1 วาย อัน ตี เฌาพรา วี ต็อห ดี อาโมวแซ, “แตห เบ เลห แคง โดง กอย เบ นี. บอ แม บอ เฆ ดูอี ปี แยต แม เลห แคง มืง แอฆึบ ตึอน, แตห เบ ฮาว ฌัม มืง ปี ดึอม กาลาง โอว. โอว แฮะ ดึอม ดัว กาดีก ซัดฌา ดี อาบราฮัม, อาแซก บอ อาโกบ. โอว แฮะ ต็อห ดี ดัว มืง ตี ดี เฆ หลูกหลาน อาบราฮัม. แตห เบ ฮาว ฌัม มืง ตี ดอ ตี นี. 2 โอว ดี จัร อามู อามาด โอว, แตห อัน แยต ดี อาต เบ. โอว ดี บอ ซูต เฆ ดูอี เฮา เลห แคง มืง ตี. บอ เฆ ดูอี กานัณ, ดูอี อาโมวรีด, ดูอี เฮทีด, ดูอี เพเรซีด, ดูอี ฮีวีด บอ เฆ ดูอี เยบูซีด, ดูอี ฌึร ตี ดอน โมยว โอว ดี ซูต เลห แคง มืง ตี. 3 แตห เบ ฮาว ลึบ กอย แคง มืง ตี. อึณ มูห มืง หมึอม. กาดาย แคง มืง ตี แฮะ บอด, แตห เบ มึห เฮ เฆ เบล ดอน โมยว. แตห เบ มึห ปี ดี โลว เบ ดอน โมยว. โอว ยี ตู ฮาว รึม โดบ เบ. โกบ มูห เบ ดูอี อี ตู โทม โดบ โอว, โอว อาว ฮู ฮาว รึม โดบ เบ. เซ โอว บอ ฮาว รึม โดบ เบ, โอว โยว โอว ดี โบง แตห เบ ชึม ดอ ฮาว เบ โดบ อึณเตณ.”

4-5 ปัน ตี เฌาพรา แฮะ จัร อาโมวแซ กาลาง ดี ดูอี ต็อห, “เบ มูห ดูอี อี มึห น็อห ตู โทม ตู โดบ โอว. เซ โอว ดี ฮาว รึม โดบ เบ อาดา อู กาจัน, โอว ดี บอ โบง แตห เบ ชึม. ดอ ตี นี แตห เบ บูต แวน ครึง ชีด ปี ตา เบ. แฮะ ฮอต, โอว ดี เฌณฌา ลอง ปี ดี โลว โอว โบง ดี เบ.” เฆ ดูอี กืน บอ โทม โฆรห ปี กาลาง เฌาพรา. อึณ วี แบน ดูก ดี น็อห เฆ, แตห เฆ วี ยาม วี กลึร. อาว มึห อาเซ ชึบ ครึง ชีด. 6 ปัน ตี เฆ ดูอี อีซาเรลัะ แวน โตต โมยว อี ชีด ปี ตา เฆ ดอ กอย เฆ ดี นอน โฮวเรบ ตึอน.^a

7 ดอ กอย เฆ ดูอี อีซาเรลัะ โดง คยัะ เฆ, อาโมวแซ แฮะ ดึอม เบลห ทึบ บีก นา เรต โดง คยัะ เฆ, แตห อึณ กอย โต็ง อี แจก. ทึบ บีก ตี อัน ต็อห, อึณ มูห โดง ปี ปึอน ลาย กาตูณ. อาเซ ซี ดีหมอด เฌาพรา ลอง อามู อัน, อัน บอ นับ ดี ฮาว ฌัม โดง กอย ทึบ บีก ตี. 8 ดอน เฌณ ดอน เฌณ ดอ ฮาว ลึบ อาโมวแซ แคง ทึบ บีก ตึอน, เฆ ดูอี บอกาเฆลียด กอย ดี อาต ทึบ เฆ, ยอด อัน ลึบ นา แคง. 9 ดอ ลึบ อาโมวแซ แคง ทึบ บีก ตึอน, ร็อง อึณอูะ ตึอน เลห โลง กอย ดี อาต มาโลห อัน. อึณ บอ กอย ดี ตี ดอ กาลาง เฌาพรา ดี อาโมวแซ. 10 เฆ ดูอี ยี ยอด อึณอูะ เลห โลง ดี อาต มาโลห ทึบ บีก ตึอน, ดอน อี วี ยีต กอย ดี อาต ทึบ โดง กอย อัน, กรึบ เฌาพรา. เฆ กรึบ ปาย ตี ดอ กาลาง เฌาพรา โฆรห ดี อาโมวแซ. 11 ดอ อัน ตี เฌาพรา บอ กาลาง ดี อาโมวแซ แตห ฆาย ลาย มางัห, แตห อึณ ปี ดูอี อู วี กาลาง ดี ฆึก อัน. แฮะ ฮอต กาลาง ปาย ตี อาโมวแซ บอ เวณ ฌัม โดง คยัะ เฆ ดูอี กืน. อึณ ยี มูห อาโยวซูอา, อี มูห ฆอน อานูน, อัน จอย อาโมวแซ. อาซาก อัน หณัม กืน. อัน ตู เลห แคง ทึบ บีก ตึอน, อัน กอย เซเซ แคง ทึบ.

