1 เฌาพรา วี ต็อห, “เบ โลว วี ดึห เฮ กาทีน, โบง กาโช็ง แตห ดูอี หลู ซีนัม อูห หงูน นา แดง. 2 เบ โลว โบง แตห นา โต็ง อัน อู กานีห บอ นา เตียม อัน อู กานีห. ดี กาโตะ อัน บอ พวน บลาก เบ โลว วี โบง แตห อึณ กาโตต บัต. นา จา อัน โลว โบง อา กานีห. อี กาโตต บัต ดี กาโตะ กาโช็ง โลว โบง แตห อึณ แบน อู ซีะ, แกวะ แตห อึณ กาดึก มาเซ. 3 แฮะ ฮอต, เบ โลว ปีด ครีว บอด, บอ นา แดง บอ ดี โคบ อัน บอ กาโตะ อัน. เบ โลว โบง บาง ครีว แตห อึณ กอย นา เรต กาโช็ง บอ พวน บลาก. 4 เบ โลว วี โบง ควัง ครีว, แตห อึณ มึห อู บลาก อา ควัง. เบ โลว ดึก อูน ควัง ตี นา ครึม บาง ตึอน, แตห เฆ กอย ลาย กาซืร. แคง ควัง ตี เบ โลว ปลอะ มัง ฆอด, แตห เบ ปึอน ดี ฆอด กาโช็ง ตี. 5 เบ โลว โบง มัง ฆอด ตา เฮ กาทีน, วี ปีด ครีว. 6 กาโช็ง ตี เบ โลว เบลห อูน นา เรต บีก ฆ็อง อี กอย ดี อาต ฌีดืก อี แตห ดูอี นับ ลอง โอว. โดง ตี บอ มูห นา อาต ซีบลึก อี กอย นา แดง ฌีดืก ตึอน อี มูห โดง กอย โอว, แตห เบ กาตูณ โอว.

7 ดอน ซีณวัห, ดอ ลึบ อาโรน แคง ทึบ บีก บอด ตึอน, ดอ ลึมลา อัน เงา ราง ตาง ตึอน, อัน บอ โลว หลู ซีนัม อูห หงูน แดง กาโช็ง หลู ตี. 8 แฮะ ฮอต, บา ดี อับ ดอ วี ลึบ อาโรน แคง ทึบ บีก บอด, ปีด็อะ เงา ราง ตาง ตึอน, อัน โลว วี หลู ซีนัม อูห หงูน นา แดง กาโช็ง ตี ปอ อู เฌณ. ปาย ตี เบ โลว โบง เซเซ. อู ซีแง อา เฌณ แตห อึณ มึห ซีนัม อูห หงูน ดี อาต เฌาพรา, แกวะ แตห อึณ กาดัด ดอ เหมา, แตห อึณ อูห หงูน ดอน โจว ดอน บาน. 9 แดง กาโช็ง หลู ซีนัม อูห หงูน ตี, แกวะ หลู แบน โมยว แบน โมยว แดง ซีนัม อูห หงูน ปี จัร โอว เบ หลู. แกวะ ดึห หลู ซีนัม อูห หงูน ปอ อู โมยว. แกวะ หลู โดว ซัดดาวา ปี โดะ กาซึม เงา, แกวะ หลู กาแปะ แบน โมยว แบน โมยว, แกวะ โหลว อึม มางูน, หลู ดี โอว แดง กาโช็ง ตี. 10 อู ซีนัม อู เฌณ อาโรน โลว ตึย หนาม โดว ซัดดาวา, พ็อห ดี กาโตะ อี กาโตต บัต, แตห เฌาพรา ฆ็อห แวน นา ตู หมึอม อี ดึก ดี กาโช็ง ตี. ดอ อัน ตี เบ โลว ดึห หนาม มาบู ปี หลู เบ ดอ หมาณ เบ แตห เฌาพรา ฆ็อห แวน หมาบ เบ. ปาย ตี เฆ ดูอี อีซาเรลัะ โลว โบง ดอน โจว ดอน บาน. อึณ แตห กาโช็ง ตี วี แบน กาโช็ง บอด กาเซา ดี อาต เฌาพรา.” เฌาพรา ต็อห ปาย ตี ดี อาโมวแซ ตึอน.

