1 อึณ ยี มูห ดูอี อีซาเรลัะ เฆ กืน อี กอย นา ปัน. เฆ แฮะ หน็อะ เหลณ, แตห อาโมวแซ วี เลห โลง ดี นอน เฌาพรา ตึอน. เฆ วี ฮาว ฌัม โดง กอย อาโรน. เฆ ต็อห ดี อัน, “แม โลว โบง อารึบ เฌา แบน กาดัง แบน กาดัง, แตห เฆ ปึอน ดี แยต เอ, แตห เฆ แหน อึณเตณ ปี โลว ฮาว เอ. อึณ ยี มูห อาโมวแซ, อี แฮะ ตึย เอ เลห แคง มืง แอฆึบ ตึอน, อัน แฮะ หราย. เย ตู นับ ปี ปาย อัน, ตู นับ, อัน กอย นา เหมา.”

2 แฮะ ฮอต ต็อห ปาย ตี อาโรน วี ต็อห, “แตห เบ บูต เลห บีโหยะ ครีว ปี ตา อีบึณ เบ บอ ฆอน เบ, บอ มูห ฆอน อีบึณ บอ มูห ฆอน อีมาย, แตห เบ บอกาเฆลียด ตัห ดัว โตต ดี โอว.” 3 อัน แฮะ ฮอต ต็อห ปาย ตี เฆ บอกาเฆลียด บูต เลห บีโหยะ เฆ, ดัว ดี อาโรน. 4 อาโรน ดึห โตต ครีว ปี ดัว เฆ ดี อัน. แฮะ ฮอต, อัน วี โบง อารึบ มัก อาโล็ง, แตห เฆ ปึอน ดี กรึบ. อัน แฮะ ฮอต โบง, เฆ ดูอี กืน วี ต็อห, “อึย เบ ดูอี อีซาเรลัะ, อาตี แฮะ มูห เฌาพรา อี แฮะ ตึย เบ แตห เบ เลห แคง มืง แอฆึบ ตึอน, ตัห ฌัม โดง กอย เบ นี.”

5 ดอ ยึร อาโรน เฆ ดูอี กืน มึห น็อห ฌึร ตี, อัน บอ โบง กาโช็ง หลู, เบลห ดี อาต อารึบ ตึอน. อัน บอ ต็อห ดี เฆ ดูอี กืน, “แคหณา เอ ดี โบง บลอย เฌาพรา.” 6 โคว อัน ตี, เฆ ดูอี กืน วี เจว ยีต. เฆ หลู ปี ดี หลู ดอน โมยว ดี อาต อารึบ ตึอน. เฆ บอ หลู ปี ดี หลู อี โดะ ดี เงา บอ ปี ดี หลู อี กอย กาฌูะ โฮม รึม. วาย อัน ตี เฆ วี กอย รึม, โฮม โบม, เดียง อึม มางูน. แฮะ ฮอต, เฆ วี ยีต วี กัร ซีนัน ซีนืง บอ ฆา.

7 ดอ อัน ตี เฌาพรา วี ต็อห ดี อาโมวแซ, “แตห แม ปีครัน แม เลห โลง ดี นี. เฆ ดูอี อาโมยว แม ปี แยต แม เลห แคง มืง แอฆึบ ตึอน, เฆ แฮะ โบง นา ตู หมึอม อี หมึอม กาอีห. 8 เฆ วี กาปลูะ น็อห บอ ฮาย กาเซา. อาว เหลณ, โอว แฮะ ต็อห ดี เฆ มาเซ ปี โลว โบง เฆ. ดอ ตี นี เฆ แฮะ ฮอต โบง อารึบ มามัก ตา ครีว. เฆ แฮะ ฮอต เบลห อัน กาแต เฆ, หลู ดอน โมยว ดี อัน. เฆ มืร แฮะ ต็อห, ‘อาตี มูห เฌาพรา ปี กรึบ เบ ดูอี อีซาเรลัะ. เฌาพรา ตี แฮะ แยต เบ เลห แคง มืง แอฆึบ.’

