1 เฌาพรา วี ต็อห ดี อาโมวแซ, “คา นี โอว ดี วี กาลาง ดารา แบน โมยว แบน โมยว ปี ดี โลว แม กาลาง ดี เฆ ดูอี อีซาเรลัะ.

2 เซ เบ จึห ดูอี แฮแบร อู วี, แตห อัน แบน หมาย เบ, ดูอี ตี โลว โบง ฆาน เบ อาดา เดา ซีนัม. ฮี ฌัม ซีนัม อึณบู, เบ โลว แตห อัน เลห ฮาว, โบง ปี อึง อัน. แกวะ แตห เบ วี หมาณ มาเซ ดี อัน. 3 เซ อัน แฮะ ตัห อู วี, หณัม มึห อีบึณ, เบ โลว แตห อัน เลห ฮาว อู วี. เซ อัน ยี มึห บอ อีบึณ อัน ดอ ตัห อัน, เบ บอ โลว แตห ฆาย บอ อา วี เลห ฮาว. 4 เซ ดา กาณา อัน แฮะ ดัว อีบึณ ดี อัน, เซ อัน บอ มึห ฆอน อีมาย เฆ ฆอน อีบึณ, อีบึณ เฆ ฆอน อัน ตี, เฆ แฮะ แบน โกรว ดา กาณา อัน. อีมาย ตึอน ยี ปึอน เลห ฮาว อัน อู วี, อาว ฮู โลว แบน หมาย อี.

5 เซ อึณ ยี มูห หมาย ตึอน, เซ อัน บอ ต็อห, อัน ร็อก ดา กาณา อัน, เซ อัน บอ ร็อก อีบึณ เฆ ฆอน อัน, ตู ซี เลห โดง กอย ดา กาณา อัน บอ ต็อห ดี แบน หมาย แคง กาง ดา กาณา อัน เซเซ, 6 ดา กาณา อัน ตึอน โลว ตึย หมาย อัน ตี, แตห อัน ฮาว กาลาง ดี อาต เฌาพรา. ปัน ตี ดา กาณา อัน บอ เบลห อัน กอย ดี โคบ มาโลห กาง. อัน โลว ดึห มาลัต, บลูห โหยะ อัน ดี มา มาโลห. วาย อัน ตี ดูอี ตึอน ดี แบน หมาย แคง กาง ดา กาณา อัน เซเซ.

7 เซ อึณ ยี มึห อีมาย อู วี, เซ อัน บอ ย็อง ฆอน อีบึณ อัน แตห อัน แบน หมาย อี เฮา, อีบึณ ตี อาว ปึอน เลห วาย แฮะ โนะ เดา ซีนัม. อาว ปี อีมาย เฆ ตึอน. 8 เซ อีบึณ ตึอน แฮะ แบน อีบึณ ดา กาณา อัน, เซ อัน ยี ตู โบง แตห อึณ ล็อะ น็อห ดา กาณา ตึอน, ดา กาณา ตึอน โลว วี ดัว อีบึณ ตี ดี ฆูณ อัน, แตห ฆูณ อัน วี จึห. อาว ปึอน ย็อง หมาย อีบึณ ดี ดูอี อาโมยว เฮา. โคว, อัน แฮะ ฮอต แบน อีบึณ ดา กาณา อัน. 9 เซ ดูอี อู วี ยี จึห ฆอน อีบึณ, แตห อึณ แบน อีบึณ ฆอน อีมาย อัน, อัน โลว มาด ฆอน อีบึณ ตี ปี ฆอน ดัง อัน. 10 เซ อีมาย อู วี วี ดึห อีบึณ ปอ อู วี, อัน บอ โลว ลึมลา อีบึณ บรีม. อีบึณ บรีม แฮะ แบน อีบึณ อัน เซเซ. บอ ปี ดี โฮม ปี ดี ตา, อัน โลว กาซาง ดี อัน. 11 เซ อีมาย ยี ตู ซี โบง ฌึร ตี ดอน โมยว ดี อีบึณ ดัง อัน ตึอน, อัน โลว แตห อัน เวณ แคง กาง ฆูณ มา อัน. อาว ปึอน หมาณ มาเซ ดี ฆูณ มา อัน.” แคะ ตี เฌาพรา เบลห อูน ดารา ลอง หมาย อี.