12 อาโมวแซ วี ต็อห ดี เฌาพรา, “แม เฌาพรา, แม แฮะ จัร โอว แตห โอว ตึย ดูอี เฆ นี, แตห เฆ ตัห ฌัม แคง มืง กามาย. แม มืร แฮะ ต็อห, แม แฮะ นับ โอว, โอว มูห ฆึก ปี อึง แม. แม ยี ตู กาลาง ดี โอว, อาเซ ดี ฮาว รึม โดบ โอว. 13 เซ แม อึง โอว, เซ แม แฮะ กาเว โอว, โอว หมาณ, แตห แม กาลาง ดี โอว, แตห โอว นับ ปี อึง แม, แตห โอว ปึอน ดี โบง อี ล็อะ น็อห แม, แตห โอว นับ ซีคยา. โอว บอ หมาณ, แตห แม โหลห ดูอี เฆ ตี อี มูห ดูอี ปี ร็อห แม.”

14 เฌาพรา วี ต็อห ดี อัน, “โอว ดี ฮาว รึม โดบ แม, แตห เบ ปึอน ดี กอย ดาคึย.”

15-16 อาโมวแซ วี ต็อห, “เซ แม ฮาว รึม โดบ เย, อึณ ดี ลึห ซีคยา ดี ดูอี เฮา, เย มูห ดูอี อาว ปี เฆ ดูอี เฮา ดอน โมยว แดง กาดาย นี. เซ แม ฮาว รึม โดบ เย, เฆ ดูอี ดอน โมยว ดี บอ นับ, แม แฮะ อึง บอ โอว บอ เฆ ดูอี นี. เซ แม ยี ตู ฮาว รึม โดบ เย, แกวะ แตห แม จัร เย เลห แคง โดง กอย เย นี ดอ เหมา.”

17 ปัน ตี เฌาพรา วี ต็อห, “โอว แฮะ อึง แม. โอว บอ นับ ซีคยา แม. โคว อัน ตี, โอว ดี โบง ปี หมาณ แม.”

18 อาโมวแซ ต็อห, “เซ อึณ ปาย ตี โอว บอ หมาณ, แตห แม บยัะ อาโรง บลาง แม, แตห โอว ปึอน ดี ยึร.”

19 เฌาพรา วี ต็อห, “โอว ดี แตห อาโรง บลาง โอว ฮาว ดี อาต แม, แตห แม ยึร. โอว ดี วี กาลาง จืร โอว ดี แม, แตห แม โทม. โอว มูห อัน เฌา. โอว ดี อึง เฆ ดูอี ปี ร็อห โอว. โอว ดี กาเว เฆ ดูอี ปี อึง โอว. 20 แม ยี ตู ปึอน ยึร นา โอว. ดูอี แดง กาดาย นี, เซ เฆ ยึร นา โอว, เฆ โลว ยัม.

21 โคว อัน ตี, แตห แม ฮาว กอย แดง ดาอาง อี กอย กาตัด โดง กอย โอว นี. 22 โอว ดี แตห แม กอย แคง มาอัะ ดาอาง. แฮะ ฮอต, โอว ดี ตา แด โอว, ฆ็อง งาย แม ดอ กาโลห โอว ฮาว โคบ แม. 23 โอว แฮะ ฮอต กาโลห แม, โอว ดี วี เบลห โลง แด โอว, แตห แม ปึอน ดี ยึร กาตูะ โอว. นา โอว แม ยี ตู ปึอน ยึร.” ปาย ตี เฌาพรา แฮะ กาลาง โฆรห ดี อาโมวแซ.