9 โอว แฮะ นับ แคะ ดืร น็อห เฆ. 10 ดอ ตี นี โอว แฮะ รู กาเซา ดี เฆ. แกวะ แตห แม แคร โอว, แตห โอว วี แวน เฆ บอกาเฆลียด, แตห เฆ ยัม โตต. โอว ยี ดี แตห แม บอ หลูกหลาน แม แบน อาโมยว ดูอี ตาง.”

11 เฌาพรา แฮะ ฮอต ต็อห ปาย ตี อาโมวแซ หมาณ, แตห เฌาพรา วี โทม โฆรห อัน. อัน วี ต็อห, “อึย แม เฌาพรา, เหมา อึณ ปาย ปี รู กาเซา แม ดี ดูอี เฆ ตี อี มูห ดูอี ปี อึบ แม? แม แฮะ แตห เฆ เลห แคง มืง แอฆึบ, บยัะ ปวน แม ดี เฆ. 12 ดอ ตี นี เซ แม โบง ปี ต็อห แม นี, เฆ ดูอี แอฆึบ นับ ดี แคณ แม. เฆ นับ ดี ต็อห, แม แฮะ คราม ดี แตห เฆ ชึม. เฆ ดี ต็อห, แม แฮะ ณึงราง ตึย เฆ เลห แคง มืง เฆ. มาแล แม โบง ปาย ตี แตห เฆ ยัม แดง นอน นี, แกวะ ฮู แตห อึณ มึห อาโมยว เฆ แดง กาดาย นี. โคว อัน ตี, โอว หมาณ, แตห แม เฌาพรา วี แวน น็อห รู แม ตี. โอว หมาณ, แตห แม กาปลูะ น็อห แม, แกวะ แตห แม โบง แตห อึณ แบน ดูก ดี ดูอี เฆ นี. 13 โอว หมาณ, แตห แม โหลห อาบราฮัม บอ อาแซก บอ อาโกบ ตึอน, อี มูห แดเจณ แม. แม เฌาพรา แฮะ ดึอม ดัว กาดีก ซัดฌา ดี เฆ. กาดีก ซัดฌา ปี ดัว แม ตี, อึณ แฮะ หมาน ปี แม เฌาพรา แฮะ หมาน. แม แฮะ ต็อห, แม ดี แตห เฆ หลูกหลาน อาบราฮัม ตึอน กืน แคะ กืน ซีมัณ อี กอย ฆางหราว. แม มืร แฮะ ต็อห, แม ดี แตห เฆ หลูกหลาน อัน กอย แคง มืง ตึอน, แตห อึณ แบน มืง เฆ. แม แฮะ ดัว กาดีก ซัดฌา ต็อห, เฆ ดี ปึอน กอย เซเซ แคง มืง ปี ดี ดัว แม ดี เฆ. ดอ ตี นี โอว หมาณ, แตห แม เฌาพรา วี โหลห กาดีก ซัดฌา ฌึร ตี ปี ดัว แม ดี เฆ.” 14 อาโมวแซ แฮะ ฮอต หมาณ ปาย ตี เฌาพรา กาปลูะ น็อห อัน. อัน ตู วี โบง แตห เฆ ดูอี บอกาเฆลียด โลว ยัม.

15 วาย อัน ตี อาโมวแซ วี เลห โลง แดง นอน. อัน บอ โฆ็ง มาว อา ดีพลาง ปี แดม อูน เฌาพรา, อี แตห ดูอี นับ ลอง อัน. 16 มาว ตึอน มูห ปี โบง เฌาพรา. โดว ปี แดม อูน นา แดง มาว ตี, อึณ มูห ปี แดม อูน เฌาพรา ตา แด อัน. อัน แฮะ ดอก แตห อึณ เลห โดว ทัม บอ อา บลาก.