11 วาย อัน ตี เฌาพรา วี ต็อห ดี อาโมวแซ, 12 “เซ เบ ตีห แคะ กอย เฆ ดูอี อีซาเรลัะ, อีมาย ดอน อี แคง ดูอี อีซาเรลัะ โลว ดัว รึอน ดี โอว อี มูห เฌาพรา, แตห อึณ กาดาง หมาบ อัน, แกวะ แตห อาซาก อัน ชึม. เซ เฆ ดัว รึอน ตี, อึณ ตู แตห เฆ กาดูห ดูก มาเซ ดอ ตีห เบ แคะ กืน เฆ ดูอี อี ฮับ จืร เฆ แคง ฌาราง. 13 ดอ ฮับ เฆ จืร เฆ แคง ฌาราง, เฆ ดอน อี โลว หลู รึอน อู ควาย ดี โอว. เบ โลว ซัะ อูน รึอน, ตา มัง ซัะ อี กอย แคง ทึบ บีก บอด. 14 ดอน อี อี ฮับ จืร อัน แคง ฌาราง, อาซาก อาเซ แฮะ โนะ อา ฆึร ซีนัม โฮะ นา แดง, อัน โลว หลู รึอน แคะ ตี ดี เฌาพรา. 15 เซ อึณ มูห ดูอี ครัม, อัน โลว ดัว แคะ อู ควาย, อาว ปึอน ดัว หลึอม ตี. อาเซ แฮะ ฆีน บอ โลว ดัว อู ควาย แคะ ตี. อาว ปึอน โยม. ดอน อี โลว ดัว แคะ ตี, แตห อึณ กาดาง หมาบ อัน, แกวะ แตห อาซาก อัน ชึม. 16 เบ โลว แฆบ รึอน อี กาดาง หมาบ เฆ ดูอี อีซาเรลัะ ตี, แตห เบ วี มึห ดี ดัว ดี เฆ ดูอี อี ลึมลา ทึบ บีก บอด. เซ เบ ดัว รึอน ตี ดี โอว, อึณ ดี แตห โอว โหลห เบ ดูอี อีซาเรลัะ, แตห เบ วี กาล็อะ ดี โอว, แกวะ แตห อาซาก เบ ชึม.”

17 เฌาพรา แฮะ ฮอต กาลาง ดี อาโมวแซ ปาย ตี อัน วี ต็อห, 18 “เบ โลว โบง อึณปาน ตาง บอ เปลา อัน, ตา บ็อง. แคง อึณปาน ตี เบ โลว เบลห อูน อึม ปี ดี ตา เบ ดอ บาย เบ แบน โมยว แบน โมยว อาต หลู. เบ โลว เบลห อูน อึณปาน ตาง ตี ดี กาแต ทึบ บีก บอด ฆาย กาโช็ง หลู ตึอน. แฮะ ฮอต, เบ โลว ฮับ อึม นา แคง. 19 บอ อาโรน เฆ ฆอน อัน, เฆ โลว บาย แด บอ เปลา เฆ แคง อึม ตี. 20 ดอน เฌณ ดอน เฌณ อาต ลึบ ฮาว เฆ แคง ทึบ บีก บอด เฆ โลว บาย แด บอ เปลา เฆ. ดอ ฮาว เฆ ฌัม กาตัด กาโช็ง หลู, แตห เฆ เบลห ปี ดี หลู นา แดง, แตห เงา กาซึม, เฆ โลว วี บาย แด บอ เปลา เฆ ดี อาต, แกวะ แตห เฆ ยัม ดอ กอย เฆ ดี อาต โอว. 21 เบ โลว จัร บอ อาโรน บอ ฆอน อัน เฆ หลูกหลาน อัน โบง ปาย ตี เซเซ.” เฌาพรา แฮะ กาลาง ดี อาโมวแซ ปาย ตี.

22 แดง ตี เฌาพรา วี ต็อห ดี อาโมวแซ, 23 “เบ โลว โบง ซีนัม อูห หงูน, แตห เบ ดึห อึณกรึห ซีนัม แบน โมยว แบน โมยว. เบ โลว ดึห อึม ปี เนียะ เลห แคง เดา มอรา อาดา โอย ซัะ, บอ แฆละ เฮ ซีนาโมน อู ซัะ ดี พัน คัน บอ โฆ็ลง ปี โบง อี ซีนัม อูห หงูน ปอ อู ซัะ ดี พัน คัน. 24 แดง ตี เบ บอ โลว ดึห เดา คีดา โอย ซัะ, บอ นามัน อี เนียะ ดี เบล นามัน อาดา พวน กาเปา. เบ โลว ซัะ อูน โตต ซีนัม ตี ตา เบล ซัะ แคง ทึบ เฌาพรา, แตห อึณ หมาน. 25 ดูอี อี นับ ดี โบง ซีนัม อูห หงูน, อัน โลว วี ดึห ดอน โมยว ฌึร ตี, โบง แตห อึณ แบน นามัน อูห หงูน อี บอด, อี ปึอน ดี พ็อห ดี ดอน โมยว. เบ โลว ดึห นามัน อูห หงูน บอด ตี, พ็อห ดี ดูอี อี คัม ดี โบง ฆาน โอว อี มูห เฌาพรา. 26 วาย อัน ตี เบ บอ โลว พ็อห นามัน บอด ตี ดี ทึบ บีก บอด บอ ดี ฌีดืก ตึอน อี แตห ดูอี นับ ลอง โอว อี มูห เฌาพรา. 27 เบ บอ โลว ดึห นามัน ตี, พ็อห ดี กาโช็ง ปี อูน เบ คามูน บอ อาฌัะ ดอน โมยว ปี ตา เบ ดี กาโช็ง ตี. เบ บอ โลว พ็อห ดี ดัง เงา ออม ตึอน บอ ดี อาฌัะ ปี ตา เฆ ดอ ลึมลา เฆ ดัง เงา ออม ตึอน, บอ กาโช็ง หลู ซีนัม อูห หงูน, เบ โลว พ็อห โตต ฌึร ตี, ตา นามัน บอด ตี. 28 แฮะ ฮอต, เบ บอ โลว พ็อห ดี กาโช็ง หลู บอ อาฌัะ ปี ตา ดูอี ดอ หลู เฆ ดี กาโช็ง หลู ตี. บอ อึณปาน ตาง ตึอน เฆ เปลา อัน เบ โลว พ็อห โตต ดอน โมยว. 29 โกรว ฌึร ตี, เบ โลว พ็อห นามัน บอด, แตห เฆ แบน โกรว อี ซีงา บอด หลึอม โตต. วาย อัน ตี อึณ บอ มึห มาเซ อี ตา ดึร โกรว ซีงา บอด ตี, เฌาพรา ดี มาด บอ โกรว ตี ดี แบน โกรว อี ซีงา บอด.

