1 เฌาพรา วี กาลาง ดี อาโมวแซ ฆาย อาโรน ต็อห, 2 “เซ ดูอี อู วี มึห บึบ, มึห เหรา, มึห เซา อี นับ ดี แบร, โยว อึณ มูห โมยว อี นับ ดี ดึก ดี อี เฮา, โลว แดะ ดูอี วี ตี ฮาว ณืร อาโรน. เซ อาว ปาย ตี โลว ณืร ฆอน อัน อี มูห ดูอี หลู ดี เฌาพรา. 3 ดา อี หลู ดี เฌาพรา โลว ยอด แคม. เซ ฮึก อี ลัต กาซืร ดีม ตี ยี ลูย บอ ฮูน ดีโฆละ กาซืร ตี, อึณ มูห รอฆา อี นับ ดี แบร, นับ ดี ดึก. ดา อี หลู ดี เฌาพรา โลว ต็อห ดูอี ตี, อัน ตู ซีงา โดบ ปี ดัม ดารา. 4 เซ ฮูน กาซืร ดีม ตี ยี ลูย, เซ อึณ ยี ตู ดีโฆละ, ฮึก กาซืร ตี มืร ตู ลูย, แตห ดา อี หลู ดี เฌาพรา คร็อง อูน ดูอี วี ตี อาดา บู ซีแง. 5 เซ แฮะ โนะ บู ซีแง, ดา อี หลู ดี เฌาพรา โลว วี ยอด. เซ รอฆา อี เลห ดี ฮูน อัน ตี ตู บลืง, เซ อึณ ตู ตาง ตู โยม, อัน ดี วี โลว คร็อง อัน ปอ บู ซีแง. 6 เซ แฮะ โนะ บู ซีแง ตี, ดา อี หลู ดี เฌาพรา ตึอน โลว วี ยอด แคม ปอ อู เฌณ. เซ โดง ดีม ตี แฮะ กาฮ็อห เฮณ, อาว ฮู ฆลาม แบร ปอ อึณ ปัว, ดา อี หลู ดี เฌาพรา แฮะ ปึอน ต็อห, ดูอี ตี แฮะ ซีงา. อึณ เหรา ปีเยณ. ดูอี วี ตี โลว ลัห ครึง อัน, แตห อัน วี ซีงา โดบ ปี ดัม ดารา. 7 มาแล, วาย แฮะ ฮอต ต็อห ดา อี หลู ดี เฌาพรา, ดูอี วี ตี แฮะ ซีงา, เซ เหรา อัน วี กาปลูห, วี แบร ตาง, อัน โลว วี ฮาว บยัะ โดว อัน ดี ดา อี หลู ดี เฌาพรา ปอ อู เฌณ. 8 ดา อี หลู ดี เฌาพรา โลว วี ยอด แคม. เซ เหรา อัน ตี วี แบร กืน, อัน โลว ต็อห, ดูอี ตี อาว ซีงา. อึณ มูห รอฆา อี นับ ดี แบร, นับ ดี ดึก ดี อี เฮา.

9 เซ ดูอี มึห รอฆา อี เลห ดี ฮูน อัน อี นับ ดี ดึก ดี อี เฮา, เบ โลว แดะ ฮาว อัน โดง กอย ดา อี หลู ดี เฌาพรา. 10 ดา อี หลู ดี เฌาพรา ตี โลว ยอด แคม. เซ อึณ มึห บึบ อี ลูย, วี แตห บอ ฮึก อัน ลูย, ยัง อัน มืร เจว เรณ กาเซา, 11 อาตี แฮะ มูห รอฆา อี นับ ดี ดึก, นับ ดี แบร. ดา อี หลู ดี เฌาพรา โลว ต็อห, ดูอี วี ตี อัน ตู ซีงา. อาว ฮู โลว คร็อง อูน. โคว, แฮะ ฮอต นับ, อัน ตู ซีงา.

