1 วาย อัน ตี อาโมวแซ วี แดะ เฆ ดูอี อีซาเรลัะ, แตห เฆ ตัห กาฌูะ. แฮะ ฮอต, อัน วี ต็อห ดี เฆ, “ดอ ตี นี โอว ดี วี กาลาง ดี เบ ดอน โมยว ปี จัร เฌาพรา เบ โบง. 2 เดา ซีแง เบ โลว โบง ฆาน เบ. ซีแง อึณบู มูห ซีแง ดีเหลา, ซีแง บอด. เบ โลว อูน ฆาน เบ, ดีเหลา บอ กรึบ เฌาพรา. เซ อึณ ยี มึห ดูอี โบง ฆาน ซีแง อึณบู, เบ โลว ง็อห ยัม อาซาก อัน. 3 ดอ ซีแง ดีเหลา แกวะ บูด เงา แคง กาง เบ.”

4 วาย อัน ตี อาโมวแซ วี ต็อห ดี เฆ ดูอี อีซาเรลัะ, “เฌาพรา วี จัร เบ โบง ปอ อู โมยว. 5 เบ โลว ตึย โกรวกราม เบ ดัว ดี เฌาพรา. อาเซ มึห น็อห ซี หลู ดี เฌาพรา, แตห อัน ดึห หลู บอ ครีว, รึอน เฆ บ็อง. 6 บอ เซณ อี คอง, อี ฆูย คอน บอ อี เรณ แฆ, บอ บีก ปี ตา เฆ กาตัม ลูย เฆ ฮึก มาแป 7 บอ ฮูน มาบู อี จูด ซีนัม เรณ, บอ ฮูน มามัก อึม, บอ เฮ กาทีน. 8 เบ ปึอน ดี หลู บอ นามัน ปี โลว ฮับ แคง เงา ราง บอ อึณกรึห ซีนัม อูห หงูน อี โลว ปีด็อะ ดี เงา เฆ อึณกรึห นามัน อูห หงูน ปี ดี โลว พ็อห 9 บอ แซณ ว็อง ลูย เฆ แซณ ดอน โมยว ปี โลว ดึก ดี ซีโตว เอโพด ฆาย ฮู ปี เบลห อาโรน ดี บังน็อห อัน. เบ โลว ดึห ดอน โมยว ฌึร ตี, วี หลู ดี เฌาพรา.”

10 วาย อัน ตี อาโมวแซ วี ต็อห ดี เฆ, “กาแต เบ, อาเซ มึห อางยาน, อาเซ แหลว ดี โบง แบน โมยว แบน โมยว, แตห อัน ตัห, แตห อัน โบง ดอน โมยว ปี จัร เฌาพรา เอ โบง. 11 เฆ ดูอี อี แหลว ดี โบง ดอน โมยว, แตห เฆ วี โบง ทึบ บีก บอด บอ บีก อี แบน กาตูะ อัน บอ มัง กาเกียบ บอ แบน เฆ แรบ อัน. แตห เฆ โบง บอ ร็อง เฆ เจณ อัน. 12 เฆ โลว โบง บอ ฌีดืก บอ ซีบลึก อัน บอ มัง ฆอด อัน บอ บีก ฆ็อง อี กอย นา อาต ฌีดืก ตึอน. 13 เฆ โลว โบง บอ กาโช็ง ปี โลว เบลห คามูน บอ มัง ฆอด กาโช็ง ตี บอ อาฌัะ ดอน โมยว อี กอย ดี กาโช็ง บอ คามูน ปี โลว หลู ดี เฌาพรา. 