1 วาย แฮะ ฮอต เลห เฆ ดูอี อีซาเรลัะ แคง มืง แอฆึบ ดอ โนะ โอย มาเฆียน, เฆ วี ตัห ฌัม โดง กาฮ็อห อี จืร ซีนาย. 2 คา อาต เฆ แฮะ ฮอต เลห แคง โดง คยัะ อี จืร เรพีดีม, เฆ วี ตัห ฌัม โดง กาฮ็อห อี จืร ซีนาย. เฆ วี คยัะ ดี ดัง นอน ซีนาย ตึอน.

3 วาย อัน ตี อาโมวแซ โฮะ โดง กอย เฌาพรา. เฌาพรา ยี กอย แดง นอน. อัน วี ต็อห ดี อาโมวแซ, “แตห แม กาลาง โฆรห ดี หลูกหลาน อาโกบ เฆ อี แฮะ แบน ดูอี อีซาเรลัะ. แตห แม ต็อห, 4 ‘เบ แฮะ ยึร ปี โบง โอว ดี เฆ ดูอี แอฆึบ ตึอน. โอว มืร แฮะ ตึย เบ แตห เบ ฌัม โดง กอย โอว นี. แปะ แฮะ โบง โอว ดี เบ, อึณ แฮะ ปี มาฆลาง แตห ฆอน อัน ป็อะ แดง เพียง อัน, แกวะ แตห อัน โจห. 5 ดอ ตี นี, เซ เบ ดี โทม โดบ ปี ต็อห โอว, เซ เบ บอ โบง ปี ดึอม ลาย กาแซณ เอ, โอว ดี บอ แตห เบ แบน ดูอี อาโมยว โอว. กาแต เฆ ดูอี ดอน โมยว แคง มืง ดอน มืง แดง กาดาย นี, โอว ดี วี แตห เบ แบน ดูอี ปี ร็อก โอว หลึอม อี เฮา. 6 เบ ดี แบน ดูอี อาโมยว บอด ปี อึบ มี โอว. โอว ดี บอ แตห เบ แบน ดูอี อาโมยว บอด, อี หลู ดี โอว ดาง อี เฮา.’ ปาย ตี แม โลว กาลาง แตห เฆ ดูอี อีซาเรลัะ โทม.” 7 วาย อัน ตี อาโมวแซ วี เลห โลง แดง นอน. อัน วี แดะ เฆ ดา ตาง ดูอี อีซาเรลัะ ตัห ฌัม โดง กอย อัน. อัน วี แค โฆรห ปี กาลาง เฌาพรา ดี อัน, แตห เฆ วี โทม โตต ดอน โมยว ปี จัร เฌาพรา อัน กาลาง. 8 เฆ ดูอี อีซาเรลัะ บอกาเฆลียด เวียะ โฆรห อัน อู เฌณ. เฆ ต็อห, “เย ดี โบง โตต ดอน โมยว ปี จัร เฌาพรา เย โบง.” ปัน ตี อาโมวแซ วี ฮาว โดง กอย เฌาพรา, วี กาลาง โฆรห เฆ ดี อัน เฌา.

9 เฌาพรา วี ต็อห ดี อาโมวแซ, “โอว ดี ตัห ฌัม โดง กอย แม ดอ กอย โอว แคง อึณอูะ ว็อง. ปาย ตี เฆ ดูอี ปึอน ดี โทม โฆรห โอว ดอ กาลาง โอว โฆรห ดี แม. โอว ดี โบง ปาย ตี แตห เฆ ดูอี บอกาเฆลียด วี หณึม เซเซ โฆรห ปี กาลาง แม ดี เฆ.” วาย อัน ตี อาโมวแซ วี กาลาง โฆรห ปี ต็อห เฆ ดูอี อีซาเรลัะ ดี อัน, แตห เฌาพรา บอ นับ โตต ดอน โมยว.

10 เฌาพรา วี ต็อห ดี อาโมวแซ, “แตห แม เวณ โดง กอย เฆ ดูอี กืน. บอ อาตึร บอ แคหณา แม โลว จัร เฆ, แตห เฆ แรน โดว เฆ, แตห เฆ ซีงา บอด, แตห อึณ ปี ปี โลว โอว. 11 แตห แม จัร เฆ ลัห ครึง เฆ. ดอ ฌัม โอย ซีแง, แตห อึณ ฮอต โตต. ดอ ฌัม ซีแง ฮาโอย โอว ดี เลห โลง ดี นอน ซีนาย นี, แตห เฆ ดูอี บอกาเฆลียด ปึอน ดี ยึร. 12 แตห แม โบง กาอูน, แตห อึณ กอ โรบ นอน. แฮะ ฮอต แม โลว จัร ดูอี, แกวะ แตห เฆ โฮะ แดง นอน นี, แกวะ แตห เฆ ปวน กาอูน ปี เบลห แม ตี, แกวะ แตห เฆ ฮาว ฌัม ดี ดัง นอน นี ดอ เหมา. อาเซ กาโลห กาอูน ปี เบลห แม ตี, อัน โลว คัม หมาบ อัน, โลว ยัม อู เฌณ. 13 เบ โลว ง็อห ยัม อัน, วึณ มาว ดี อัน, แตห อัน กอ ยัม. เซ เบ ตู วึณ มาว, เบ โลว บัณ บลา, แตห อัน ยัม. โอว ยี ตู แตห เบ มัห อัน, ตู แตห เบ ปา อัน. เซ อึณ บอ มูห โดว ซัดดาวา, อี ตัห กาโลห กาอูน ตึอน, เบ โลว ง็อห แวน บอ อัน. เบ โลว หน็อะ, แตห เบ กอ ปึอน ดี โทม ฮัม ตาง โต็ง, อี มูห ฮัม บูด เวา. เซ เบ โทม ฮัม ตี, แม โลว แตห เฆ ดูอี ฮาว โฮะ แดง นอน นี.”