12 เซ รอฆา อัน ตี แฮะ ฆลาม กาลัยะ ดี อัน บอ โดว, จูห ดี ฆีณ กอ ฌัม เปลา, 13 ดา อี หลู ดี เฌาพรา โลว วี ยอด แคม ปอ อู เฌณ. เซ แฮะ ยึร, รอฆา ตี แฮะ วี แบร กาลัต บอ โดว, อัน โลว ต็อห, ดูอี วี ตี แฮะ วี ซีงา. โคว, อัน แฮะ วี ลูย บอ โดว, แฮะ วี แบน อี ซีงา ดี อัน. 14 เซ บึบ ตี ยี บรัห, ยัง อัน มืร เรณ, อัน ตู ซีงา. 15 เซ ดา อี หลู ดี เฌาพรา ยึร, บึบ ดีม ตี แฮะ บรัห, ยัง มืร เรณ, อัน โลว ต็อห ดูอี วี ตี ตู ซีงา. เซา บึบ บรัห บอ ยัง เรณ ตี, อึณ มูห รอฆา อี นับ ดี ดึก, นับ ดี แบร. อึณ ตู ซีงา. 16 มาแล, เซ ยัง เรณ ตี วี บยอง, วี ลูย, ดูอี วี ตี โลว วี ฮาว โดง กอย ดา อี หลู ดี เฌาพรา. 17 ดา อี หลู ดี เฌาพรา โลว วี ยอด ปอ อู เฌณ. เซ ดีม อัน โดง บึบ ตี วี ลูย, อัน แฮะ ซีงา. ดา อี หลู ดี เฌาพรา โลว ต็อห, ดูอี ตี แฮะ วี ซีงา.

18 เซ อึณ ยี มึห ดูอี อี แฮะ มึห บึบ อี แฮะ หราย, 19 วาย ตี วี แบน บึบ ลูย, เซ อาว ปาย ตี กาซืร ตี วี ลูย เรณ, อัน โลว วี ฮาว โดง กอย ดา อี หลู ดี เฌาพรา. 20 ดา อี หลู ดี เฌาพรา โลว ยอด ซีคยา. เซ กาซืร ดีม ตี แหนน แฮะ แว ควาก ตาง, ฮึก อัน มืร ลูย, อัน โลว ต็อห, ดูอี วี ตี อาว ซีงา. อึณ มูห รอฆา อี นับ ดี แบร, นับ ดี ดึก ดี อี เฮา อี ตัห ดี บึบ ตึอน. 21 มาแล, เซ ดา อี หลู ดี เฌาพรา แฮะ ฮอต ยอด แคม, เซ ฮึก อัน กาซืร ดีม ตี มืร ตู ลูย, ดีม แคง ฮูน มืร อาว ลึก, อาว ฮู เรณ, ดา อี หลู ดี เฌาพรา โลว วี คร็อง อูน ดูอี ตี อาดา บู ซีแง. 22 ดอ อัน ตี, เซ กาซืร ดีม วี แบร กืน, ดา อี หลู ดี เฌาพรา โลว ต็อห, ดูอี ตี ตู ซีงา. อึณ มูห รอฆา อี นับ ดี ดึก, นับ ดี แบร ดี อี เฮา. 23 มาแล, เซ กาซืร ดีม ตี ยี ตู บลืง, ตู แบร กืน, อึณ มูห ปลา ดีม ปาย ตี. ดา อี หลู ดี เฌาพรา แฮะ ปึอน ต็อห, อัน แฮะ ซีงา.

24 เซ อึณ ยี มึห ดูอี อี แฮะ บลูห ดี เงา, แฮะ แบน ดีม ดี โดว อัน, กาซืร ดีม ตี วี เลห อี ลูย, อี ลูย เรณ, 25 ดา อี หลู ดี เฌาพรา โลว ยอด แคม. เซ ฮึก กาซืร ตี มืร ลูย, ดีม ตี แฮะ ราม ลึก, อึณ มูห รอฆา อี นับ ดี แบร, นับ ดี ดึก, อี ตัห ดี ดีม อี บลูห ดี เงา ตึอน. ดา อี หลู ดี เฌาพรา โลว ต็อห, ดูอี วี ตี ตู ซีงา. 26 มาแล, เซ ฮึก กาซืร ตี ตู ลูย, ดีม มืร ตู โลง ลึก, อาว ฮู เรณ, ดา อี หลู ดี เฌาพรา โลว คร็อง อูน ดูอี วี ตี อาดา บู ซีแง. 27 เซ แฮะ ฮอต โนะ บู ซีแง, ดา อี หลู ดี เฌาพรา โลว วี ยอด แคม ปอ อู เฌณ. เซ กาซืร ดีม ตี แฮะ แบร, อัน โลว ต็อห, ดูอี ตี ตู ซีงา. 28 มาแล, เซ กาซืร ตี ตู บลืง, ตู แบร ตาง, อาว ฮู เรณ, อึณ ตู มูห รอฆา อี นับ ดี แบร, นับ ดี ดึก. ดา อี หลู ดี เฌาพรา แฮะ ปึอน ต็อห, ดูอี วี ตี แฮะ ซีงา. โคว, อึณ มูห ดีม บลูห ดี เงา ปีเยณ.

