1 เฌาพรา วี ต็อห ดี อาโมวแซ, “แม โลว วี โบง มาว กามาย อา ดีพลาง, แตห อึณ ปี มาว ดีพลาง บรีม แปะ แฮะ โบง โอว. โอว ดี วี แดม ดารา ปี ดึอม แดม โอว นา แดง มาว อา ดีพลาง บรีม ตึอน แตห อึณ ปี ปี ปยาต แม. 2 แม โลว อึณปราย โตต, แตห กอ ฌัม แคหณา ซีณวัห เจว. แม โลว วี โฮะ ฌัม โดง กอย โอว นา กาแดะ นอน ซีนาย. 3 ดูอี เฮา อาว ปึอน ฮาว รึม โดบ แม. โอว ตู คัม ดี ยึร ดูอี ปอ อู วี กอย แดง นอน บอ นอน. บอ โดว ซัดดาวา อี มูห มาบู, มา แป บอ มามัก, แกวะ แตห เฆ โฮม เปต ดี ดัง นอน.”

4 เฌาพรา แฮะ ฮอต กาลาง ปาย ตี อาโมวแซ วี โบง มาว ดีพลาง กามาย อา ดีพลาง, แตห ฆาย ปี อา ดีพลาง บรีม ตึอน. ปา แคหณา ซีณวัห อัน วี เจว โฮะ ดี นอน ซีนาย ตึอน, แตห อึณ ปี ปี จัร เฌาพรา อัน โบง. อัน มืร โฆ็ง มาว อา ดีพลาง ตึอน. 5 ปัน ตี เฌาพรา วี เลห โลง แคง อึณอูะ. อัน ตัห กอย โดง กอย อาโมวแซ. อัน วี กาลาง จืร อัน, แตห อาโมวแซ วี โทม. อัน ต็อห, “โอว มูห อัน เฌา ปี มูห โอว.” 6 ปัน ตี เฌาพรา กาโลห ดี อาต อาโมวแซ. ดอ อัน ตี อัน ต็อห, “โอว มูห อัน เฌา. โอว มูห เฌาพรา อี มึห น็อห หมึอม, น็อห กาเว ดูอี. โอว อาว หงึย รู. น็อห โอว นับ ดี ร็อก กาเซา ดูอี. เซเซ โอว บอ โบง ปี ต็อห โอว. น็อห ร็อก โอว ตี อาว นับ ดี โตต ดอ เหมา. 7 โอว ร็อก เฆ ดูอี แบน แหรณ โจว. โอว มืร ฆ็อห แวน หมาบ ปี โบง ดูอี, ฆ็อห แวน น็อห ฮาย ดูอี บอ น็อห ตู อึง ดี โทม โฆรห โอว. โอว ยี ตู แตห ดูอี มึห หมาบ ปึอน ลอด คัม หมาบ เฆ. โอว ดี แตห บอ ฆอน บอ หลาน ดูอี โลว คัม หมาบ ปี ดึอม โบง ฆูณ ดา เฆ. เฆ ฆอน โลว คัม หมาบ ฆูณ ดา เฆ แตห กอ ฌัม โอย โจว บอ พวน โจว.”

8 ดอ อัน ตี อาโมวแซ วี โฆม ดี อาต เฌาพรา อู เฌณ, วี ซาคึร. อัน ต็อห, 9 “อึย แม เฌาพรา, เซ แม เฌาพรา แฮะ อึง โอว, โอว หมาณ แตห แม เฌาพรา ฮาว รึม โดบ เย. โอว แฮะ นับ, ดูอี อีซาเรลัะ นี, เฆ มูห อาโมยว ดูอี อี มึห น็อห ดืร. โอว ยี หมาณ, แตห แม เฌาพรา ฆ็อห แวน หมาบ เย ตี, แวน น็อห ฮาย เย ดูอี อี นับ ดี โบง นา ตู หมึอม เซเซ. โอว บอ หมาณ, แตห แม วี แตห เย แบน ดูอี อาโมยว ปี อึบ แม เซเซ.”