14 เฆ บอ โลว โบง บอ ดัง เงา ออม อี แตห อึณ บลาง บอ อาฌัะ ปี ตา เฆ ดอ ลึมลา เฆ ดัง เงา ออม ตี บอ ซีลัยะ บอ นามัน ปี ฮับ เฆ แคง เงา ออม. 15 เฆ โลว โบง บอ กาโช็ง ปี หลู ซีนัม อูห หงูน บอ มัง ฆอด อัน บอ ซีนัม อูห หงูน บอ นามัน ปี ดี พ็อห. เฆ บอ โลว โบง บีก อี ฆ็อง ดี อาต มาโลห ทึบ บีก บอด 16 บอ กาโช็ง หลู โดว ซัดดาวา บอ กาแบห บ็อง ปี ดี ฮับ แคง กาโช็ง ตี บอ มัง ฆอด อัน บอ อาฌัะ ปี ตา ดูอี ดอ หลู เฆ แดง กาโช็ง ตี บอ อึณปาน ตาง เฆ เจณ อัน. 17 เฆ โลว โบง บอ บีก ฆ็อง ปี โลว เบลห ดี แวง บอ ร็อง อัน บอ เจณ ร็อง บอ บีก ฆ็อง ปี โลว เบลห ดี อาต มาโลห แวง ตึอน. 18 เฆ โลว โบง บอ หล็อก วัน ทึบ เฆ หล็อก วัน แรง แวง บอ วัน ปี โลว ตา. เฆ ดูอี อี แหลว ดี โบง, เฆ โลว โบง โตต ดอน โมยว ฌึร ตี. 19 แฮะ ฮอต, เฆ โลว วี โบง ครึง บอด ปี ชึบ เฆ ดูอี อี หลู ดี เฌาพรา ดอ ลึบ เฆ นา แคง ทึบ บีก บอด, โบง ฆาน เฌาพรา. บอ ครึง ปี ดี ตา อาโรน บอ ครึง ฆอน อาโรน ปี ชึบ เฆ ดอ หลู เฆ ดี เฌาพรา, เฆ โลว โบง.” อาโมวแซ กาลาง แตห เฆ ดูอี กืน ปึอน ดี โทม.

20 อัน แฮะ ฮอต กาลาง โฆรห ตี, เฆ ดูอี อีซาเรลัะ ดอน อี วี เวณ เลห โดง กอย อาโมวแซ ตึอน. 21 อาเซ ยี มึห น็อห ซี หลู, อัน วี ดึห โกรว ปี ดี หลู อัน ดี เฌาพรา, ฮาว ดัว ดี อาโมวแซ, แตห เฆ ปึอน ดี โบง ทึบ บีก บอด บอ โกรว ดอน โมยว ปี โลว เฆ ดอ โบง เฆ ฆาน เฌาพรา. เฆ บอ หลู ดอน โมยว ปี โลว เฆ, แตห เฆ ปึอน ดี โบง ครึง บอด ตึอน. 22 อาเซ มึห น็อห ซี หลู, เฆ ดอน วี ดอน วี บอ ตัห ดัว ครึง ครีว อัน. อึณ บอ มูห ฆันแด, บีโหยะ, ซีกานู เฆ ครึง ครีว ปี ตา เฆ แบน โมยว แบน โมยว. เฆ ดอน อี ตัห หลู ครึง ครีว ตึอน ดี เฌาพรา. บอ เฆ อีมาย อีบึณ. เฆ บอ หลู โกรว ฌึร ตี, มาวัด วีว มาวัด เวณ ดี อาต เฌาพรา. 23 อาเซ ยี มึห เซณ อี คอง, อี ฆูย คอน บอ อี เรณ แฆ, อาเซ บอ มึห บีก กาตัม ลูย บอ ฮึก มา แป บอ ฮูน มาบู อี จูด ซีนัม เรณ บอ ฮูน มามัก อึม, อัน บอ ตึย หลู โตต โกรว ฌึร ตี ดี เฌาพรา. 