1 ปัน ตี เฆ วี ดึห เฮ กาทีน, โบง กาโช็ง ดี หลู แบน โมยว แบน โมยว ปี โดะ กาซึม เงา. นา โต็ง อัน พัน กานีห, นา กาว็อห อัน พัน กานีห บอ นา จา อัน โอย กานีห, แตห อึณ มึห พวน บลาก กาลัง. 2 ดี กาโตะ อัน เฆ บอ โบง แตห อึณ บัต บอ พวน กาโตะ, แตห เฆ โบง แตห อึณ แบน อู ซีะ. วาย อัน ตี เฆ วี ปีด บ็อง. 3 เฆ บอ ดึห บ็อง, โบง อึณกรึห ปี ดี ตา ดอ หลู เฆ. อึณ มูห บอ กาโละ บอ ปูง ดี ฆีด แวน กาฟาง เงา, บอ มัง โซก เฆ ซีลัยะ ฮับ หนาม อี คร็อห ดี กาโช็ง, เฆ มัง แฌต ยัง บอ พาน ปี อูน เงา นา แคง. โกรว ฌึร ตี ดอน โมยว, เฆ โบง ตา บ็อง. 4 เฆ บอ โบง กาแบห ตา บ็อง, วี เบลห นา แคง กาโช็ง ตึอน, แตห อัน กอย นา ครึม คร็อง อี กอย โรบ กาโช็ง ตึอน. เฆ แตห อัน กอย ดี กาแต นา จา กาโช็ง ตึอน. 5 บอ ควัง บ็อง พวน ควัง เฆ วี โบง. เฆ วี ดึก ควัง ตี ดี กาโตะ กาแบห ตึอน บอ พวน กาโตะ, แตห เฆ ปึอน ดี ปลอะ มัง ฆอด นา แคง. 6 แฮะ ฮอต, เฆ บอ โบง มัง ฆอด อัน, วี ตา เฮ กาทีน, วี ปีด บ็อง. 7 วาย อัน ตี เฆ บอ ปลอะ อูน มัง ฆอด ตึอน แคง ควัง อี กอย บลาก ดี โคบ กาโช็ง ตึอน, แตห เฆ ปึอน ดี ฆอด อัน. เฆ โบง กาโช็ง ตึอน, ตา แบน, แตห อึณ กาโอ็ง.

8 วาย อัน ตี เฆ โบง อึณปาน ปี ฮับ อึม บอ เจณ อัน, วี ตา บ็อง. บ็อง ปี ตา เฆ ตี, อึณ มูห ปี หลู เฆ อีบึณ อี โบง ฆาน เฌาพรา ดี อาต มาโลห ทึบ บีก บอด. เฆ แฮะ หลู บลัะ บ็อง, ปี ตา เฆ แบน แอบ ฌัม.

9 เฆ แฮะ ฮอต โบง ฌึร ตี ดอน โมยว, เฆ บอ โบง แวง ทึบ บีก บอด. บลาก นา เตต อัน เฆ โบง แตห อึณ มึห บีก ฆ็อง ตา กาตัม ลูย. นา โต็ง อัน เฆ โบง แตห อึณ แบน อู มาย็อห กานีห. 10 เฆ บอ โบง ร็อง อัน อา ฆึร ณ็อง เฆ เจณ ร็อง บอ อา ฆึร โบ็ง. เฆ โบง บอ ร็อง บอ เจณ อัน ตา บ็อง. เฆ ยี ดึห รึอน, โบง ลาวัยะ เฆ วัน รึอน, แตห อึณ กอย ดี กาแต ร็อง, แตห อึณ โปลม. 11 บลาก นา กัว บอ โต็ง อู มาย็อห กานีห. บอ บลาก ตี แฮะ มึห ร็อง อา ฆึร ณ็อง, บอ เจณ ร็อง อี มูห บ็อง, มึห อา ฆึร โบ็ง. ร็อง เฆ ตี บอ มึห ลาวัยะ รึอน เฆ วัน รึอน.