10 อาโมวแซ แฮะ ฮอต หมาณ ปาย ตี เฌาพรา วี ต็อห, “โอว ดี วี ดัว กาดีก ซัดฌา กามาย, แตห บอ เบ บอ โอว วี ลาย กาแซณ ปอ อู จึบ. โอว ดี วี โบง นา หมึอม อาม กาเซา ดี อาต เบ, แตห เบ บอกาเฆลียด ปึอน ดี ยึร. ปี ดี โบง โอว ฌึร ตี, เฆ ดูอี แดง กาดาย ตู ดึอม ยึร ดอ เหมา. เฆ ดูอี อี กอย ดี โคบ เบ, เฆ ดี ยึร แคะ ตาง, แคะ หมึอม อาม กาเซา ปี ดี โบง โอว อาดา เบ. 11 แคะ ปี จัร โอว เบ โบง อาตึร นี, แตห เบ วี โทม, วี โดบ, วี โบง. เซ เบ วี โทม โฆรห โอว, โอว ดี ซูต เฆ อาโมยว ดูอี เฮา, แตห เฆ เตา อาต ตัห ฌัม เบ โดง กอย เฆ. บอ เฆ ดูอี อาโมวรีด, ดูอี กานัณ, ดูอี เฮทีด, ดูอี เพเรซีด, ดูอี ฮีวีด บอ เฆ ดูอี เยบูซีด, โอว ดี แตห เฆ เลห โตต ดอ ตัห ฌัม เบ โดง กอย เฆ. 12 เบ โลว ซาดีก, แกวะ ดัว กาดีก ซัดฌา ดี เฆ อาโมยว ดูอี อี กอย แคง มืง ปี ฮาว เบ. เซ เบ ยี ลาย กาแซณ, อึณ ดี แตห เบ ชึม. 13 เซ เบ ฌัม โดง กอย เฆ ดูอี เฮา, เบ โลว แวน โดง ปี กรึบ เฆ อารึบ. เบ โลว ดูห มาว บอด ปี กรึบ เฆ, แตห อึณ กาลาต. บอ กันทอน ปี หลู เฆ ดี นาง กานัม อี จืร เอซูรา ตึอน, เบ โลว ฆัร แวน, แกวะ ฮู แตห อึณ มึห มาเซ, ปี กรึบ เฆ. 14 แกวะ กรึบ เฌา แบน โมยว แบน โมยว. โอว อี มูห อัน เฌา, โอว มูห เฌาพรา อี ตู คัม เบ กรึบ มาเซ แดง โอว.

15 แกวะ ลาย กาแซณ มาเซ ดี ดูอี อี กอย แคง มืง กามาย เบ. เฆ ดูอี อี กอย แคง มืง ตี, เฆ นับ ดี ดัว อีบึณ เฆ, แตห เฆ วี แบน ยา มาลัม ปี อึง เฌา ปี กรึบ เฆ. เฆ บอ นับ ดี โบง บลอย หลู ตาง. ดอ อัน ตี เฆ ดี บอ นับ ดี บาง เบ, แตห เบ กอย รึม โดบ เฆ, วี โฮม ปี หลู เฆ. 16 วาย อัน ตี เบ บอ นับ ดี ร็อห ฆอน อีบึณ เฆ, ดัว ดี ฆอน อีมาย เบ, แตห เฆ คัด. เซ เฆ โบง ปาย ตี อีบึณ เฆ ตึอน, เฆ นับ ดี กรึบ เฌา บรีม ปี ดึอม กรึบ เฆ. แฮะ ฮอต, เฆ ดี บอ กาซูห ฆอน อีมาย เบ, แตห เฆ แวน โอว, วี กรึบ ปี กรึบ อีบึณ เฆ. โคว อัน ตี, โอว แฮะ ต็อห, แกวะ ลาย กาแซณ มาเซ ดี ดูอี ตี.

17 แกวะ ดึห ครีว, รึอน, เฆียง เฆ ฮีน, โบง อารึบ ปี ดี กรึบ เบ ดอ เหมา.

18 เบ บอ โลว โบง บลอย โฮม คามูน ตู ฮับ ซีนัม บรัห ดอ ฌัม มาเฆียน อาบีบ ตึอน. อาดา บู ซีแง เบ โลว โบง ดอน โมยว ปี ดึอม จัร โอว เบ โบง ดอ ฌัม บลอย ตี. ปาย ตี เบ โลว โหลห มาเฆียน อาบีบ ตึอน ดอ แตห โอว เบ เลห แคง มืง แอฆึบ.

19 บอ ฆอน อีมาย อี มูห ฆอน ฆีณ ดอน อี, บอ ฆอน ดูอี บอ ฆอน โดว ซัดดาวา ปี เฮียง เบ, เฆ มูห โกรว โอว. 20 เซ อึณ ยี มูห ฆอน มาลา, อี มูห ฆอน ฆีณ, เบ โลว ดึห ฆอน มาบู อู โดว กาดาง อัน. เซ เบ ตู มึห มาบู อี กาดาง อัน, เบ โลว มัห โกม อัน, แตห อึณ กาลาต. เซ อึณ มึห ฆอน อีมาย เบ อี มูห ฆอน ฆีณ, เบ โลว ดัว มาบู, กาดาง อัน.

เซ ดูอี ตู มึห ดี โฆ็ง ปี ดี หลู เฆ, แกวะ แตห เฆ ตัห ฌัม โดง กอย โอว.

21 เดา ซีแง เบ โลว โบง ฆาน เบ แบน โมยว แบน โมยว. ฮี ฌัม ซีแง อึณบู, เบ โลว ดีเหลา. อึณ บอ มูห ดอ แท เบ นา, อึณ บอ มูห ดอ โซะ เบ โหงว, เบ โลว ดีเหลา เซเซ ดอ ฌัม ซีแง อึณบู.

