เฌาพรา ปี วี กาลาง ดี อาโมวแซ ปอ อู เฌณ ต็อห, 2 “ดูอี บอ นับ ดี โบง หมาบ ดี อาต เฌาพรา ปาย นี. เซ ดูอี อู วี แฮะ แวน โกรวกราม แปะ แฮะ อาบ ดัว อี เฮา ดี อัน, บอ มูห โกรว แปะ แฮะ อูน อี เฮา ดี อัน, บอ มูห โกรว แปะ แฮะ หมาบ หมัร ดี อี เฮา, บอ มูห โกรว แปะ แฮะ โฌน ดี อี เฮา, เซ อัน ยี ตู ยอด แมน ซีคยา โกรว ตี บอ คาหนาบ กาชัวะ แตห อัน ปึอน โกรว อี เฮา, อัน ดี คัม หมาบ อัน ตี. 3 เซ อัน บอ ยึร โกรวกราม อี แฮะ โบยห, อัน ยี กาโลว แนะ ต็อห อัน ตู ยึร, เซ อัน มืร คัม ซัมดืง ลอง อี ตู หมาน, ลอง หมาบ แบน โมยว แบน โมยว ปี โบง ดูอี, 4 เซ อึณ มึห อี แฮะ โบง นา ตู หมึอม ฌึร ตี แบน โมยว แบน โมยว, อัน โลว วี เวียะ วีว โกรว ปี กาโลว อัน ตี ดอน โมยว. 5 ซีแง วี นับ อี อัน แฮะ ลูต ตี, อัน โลว วี ดัว วีว โตต ดี ดา กาณา โกรว ตี. อาว วัน แคะ ตี. อัน ปี วี โลว ดัว ปอ พัน บูน อู บูน. 6 แดง ตี, ซีแง อัน ตี อัน โลว ดึห ตัห ปี ดี หลู, ดัว ดี ดา อี หลู ดี เฌาพรา แตห ดา อี หลู ดี เฌาพรา หลู, แตห เฌาพรา ฆ็อห แวน แปะ แฮะ กาลึบ อัน. โกรว ปี ดี หลู ตี, อัน โลว ดึห มาบู โดว อาโล็ง. เซ อาว ปาย ตี มาแป โดว อาโล็ง อี ตู มึห โดง ดี แน. ง็อห อัน, อัน โลว ดึห แคะ ปี ต็อห ดา อี หลู ดี เฌาพรา. 7 ดา อี หลู ดี เฌาพรา ดี บอ หลู ดี เฌาพรา, แตห ดูอี วี ตี วี กาล็อะ ดี เฌาพรา. แฮะ ฮอต หลู, เฌาพรา มืร ดี ฆ็อห แวน หมาบ แปะ แฮะ โบง อัน ตี ดอน โมยว.”

8 เฌาพรา ปี วี ต็อห ดี อาโมวแซ, 9 “แตห แม กาลาง ดี อาโรน เฆ ฆอน อัน ต็อห, ‘อานี อึณ มูห ปี หมาณ ดารา ลอง ปี ดี หลู อี โดะ ดี เงา. โดว ปี ดี หลู อี โดะ ดี เงา ตี โลว เบลห แดง กาโช็ง หลู, แตห อึณ กอย ดอง คืน กอ ฌัม วัห. แตห เงา กูห เซเซ, แกวะ แตห อึณ ยัด ดอ เหมา. 10 ดา อี หลู ดี เฌาพรา โลว ชึบ ซีโตว กาตัม ลูย บอ ซีลา กาตัม ลูย, วี ดึห เบรา โดว ปี โดะ เฆ แดง กาโช็ง หลู ตี, วี เบลห โคบ กาโช็ง หลู ตึอน. 11 แฮะ ฮอต ปาย ตี อัน โลว วี กาปลูะ เลห ครึง ปี ตา อัน. วี ดึห เบรา เงา ตี, เลห นา เรต โดง คยัะ เบ, วี ฮาว โดง ซีงา บอด ตึอน. 12 เงา แดง กาโช็ง หลู ตึอน, อาว ปึอน แตห อึณ ยัด. แตห อึณ กูห เซเซ. ดอน หณา ดา อี หลู ดี เฌาพรา โลว ฮับ เฮ, กาซูห เงา ตี. อัน โลว เบลห ซีคยา โดว ปี ดี หลู อี โดะ ดี เงา แดง กาโช็ง หลู ตี. อัน บอ โลว วี โดะ เบรียง โดว อี มูห ปี หลู อี กอย กาฌูะ โฮม รึม. 13 เงา ตี โลว กูห เซเซ แดง กาโช็ง หลู. อาว ปึอน ยัด ดอ เหมา.’”