17 ดอ โลง อาโมวแซ แดง นอน, อึณ มูห อาโยวซูอา. ดอ ยึร อัน เฆ ดูอี กืน แฮะ ซีนัน ซีนืง, อัน วี ต็อห ดี อาโมวแซ, “แตห แม โทม ซีนัน ซีนืง. อึณ ปี ดูอี อี กอย โดง คยัะ เอ ลาย กาโฆห.”

18 อาโมวแซ วี ต็อห, “ปี โทม โอว อาว ปี ปี ดัด ดูอี ดอ แป เฆ รันซู. อาว ปี ปี ดัด เฆ ดอ ชึม เฆ. อึณ ปี ดูอี ต็อห โหมว ดาคึย อี ลึห ดี โหยะ โอว.”

19 ปัน ตี อาโมวแซ วี ตัห กาตัด โดง คยัะ เฆ. อัน วี ยึร อารึบ มัก ตึอน, บอ ยึร แคะ โคย ดูอี. อัน บอ แกร ดี รู กาเซา. อัน บอ ซัต แวน มาว อา ดีพลาง ปี โฆ็ง อัน, แตห อึณ กาลาต ลึร ดี ดัง นอน ตึอน. 20 วาย อัน ตี อาโมวแซ วี ดึห อารึบ มามัก ตึอน, ฮับ แคง เงา, แตห อึณ ลาต โตต. อัน วี ดูห ครีว ตี, แตห อัน วี แบน กามอต. แฮะ ฮอต, อัน วี บรัด แคง อึม, วี คาหนาบ เฆ ดูอี อีซาเรลัะ, แตห เฆ เดียง อึม ตี.

21 อัน วี ดีหมอด อาโรน ต็อห, “มาเซ ปี โบง เฆ ดูอี ดี แม, แตห แม ควาง เฆ โบง หมาบ ตาง ฌึร ตี?”

22 อาโรน วี ต็อห, “อึย ดา กาณา โอว, แกวะ แตห แม รู ดี โอว. แม แฮะ นับ ซีคยา, ดูอี เฆ นี, เฆ หงึย ดี โบง นา ตู หมึอม. 23 เฆ แฮะ ต็อห ดี โอว, ‘แตห แม โบง อารึบ เฌาพรา, อี ดี แยต ดี อาต อึณเตณ ปี โลว ว็อะ เอ. อึณ ยี มูห อาโมวแซ อี แฮะ ตึย เอ เลห แคง มืง แอฆึบ, อัน แฮะ หราย. เอ ตู นับ ปี ปาย อัน.’ 24 แฮะ ฮอต, โอว จัร เฆ แตห เฆ บูต เลห ครีว ปี ตา เฆ, แตห เฆ วี ดัว โตต ดี โอว. แฮะ ฮอต, โอว วี ฮับ ครีว เฆ ตี แคง เงา, แตห อารึบ มัก อาโล็ง นี วี เลห.”

25 ปัน ตี อาโมวแซ กอ นับ อึณ ปาย เหมา. อัน บอ นับ, เฆ ดูอี แฮะ แวน โฆรห อัน, อาว ฮู โดบ อาเซ. บอ อาโรน ตู แป ดี อึบ เฆ. อัน แฮะ ควาง เฆ โบง นา ตู หมึอม ฌึร ตี, แตห รันซู เฆ วี ปึอน ดี กาณัห เฆ, อาว ฮู โยว เฆ. 26 โคว, อาโมวแซ วี กอย ดี มาโลห โดง คยัะ เฆ ดูอี อีซาเรลัะ. อัน ดัด ตาง ต็อห, “อาเซ ซี โดบ เฌาพรา, แตห อัน ตัห ฌัม โดง กอย โอว นี.” อัน แฮะ ต็อห ปาย ตี เฆ ครึร อาเลวี ตึอน เฆ บอกาเฆลียด ตัห กาฌูะ โดง กอย อัน.

