คาน 15
ลอง โมยว อี แตห อีบึณ อีมาย ตู ซีงา
1 เฌาพรา วี จัร อาโมวแซ ฆาย อาโรน แตห ฆาย กาลาง ดี เฆ ดูอี อีซาเรลัะ ต็อห, 2 “เซ อีมาย มึห อี รอต อี ฌึอม เลห ดี ลัะคานา อัน, อี ฌึอม เลห ตี แตห วี ตี ตู ซีงา บอด โดบ ปี ดัม ดารา. 3 อี ฌึอม เลห ตี, บอ มูห อึณรอต ฌึอม เลห, บอ มูห อี อึณกัง, อึณ แตห ดูอี วี ตี ตู ซีงา.
4 กาโช็ง โดง แฮะ ดึอม อีด อัน, บอ แปะ แฮะ ตูต อัน ดอน โมยว อาว ซีงา. 5 อาเซ วี ตา ดึร ตา ปา กาโช็ง อีด ตี, อัน โลว วี ลัห ครึง อัน, ตา บอ อึม. อัน มืร ตู ซีงา ฌัม บา ดี อับ. 6 เซ ดูอี ปอ อู วี วี ตูต ดี โดง ตูต วี ตี, บอ อัน ตู ซีงา ฌัม บา ดี อับ. อัน โลว ลัห ครึง อัน, ตา บอ อึม.
7 อาเซ ตา ดึร ตา ปา ดูอี อี แฮะ แบน ฌึร ตี, บอ อัน โลว วี ลัห ครึง อัน, ตา บอ อึม. อัน มืร ตู ซีงา ฌัม บา ดี อับ.
8 ดูอี อี มึห อี ฌึอม เลห ตี, เซ อัน ปัต, อึม ปัต อัน วี ดึร ดูอี อี ซีงา, ดูอี ตี โลว วี ลัห ครึง อัน, ตา บอ อึม. อัน มืร ตู ซีงา ฌัม บา ดี อับ.
9 กอบ ปี ป็อะ ปี ตูต ดูอี อี มึห เซา ฌึร ตี แฮะ แบน โตต อี ตู ซีงา. 10 อาเซ วี ตา ดึร ครึง แปะ แฮะ ตูต อัน, บอ มูห มาเซ อาว ต็อห, อึณ ตู ซีงา ฌัม บา ดี อับ. ดูอี อี วี ดึห ฮาว ครึง อัน ตึอน มืร, อัน โลว วี ลัห ครึง อัน, ตา บอ อึม. อึณ แฮะ แบน ตู ซีงา ดี อัน ฌัม บา ดี อับ.
11 เซ ดูอี มึห อี ฌึอม เลห ดี อัน ตี, ตู บาย แด อัน, วี ปา อี เฮา, บอ ดูอี ปี ปา อัน ตี โลว วี ลัห ครึง อัน, ตา บอ อึม. อัน ตู ซีงา ฌัม บา ดี อับ.
12 กาโละ กาดาย ดอน โบ็ง, เซ ดูอี ตี ฮี ตา ดึร, โลว มัห กาลาต. เซ อึณ ยี มูห อึณปาน เฮ แปะ แฮะ ตา ดึร ตา ปา อัน, โลว วี โคต, วี บาย แวน.
13 วาย แฮะ ฮอต หราย รอฆา อี ฌึอม เลห ดี ดูอี ตึอน, อัน โลว บัร อาดา บู ซีแง. แฮะ ฮอต, อัน โลว วี ฮาว ตา อึม, ลัห บอ ครึง อัน แคง อึม อี แหล. วาย อัน ตี อัน แฮะ วี ซีงา โดบ ปี ดัม ดารา. 14 ฮี ฌัม ซีแง อึณดา, อัน โลว ดึห ตัห มาโบลย อา โดว. เซ อาว มูห มาโบลย, แตห อัน ดึห มาโบลย แปร อา โดว, ดึห ฮาว ดี อาต เฌาพรา ดี บาง มาโลห ทึบ บีก บอด, ดัว ดี ดา อี หลู ดี เฌาพรา. 15 ดา อี หลู ดี เฌาพรา โลว ดึห มาซีม ตึอน อู โดว, หลู ดี เฌาพรา, แตห อึณ แบน ปี หลู อี แตห เฌาพรา ฆ็อห แวน หมาบ ดูอี ตึอน. อัน โลว หลู ปอ อู โดว, แตห อึณ แบน ปี หลู อี โดะ ดี เงา. อัน โลว โบง ปาย ตี แตห อัน วี ลาย กาล็อะ ดี เฌาพรา วาย แฮะ ฮอต มึห อัน อี ฌึอม เลห ดี โดว อัน.