22 พัน ฆึร ซีแง วาย แฮะ ฮอต โซะ โหงว, เบ โลว โบง บลอย โซะ โหงว. บอ บลอย อูน เบล เบ โลว โบง ดอ กอย เบ แคง ทึบ บอ โบง บลอย ตี อาต โตต ซีนัม. 23 อู ซีนัม โอย เฌณ เฆ อีมาย โลว ฮาว ฌัม โดง กอย โอว อี มูห เฌาพรา ปี กรึบ เบ ดูอี อีซาเรลัะ. 24 โอว ดี บอ ซูต เฆ ดูอี เฮา เลห แคง มืง เฆ, แตห อึณ แบน มืง เบ, แตห โดง กอย เบ กาว็อห. โอว มืร ตู แตห อึณ มึห อาเซ, อี ต็อห ดี ปรา มาน มืง เบ ดอ ตัห เบ ดี อาต โอว ดี ทึบ บอด.

25 เซ เบ บอ หลู โดว ซัดดาวา ดี โอว, อาว ปึอน หลู โดบ คามูน อี ฮับ ซีนัม บรัห. ดอ โบง เบ บลอย โหลห เบ เฌาพรา ดอ กาโลห อัน กาง เบ, อาว ปึอน อูน กาโลย ปี ดี หลู แตห อึณ ฌัม แคหณา.

26 ปี ซัม เบ แบน โมยว แบน โมยว อี เลห ดี อาต ดอ อาคราว อัน, เบ โลว ดึห ร็อห อี ชีด กาเซา, หลู ดี เฌาพรา.

เซ เบ ดัง ยัง ฆอน มาแป, แกวะ ฮับ อึม ปู มา อัน.” แคะ ตี เฌาพรา แฮะ วี กาลาง ดี อาโมวแซ, แตห เฆ วี ลาย กาแซณ ลอง อัน ตี.

27 วาย อัน ตี เฌาพรา วี ต็อห ดี อาโมวแซ, “แม โลว แดม อูน โฆรห ปี กาลาง โอว ดี แม ดอ ตี นี. โฆรห ตี มูห โฆรห ปี ลาย กาแซณ โอว ดี เบ.” 28 อาโมวแซ ยี กอย โดง กอย เฌาพรา อาดา พวน ฆึร ซีแง ดี พวน ฆึร หมึร. ดอ กอย อัน แดง นอน, อัน ตู โฮม มาเซ, ตู เดียง อึม ดอ เหมา. อัน บอ แดม อูน ปี ลาย กาแซณ เฌาพรา ฆาย ดูอี อีซาเรลัะ. อัน วี แดม แดง มาว อา ดีพลาง อี มูห ดารา ฆึร ณ็อง ปี ดัว เฌาพรา ดี เฆ.

29 ดอ วี เลห โลง อาโมวแซ แดง นอน ซีนาย ตึอน, วี โฆ็ง มาว กามาย อา ดีพลาง, นา อัน วี บลาง ราว โกบ กอย รึม อัน โดบ เฌาพรา, ลาย กาลาง โฆรห. เฆ ดูอี เฮา ปึอน ดี ยึร บลาง ตี. อาโมวแซ ยี ตู นับ ลอง อัน ตี. 30 ปัน ตี บอ อาโรน บอ เฆ ดูอี อีซาเรลัะ, เฆ บอกาเฆลียด บอ ยอด อาโมวแซ, วี ยึร นา อัน มึห อาโรง บลาง ตี. เฆ กอ โยว, ตู ยัะ ฮาว กาตัด โดง กอย อัน. 31 อาโมวแซ ยี แดะ เฆ ตัห ฌัม โดง กอย อัน. แฮะ ฮอต, อาโรน บอ เฆ ดา ตาง ดูอี อีซาเรลัะ, เฆ วี ฮาว ฌัม โดง กอย อัน, แตห เฆ วี ลาย กาลาง โฆรห. 32 วาย อัน ตี บอ เฆ ดูอี กืน วี ตัห ฌัม โดง กอย อาโมวแซ. อัน มืร วี กาลาง ดี เฆ แตห เฆ วี โทม โตต ดารา ปี จัร เฌาพรา เฆ โบง ดอ กอย อัน แดง นอน ซีนาย ตึอน.

33 อัน แฮะ ฮอต กาลาง ดี เฆ ดูอี กืน, อัน ดึห โดณ กาบีด นา อัน. 34 ดอ วี ลึบ อัน แคง ทึบ ดีแตด, วี กาลาง โฆรห ดี เฌาพรา, อัน บูต แวน โดณ ตึอน ดี นา อัน. อัน แฮะ ฮอต เลห โดง กอย เฌาพรา, อัน วี กาลาง ดี เฆ ดูอี อีซาเรลัะ แคะ ปี กาลาง เฌาพรา ดี อัน. 35 เฆ ดูอี อีซาเรลัะ ยี ยึร อาโรง บลาง ดี นา อัน. โคว, อาโมวแซ วี ดึห โดณ, วี กาบีด นา อัน, แตห กอ ฌัม อาคราว ดี วี ลึบ อัน โดง กอย เฌาพรา, วี กาลาง ดี เฌาพรา ปอ อู เฌณ.