1 วาย อัน ตี เฌาพรา วี ต็อห ดี อาโมวแซ, 2 “โอว แฮะ ฮอต ร็อห อาเบฌาเลน อี มูห ครึร อายูดา ตึอน, แตห อัน โบง แบน โมยว แบน โมยว. อาเบฌาเลน ตี, อัน มูห ฆอน อาอูรี อี มูห ฆอน อาฮูรา. 3 โอว แฮะ ฮอต ดัว น็อห พึอม เฌาพรา ลึบ แคง น็อห อัน, แตห อัน แหลว ดี โบง แบน โมยว แบน โมยว ปี จัร โอว เบ โบง. โอว แฮะ แตห อัน มึห อางยาน, แตห อัน แหลว ดี โบง ดอน โมยว. 4 อัน นับ ดี โบง โบห เฆ ปัยะ ดอน โมยว ตา ครีว, รึอน บอ บ็อง. 5 อัน แหลว ดี รัณ แซณ บอ โบง กาง แซณ. อัน บอ แหลว ดี ตา เฮ, โบง แบน โมยว แบน โมยว บอ แบน ลักซามา อี โบง โกรวกราม อี ชีด กาเซา. 6 แดง ตี โอว แฮะ ร็อห บอ อาโอโฮลีอาบ, อี มูห ฆอน อาฮีซามาด, อี มูห ครึร อาดาน ตึอน. โอว แฮะ จัร อัน จอย อาเบฌาเลน ตึอน. บอ เฆ ลักซามา อี โลว จอย ฆาย อา วี ตี, โอว เฌาพรา แฮะ แตห เฆ ดอน อี มึห อางยาน, แตห เฆ ปึอน ดี โบง ดอน โมยว ปี จัร โอว แม โบง บอ ปี บยัะ โอว ดี แม ดอ ตี นี. 7 ปี โลว โบง เฆ, อึณ มูห บอ ทึบ บีก บอด อี มูห โดง กอย โอว, แตห เบ ปึอน ดี กาตูณ โอว บอ ฌีดืก อี แตห เบ ดูอี นับ ลอง โอว, บอ ซีบลึก อัน, บอ อาฌัะ ดอน โมยว ปี โลว เบลห เบ นา แคง ทึบ บีก บอด ตึอน. 8 เฆ ดี โบง บอ กาโช็ง คามูน เฆ อาฌัะ ดอน โมยว ปี ตา เฆ ดี กาโช็ง ตี บอ ดัง เงา ออม ครีว เฆ อาฌัะ ปี ตา เฆ ดอ ลึมลา เฆ ดัง เงา ออม ตี บอ กาโช็ง หลู เฆ ซีนัม อูห หงูน ดี เฌาพรา. 9 บอ กาโช็ง หลู เฆ โดว ซัดดาวา เฆ โลว โบง บอ อึณกรึห ปี ตา ดูอี ดอ หลู เฆ โดว ซัดดาวา บอ อึณปาน ตาง เฆ เปลา อัน, เฆ โลว โบง โตต ดอน โมยว ฌึร ตี. 10 เฆ บอ โลว ด็อะ ครึง ปี ดี ตา อี มูห ครึง บอด ปี ดี ตา อาโรน เฆ ฆอน อาโรน ดอ โบง เฆ ฆาน เฌาพรา. 11 เฆ โลว โบง บอ นามัน บอด เฆ ซีนัม อูห หงูน ปี โลว ปีด็อะ ดี เงา, ปี โลว ตา เฆ แคง ทึบ บีก บอด. เฆ โลว โบง โตต ดอน โมยว ฌึร ตี, แตห อึณ ปี ปี บยัะ โอว ดี แม.” ปาย ตี เฌาพรา แฮะ ฮอต กาลาง ดี อาโมวแซ.

12 วาย อัน ตี เฌาพรา วี กาลาง ปอ อู โมยว ดี อาโมวแซ. 13 อัน ต็อห, “แตห แม อาโมวแซ วี จัร เฆ ดูอี อีซาเรลัะ ต็อห, ‘เบ โลว กัม รีด ซีแง ดีเหลา. อึณ มูห ซีแง ปี ดัว โอว ดี เบ. ซีแง ดีเหลา ตี, อึณ ปี ลักซานา ปี ดัว โอว ดี เบ. อู ซีณ ดอ ตี นี, ฌัม นา อาต ดอน โจว ดอน บาน, ดอ ฌัม ซีแง ดีเหลา อึณ แตห เบ โหลห, อึณ มูห โอว, โอว เฌาพรา แฮะ แบน ดา กาณา อี อึบ เบ. บอ มูห โอว อี แตห เบ แบน ดูอี บอด อี ตู ปี ดูอี เฮา. 14 เบ โลว โบง ปี โลว โบง เบ ซีแง ดีเหลา ตี. โคว, อึณ มูห ซีแง บอด. เซ อึณ มึห ดูอี โบง ฆาน ดอ ฌัม ซีแง ดีเหลา, เบ โลว ง็อห ยัม ดูอี ตี. 15 เดา ซีแง เบ โลว โบง ฆาน เบ. ฮี ฌัม ซีแง อึณบู, อึณ มูห ซีแง ดีเหลา. อึณ มูห ซีแง บอด, ซีแง อี แตห เบ โหลห โอว. อาเซ โบง ฆาน ซีแง อัน ตี เบ โลว ง็อห ยัม อัน. 16-17 เฆ ดูอี อีซาเรลัะ โลว กรึบ โอว ดอ ฌัม ซีแง ดีเหลา, แตห อึณ แตห เฆ โหลห เซเซ ปี โบง โอว ดอ มึอน. โอว แฮะ พาน เบลห ฆางหราว บอ กาดาย อาดา เดา ซีแง. ยี ฌัม ซีแง อึณบู, โอว วี ดีเหลา, ตู โบง ฆาน มาเซ. โคว อัน ตี, บอ เบ โลว ดีเหลา ซีแง อึณบู.’” แคะ ตี เฌาพรา กาลาง โฆรห ดี อาโมวแซ ดอ กอย อัน ดี อาต เฌาพรา แดง นอน ซีนาย ตึอน.

18 เฌาพรา แฮะ ฮอต กาลาง ดารา อัน ดอน โมยว ดี อาโมวแซ ตึอน, อัน วี ดึห มาว อา ดีพลาง, ดัว ดี อาโมวแซ. นา แดง มาว อา ดีพลาง ตึอน, แฮะ แดม อูน ดารา เฌาพรา ปี ดัว อัน ดี ดูอี, แตห เฆ นับ ลอง อัน. อึณ มูห ปี แดม อูน เฌาพรา ราง อัน, ตา แด อัน.