29 เซ อึณ มึห อีบึณ อีมาย อี มึห โดง เซา ดี ฆีณ, เซา ดี กูงกาบ, 30 ดา อี หลู ดี เฌาพรา โลว ยอด แคม. เซ ฮี แหนน ดี เซา แคง ยัง, ฮึก กาซืร ตี มืร เดณ เดณ, ฮึก ฆีณ อัน มืร ฮาง, อึณ มูห รอฆา อี นับ ดี ดึก, นับ ดี แบร. อัน โลว ต็อห, ดูอี วี ตี ตู ซีงา. 31 เซ ดา อี หลู ดี เฌาพรา ยี ยอด แคม กาซืร ตี, เซ ดีม ตู โลง แคง ยัง, ฮึก ยี ตู ว็อง, อัน โลว ดึห คร็อง ดูอี ตี อาดา บู ซีแง. 32 เซ ฮี โนะ บู ซีแง, ดา อี หลู ดี เฌาพรา โลว วี ยอด ซีคยา. เซ กาซืร ตี อาว ฮู แบร ตาง, อาว มึห ฮึก เดณ, อาว แหนน ดี โลง แคง ยัง, 33 เฆ โลว ฆาะ แวน ฮึก ฆีณ อัน ตี. ดา อี หลู ดี เฌาพรา โลว วี คร็อง อูน อัน ปอ บู ซีแง. 34 เซ ยี โนะ บู ซีแง ตี, ดา อี หลู ดี เฌาพรา โลว วี ยอด กาซืร ดีม, กาซืร เซา ตี ปอ อู เฌณ. เซ อาว แหนน ดี แบร ตาง, อาว แหนน ดี โลง แคง ยัง แคง ฮูน, อัน แฮะ ปึอน ต็อห, ดูอี ตี แฮะ ซีงา. 35 มาแล, วาย แฮะ ฮอต ต็อห ดา อี หลู ดี เฌาพรา, ดูอี ตี แฮะ ซีงา, เซ ดีม อัน ตี วี แบร ตาง, 36 ดา อี หลู ดี เฌาพรา โลว วี ยอด ปอ อู เฌณ. เซ ดีม อัน ตี แฮะ แบร ตาง, อาว ฮู โลว ยอด โยว ฮึก เดณ ตู เดณ. แฮะ ปึอน ต็อห, ดูอี วี ตี ตู ซีงา. 37 มาแล, เซ ดา อี หลู ดี เฌาพรา ทาง, ดีม อัน ตี อาว ฮู แบร ตาง, ฮึก อี ว็อง ยี ซี ลัต, ดีม ตี มืร แฮะ แกน. ดา อี หลู ดี เฌาพรา แฮะ ปึอน ต็อห, ดูอี ตี แฮะ ซีงา.

38 เซ อีบึณ อีมาย มึห โดง อี ลูย ดี ฮูน อัน แบน โปละ แบน โปละ, ดา อี หลู ดี เฌาพรา โลว ยอด แคม. 39 เซ กาซืร ตี ยี ฆัห ลูย, อึณ มูห ลูพึอก. ดูอี วี ตี แฮะ ซีงา.

40 เซ อึณ มึห ดูอี ฮึก ฆีณ อัน อึณ แท, แบน ฆีณ ฆลัะ, ดูอี ตี แฮะ ซีงา. 41 เซ ฆีณ ฆลัะ ดี กาต็อห, ดูอี ตี แฮะ ซีงา.

42 มาแล, เซ ดีม ลูย เรณ วี เลห กาซืร ฆลัะ ดี ฆีณ อัน บอ ดี กาต็อห ตี, อึณ มูห รอฆา อี นับ ดี ดึก, นับ ดี แบร. 43 ดา อี หลู ดี เฌาพรา โลว วี ยอด แคม. เซ กาซืร เซา ตี แฮะ ลูย เรณ ดี ฆีณ ฆลัะ บอ ดี กาต็อห ฆลัะ อัน, เซ อึณ ปี รอฆา อี เลห ดี ฮูน ตึอน, 44 ดา อี หลู ดี เฌาพรา โลว ต็อห, ดูอี ตี ตู ซีงา.

