1 เฌาพรา วี กาลาง โฆรห ดี อาโมวแซ ปอ อู เฌณ, 2 วี จัร อัน แตห อัน วี กาลาง ดี เฆ ดูอี อีซาเรลัะ. อัน ต็อห, “เซ อึณ มึห ดูอี อี ตู นับ, ตู ทาง ปี โบง อัน แฮะ ลูต ดารา เฌาพรา, เซ อัน บอ ตา กาลึบ ดี โบง อี ตู หมึอม, อัน โลว โบง ปาย นี.

3 เซ อัน บอ มูห ดา ตาง อี หลู ดี เฌาพรา อี แฮะ ตา กาลึบ, แตห อึณ แบน หมาบ บอ ดี ดูอี กืน, อัน โลว ดึห มัก อาทึก ดีแตด อี ซี หนึม, อี ตู มึห โดง ดี แน. อัน โลว หลู ดี เฌาพรา, แตห อึณ ฆ็อห แวน หมาบ อัน. 4 อัน โลว ดึห มัก โดว ตี, ตัห ดี อาต มาโลห ทึบ บีก บอด. อัน โลว ดาง แด อัน แดง ฆีณ มัก ตี. แฮะ ฮอต, ซัวะ แมง อัน ดี อาต เฌาพรา. 5 ดอ อัน ตี ดา ตาง อี หลู ดี เฌาพรา ตี, อัน โลว ดึห หนาม มัก โดว ตี มัง กาล็อะ, วี โฆ็ง ฮาว แคง ทึบ บีก บอด. 6 อัน โลว ตา กานู อัน จึบ แคง หนาม ตี, วี คร็อห หนาม ตี นา อาต บีก ฆ็อง อี กอย ดี โดง อี ซีงา บอด หลึอม โตต. อัน โลว คร็อห ปาย ตี อาดา บู เฌณ. 7 แฮะ ฮอต, อัน โลว ดึห หนาม มัง กาล็อะ, วี พ็อห ดี กาโตต บัต พวน กาโตะ อี กอย ดี กาโช็ง อี มูห โดง โดะ เฆ ซีนัม อูห หงูน อี กอย แคง ทึบ บีก บอด. หนาม อี ซี ฆีด ซี กอย, อัน โลว ดึห ฮาว ฮูห ดี เจณ กาโช็ง หลู อี มูห โดง โดะ เฆ โดว ซัด อี กอย ดี อาต มาโลห ทึบ บีก บอด ตึอน. 8 อัน บอ โลว ดึห เลห โตต แคะ กอย เบรียง โดว ตี. อึณ บอ มูห เบรียง อี ดึก ดี โคงนัร อัน 9 บอ เบล ลัม อัน อา โบ็ง บอ เบรียง อี ดึก ดี เบล ลัม อัน บอ เบรียง อี ดึก ดี กาโดม อัน, อัน โลว ดึห โตต. 10 ดา อี หลู ดี เฌาพรา ตึอน โลว ดึห เบรียง บอ เบล ลัม แคง โดว ตี, แตห อึณ ปี เฆ ดึห เบรียง มามัก ปี หลู เฆ ดอ กอย กาฌูะ โฮม รึม เฆ. แฮะ ฮอต, ดา อี หลู ดี เฌาพรา ตึอน โลว วี โดะ โตต แดง กาโช็ง อี มูห โดง โดะ เฆ ปี ดี หลู. 11 อึณ ยี มูห ฮูน อัน, ยัง อัน, ฆีณ อัน, เปลา อัน บอ โคงนัร อัน, ซีฌีง อัน, อี ซี ฆีด บอ โตต, 12 อัน โลว ดึห ฮาว นา เรต โดง คยัะ เฆ. อัน โลว ดึห ตัห โดง ฮูห เฆ กาฟาง ปี หลู เฆ อี มูห โดง ซีงา บอด ตึอน. อัน โลว โดะ กาซึม โตต แดง กาฟาง ตี.

