1 เฌาพรา วี ต็อห ดี อาโมวแซ, 2 “แตห แม แดะ อาโรน เฆ ฆอน อัน ตัห ดี บาง มาโลห ทึบ บีก บอด, แตห แม ดึห ตัห บอ ครึง ตา ดูอี อี หลู ดี เฌาพรา บอ นามัน อูห หงูน อี ปึอน พ็อห ดี อี บอ มามัก ปี โลว หลู แตห เฌาพรา ฆ็อห แวน หมาบ อี บอ มาบู อาโล็ง อา โดว บอ คามูน อี ตู ฮับ ซีนัม บรัห อู คอน. 3 แตห แม แดะ บอ เฆ ดูอี กืน ตัห กาฌูะ ดี บาง มาโลห ทึบ บีก บอด ตี.” 4 อาโมวแซ บอ โบง โดบ ปี ต็อห เฌาพรา ดี อัน. เฆ ดูอี กืน แฮะ ฮอต ตัห กาฌูะ, 5 อัน บอ ต็อห ดี เฆ, “อานี มูห ปี กาลาง เฌาพรา แตห เอ โบง, แตห โตต ดอน โมยว กอ ฮอต ซีคยา.” 6 อาโมวแซ บอ แดะ อาโรน เฆ ฆอน อัน, วี จัร เฆ ตา อึม. 7 อัน บอ ดึห ซีโตว ตูน บอ ซีโตว ตือะ, ชึบ ดี อาโรน, รีด บอ แซะ ดี ณอย อัน, ปี วี ชึบ บอ ซีโตว เอโพด, วี รีด บอ ซาบรอด อี แฮะ ชีด กาเซา. 8 อัน วี ชึบ บอ ฮู อี ดึก ดี บังน็อห, วี ดึห มาว อา โบ็ง อี จืร อูรีม ฆาย ทูมีม, ฮับ แคง ฮู ตี. 9 อัน วี บร็อะ บอ กาแมะ. นา เรต กาแมะ ตี, อัน วี ปัก ดึก ดีพลัะ ครีว บอด ดี กาต็อห อัน, แตห อึณ ปี มังฆึม, แตห อึณ บยัะ ลอง แฮะ แบน อาโรน ดา อี หลู ดี เฌาพรา. อาโมวแซ บอ โบง โตต ดอน โมยว แตห อึณ โดบ ปี กาลาง อูน เฌาพรา.

10 ปัน ตี อาโมวแซ วี ดึห นามัน อูห หงูน, พ็อห ดี ทึบ บีก บอด บอ ดี ดอน โมยว อี กอย แคง ทึบ บีก บอด ตี. 11 อัน วี ดึห นามัน อูห หงูน มัง กาล็อะ, คร็อห ดี กาโช็ง หลู บู เฌณ, แตห บอ กาโช็ง หลู บอ ครึง หลู ดอน โมยว บอ อึณปาน ตาง บอ เจณ อัน แบน อี ซีงา บอด. 12 อัน บอ ดึห นามัน อูห หงูน ตี, วี โหลว ดี ฆีณ อาโรน, แตห อาโรน แบน ดา อี หลู ดี เฌาพรา. 13 วาย อัน ตี อัน วี แดะ ตัห บอ เฆ ฆอน อาโรน, วี ชึบ ซีโตว ดี เฆ, วี รีด บอ แซะ ดี ณอย เฆ, ชึบ บอ มาฆีณ ดี ฆีณ เฆ, แตห อึณ โดบ ปี ดัม อูน เฌาพรา.