45 ดูอี อี มึห ดีม ดี ฮูน, อี นับ ดี แบร, นับ ดี ดึก ตี, อัน โลว ตา ครึง หลูห, ครึง กาปยาต. อัน โลว เบลห ฮึก ฆีณ อัน ปาย ตี ตู จัห. อัน โลว กาบีด โมต อัน บอ ดัด ต็อห, ‘โอว ตู ซีงา. โอว ตู ซีงา.’ 46 อัน ดี แบน ดูอี ตู ซีงา โจว มึห อัน รอฆา ตี. อัน โลว กอย อัน อู วี, กอย นา เรต โดง คยัะ, อาว ปึอน กอย รึม โดบ อี เฮา.”

47 เฌาพรา ปี วี ต็อห, “เซ ครึง ตา เบ มึห กาดีห, บอ มูห ครึง ฮึก มาบู บอ มูห ครึง กาตัม ลูย, 48 อึณ บอ มูห ปี ด็อะ ปี ดาณ เบ บอ มูห เซณ บีก บอ เซณ ฮึก มาบู บอ มูห ครึง โมยว อี โบง ตา ฮูน, 49 เซ กาดีห อัน บอ โบว แบน ดี ครึง ตา, เซ อึณ วี กาเงียน กาเงียน บอ เรณ เรณ, ฌึร ตี แฮะ มูห โตต รอฆา กาดีห. เบ โลว ฮาว บยัะ โกรว ตี ดี ดา อี หลู ดี เฌาพรา. 50 ดา อี หลู ดี เฌาพรา โลว ยอด แคม ครึง อี กาดีห ตี, โลว อูน อาดา บู ซีแง. 51 เซ แฮะ โนะ บู ซีแง, ดา อี หลู ดี เฌาพรา โลว วี ยอด แคม ปอ อู เฌณ. เซ กาดีห ตี แฮะ แว แบร ตาง, ครึง ตี อาว ฮู ซีงา. 52 ดา อี หลู ดี เฌาพรา โลว โดะ แวน แคง เงา โกบ แฮะ มึห อัน กาดีห อี นับ ดี แบน นา ตู หมึอม ดี อี.

53 เซ ดา อี หลู ดี เฌาพรา แฮะ ฮอต ยอด แคม, แฮะ นับ รอฆา ตี ตู แบร ดี ครึง ตา ฌึร ตี, 54 อัน โลว กาลาง, แตห เฆ ลัห ครึง ตี. แฮะ ฮอต, ปี วี อูน ปอ บู ซีแง. 55 แฮะ ฮอต ปัน ตี ดา อี หลู ดี เฌาพรา โลว วี ยอด. เซ กาซืร กาดีห ตี ซี มึห, อาว บลืง, ยี ตู ตาง หลึอม บรีม, ครึง ตี ตู ซีงา. กาซืร กาดีห ครึง ตี บอ กอย นา เหมา, โลว โดะ แวน แคง เงา. 56 เซ ดา อี หลู ดี เฌาพรา แฮะ ฮอต ยอด แคม วาย แฮะ ฮอต ลัห ครึง ตี, เซ กาดีห ตี แฮะ โยม โลง, โลว กายาต แวน กาซืร กาดีห ตี. 57 เซ กาซืร กาดีห ตี วี แบร ตาง ดี ครึง ตึอน, ดา กาณา อัน โลว โดะ แวน แคง เงา. 58 มาแล, เซ แฮะ ฮอต ลัห ครึง อี มึห กาดีห ตี, เซ กาดีห ตี มืร แฮะ หราย, อัน ปี วี โลว ลัห ปอ อู เฌณ. แฮะ ฮอต, ครึง ตี แฮะ วี ซีงา.”

59 อานี อึณ มูห ดารา ลอง รอฆา ครึง กาดีห, อี นับ ดี โบว แบน ดี ครึง ฮึก มาบู เฆ ครึง กาตัม ลูย บอ ดี ครึง ปี ด็อะ ปี ดาณ บอ ดี ครึง ปี โบง เฆ ตา ฮูน โดว ซัด. อึณ มูห ดารา แตห อี นับ, อา เหมา แฮะ ซีงา, อา เหมา ตู ซีงา.