12 บลาก นา เฆต ซีแง เฆ บอ โบง บีก ฆ็อง, แตห อัน โต็ง พัน ฆึร กานีห. เฆ บอ โบง ร็อง อัน ฆึร ณ็อง บอ เจณ ร็อง ฆึร โบ็ง, บอ ลาวัยะ รึอน เฆ ณ็อง รึอน, อี กอย ดี ร็อง ตึอน. 13 แวง บลาก เลห ซีแง แบน นา เตียม, อัน มูห พัน ฆึร กานีห. 14-15 บีก ฆ็อง อี กอย ดี โคบ มาโลห อู บลาก, นา โต็ง อัน แฮะ มูห ฆึร ดี พัน กานีห. เฆ บอ โบง ร็อง โอย ณ็อง อาดา บีก ตี, บอ เจณ ร็อง โอย โบ็ง. ดี โคบ มาโลห ปอ บลาก, เฆ โบง บอ บีก ฆ็อง บอ ร็อง เฆ เจณ ร็อง, แตห อึณ การัม บอ อา บลาก. 16 บีก ฆ็อง ปี เบลห เฆ ดี แวง แตห อัน ปี โล็ง แวง, เฆ โบง โตต ตา บีก กาตัม ลูย. 17 เจณ ร็อง เฆ โบง ตา บ็อง, บอ ร็อง เฆ โบง ตา บ็อง. บอ ลาวัยะ ร็อง ณ็อง ปี ดึก เฆ ดี ร็อง, เฆ โบง ตา รึอน. บอ กาแดะ ร็อง ตึอน ดอน ณ็อง, เฆ วี ปีด รึอน. ปาย ตี ร็อง ดอน ร็อง ดี แวง แฮะ มึห ณ็อง รึอน.

18 บีก ฆ็อง ดี อาต มาโลห แวง, เฆ แฮะ โบง วี ตา เซณ อี คอง, อี ฆูย คอน, อี เรณ แฆ บอ กาตัม ลูย. อึณ มูห ฆาน ปี โบง ดูอี แหลว ดี จีณ โบห เฆ ปัยะ. บีก ฆ็อง ตึอน มูห นา โต็ง อา ฆึร กานีห, นา จา อัน พัน กานีห. ปาย ตี บอ บีก ฆ็อง ดี อาต มาโลห บอ บีก ดี โคบ แวง บอ แวง, เฆ แฮะ การัม. 19 ดี อาต มาโลห แวง อึณ บอ มึห ร็อง พวน ณ็อง บอ เจณ ร็อง พวน โบ็ง. เฆ โบง อาตี, ตา บ็อง. บอ ลาวัยะ อัน เฆ โบง ตา รึอน. กาแดะ ร็อง ตึอน, เฆ บอ ปีด รึอน. 20 บอ หล็อก วัน ทึบ บอ หล็อก วัน โล็ง, เฆ วี โบง โตต ตา บ็อง.

21 อาตี มูห โกรว แบน โมยว แบน โมยว ปี ตา เฆ แตห เฆ ปึอน ดี โบง ทึบ บีก บอด, อี มูห โดง กอย ฌีดืก อี แตห ดูอี นับ ลอง เฌาพรา. อึณ มูห ปี แดม เฆ ครึร อาเลวี อูน ดอ จัร อาโมวแซ เฆ แดม อูน. ดูอี อี บัร เฆ ดูอี โบง ฆาน, อัน มูห อาอีทามา อี มูห ฆอน อีมาย อาโรน ตึอน.