16 เซ อีมาย ปีเลห อึม โกรว อัน, อัน โลว วี ตา อึม บอ โดว. อัน มืร ตู ซีงา ฌัม บา ดี อับ. 17 ครึง ปี ตา ปี ชึบ อัน บอ มูห บีก, บอ มูห ด็อะ, บอ มูห ฮูน โดว ซัด, เซ อึม โกรว อัน ตี แฮะ ตา ดึร, โลว วี ลัห บาย แวน. ครึง ตี ตู ซีงา ฌัม บา ดี อับ.
18 วาย แฮะ ฮอต ลาย ลาย อีบึณ อีมาย, ฆาย บอ วี โลว วี ตา อึม. แฮะ แบน ตู ซีงา ฌัม บา ดี อับ.
19 เซ อีบึณ มึห ครึง กาปลูะ, อัน ตู ซีงา โดบ ปี ดัม ดารา อาดา บู ซีแง. อาเซ ตา ดึร ตา ปา อัน, อัน มืร ตู ซีงา ฌัม บา ดี อับ.
20 ครึง ตา แปะ แฮะ ตูต แปะ แฮะ อึณเบว อัน ดอ อัน ตี แฮะ แบน โตต อี ตู ซีงา. 21 อาเซ วี ตา ดึร กาโช็ง อีด อัน, อัน โลว วี ลัห ครึง อัน, ตา บอ อึม. อัน มืร ตู ซีงา ฌัม บา ดี อับ. 22 ดูอี อี วี ตา ดึร โดง แปะ แฮะ ฮอต อัน ตูต, ดูอี ตี โลว วี ลัห ครึง อัน, ตา บอ อึม. อัน มืร ตู ซีงา ฌัม บา ดี อับ. 23 บอ กาโช็ง อีด อัน ตี, บอ แปะ แฮะ ตูต อัน ดอน โมยว, อาเซ วี ตา ดึร, อัน ตู ซีงา ฌัม บา ดี อับ.
24 เซ อีมาย อีด โดบ อีบึณ ดอ มึห อัน ครึง กาปลูะ, อี ตู ซีงา อีบึณ ตี แฮะ วี ดึก ดี อัน. อัน มืร ตู ซีงา อาดา บู ซีแง. บอ กาโช็ง อีด อัน ตู ซีงา.
25 เซ อีบึณ มึห หนาม ฌึอม แหล เลห ดอ ตู มึห อัน ครึง กาปลูะ, เซ หนาม บอ ฌึอม เลห เหลณ หลึอม ดอ มึห อัน ครึง กาปลูะ, อัน ตู ซีงา อาดา ดอ ฌึอม เลห หนาม ตี ดี อัน. อัน ตู ซีงา ปี ดอ มึห อัน ครึง กาปลูะ ตึอน. 26 กาโช็ง โดง อีด อัน บอ แปะ แฮะ ตูต อัน ดอ มึห อี ฌึอม เลห ดี อัน ตี, ตู ซีงา ปี ดอ มึห อัน ครึง กาปลูะ. 27 อาเซ วี ตา ดึร ครึง ตา ฌึร ตี, บอ อัน ตู ซีงา. อัน โลว วี ลัห ครึง อัน, ตา บอ อึม. อัน ตู ซีงา ฌัม บา ดี อับ.
28 วาย แฮะ ฮอต ฆืด หนาม อัน ตี, อีบึณ ตี โลว วี บัร อาดา บู ซีแง. แฮะ ฮอต, อัน วี แบน อี ซีงา. 29 ฮี ฌัม ซีแง อึณดา, อัน โลว ดึห มาโบลย อา โดว. เซ อาว ปาย ตี มืร, ดึห มาโบลย แปร อา โดว, ฮาว โดง กอย ดา อี หลู ดี เฌาพรา ดี โคบ มาโลห ทึบ บีก บอด. 30 ดา อี หลู ดี เฌาพรา โลว ดึห มาโบลย ตี อาดา อู โดว, หลู แตห อึณ แบน ปี หลู อี แตห เฌาพรา ฆ็อห แวน หมาบ. อัน โลว หลู ปอ อู โดว, แตห อึณ แบน ปี หลู อี โดะ ดี เงา. ปาย ตี ดา อี หลู ดี เฌาพรา โลว โบง, แตห อีบึณ ตี วี ลาย กาล็อะ ดี เฌาพรา วาย แฮะ มึห อัน หนาม ฌึอม เลห ตึอน.
31 ปาย ตี เบ โลว ซาดีก, แกวะ แตห เฆ ดูอี อีซาเรลัะ โบง แบน โมยว แบน โมยว อี แตห เฆ ตู ซีงา, แตห เฆ ปี กาดาต โดง กอย โอว อี กอย กาแต โดง กอย เฆ. เซ เฆ ตู โรวเซ โดง กอย โอว, โยว เฆ ยัม โกบ ตู ซีงา เฆ โมยว อี โดบ ดารา.”