13 เซ อึณ มูห ดูอี อีซาเรลัะ บอ พึง โบง อี ตู หมึอม, เฆ บอกาเฆลียด ยี ตู นับ, ตู ทาง ลอง อัน ตี แฮะ ลูต ดารา เฌาพรา, อึณ ยี แฮะ แบน หมาบ ดี เฆ, 14 ดอ วี นับ เฆ อึณ แฮะ แบน หมาบ ดี เฆ, ดอ อัน ตี อู เฌณ, แตห เฆ บอกาเฆลียด ดึห ตัห มัก อาทึก อี ซี หนึม, แตห อึณ แบน ปี ดี หลู อี แตห เฌาพรา ฆ็อห แวน หมาบ. เฆ โลว ดึห ตัห โดว ตี ดี ทึบ บีก บอด. 15 เฆ อี มูห ดา ตาง อี แยต พึง ดูอี เฆ ตี, เฆ โลว ดึห แด เฆ, ดาง แดง ฆีณ มามัก โดว ตี. แฮะ ฮอต, โลว ซัวะ แมง อัน ดี อาต เฌาพรา. 16 ดา อี หลู ดี เฌาพรา, อัน โลว ดึห หนาม มามัก ตี มัง กาล็อะ, ฮาว แคง ทึบ บีก บอด. 17 อัน โลว จึบ กานู อัน แคง หนาม ตี, วี คร็อห อาดา บู เฌณ นา อาต บีก ฆ็อง อี มูห นา อาต โดง กอย เฌาพรา. 18 อัน โลว ดึห หนาม ตี มัง กาล็อะ, พ็อห ดี กาโตต บัต พวน กาโตะ อี กอย ดี กาโช็ง หลู. อึณ มูห โดง โดะ เฆ ซีนัม อูห หงูน อี กอย แคง ทึบ บีก บอด นา อาต เฌาพรา ตึอน. หนาม อี ซี ฆีด อี ซี กอย ตึอน, อัน โลว ดึห ฮาว, ฮูห ดี ดัง กาโช็ง หลู โดง โดะ เฆ ปี ดี หลู อี กอย ดี อาต ทึบ บีก บอด. 19 แฮะ ฮอต ปาย ตี อัน โลว วี ดึห โตต แคะ กอย เบรียง, วี โดะ แดง กาโช็ง หลู. 20 อัน โลว หลู มามัก ตี, แตห อึณ ปี ปี หลู อี แตห เฌาพรา ฆ็อห แวน หมาบ ตึอน. เซ ดา อี หลู ดี เฌาพรา แฮะ โบง โตต ปาย ตี แตห เฆ วี กาล็อะ ดี เฌาพรา, เฌาพรา มืร ดี ฆ็อห แวน หมาบ เฆ ดูอี บอกาเฆลียด. 21 แฮะ ฮอต, อัน โลว วี ดึห มามัก บอ โดว อี ซี ฆีด, เลห นา เรต โดง คยัะ เฆ, โดะ แคง เงา, แตห อึณ ปี ดอ โดะ หลู เฆ มามัก อี แตห เฌาพรา ฆ็อห แวน หมาบ ตึอน. เฆ โลว หลู ปาย ตี เซ เฆ ดูอี บอ พึง แฮะ โบง อี ตู หมึอม.

22 เซ อึณ ยี มูห ดา ตาง อี อึบ มืง, เซ อัน แฮะ โบง อี ตู หมึอม, อัน ยี ตู นับ, ตู ทาง ลอง อัน ตี แฮะ ลูต ดารา เฌาพรา, อึณ ยี แฮะ แบน หมาบ ดี อัน, 23 ดอ วี นับ อัน, อึณ แฮะ แบน หมาบ ดี อัน, อัน โลว ดึห มาแป โดว อาโล็ง อี ตู มึห โดง ดี แน, ตัห หลู. 24 อัน โลว ดาง แด อัน แดง ฆีณ มาแป ตี, วี ซัวะ แมง อัน ดี โดง ง็อห เฆ โดว ซัด อี โดะ ดี เงา. อึณ มูห ปี หลู อี แตห เฌาพรา ฆ็อห แวน หมาบ. 25 ดา อี หลู ดี เฌาพรา โลว จึบ กานู อัน แคง หนาม มาแป ตี, วี พ็อห ดี กาโตต บัต พวน กาโตะ อี กอย ดี กาโช็ง หลู ตึอน. แฮะ ฮอต, หนาม อี ซี ฆีด ซี กอย ตึอน, อัน โลว วี ฮาว ฮูห ดี ดัง กาโช็ง หลู ตึอน. 26 แฮะ ฮอต ปาย ตี อัน โลว ดึห โตต เบรียง, โดะ แดง กาโช็ง หลู, แตห อึณ ปี อัน โดะ เบรียง โดว ปี หลู ดอ กอย กาฌูะ เฆ โฮม รึม. ปาย ตี ดา อี หลู ดี เฌาพรา โลว หลู, แตห ดา ตาง อี อึบ มืง วี กาล็อะ ดี เฌาพรา. แฮะ ฮอต หลู, เฌาพรา มืร ดี ฆ็อห แวน หมาบ อัน ตี.

