เฌาพรา วี จัร อาโมวแซ กาลาง ปอ อึณ ปัว ต็อห, “เซ อึณ มึห ดูอี อี แฮะ ยึร อี เฮา โบง หมาบ, เซ ดา ตาง ซูงพยาด อามู ตี, วี แดะ อัน แบน ซักเซ, อัน มืร แฮะ ฮอต โทม โฆรห ดา ตาง ตี อี ดืง อัน, เซ อัน ตู กาลาง โฆรห หมาน, เซ ดูอี วี ตี ยี ตู แค แคะ ปี นับ อัน ลอง อามู ตี, อึณ แบน หมาบ ดี อัน.

2 เซ อึณ บอ มึห ดูอี ปอ วี, อัน แฮะ ตา ดึร ตา ปา โมยว อี ตู ซีงา บอด, อึณ บอ มูห โดว ซัด ปี เฮียง อี, โดว ซัด อี กอย แคง แปร บอ โดว ซัด อี มึอน อี หลัน แดง กาดาย อี แฮะ ยัม, ดูอี วี ตี ปี ซัะ นับ ลอง ตู ซีงา บอด โดบ ปี ดัม ดารา ตี มืร, อัน ยี แฮะ ฮอต มึห หมาบ.

3 เซ อึณ บอ มึห ดูอี อี ตา ดึร ตา ปา โมยว อี ตู ซีงา บอด อี ดึก ดี ดูอี เฮา, อัน แฮะ โบง ฌึร ตี, อัน ปี ซัะ นับ มืร, ดอ วี นับ อัน, อึณ แฮะ ฮอต แบน หมาบ ดี อัน.

4 เซ อึณ บอ มึห ดูอี อี กาลาง โฆรห ดืง ดี อาต เฌาพรา อาต นับ ซีคยา อัน, แฮะ ฮอต, อัน วี นับ ซีคยา ลอง ปี ดืง อัน, บอ มูห อี หมึอม อี ตู หมึอม, อาเร ตู ตาง. อัน ยี แฮะ ฮอต มึห หมาบ.

5 ดอน อี อี แฮะ โบง หมาบ ฌึร ตี, อัน โลว วี กาลาง ปี ลูต อัน ตี. 6 แฮะ ฮอต, อัน โลว ดึห มาบู โดว มา. เซ อาว ปาย ตี มาแป โดว มา, ดึห ตัห หลู ดี เฌาพรา, แตห อึณ ฆ็อห แวน หมาบ ปี โลว คัม อัน. ดา อี หลู ดี เฌาพรา โลว หลู ปี หลู อัน ตี, แตห ดูอี วี ตี วี กาล็อะ ดี เฌาพรา.

7 มาแล, เซ ดูอี ตี ตู แป ดี หลู มาบู เฆ มาแป, อัน โลว หลู มาโบลย แปร อา โดว. เซ อาว มูห มาโบลย แปร, อัน โลว ดึห มาโบลย ดีแตด อา โดว, ตัห หลู ดี เฌาพรา, แตห อึณ ฆ็อห แวน หมาบ ปี โลว คัม อัน. มาโบลย อาดา อู โดว แบน ปี หลู อี แตห เฌาพรา ฆ็อห แวน หมาบ. อาดา ปอ โดว, อึณ ดี แบน ปี หลู อี โดะ ดี เงา. 8 อัน โลว ดึห ตัห มาโบลย ตี, ดัว ดี ดา อี หลู ดี เฌาพรา. ดา อี หลู ดี เฌาพรา โลว หลู อี แตห เฌาพรา ฆ็อห แวน หมาบ ตี ดี อาต. อัน โลว กาเวียะ แมง มาโบลย ตี, ยี ตู ปึอน แตห ฆีณ อัน กาดัด. 9 อัน โลว ดึห หนาม อัน มัง กาล็อะ, คร็อห ดี แรง กาโช็ง หลู. หนาม อี ซี ฆีด ซี กอย ตึอน โลว วี ซาเนียะ ดี เจณ กาโช็ง หลู. ปาย ตี อึณ แฮะ แบน ปี หลู อี แตห เฌาพรา ฆ็อห แวน หมาบ. 10 มาโบลย ปอ อู โดว ตึอน โลว แบน ปี หลู อี โดะ ดี เงา, แตห อึณ โดบ ปี โลว หลู เบ ปี หลู อี โดะ ดี เงา แบน โมยว แบน โมยว. ดา อี หลู ดี เฌาพรา โลว หลู ปี หลู ตี, แตห ดูอี วี ตี วี กาล็อะ ดี เฌาพรา. อัน แฮะ ฮอต หลู, เฌาพรา มืร ดี ฆ็อห แวน หมาบ อัน ตี.

