1 เฌาพรา ปี วี กาลาง ฮาว ต็อห, “อานี มูห ดารา ลอง ปี หลู อี ฆ็อห แวน ปี กาลึบ อี. อึณ แฮะ บอด กาเซา. 2 เฆ โลว ดึห โดว ปี ดี หลู ตี, ซัวะ แมง อัน โคบ โดง ง็อห เฆ โดว ปี หลู อี โดะ ดี เงา ตึอน. โลว ดึห หนาม อัน, ฮูห ปัะ โรบ กาโช็ง หลู บอ พวน บลาก. 3 โลว ดึห เลห โตต เบรียง อัน, หลู แดง กาโช็ง หลู, บอ เบรียง ดี ซีดา อัน, บอ เบรียง อี ดึก ดี โคงนัร อัน. 4 บอ เบล ลัม อัน อา โบ็ง บอ เบรียง อัน บอ เบรียง อี ดึก ดี กาโดม อัน. ฌึร ตี โลว ดึห โตต. 5 เฆ ดา อี หลู ดี เฌาพรา โลว ดึห เลห โตต เบรียง เฆ ตี, โดะ แคง เงา, แตห อึณ แบน ปี หลู ดี เฌาพรา. อาตี มูห ปี หลู อี ฆ็อห แวน ปี กาลึบ อี. 6 อีมาย ดอน อี อี กอย แคง อึณโฮม ดา อี หลู ดี เฌาพรา แฮะ ปึอน โฮม ยัง ตี. โกบ แฮะ บอด กาเซา, เฆ โลว โฮม แคง โดง ซีงา บอด.

7 ดารา ตี ลอง ปี ดี หลู อี ฆ็อห แวน ปี กาลึบ อี บอ ดารา ลอง ปี ดี หลู อี ฆ็อห แวน หมาบ อี แฮะ มูห อู โมยว. ยัง อัน แฮะ แบน โกรว ดา อี หลู ดี เฌาพรา อี แฮะ หลู ดาง เฆ ดูอี อี ซี วี กาล็อะ ดี เฌาพรา. 8 ดา อี หลู ดี เฌาพรา อี หลู โกรว ปี หลู อี โดะ ดี เงา อาดา อี เฮา ตี, อัน ดี ปึอน ฮูน โดว ปี หลู อัน ตี. 9 บอ ลอง ปี ดี หลู ดีฆาว แบน โมยว แบน โมยว, อึณ บอ ปาย ตี. อึณ บอ มูห แปะ แฮะ เบลห เฆ แคง กาเดา โพว, แตห อึณ ซีน, บอ มูห แปะ แฮะ โคว เฆ แคง กาโละ มาคาง บอ แปะ แฮะ โคว เฆ แดง ดีพลัะ ฮีน, ฌึร ตี บอ โตต ดอน โมยว, ดา อี หลู ดี เฌาพรา วี อี หลู ตี, อัน แฮะ ปึอน ดึห, แตห อึณ แบน โกรว อัน. 10 เซ อึณ ยี มูห ปี ดี หลู ดีฆาว แบน โมยว แบน โมยว, เซ อึณ ตู ซีน, บอ มูห โมยว อี กาวัร นามัน, โมยว อี หณัม กาวัร, เฆ ดา อี หลู ดี เฌาพรา อี มูห ฆอน อาโรน ตึอน, เฆ โลว กาซาง ดี เฆ ดอน อี, แตห อึณ การัม.”

11 เฌาพรา ปี วี ต็อห, “อานี อึณ มูห ดารา ลอง ปี ดี หลู ดี เฌาพรา อี กอย กาฌูะ โฮม รึม. 12 เซ อึณ มึห ดูอี อี ซี หลู โกบ ซี ดาง อัน ฆูง เฆฌู ดี เฌาพรา, อัน โลว หลู คามูน อี ตู ฮับ ซีนัม บรัห, ยี กาวัร นามัน. อึณ บอ มูห คามูน ดีพลัะ, บอ มูห คามูน อี ดึห เคาคยูง บอ กาวัร นามัน, อัน โลว ดึห หลู กาโดบ ดี โดว ปี โลว หลู แตห อึณ แบน ปี ดี หลู อี ดาง ฆูง เฆฌู ดี เฌาพรา. 13 แดง ตี, อัน ปี วี โลว หลู บอ คามูน อี ฮับ ซีนัม บรัห. 14 อัน โลว ดึห คามูน ตี, อู โมยว อู โบ็ง, แตห อึณ แบน ปี หลู ดี เฌาพรา. อึณ บอ แบน โกรว ดา อี หลู ดี เฌาพรา, วี อี แฮะ ดึห หนาม โดว ปี หลู อัน ตี บอ พ็อห ดี กาโช็ง หลู ตึอน. 15 ยัง โดว ปี หลู ตี โลว โฮม ซีแง ตี อู เฌณ. อาว ปึอน อูน แตห อึณ ฌัม ปา แคหณา ซีณวัห.