14 แฮะ ฮอต ปาย ตี อาโมวแซ บอ ดึห ตัห มามัก ปี ดี หลู อี แตห เฌาพรา ฆ็อห แวน หมาบ ตึอน. อาโรน เฆ ฆอน อัน บอ ดาง แด เฆ แดง ฆีณ มัก ตี. 15 อาโมวแซ แฮะ ฮอต ซัวะ แมง มัก ตี, อัน วี ดึห หนาม อัน มัง กาล็อะ, วี จึบ กานู อัน แคง หนาม ตี, วี พ็อห ดี กาโตต บัต กาโช็ง หลู, แตห อัน ซีงา บอด. อัน วี ดึห หนาม ตี, วี ฮูห ดี เจณ กาโช็ง หลู ตี, แตห อึณ ซีงา บอด, แตห อึณ ปึอน หลู ปี หลู อี ฆ็อห แวน หมาบ แดง กาโช็ง ตี. 16 อาโมวแซ บอ ดึห โตต เบรียง อี ดึก ดี โคงนัร โดว ปี ดี หลู อัน. อัน ดึห บอ เบรียง อี ดึก ดี กาโดม บอ เบล ลัม อัน บอ อา โบ็ง, วี โดะ แคง เงา แดง กาโช็ง หลู. 17 อัน ปี วี ดึห โดว ปี หลู อี ซี ฆีด ตึอน, บอ ฮูน อัน บอ ยัง อัน บอ ซีฌีง หนึม อัน, วี เลห ฮาว นา เรต โดง คยัะ เฆ ตึอน, วี โดะ กาซึม, แตห อึณ โดบ ปี กาลาง อูน เฌาพรา.

18 แฮะ ฮอต ปาย ตี อาโมวแซ วี ดึห ตัห มาบู ปี โลว หลู อี โดะ ดี เงา ตึอน. อาโรน เฆ ฆอน อัน บอ ดาง แด เฆ แดง ฆีณ มาบู ตี. 19 อาโมวแซ แฮะ ฮอต ง็อห มาบู ตี, อัน บอ ดึห หนาม อัน, พ็อห ดี แรง กาโช็ง หลู บอ พวน บลาก. 20 อัน บอ กาแดบ มาบู ตึอน แบน ดีฆัร แบน ดีฆัร, วี ดึห ฆีณ บอ ยัง อัน บอ เบรียง อัน, วี โดะ แคง เงา. 21 แฮะ ฮอต, อาโมวแซ บาย โคงนัร มาบู ตี บอ เปลา อัน เฆ ตึอน, วี ดึห มาบู ตี บอ โดว, วี โดะ แคง เงา แดง กาโช็ง หลู, แตห อึณ โดบ ปี กาลาง อูน เฌาพรา, แตห อึณ แบน ปี ดี หลู ดี เฌาพรา อี โดะ ดี เงา. อูห หงูน อัน บอ ล็อะ น็อห เฌาพรา.