30 เบ โลว วี พ็อห นามัน บอด ตี ดี อาโรน เฆ ฆอน อัน, แตห เฆ แบน ดูอี อี ปึอน หลู ดี โอว. 31 เบ โลว กาลาง ดี เฆ ดูอี อีซาเรลัะ ต็อห, ‘นามัน ฌึร ตี มูห นามัน บอด ปี ดัว เฌาพรา ดี เบ, แตห เบ พ็อห ดี ดอน โมยว ปี โลว เบ ดอ โบง เบ ฆาน เฌาพรา. แตห เบ ตา อาตี ดอน โจว ดอน บาน ฮาว นา อาต. 32 เบ ยี แกวะ ตา นามัน ตี, พ็อห ดี ดูอี ดอน อี. แกวะ โบง นามัน ตี, ตา อึณกรึห ตึอน ปี จัร โอว เบ ตา. นามัน ตี แฮะ บอด, อาว ปึอน ดัว อี เฮา ตา ดอ เหมา. 33 เซ อึณ ยี มึห ดูอี โบง นามัน ปี นามัน บอด ตี, อาเซ วี พ็อห นามัน ตี แดง ฆีณ อี เฮา, อี ตู มูห ดูอี หลู ดี โอว อี มูห เฌาพรา, เบ โลว เบลห แวน ดูอี ตี, แกวะ ฮู มาด อัน มูห ดูอี อีซาเรลัะ.’” ปาย ตี เฌาพรา วี ต็อห ดี อาโมวแซ.

34 วาย อัน ตี เฌาพรา วี กาลาง โฆรห ดี อาโมวแซ ปอ อู เฌณ. อัน ต็อห, “แม โลว แตห ดูอี โบง ซีนัม อูห หงูน ปอ อู โมยว. แม โลว จัร เฆ หลู ดี โอว บอ กาณัน เฮ นาทาบ, ซีนัม เซเคด, กาณัน เชเบนา บอ กาณัน เลโบน ดีโลย. จัน เฆ พวน โมยว ตี, เบ โลว แตห อึณ ลาย การัม. 35 แฮะ ฮอต, เบ โลว แตห ดูอี นับ ดี โบง ซีนัม อูห หงูน วี กาวัร โตต, โบง ซีนัม อูห หงูน อี โลว โดะ แคง เงา. แตห เบ ฮับ ซัยะ, แตห อึณ แบน ซีนัม อูห หงูน อี ซีงา บอด 36 ซีนัม อูห หงูน ฌึร ตี, เบ โลว กรีด มัง กาล็อะ, แตห อึณ กามูน. แฮะ ฮอต, เบ โลว โดะ ดี เงา บอ อูน ดี อาต ฌีดืก อี กอย นา แคง ทึบ บีก บอด อี มูห โดง กอย โอว, แตห เบ กาตูณ โอว. ซีนัม อูห หงูน อี โลว โดะ ดี เงา ตี, อึณ ดี บอด หลึอม โตต. 37 แกวะ แตห เบ ควาง ดูอี เฮา โบง ซีนัม อูห หงูน ปี ซีนัม อูห หงูน ตี. เบ โลว แตห ซีนัม อูห หงูน ตี แบน ซีนัม อูห หงูน บอด, ดัว มี ดี โอว, แกวะ แตห อี เฮา ตา. 38 เซ อึณ ยี มึห ดูอี โบง ซีนัม อูห หงูน ฌึร ตี, เซ อัน วี ตา ราง อัน, เบ โลว เบลห แวน ดูอี ตี, แกวะ มาด อัน มูห ดูอี อีซาเรลัะ.” แคะ ตี เฌาพรา กาลาง ดี อาโมวแซ ลอง ซีนัม อูห หงูน ตึอน.