16 เซ อึณ ยี มึห ดูอี อี ซี หลู ปี ดี หลู อี กอย กาฌูะ โฮม รึม โกบ แฮะ กาแซณ อัน ดี หลู บอ โกบ แฮะ ซี หลู อัน ราง อัน, เซ เฆ ยี ตู ปึอน ดี โฮม แตห อึณ โตต ซีแง หลู ตี, อี ซี ฆีด ซี กอย ตึอน แฮะ ปึอน โฮม ปา แคหณา. 17 เซ อึณ ยี มึห ยัง โดว ปี หลู อี ซี กอย ฌัม ปัน ตัะ หณา, โลว โดะ แวน โตต แคง เงา. 18 เซ ฮี โฮม ซีแง ตัะ หณา ตี, เฌาพรา ตู ดึห ปี หลู ดูอี วี ตี. ปี หลู อัน ตี, อาว มึห อาฆยึร มาเซ. แฮะ แบน โตต อี หมึอม กาอีห. ดูอี วี ตี โลว คัม หมาบ อัน.

19 เซ โมยว อี ตู ซีงา บอด แฮะ ตา ดึร ยัง โดว ปี หลู อี, อาว ปึอน โฮม ยัง ตี. โลว โดะ แวน แคง เงา. เซ อึณ ยี มูห ยัง ปี ดี หลู อี หมึอม, ดอน อี อี แฮะ ซีงา บอด โดบ ปี ดัม ดารา แฮะ ปึอน โฮม. 20 เซ อึณ ยี มึห ดูอี อี ตู ซีงา บอด โดบ ปี ดัม ดารา, เซ อัน ยี โฮม, เบ โลว เบลห แวน อัน, แกวะ แตห เบ มาด อัน มูห ดูอี อาโมยว เบ. 21 แดง ตี, วี อี โฮม ยัง โดว ปี หลู ตี วาย แฮะ ตา ดึร ตา ปา อัน อี ตู ซีงา บอด มัง โมยว, บอ มูห อี ดึก ดี ดูอี, อี ดึก ดี โดว ซัดดาวา, ดูอี วี ตี มืร, เบ โลว เบลห แวน อัน, แกวะ แตห เบ มาด อัน มูห ดูอี อาโมยว เบ.”

22 เฌาพรา ปี วี จัร อาโมวแซ, 23 แตห อัน วี กาลาง ดี เฆ ดูอี อีซาเรลัะ ต็อห, “แคะ กอย เบรียง มามัก บอ เบรียง มาบู เฆ มาแป, เบ ตู ปึอน โฮม ดอ เหมา. 24 เบรียง โดว ซัด อี ยัม ราง อัน, บอ เบรียง โดว ซัด ปี ก็อะ ยัม มาโดว แปร, เบ ตู ปึอน โฮม ดอ เหมา. มาแล, เซ เบ ดึห จัร โบง ปอ อู โมยว, แฮะ ปึอน. 25 เซ อึณ ยี มึห ดูอี อี โฮม เบรียง โดว ซัด อี ปึอน หลู ดี เฌาพรา แตห อึณ แบน ปี ดี หลู อี โดะ ดี เงา, เบ โลว เบลห แวน ดูอี วี ตี, แกวะ แตห เบ มาด อัน มูห ดูอี อาโมยว เบ. 26 เบ ดูอี อีซาเรลัะ, เบ บอ กอย ดี เหมา อาว ต็อห, เบ มืร ตู ปึอน โฮม หนาม มาซีม บอ หนาม โดว ซัด คอ อู โมยว. 27 เซ อึณ ยี มึห ดูอี อี แฮะ ลูต, แฮะ บลืง ดารา ตี, ดูอี วี ตี, เบ โลว เบลห แวน อัน, แกวะ แตห เบ มาด อัน มูห ดูอี อาโมยว เบ.”