27 แฮะ ฮอต, อัน วี ต็อห ดี เฆ, “อัน เฌา อี มูห เฌาพรา ปี กรึบ เฆ ดูอี อีซาเรลัะ, อัน ต็อห ดี เบ, แตห เบ ดอน อี ดึห มาปัวะ ลาง อัน, วี ฮาว ดอน นา ดอน โปละ โดง คยัะ เฆ ดูอี อีซาเรลัะ, แตห เบ ดอน อี ง็อห ยัม บอ เฆ บีนอง บอ ฆึก บอ เฆ ดูอี อี กอย กาตัด กาง เบ.” 28 อาโมวแซ แฮะ ฮอต ต็อห ปาย ตี เฆ ดูอี ครึร อาเลวี วี โบง ปี จัร อาโมวแซ เฆ โบง. ซีแง อัน ตี อึณ มึห ดูอี กาบัก โอย แหรณ วี อี แฮะ ยัม. 29 ปัน ตี อาโมวแซ วี ต็อห, “อาตึร นี, เบ แฮะ แบน ดูอี อี ปึอน ดี โบง ฆาน เฌาพรา. เบ ตู กาเว ฆอน บอ บีนอง เบ. โกบ โบง เบ ปาย ตี เฌาพรา แฮะ ม็องการา ดัว ดี เบ.”

30 ยี ฌัม ซีณวัห ปา แคหณา, อาโมวแซ วี ต็อห ดี ดูอี ดอน อี, “เบ แฮะ โบง หมาบ ตาง กาเซา. ดอ ตี นี โอว ดี วี ฮาว แตห โอว โฮะ ฌัม โดง กอย เฌาพรา นา แดง นอน. โอว ดี บอ หมาณ ดี เฌาพรา, แตห อัน ฆ็อห แวน หมาบ เบ ตี, แตห เบ วี กาล็อะ ดี เฌาพรา.”

31 ปัน ตี อาโมวแซ วี โฮะ แดง นอน, ฌัม โดง กอย เฌาพรา. อัน ต็อห ดี เฌาพรา, “อึย แม เฌาพรา, เฆ ดูอี แฮะ ฮอต โบง หมาบ นา ตู หมึอม กาเซา. เฆ แฮะ ดึห ครีว, โบง อารึบ, ต็อห อึณ มูห เฌาพรา. 32 โอว ยี หมาณ, แตห แม เฌาพรา ฆ็อห แวน หมาบ เฆ ตี. เซ แม ยี ตู ซี ฆ็อห แวน หมาบ เฆ ตี, โอว หมาณ, แตห แม บยัด แวน จืร โอว, แกวะ ฮู แตห อึณ มึห แคง บับ ปี แดม แม, แคง ฌาราง ปี อูน แม จืร ดูอี ปี อึบ แม.”

33 เฌาพรา วี ต็อห ดี อาโมวแซ, “โอว ดี บยัด แวน จืร เฆ ดูอี อี โบง นา ตู หมึอม ดี โอว, แกวะ ฮู แตห เฆ มึห แคง บับ ฌาราง โอว. 34 ดอ ตี นี แม โลว แยต ฮาว ดูอี เฆ นี, แตห เฆ ฌัม แคง มืง แปะ แฮะ กาลาง โอว ดี แม. โอว ดี แตห อามู อามาด โอว แยต เบ ดอ ฮาว เบ โดบ อึณเตณ. เซ อึณ ยี มึห อาคราว ดี ดัม หมาบ เฆ, เฆ ดี โลว คัม หมาบ เฆ.”

35 เฌาพรา แฮะ ฮอต กาลาง ปาย ตี อัน วี แตห เซา อี โฮะ ดี ดูอี ตัห ฌัม โดง กอย ดูอี อีซาเรลัะ, แตห เฆ คัม หมาบ เฆ ดอ กรึบ เฆ อารึบ มัก แปะ แฮะ โบง อาโรน.