14 เฌาพรา แฮะ ฮอต กาลาง ปาย ตี อาโมวแซ วี โลง ดี นอน, วี ตัห ฌัม โดง กอย เฆ ดูอี. อัน วี แตห เฆ แรน โดว เฆ, แตห เฆ ซีงา บอด, แตห อึณ ปี ปี อึง เฌาพรา. โคว, เฆ บอ ลัห ครึง เฆ. 15 วาย อัน ตี อัน วี ต็อห ดี ดูอี กืน, “เบ โลว แรน โตต ดอน โมยว, แตห อึณ ฮอต ดอ ฌัม ซีแง ฮาโอย. แกวะ แตห เบ อีมาย อีบึณ ลาย ลาย ดอ อัน ตี.”

16 วาย อัน ตี แฮะ ฌัม ซีแง ฮาโอย, อึณ บอ มึห อึณอูะ ว็อง แดง นอน. บอ ปลัะ อึณเปลต บอ ฮัม กานัม แฮะ ตัห. แฮะ ฮอต อึณ บอ มึห ฮัม ปี บูด เวา, อึณ ฮัม ตาง กาเซา. อึณ แตห เฆ ดูอี กอย แคง ทึบ บีก บอ โยว ดียูห ดีเยณ กาเซา. 17 วาย อัน ตี อาโมวแซ แตห ดูอี เลห แคง ทึบ บีก เฆ, แยต เฆ ฮาว ฌัม ดี อาต เฌาพรา. เฆ บอ ฮาว กอย ดี ดัง นอน ตึอน. 18 เฌาพรา บอ เลห โลง ดี นอน, แตห เงา บอ กอย โรบ อัน, แตห ดัก เงา ปลึก นอน ซีนาย บอ นอน. ดัก เงา บอ โฮะ นา แดง, แตห อึณ ปี ดัก เงา อี เลห แคง กาง จึม. นอน บอ นอน มืร ดียูห ดีเยณ กาเซา. 19 ฮัม ปี บูด เวา ตึอน วี เลห, วี แกร ดี ตาง หลึอม คา อาต. ดอ อัน ตี อาโมวแซ กาลาง โฆรห ดี เฌาพรา. แฮะ ฮอต, เฌาพรา วี เวียะ โฆรห อัน.

20 เฌาพรา วี โลง ฌัม นา แดง กาแดะ นอน ตึอน. อัน วี จัร อาโมวแซ, แตห อัน ฮาว โฮะ ฌัม โดง กอย อัน นา กาแดะ นอน. ปัน ตี อาโมวแซ มืร โฮะ นา แดง. 21 อัน แฮะ ฮอต ฌัม, เฌาพรา วี ต็อห ดี อัน, “แม โลว วี เลห โลง, ฌัม โดง กอย เฆ ดูอี กืน. แม โลว จัร เฆ, แกวะ แตห เฆ ปรา ดี โฮะ, แกวะ แตห เฆ เทว ดี ยอด เฌาพรา, แกวะ แตห เฆ ดูอี กืน โลว ยัม. 22 บอ เฆ ดา ตาง อี หลู ดี โอว, เฆ อี โลว ตัห ฌัม ดี อาต โอว, เฆ โลว แรน บอ โดว เฆ, แตห เฆ ซีงา บอด, แตห อึณ ปี ปี โลว โอว. เซ เฆ ตู โบง ปาย ตี โอว ดี วี แตห เฆ คัม หมาบ เฆ.”

23 อาโมวแซ วี ต็อห ดี เฌาพรา, “แม แฮะ ฮอต จัร เย โบง กาอูน โรบ นอน นี, แตห อึณ แบน โดง บอด. โคว, เฆ ดูอี อาว ปึอน วี ตัห โฮะ แดง นอน ซีนาย นี.”

24 เฌาพรา วี ต็อห, “แตห แม โลง. แฮะ ฮอต, แตห แม วี โฮะ วี ตึย บอ อาโรน ตัห โดบ แม. เฆ ดา ตาง อี หลู ดี โอว บอ เฆ ดูอี กืน ยี ตู ปึอน ปรา ดี ลึบ ฌัม โดง กอย โอว. เซ เฆ ยัะ ตัห กาตัด โอว, เฆ ดี วี คัม หมาบ เฆ.” 25 เฌาพรา แฮะ ฮอต กาลาง ปาย ตี อาโมวแซ วี เลห โลง, วี ฌัม โดง กอย เฆ ดูอี กืน, วี กาลาง โตต ดอน โมยว แปะ แฮะ ต็อห เฌาพรา, แตห ดูอี วี โทม.