28 เฌาพรา วี จัร อาโมวแซ 29 แตห อัน วี กาลาง ดี เฆ ดูอี อีซาเรลัะ ต็อห, “เซ อึณ มึห ดูอี อี ซี หลู ปี ดี หลู อี กอย กาฌูะ โฮม รึม, อัน โลว ดึห ตัห ปี หลู ตี, อาดา อู บูน, วี หลู ดี เฌาพรา. 30 อัน โลว ดึห โดว ปี ดี หลู อัน ตี, แตห อึณ แบน ปี หลู อี โดะ ดี เงา. อัน โลว ดึห เบรียง โดว ตี, บอ บังน็อห อัน, ตัห หลู. บังน็อห อัน, อัน โลว มาวัด วีว มาวัด เวณ ดี อาต เฌาพรา, แตห อึณ แบน ปี หลู อี มาวัด วีว มาวัด เวณ. 31 ดา อี หลู ดี เฌาพรา โลว ดึห เบรียง, โดะ แดง กาโช็ง หลู. มาแล, บังน็อห อัน ดี แบน โกรว ดา อี หลู ดี เฌาพรา. 32 บอ ฆึม ปัน อัน บลาก อาอัห โลว ดัว ดี ดา อี หลู ดี เฌาพรา, แตห อึณ แบน รูห อี ดาง ฆูง เฆฌู ดี อัน. 33 ฆอน อาโรน อี มูห วี อี หลู หนาม เฆ เบรียง โดว ปี หลู อี บอ กอย กาฌูะ โฮม รึม ตี, อัน ดี ปึอน ฆึม ปัน อัน บลาก อาอัห ตี. 34 บอ บังน็อห โดว ปี หลู เฆ ตี, บอ ฆึม ปัน บลาก อาอัห, โอว เฌาพรา แฮะ ดึห ดี เฆ ดูอี อีซาเรลัะ, วี ดัว ดี เฆ ดา อี หลู ดี เฌาพรา. อาตี แฮะ แบน ปี โลว ดัว เฆ ดูอี อีซาเรลัะ เซเซ. เฆ โลว ดัว ฌึร ตี ดี ดา อี หลู ดี เฌาพรา ดอน โจว ดอน บาน ฮาว นา อาต นี.”

35 อาตี มูห อู บูน ปี ดึห เลห เฆ แคง ปี หลู ดี เฌาพรา อี โดะ ดี เงา. เฆ โลว วี ดัว บูน ตี ดี อาโรน เฆ ฆอน อัน. ดอ แตห เฌาพรา เฆ แบน ดา อี หลู ดี เฌาพรา, อัน ดัว ดี เฆ อู บูน ตี. 36 ดอ แตห อัน เฌา เฆ แบน ดา อี หลู ดี เฌาพรา ตี, เฌาพรา แฮะ กาลาง ดี เฆ ดูอี อีซาเรลัะ บอกาเฆลียด, แตห เฆ ดึห เลห แคง ปี หลู เฆ ตี, วี ดัว ดี ฆอน อาโรน ตึอน. อาตี แฮะ มูห ดารา ปี โลว โดบ เฆ ดูอี อีซาเรลัะ ดอน โจว ดอน บาน ฮาว นา อาต นี.

37 แคะ ตี มูห ดารา ปี ดัว เฌาพรา ลอง ปี หลู อี โดะ ดี เงา บอ ปี หลู ดีฆาว แบน โมยว แบน โมยว บอ ปี หลู อี ฆ็อห แวน หมาบ บอ ปี หลู อี ฆ็อห แวน ปี กาลึบ อี. อึณ บอ มูห บอ ดารา ลอง ปี โลว หลู ดอ โจะ เฆ ฆอน อาโรน, แตห เฆ แบน ดา อี หลู ดี เฌาพรา. อึณ มูห บอ ลอง ปี หลู อี กอย กาฌูะ โฮม รึม. 38 เฌาพรา แฮะ กาลาง ฌึร ตี ดี อาโมวแซ ดอ กอย อาโมวแซ แดง นอน ซีนาย. อึณ บอ มูห ซีแง ดอ กาลาง อัน ดี เฆ ดูอี อีซาเรลัะ, แตห เฆ โบง ปี ดี หลู ดี เฌาพรา ดอ กอย เฆ แคง แปร กาฮ็อห ดี นอน ซีนาย.