22 อึณ ยี มูห อาเบฌาเลน, อัน แฮะ โบง โตต ดอน โมยว, ปี จัร เฌาพรา ดี อาโมวแซ. อาเบฌาเลน มูห ฆอน อาอูรี. อาอูรี ตึอน มูห ฆอน อาฮูรา, อี มูห ครึร อายูดา. 23 บอ อาโอวโฮวลีอาบ วี โบง ฆาน ดี รึม. อาโอวโฮวลีอาบ มูห ฆอน อาฮีซามาด อี มูห ครึร อาดาน. ดูอี ตึอน, ฆาย มูห ลักซามา อี แหลว ดี โบง ดอน โมยว บอ แหลว ดี โบง เบลห โบห เฆ ปัยะ. ฆาย บอ แหลว ดี จีณ โบห เฆ ปัยะ ตา เซณ อี คอง, อี ฆูย คอน, อี เรณ แฆ บอ กาตัม ลูย. 24 ครีว ปี หลู เฆ ดูอี แตห อึณ แบน ปี หลู มาวัด วีว มาวัด เวณ, อึณ มูห ครีว ปี ตา เฆ โบง ดอน โมยว แคง ทึบ บีก บอด ตึอน. จัน อัน อา ฆึร ดี ดีม ทาเลน ดี บู มาย็อห ดี โอย ฆึร เซเคน. เฆ ซัะ ครีว ตี, ตา เบล ซัะ แคง ทึบ บอด.^a

25 รึอน ปี ตึย ดูอี หลู, จัน อัน บอกาเฆลียด มูห อู มาย็อห ทาเลน ดี อู แหรณ ดี บู มาย็อห ดี บู ฆึร ดี พัน เซเคน. เฆ ซัะ รึอน ตี, ตา เบล ซัะ แคง ทึบ บีก บอด.^b 26 รึอน ตี อึณ มูห รึอน ปี ดัว อีมาย ดอน อี. อู วี โลว ดัว อู เบคา. อึณ ปี รึอน อู ควาย. รึอน ตึอน มูห ปี แฆบ เฆ ดี อีมาย อี ฮับ จืร เฆ แคง ฌาราง ดอ โนะ อาซาก เฆ อา ฆึร ซีนัม โฮะ นา แดง. อีมาย ตึอน, เฆ บอกาเฆลียด แฮะ มึห เดา แซน ดี โอย แหรณ ดี พัน มาย็อห ดี พัน ฆึร วี. 27 รึอน อาดา อู มาย็อห ทาเลน ตึอน, เฆ แฮะ ตา โบง เจณ ร็อง อี กอย แคง ทึบ บีก บอด ตึอน บอ เจณ ร็อง ปี ฮอย เฆ บีก ฆ็อง แคง ทึบ บีก บอด ตึอน. เจณ ร็อง ตึอน อึณ มึห อู มาย็อห โบ็ง. เฆ บอ ตา รึอน อู มาย็อห ทาเลน, ตา อู โบ็ง อู ทาเลน.^c 28 อึณ ยี มูห รึอน อู แหรณ ดี บู มาย็อห ดี บู ฆึร ดี พัน เซเคน ตึอน, เฆ ตา โบง ลาวัยะ อี ดึก ดี ร็อง ตึอน. แดง นี, เฆ บอ ตา รึอน ตี, ปีด ดี กาแดะ ร็อง บอ โบง วัน รึอน อี กอย ดี ร็อง ตึอน.

29 บ็อง ตึอน ปี หลู ดูอี, อึณ จัน บู ฆึร ทาเลน ดี อา แหรณ ดี พวน มาย็อห เซเคน.^d 30 บ็อง ตี, เฆ ตา ดอ โบง เฆ เจณ ร็อง ดี มาโลห ทึบ บีก บอด. เฆ บอ ตา บ็อง ตี โบง กาโช็ง หลู ดี เฌาพรา บอ กาแบห ปี เบลห เฆ นา แคง กาโช็ง หลู ตึอน บอ อาฌัะ ดอน โมยว ปี ตา เฆ ดอ หลู เฆ ดี กาโช็ง ตึอน. 31 เฆ บอ โบง เจณ ร็อง อี กอย ดี แวง ทึบ บีก บอด ตึอน, บอ เจณ ร็อง อี กอย ดี มาโลห แวง บอ ดี หล็อก. เฆ โบง บอ วัน ทึบ เฆ หล็อก ดี แรง แวง ตึอน. เฆ โบง โตต ฌึร ตี, ตา บ็อง ตี.