คาน 20
ลอง ดารา ฆึร ณ็อง
1 วาย อัน ตี เฌาพรา บอ กาลาง ดี ดูอี. อัน ต็อห,
2 “โอว มูห อัน เฌา อี มูห เฌาพรา ปี กรึบ เบ. โอว แฮะ ตึย เบ เลห แคง มืง แอฆึบ อี มูห โดง แฮะ แบน เบ หมาย ดูอี เฮา.
3 แกวะ แตห เบ กรึบ เฌา แบน กาดัง แบน กาดัง. แตห เบ กรึบ มี โอว.
4 แกวะ โบง อารึบ ต็อห, อึณ มูห เฌาพรา. บอ มูห อาโมยว อี กอย แคง ฆางหราว บอ อาโมยว อี กอย แดง กาดาย บอ อาโมยว อี กอย แคง อึม, เบ แกวะ ดึห โกรว เฆ ตี, แกวะ โบง อารึบ มาเซ, ต็อห ดี กรึบ. 5 แกวะ กรึบ อารึบ โมยว เหมา. แกวะ โฆม ดี อาต อารึบ, ต็อห อึณ บอด. โอว มูห อัน เฌา, โอว แฮะ มูห เฌาพรา ปี กรึบ เบ. โอว ยี ตู คัม เบ กรึบ แบน โมยว แบน โมยว, ต็อห อึณ มูห เฌาพรา. อาเซ ยี ตู โดบ โอว, อาเซ ฌ็อง โอว, โอว ดี แตห อึณ แบน หมาบ ดี อัน, แตห บอ หลูกหลาน อัน โลว คัม หมาบ ตี, แตห อึณ กอ โนะ โอย โจว, พวน โจว. 6 อาเซ ยี ร็อก โอว, อาเซ โดบ ซีคยา บอ โบง ปี อึง โอว, โอว ดี ร็อก อัน เซเซ, บอ อัน บอ หลูกหลาน อัน, แตห กอ ฌัม อู แหรณ โจว.
7 แกวะ กาลาง จืร โอว เซ อาว มึห ดีโคว. อาเซ ยี กาลาง ปาย ตี โอว เฌาพรา ดี แตห อึณ แบน หมาบ ดี อัน.
8 เบ โลว โหลห ซีแง ดีเหลา. เบ โลว แตห อึณ แบน ซีแง บอด. 9 อาดา เดา ซีแง เบ ปึอน โบง ฆาน แบน โมยว แบน โมยว. 10 ดอ ฌัม ซีแง อึณบู, อึณ มูห ซีแง ดีเหลา. เบ โลว กรึบ เฌาพรา อี อึบ เบ. ซีแง ตี, แกวะ โบง ฆาน มาเซ. บอ มูห ฆอน เบ, บอ มูห หมาย อีบึณ บอ หมาย อีมาย เบ บอ ดูอี เฮา อี กอย รึม โดบ เบ, บอ มูห โดว ซัดดาวา เบ, เบ แกวะ แตห อาเซ โบง ฆาน ซีแง ตี. 11 โคว, เดา ซีแง เฌาพรา โบง กาดาย บอ ฆางหราว. อัน บอ โบง ดอน โมยว อี กอย แดง กาดาย บอ แคง ฆางหราว บอ แคง อึม. ดอ ฌัม ซีแง อึณบู, เฌาพรา แฮะ ดีเหลา. โคว, เฌาพรา แฮะ วี ม็องการา แตห ซีแง ดีเหลา ตี, แตห อึณ วี แบน ซีแง บอด.
12 เบ บอ โลว โรวเซ ฆูณ มา เบ. เซ เบ โบง ปาย ตี อาซาก เบ ดี บอ โต็ง, ปึอน กอย เหลณ แคง มืง ปี ดี ดัว อัน เฌา ดี เบ.
13 แกวะ ง็อห ยัม ดูอี.
14 อีมาย แกวะ ลูต อีบึณ อี. อีบึณ แกวะ มึห น็อห กืน.
15 แกวะ ปรา โกรว อี.
16 แกวะ กาโลว ดอ กาลาง เบ ซักเซ ลอง ดูอี เฮา.
17 แกวะ แตห เบ มึห น็อห ซี ปึอน โกรวกราม อี เฮา. บอ มูห กาง อัน, อีบึณ อัน บอ หมาย อัน อี มูห อีมาย บอ อีบึณ, บอ มาโลว เฆ มามัก อัน, แคะ มูห โกรวกราม อี เฮา, แกวะ แตห แม มึห น็อห ซี ปึอน ฌึร ตี.”
ปาย ตี เฌาพรา แฮะ กาลาง ดารา อัน ดี เฆ ดูอี อีซาเรลัะ.
18 ดอ โทม เฆ ดูอี ฮัม กานัม, ดอ ยึร เฆ ปลัะ อึณเปลต บอ ฮัม เวา, ดอ วี ยึร เฆ ดัก เงา ดี นอน ตึอน, เฆ บอ โยว กาเซา, แตห เฆ ดีเยณ ลอง อัน ตี. โคว, เฆ มืร กอย กาโต็ง, ตู ยัะ ฮาว กาตัด. 19 เฆ ดูอี กืน วี ต็อห ดี อาโมวแซ, “แกวะ แตห เฌาพรา กาลาง ซืร ดี เย. เย โยว ดี ยัม โกบ ปึอน เย ดี โทม โฆรห เฌาพรา ตึอน. แตห แม กาลาง โฆรห ดี เฌาพรา. แฮะ ฮอต, เย ดี วี โทม โฆรห ปี วี ต็อห แม ดี เย.”
20 อาโมวแซ วี ต็อห ดี ดูอี กืน ตึอน, “เบ แกวะ โยว. เฌาพรา แฮะ ตัห แตห อัน เทว น็อห เบ, แตห เบ บอ โยว เฌาพรา, แกวะ แตห เบ ยัะ โบง หมาบ.”
21 วาย อัน ตี อาโมวแซ วี ฮาว ลึบ โดง กอย เฌาพรา แคง อึณอูะ ว็อง ตึอน. เฆ ดูอี กืน ยี กอย กาโต็ง. 22 แฮะ ฮอต ปัน ตี เฌาพรา วี จัร อาโมวแซ กาลาง ดี เฆ ดูอี อีซาเรลัะ. อัน ต็อห, “เบ แฮะ ฮอต ยึร โฆรห ปี กาลาง โอว, โฆรห อี เลห ฆางหราว. 23 แกวะ แตห เบ โบง อารึบ, ต็อห อึณ มูห เฌาพรา ปี โอว. อึณ บอ มูห รึอน, อึณ บอ มูห ครีว, แกวะ แตห เบ โบง อารึบ, แกวะ แตห เบ กรึบ.
24 เบ ยี โลว ดึห กาดาย, โบง กาโช็ง หลู ดี โอว. แดง กาโช็ง ตี, เบ โลว หลู มามัก อาโล็ง บอ มาแป เฆ มาบู, โดะ ดี เงา, แตห เงา กาซึม มัง โดว. บอ มัง โดว เบ โลว หลู บอ โฮม ดอ กอย กาฌูะ เบ. เบ บอ ฮาว นา เหมา, ต็อห ดี โรวเซ โอว, ต็อห ดี หลู ดี โอว, โอว ดี บอ ตัห ฌัม ดี ตี. ดอน เฌณ ดอ หลู เบ ปาย ตี โอว ดี ม็องการา ดัว ดี เบ.