27 เซ อึณ ยี มูห ดูอี เรา ดูอี กาง, อัน แฮะ โบง อี ตู หมึอม, ยี ตู นับ, ตู ทาง อัน แฮะ ลูต ดารา เฌาพรา, อึณ ยี แฮะ แบน หมาบ ดี อัน. 28 ดอ วี นับ อัน, อึณ แฮะ แบน หมาบ ดี อัน, อัน โลว วี ดึห มาแป โดว มา อี ตู มึห โดง ดี แน, ตัห หลู. 29 อัน โลว ดาง แด อัน แดง ฆีณ มาแป อี แบน ปี ดี หลู อี แตห เฌาพรา ฆ็อห แวน หมาบ อัน ตี. อัน บอ โลว ซัวะ แมง อัน โคบ กาโช็ง หลู เฆ โดว ซัด อี โดะ ดี เงา ตึอน. 30 ดา อี หลู ดี เฌาพรา โลว จึบ กานู อัน แคง หนาม ตี, วี พ็อห ดี กาโตต บัต พวน กาโตะ อี กอย ดี กาโช็ง หลู ตึอน. หนาม อี ซี ฆีด ซี กอย, โลว วี ฮาว ฮูห ดี ดัง กาโช็ง หลู ตึอน. 31 แฮะ ฮอต ปาย ตี อัน โลว ดึห เลห โตต เบรียง, แตห อึณ ปี อัน ดึห เลห เบรียง แคง โดว ปี ง็อห หลู เฆ ดอ กอย กาฌูะ เฆ โฮม รึม. อัน โลว ดึห ฌึร ตี, โดะ แคง เงา แดง กาโช็ง หลู. อูห หงูน อัน ตี ดี ล็อะ น็อห เฌาพรา. ปาย ตี ดา อี หลู ดี เฌาพรา โลว หลู, แตห ดูอี วี ตี วี กาล็อะ ดี เฌาพรา. อัน แฮะ ฮอต หลู, เฌาพรา มืร ดี ฆ็อห แวน หมาบ อัน ตี.

32 เซ อึณ ยี มึห ดูอี อี แฮะ โบง หมาบ ดอ ตู โหลห อัน โดว อัน, เซ อัน ซี หลู มาบู ดีแตด, แตห เฌาพรา ฆ็อห แวน หมาบ อัน, อัน โลว ดึห มาบู โดว มา, อี ตู มึห โดง ดี แน, ตัห หลู. 33 อัน โลว ดาง แด อัน แดง ฆีณ มาบู ตี, วี ซัวะ แมง อัน โดง ง็อห เฆ โดว อี แบน ปี หลู อี โดะ ดี เงา. 34 ดา อี หลู ดี เฌาพรา โลว จึบ กานู อัน แคง หนาม ตี, วี พ็อห ดี กาโตต บัต พวน กาโตะ อี กอย ดี กาโช็ง หลู. หนาม อี ซี ฆีด ซี กอย ตึอน, วี โลว ฮูห ดี ดัง กาโช็ง หลู. 35 ปัน ตี อัน โลว ดึห เลห โตต เบรียง, แตห อึณ ปี อัน ดึห เลห เบรียง แคง โดว มาบู ปี หลู เฆ ดอ กอย กาฌูะ เฆ, โฮม รึม. อัน โลว ดึห ฌึร ตี, โดะ แคง เงา โดบ ปี หลู อาโมยว เฮา ปี โดะ กาซึม เฆ แดง กาโช็ง หลู. ปาย ตี ดา อี หลู ดี เฌาพรา โลว หลู ปี หลู อี แตห ดูอี วี ตี วี กาล็อะ ดี เฌาพรา. อัน แฮะ ฮอต หลู, เฌาพรา มืร ดี ฆ็อห แวน หมาบ อัน ตี.”