู โดว, แตห อึณ แบน ปี ดี หลู อี ฆ็อห แวน หมาบ. ปอ อู โดว, แตห อึณ แบน ปี หลู อี โดะ ดี เงา. ปี หลู ตี โลว หลู โดบ ปี หลู ดีฆาว แบน โมยว แบน โมยว. ปาย ตี ดา อี หลู ดี เฌาพรา โลว โบง แตห ดูอี ตึอน วี กาล็อะ ดี เฌาพรา. 32 อาตี มูห ดารา ลอง ดูอี ฆีน อี มึห รอฆา ดี ฮูน อี นับ ดี แบร, นับ ดี ดึก ดี อี เฮา. เซ อัน ตู แป ดี หลู กืน, แตห อัน หลู แคะ ตี.”

33 เฌาพรา ปี วี กาลาง ดี อาโมวแซ ฆาย อาโรน. 34 อัน ต็อห, “เซ เฆ ดูอี อีซาเรลัะ กอย แคง มืง กานัณ อี มูห มืง ปี ดี อาบ ดัว โอว ดี เฆ, เซ โอว ดี บอ แตห กาดีห อู โมยว ดึก ดี กาง ดูอี อู วี, เซ อัน บอ ยึร ลอง อัน ตี, 35 อัน โลว ฮาว กาลาง ลอง อัน ตี ดี ดา อี หลู ดี เฌาพรา ต็อห, ‘โอว ทาง แฮะ มึห กาดีห อี เลห ดี กาง เย.’ 36 ปัน ตี ดา อี หลู ดี เฌาพรา โลว จัร เฆ โทะ เลห โตต โกรว เฆ อาต ฮาว ยอด อัน กาดีห อี ดึก ดี กาง ตี, โยว บอ โกรว เฆ ตี ดี แบน โตต อี ตู ซีงา. วาย ตี, อัน โลว วี ฮาว ลึบ ยอด แคง กาง ตี. 37 อัน โลว ฮาว ยอด แคม อี โบว แบน แคง กาง ตี. เซ กาซืร ตี แฮะ เงียน เงียน, เรณ เรณ, แฮะ แหนน ดี ลึบ ฮาว แคง แรง, 38 ดา อี หลู ดี เฌาพรา โลว เลห เรต กาง ตี. วี กาบีด รีด, แกวะ แตห อี ลึบ อาดา บู ซีแง. 39 เซ ฌัม ซีแง อึณบู, อัน โลว วี ฮาว ยอด ปอ อู เฌณ. เซ กาซืร ตี แฮะ แว แบร ตาง, 40 อัน โลว จัร อี ดึห เลห มาว ดี แรง โดง กาดีห ตี, วี ฮาว แวน นา เรต มืง โดง ตู ซีงา. 41 วาย ตี, โลว ฆาะ แวน ทูน แปะ แฮะ พ็อห เฆ ดี แรง ดอน โปละ. กาปูห ปี ฆาะ เลห เฆ ตี เฆ โลว วี ฮาว แวน นา เรต มืง โดง ตู ซีงา. 42 แฮะ ฮอต ปาย ตี เฆ โลว วี ดึห มาว กามาย, วี ฮับ กาซืร กาเดา ตึอน, วี ดึห ทูน กามาย พ็อห ดี แรง กาง ตี ดอน โปละ.

43 เซ กาดีห ตี วี โบว แบน ดี แรง โดง แฮะ ฮอต ปลูะ เฆ มาว กามาย บอ โดง แฮะ พ็อห เฆ ทูน กามาย ตึอน, ดา อี หลู ดี เฌาพรา โลว ฮาว ยอด, ฮาว งึอบ ปอ อู เฌณ. 44 เซ กาดีห ตี แฮะ แว แบร ตาง, กาง ตี อาว ฮู ซีงา. 45 เฆ โลว ปยาต แวน กาง ตี, ดึห แวน มาว เฆ เฮ บอ ปูน ตึอน, วี ฮาว แวน โดง ตู ซีงา นา เรต มืง. 46 ดอ กาบีด อูน เฆ มาโลห กาง ตี, เซ อึณ มึห ดูอี อี ฮาว ลึบ แคง กาง ตี, อัน อาว ฮู ซีงา ฌัม บา ดี อับ. 47 อาเซ อีด แคง กาง ตี บอ โฮม ปี ดี โฮม แคง กาง ตี, อัน โลว วี ลัห ครึง ตา อัน. 48 มาแล, เซ ดา อี หลู ดี เฌาพรา วี ตัห ยอด แคม กาซืร โบว แบน กาดีห ตึอน, เซ กาดีห ยี ตู แบร ตาง โดง แฮะ พ็อห กามาย เฆ ทูน ตึอน โกบ แฮะ หราย กาดีห ตี, อัน แฮะ ปึอน ต็อห, กาง ตี แฮะ ซีงา. 49 ปี ดี ปาย เฆ ดี โบง แตห กาง ตี วี ซีงา โดบ ปี ดัม ดารา, อึณ ปาย นี. เฆ โลว ดึห ตัห มาซีม อา โดว บอ เฮ อารีด บอ เซณ เรณ แฆ บอ กาแดะ เดา ฮูโซบ. 50 ดา อี หลู ดี เฌาพรา โลว ดึห มาซีม อาดา อู โดว, ซัวะ แมง อัน แดง กาโละ กาดาย อี มึห อึม ซีงา, ปี ต็อะ ตัห เฆ แคง อึม คึม. 51 ปาย ตี อัน โลว ดึห ยัง เฮ อารีด, บอ เซณ เรณ แฆ, บอ กาแดะ เดา ฮูโซบ, บอ มาซีม อี ซี อีม ตึอน, วี จึบ โตต แคง หนาม โดว แปะ แฮะ ง็อห เฆ ตึอน, จึบ บอ แคง อึม ซีงา ตึอน, วี คร็อห แคง กาง ตี บู เฌณ. 52 ปาย ตี อัน โลว โบง แตห กาง ตี วี ซีงา โดบ ปี ดัม ดารา. อัน โลว ดึห หนาม มาซีม, อึม ซีงา, มาซีม อีม, เฮ อารีด, กาแดะ เดา ฮูโซบ บอ เซณ เรณ แฆ. 53 วาย ตี, อัน โลว วี เบลห มาซีม อีม ตึอน, แตห อัน บึณ ฮาว แคง กาฆลัะ นา เรต มืง. ดา อี หลู ดี เฌาพรา โลว โบง ปาย ตี แตห เฌาพรา ฆ็อห แวน อี ตู หมึอม แคง กาง ตี. แฮะ ฮอต, กาง ตี มืร แฮะ วี แบน กาง ซีงา โดบ ปี ดัม ดารา.”

54 อาตี อึณ มูห ดารา ลอง รอฆา อี ดึก ดี ฮูน อี นับ ดี แปร, นับ ดี โฮะ ดี อี เฮา. 55 อึณ บอ มูห บอ ลอง กาดีห อี นับ ดี ดึก ดี ครึง ตา, บอ กาดีห อี ดึก ดี กาง. 56 อึณ บอ มูห บอ ลอง บึบ, บอ เหรา, บอ ลูพึอก ฌึร ตี ดอน โมยว. 57 ดารา ตี ดี แตห อี ซูงพยาด, แตห อี นับ ฌึร เหมา แฮะ อี ซีงา, ฌึร เหมา ตู ซีงา.