24 อาเซ ยี มึห น็อห ซี หลู รึอน เฆ บ็อง, อัน วี ตึย หลู บอ โกรว ตี ดี เฌาพรา. ดอน อี อี มึห เฮ กาทีน, อัน บอ ดึห ดัว ดี เฆ, แตห เฆ ปึอน ดี โบง แบน โมยว แบน โมยว ปี โลว ตา เฆ เฮ กาทีน ตึอน. 25 เฆ อีบึณ ดอน อี อี แหลว ดี บัด เซณ, เฆ บอ ตึย เซณ ปี บัด เฆ. อึณ มูห บอ เซณ อี คอง, อี ฆูย คอน, อี เรณ แฆ บอ กาตัม ลูย. เฆ วี หลู ดอน โมยว ฌึร ตี. 26 บอ เฆ อีบึณ อี มึห น็อห ซี หลู บอ เฆ อี แหลว ดี บัด เซณ ฮึก มาแป, เฆ วี บัด บอ ฮึก มาแป, วี หลู บอ อาตี. 27 เฆ อี มูห ดา ตาง อี อึบ อี แยต อี, เฆ วี ตึย แซณ ว็อง ลูย บอ แซณ แบน โมยว แบน โมยว, วี หลู, แตห เฆ ปึอน ดี โบง ซีโตว เอโพด ฆาย ฮู ปี โลว ดึก อาโรน ดี บังน็อห อัน. 28 เฆ บอ ตึย ซีนัม แบน โมยว แบน โมยว บอ นามัน ปี โลว ตา เฆ โบง นามัน ปี ฮับ แคง เงา ราง ตาง, บอ นามัน ปี โลว พ็อห บอ ซีนัม อูห หงูน ปี โลว ปีด็อะ ดี เงา ดี อาต เฌาพรา. 29 เฆ ดูอี อีซาเรลัะ บอ เฆ อีมาย อีบึณ, เฆ อี มึห น็อห ซี หลู, เฆ บอ ตัห หลู ดอน โมยว ดี เฌาพรา, แตห เฆ ปึอน ดี โบง โตต ดอน โมยว ปี จัร เฌาพรา อาโมวแซ โบง.

30 วาย อัน ตี อาโมวแซ วี ต็อห ดี ดูอี อีซาเรลัะ, “เฌาพรา แฮะ ร็อห อาเบฌาเลน อี มูห ฆอน อาอูรี. อัน บอ มูห หลาน อาฮูรา, อี มูห ครึร อายูดา. 31 เฌาพรา แฮะ ฮับ น็อห พึอม อัน แคง น็อห ดูอี ตี, แตห อัน มึห อางยาน, แตห อัน ปึอน ดี โบง ฆาน แบน โมยว แบน โมยว. 32 เฌาพรา แฮะ แตห อัน นับ ดี โบง โบห เฆ ปัยะ ดอน โมยว ตา ครีว เฆ รึอน บอ บ็อง. 33 อัน บอ นับ ดี อึณปราย แซณ บอ โบง กาง แซณ. อัน บอ แหลว ดี โบง ดอน โมยว ตา เฮ บอ แหลว ดี โบง แบน โมยว แบน โมยว อี ชีด กาเซา. 34 บอ อาเบฌาเลน บอ อาโอวโฮวลีอาบ ตึอน, เฌาพรา แฮะ แตห ฆาย ปึอน ดี มาโนว บอ ดูอี เฮา, แตห บอ เฆ วี แหลว ปี ฆาย. อาโอวโฮวลีอาบ ตึอน ยี มูห ฆอน อาฮีซามาด, อี มูห ครึร อาดาน. 35 เฌาพรา แฮะ แตห ฆาย อา วี ตี มึห อางยาน, แตห ฆาย แบน ลักซามา อี นับ ดี โบง แบน โมยว แบน โมยว. อัน มืร แตห ฆาย นับ ดี โบง เบลห โบห เฆ ปัยะ, แตห ฆาย แหลว ดี จีณ โบห เฆ ปัยะ ดอน โมยว, ตา เซณ อี คอง อี ฆูย คอน, อี เรณ แฆ บอ เซณ กาตัม ลูย. ดูอี อา วี ตี, ฆาย บอ แหลว ดี ด็อะ แบน โมยว แบน โมยว.”