11 เซ อัน ยี ตู แป ดี หลู มาโบลย แปร อา โดว บอ มาโบลย ดีแตด อา โดว ตึอน, อัน โลว ดึห กาแปะ อี แฮะ กามอต ซีคยา อาดา อู แบล ดี อู ควาก, แตห อึณ แบน ปี หลู อี แตห เฌาพรา ฆ็อห แวน หมาบ. ยี ตู ปึอน ฮับ นามัน บอ กาณัน เลโบน นา แคง. โคว, อึณ มูห ปี หลู อี แตห เฌาพรา ฆ็อห แวน หมาบ. อาว มูห ปี หลู ดีฆาว แบน โมยว แบน โมยว. 12 อัน โลว ดึห ตัห ปี หลู ตี, ดัว ดี ดา อี หลู ดี เฌาพรา. ดา อี หลู ดี เฌาพรา โลว ดึห กาแปะ ตี อาดา อู กาตึง แด อัน, วี โดะ แดง กาโช็ง หลู โดบ ปี หลู โมยว เฮา อี โดะ ดี เงา, แตห เฌาพรา โหลห ดูอี อี หลู ตี. ปาย ตี อึณ แบน ปี หลู อี แตห เฌาพรา ฆ็อห แวน หมาบ. 13 ปาย ตี ดา อี หลู ดี เฌาพรา โลว หลู, แตห ดูอี วี ตี วี กาล็อะ ดี เฌาพรา. เฌาพรา มืร ดี ฆ็อห แวน หมาบ อัน. กาแปะ อี ซี ฆีด ซี กอย ตึอน บอ แบน โกรว เฆ ดา อี หลู ดี เฌาพรา, แตห อึณ ปี ปี หลู ดีฆาว แบน โมยว แบน โมยว.” แคะ ตี เฌาพรา แฮะ จัร เฆ ดูอี อีซาเรลัะ โบง.

14 เฌาพรา ปี วี กาลาง ดี อาโมวแซ ปอ อู เฌณ ต็อห, 15 “เซ ดูอี อู วี แฮะ ปีว ดี ดัว แคะ ปี โลว ดัว อัน ดี เฌาพรา, เซ อัน มืร ตู โหลห ปี กาลึบ อัน ตี, อัน โลว หลู โดว ซัด อู โดว ดี เฌาพรา, แตห อึณ แบน ปี วี เซ วีว อัน โกบ แฮะ กาลึบ อัน. อัน โลว ดึห มาบู ดีแตด โดว อาโล็ง. เซ อาว ปาย ตี โลว ดึห มาแป โดว อาโล็ง อี ตู มึห โดง แน. ง็อห โดว ตี โลว กาดาน รึอน แคะ ปี โลว ดัว อัน ดี เฌาพรา. เฆ โลว ซูงพยาด ง็อห อัน ตี โดบ เบล ซัะ อี กอย ดี ทึบ บีก บอด อี มูห โดง กอย เฌาพรา. 16 อัน บอ โลว วี เวียะ บอ ปี ตู มึห อัน ดี ดัว ตึอน. แดง ตี อึณ บอ โลว ดึห ง็อห อัน พัน บูน อู บูน, วี ปัว. แคะ ตี อัน โลว ดัว โตต ดี ดา อี หลู ดี เฌาพรา. ดา อี หลู ดี เฌาพรา บอ โลว หลู โดว ซัด ตี, แตห ดูอี วี ตี วี กาล็อะ ดี เฌาพรา. เซ อัน แฮะ ฮอต หลู, เฌาพรา มืร ดี ฆ็อห แวน หมาบ ดูอี วี ตี.

17 เซ อึณ มึห ดูอี อี แฮะ ลูต ดารา เฌาพรา โมยว เหมา อาว ต็อห, ปี ซัะ นับ มืร, อึณ แฮะ ฮอต แบน หมาบ ดี อัน. อัน โลว คัม หมาบ อัน ตี. 18 อัน โลว ตัห หลู ปี หลู อี แตห เฌาพรา ฆ็อห แวน ปี กาลึบ อัน ตี. อัน โลว ดึห มาบู อาโล็ง อี ตู มึห โดง แน. ง็อห อัน โลว แตห อึณ กาดาน แปะ แฮะ ลูต อัน. ดา อี หลู ดี เฌาพรา โลว หลู โดว ตี, แตห ดูอี วี ตี วี กาล็อะ ดี เฌาพรา วาย แฮะ กาลึบ อัน. อัน แฮะ ฮอต หลู, เฌาพรา มืร ดี ฆ็อห แวน ปี กาลึบ อัน ตึอน ปี ตู นับ อัน. 19 ปาย ตี ดูอี ดอน อี โลว หลู เซ อัน แฮะ ลูต ดารา เฌาพรา.”