14 เฌาพรา วี ต็อห, “อานี มูห ดารา ลอง ปี โลว หลู ดีฆาว แบน โมยว แบน โมยว. ฆอน อาโรน อู วี โลว หลู ฌึร ตี ดี เฌาพรา แดง กาโช็ง หลู. 15 แคง ปี หลู ดีฆาว ตี, อัน โลว ดึห กาแปะ เคาคยูง อู กาตึง แด อัน บอ นามัน บอ กาณัน เลโบน. อัน โลว ดึห โตต, วี โดะ แดง กาโช็ง หลู. อึณ แบน ปี หลู อี แตห เฌาพรา โหลห ดูอี อี หลู ตี, แตห อึณ อูห หงูน ดี อัน. 16 เฆ ดา อี หลู ดี เฌาพรา, เฆ ดี ปึอน ดี โฮม อี ซี ฆีด ซี กอย ตึอน, ยี ตู ปึอน ฮับ ซีนัม บรัห. เฆ โลว โฮม โดง ซีงา บอด อี กอย แคง แวง ทึบ บีก บอด. 17 อี ซี ฆีด ตึอน, โอว แฮะ ดึห เลห แคง ปี หลู อี โดะ ดี เงา, วี ดัว ดี เฆ ดา อี หลู ดี เฌาพรา. อึณ แฮะ บอด กาเซา. อึณ แฮะ ปี ปี หลู อี ฆ็อห แวน หมาบ บอ ปี หลู อี ฆ็อห แวน แปะ แฮะ กาลึบ อี. 18 ซีณ ดอ กาจูห เฆ ดี หลู ปาย ตี ฮาว นา อาต, ฆอน อีมาย อี มูห หลูกหลาน อาโรน, เฆ ดอน อี แฮะ ปึอน โฮม แปะ แฮะ กาย็อห เลห โอว ปี ดี หลู ตี, แตห เฆ โฮม เซเซ. อาเซ บอ ตา ดึร ตา ปา ปี หลู ตี, อัน ดี แบน ดูอี อี ซีงา บอด.”

19 เฌาพรา ปี วี กาลาง ดี อาโมวแซ ต็อห, 20 “ซีแง ปี พ็อห อาโรน นามัน ดี ฆีณ อัน แตห อัน แบน ดา อี หลู ดี โอว, บอ อัน บอ ฆอน อัน, เฆ โลว ดึห หลู กาแปะ เคาคยูง อี แฮะ กามอต ซีคยา อาดา อู แบล ดี อู ควาก, โบง แตห อึณ แบน ปี ดี หลู ดีฆาว แบน โมยว แบน โมยว ปี โลว หลู เฆ เซเซ. เฆ โลว หลู เจว หณา อู กาแต, บา ดี อับ อู กาแต. 21 เฆ บอ โลว กาวัร นามัน, วี โบง คามูน, โคว แดง ดีพลัะ ฮีน, ปี วี กาบัด แตห อึณ ดีรอย. แฮะ ฮอต, บอ หลู. อาตี มูห ปี หลู ดีฆาว แบน โมยว แบน โมยว. อูห หงูน อัน ดี บอ ล็อะ น็อห เฌาพรา. 22 ซีณ ดอ กาจูห เฆ ดี หลู ปาย ตี ฮาว นา อาต, ฆอน อาโรน วี แปะ แฮะ พ็อห นามัน, แตห อัน ปลูะ ฆูณ อัน, อัน โลว หลู ปาย ตี เซเซ, โลว โดะ โตต แคง เงา. 23 ดีฆาว แบน โมยว แบน โมยว ปี หลู เฆ ดา อี หลู ดี เฌาพรา ตี, อาว ปึอน โฮม ดอ เหมา. โลว โดะ กาซึม โตต แคง เงา.”

24 วาย อัน ตี เฌาพรา ปี วี จัร อาโมวแซ 25 แตห อัน ฮาว กาลาง ดี อาโรน เฆ ฆอน อัน ต็อห, “อานี อึณ มูห ดารา ลอง ปี ดี โลว หลู แตห เฌาพรา ฆ็อห แวน หมาบ. เบ โลว ดึห โดว ปี ดี หลู ตี, ง็อห ดี อาต เฌาพรา โดง ง็อห เบ โดว ปี หลู อี โดะ ดี เงา. อาตี แฮะ แบน ปี หลู อี แฮะ บอด กาเซา. 26 ดา อี หลู ดี เฌาพรา วี อี หลู ตี, อัน โลว โฮม ยัง โดว ซัด ตี โดง ซีงา บอด อี กอย แคง แวง ทึบ บีก บอด. 27 ดูอี วี เหมา อาว ต็อห, บอ มูห มาเซ อาว ต็อห, ฮี ตา ดึร ยัง โดว ซัด ตี, อัน แฮะ ฮอต แบน อี ซีงา บอด. เซ หนาม โดว ซัด ตี ตา ดึร ดึก ดี ครึง ตา, โลว วี ลัห ครึง ตี โดง ซีงา บอด. 28 กาโละ กาดาย โบ็ง แปะ แฮะ ดัง เฆ ยัง ตี, โลว มัห กาลาต. เซ เฆ บอ ดัง แคง กาโละ บ็อง, โลว วี พัะ วี โคต. 29 อีมาย ดอน อี แคง อึณโฮม ดา อี หลู ดี เฌาพรา ปึอน โฮม ยัง ตี. อึณ มูห อี บอด กาเซา. 30 มาแล, เซ อึณ แบน ปี หลู อี แตห เฌาพรา ฆ็อห แวน หมาบ, เซ ฮี ดึห หนาม โดว ซัด ตี, ลึบ คร็อห แคง ทึบ บีก บอด แตห ดูอี อี หลู วี กาล็อะ ดี เฌาพรา, อาว ปึอน โฮม ยัง ตี ดอ เหมา. โลว โดะ กาซึม โตต แคง เงา.”