22 ปัน ตี อาโมวแซ ปี วี ดึห ตัห มาบู ปอ อู โดว อี มูห ปี โลว หลู ดอ พ็อห อัน นามัน ดี ดูอี อี ดี แบน ดา อี หลู ดี เฌาพรา. อาโรน เฆ ฆอน อัน บอ ดาง แด เฆ แดง ฆีณ มาบู ตี. 23 อาโมวแซ แฮะ ฮอต ซัวะ แมง มาบู ตี, อัน วี ดึห หนาม อี แจก, พ็อห ดี โหยะ อาโรน บลาก อาอัห บอ ดี กานู มา แด บอ ดี กานู มา เจณ บลาก อาอัห. 24 อัน แฮะ ฮอต โบง ปาย ตี อัน วี แดะ บอ ฆอน อาโรน ตัห. อัน วี ดึห หนาม ตึอน พ็อห บอ ดี โหยะ เฆ บลาก อาอัห บอ ดี กานู มา แด บอ ดี กานู มา เจณ เฆ บลาก อาอัห. หนาม อี ซี ฆีด ตึอน, อัน วี ฮูห ดี แรง กาโช็ง หลู บอ พวน บลาก. 25 อัน วี ดึห บอ เบรียง อัน, ซีดา อัน บอ เบรียง อี ดึก ดี โคงนัร อัน บอ เบรียง อี ดึก ดี กาโดม บอ เบล ลัม อัน บอ อา โบ็ง บอ เบรียง อัน บอ ฆึม ปัน อัน บลาก อาอัห. 26 บอ คามูน อี ตู ฮับ ซีนัม บรัห อี กอย แคง คอน แปะ แฮะ เบลห เฆ ดี อาต เฌาพรา, อัน วี ดึห อู โบ็ง. อัน ปี วี ดึห บอ คามูน อี ฮับ นามัน อู โบ็ง บอ คามูน ดีพลัะ อู โบ็ง, วี เบลห แดง เบรียง เฆ ฆึม ปัน บลาก อาอัห มาบู ตึอน. 27 อัน วี ดึห โตต ปี ดี หลู ตี, วี เบลห แดง แด อาโรน เฆ ฆอน อัน. เฆ มืร มาวัด วีว มาวัด เวณ ดี อาต เฌาพรา. 28 แฮะ ฮอต, อาโมวแซ วี ดึห ปี หลู แดง แด เฆ ตี, วี โดะ แดง กาโช็ง หลู โดบ ปี ดี หลู เฆ อาโมยว เฮา. ปาย ตี อึณ แบน ปี โลว หลู ดอ พ็อห เฆ นามัน ดี ดูอี อี แบน ดา อี หลู ดี เฌาพรา. อึณ มูห ปี หลู อี โดะ ดี เงา, แตห อูห หงูน อัน ล็อะ น็อห เฌาพรา. 29 วาย อัน ตี อาโมวแซ บอ ดึห บังน็อห มาบู ตี บอ มาวัด วีว มาวัด เวณ ดี อาต เฌาพรา. บังน็อห โดว ตี แฮะ แบน บูน อาโมวแซ, แตห อึณ โดบ ปี จัร เฌาพรา อัน โบง.

30 อาโมวแซ วี ดึห นามัน อูห หงูน ตึอน อี แจก บอ หนาม มัง กาล็อะ อี กอย แดง กาโช็ง หลู ตึอน, วี คร็อห ดี อาโรน เฆ ฆอน อัน บอ ดี ครึง ตา เฆ. ปาย ตี อัน บอ หลู เฆ บอ ครึง ตา เฆ ดี เฌาพรา.

31 อาโมวแซ บอ กาลาง ดี อาโรน เฆ ฆอน อัน ต็อห, “แตห เบ ดึห ยัง นี, ฮาว โคบ มาโลห ทึบ บีก บอด, ดัง โฮม ยัง นี ดี ตี. เบ โลว โฮม บอ คามูน อี กอย แคง คอน ตึอน อี มูห ปี ดี หลู ดอ พ็อห เบ นามัน ดี ดูอี อี แบน ดา อี หลู ดี เฌาพรา, แตห อึณ โดบ ปี กาลาง อูน เฌาพรา. 32 คามูน บอ ยัง อี ซี ฆีด, เบ โลว โดะ แคง เงา. 33 อาดา บู ซีแง, เบ ตู ปึอน เลห นา เรต ทึบ บีก บอด นี ดอ เหมา. โคว, อึณ โลว บู ซีแง ตี, แตห เบ แบน ดา อี หลู ดี เฌาพรา. อาต โนะ บู ซีแง ตี, เบ หณัม มูห ดา อี หลู ดี เฌาพรา. 34 แปะ แฮะ โบง เอ อาตึร นี, เฌาพรา แฮะ ดัม อูน แตห เอ โบง, แตห เบ วี กาล็อะ ดี เฌาพรา. 35 เบ โลว กอย ดี มาโลห ทึบ บีก บอด ดอง วัน ดอง คืน, แตห อึณ กอ โนะ บู ซีแง, แตห เบ โบง โดบ ปี กาลาง เฌาพรา. เซ เบ ตู โบง ปาย ตี เบ โลว ยัม. เฌาพรา แฮะ กาลาง อูน ดี โอว ปาย ตี.” 36 ปาย ตี อาโรน เฆ ฆอน อัน บอ โบง โดบ ปี กาลาง เฌาพรา ดี อาโมวแซ.