วาย อัน ตี เฌาพรา วี ต็อห,

12 “เซ อึณ บอ มึห ดูอี อู วี, อัน แฮะ มัห ปอ อู วี แตห อัน ยัม, เฆ ดูอี เฮา โลว วี เหมต ดูอี ตี, ง็อห แวน บอ อัน. 13 เซ อึณ มึห ดูอี อี ตา ดึร ยัม อี เฮา, ดอ ตู อูน อัน น็อห ดี โบง ปาย ตี ดูอี วี ตี แฮะ ปึอน เตา, แตห อึณ กอ ฌัม โดง ปี ร็อห โอว ดัว ดี ดูอี ฌึร ตี. เซ อัน กอย ดี ตี, อาว ปึอน เหมต อัน, อาว ปึอน โบง มาเซ ดี อัน. 14 เซ อึณ ยี มึห ดูอี อี แฮะ ฮอต คราม ดี ง็อห อี, อัน แฮะ ฮอต ปรา ดี ง็อห ยัม อี, แฮะ ฮอต, อัน วี ฮาว เครียง ดี โคบ กาโช็ง หลู ดี โอว, เบ โลว ฮาว เหมต อัน โดง กอย อัน ตี, ตึย อัน เลห, วี ง็อห แวน อัน นา เรต. 15 เซ ดูอี อู วี มัห บอ ง็อห ยัม ฆูณ มา อัน, เบ โลว ง็อห ยัม บอ อัน.

16 เซ อึณ บอ มึห ดูอี อี ปรา ดี เหมต ดูอี เฮา, ต็อห ดี ย็อง อัน แบน หมาย อี, อัน ปี บอ แฮะ ฮอต ย็อง, หณัม ย็อง, ดอ เหมต เฆ ดูอี ตี, เฆ โลว ง็อห แวน อาซาก อัน.

17 อาเซ วี ดืง ฆูณ มา อัน, บอ อัน โลว คัม ดี ยัม.

18-19 เซ อึณ ยี มึห ดูอี ลาย กาโฆห, ลาย กามัห, เซ ดูอี อู วี ดูห ปอ อู วี, ตา มาว บอ ตา กาลึม อัน, เซ อัน ยี ตู แตห อี ยัม, ดูอี อี โบง ปาย ตี อาว มึห หมาบ. อึณ ยี มูห ดูอี คัม ดี มัห ปาย ตี เซ อัน โลว อีด โกบ มัห อี ดี อัน, เซ อัน ยี โลว ฮาว วี ฌาน อึณกรวน อัน, ดูอี อี โบง แตห อัน แบน เซา ปาย ตี อัน วี โลว ดัว รึอน ดี ดูอี เซา ตึอน. แคะ ชึม อัน รึอน, ดอ ตู ปึอน โบง อัน ฆาน, แคะ โตต อัน รึอน แตห เซา อัน กอ หราย, อัน โลว ดัว แคะ ตี ดี ดูอี อี กาดูห ดูก ตึอน.

20 เซ อึณ มึห ดูอี อู วี มัห หมาย อัน ตา อึณเพียะ, อึณ บอ มูห อีมาย อีบึณ, เซ หมาย อัน ตึอน กอ ยัม อู เฌณ, อึณ แบน หมาบ ดี ดา กาณา อัน. 21 เซ หมาย อัน ยี ยัม วาย อู ซีแง อา ซีแง, อึณ ตู แบน หมาบ ดา กาณา อัน. หมาย ตึอน แฮะ ปี โกรว ปี ชึม ดา กาณา อัน.

22 เซ อีมาย ลาย กาลูต, เซ อึณ ยี มึห อีบึณ ตู อัห, เซ เฆ โบง แตห บอ อัน ปับ เซา, แตห ฆอน อัน วี ลึร, อัน ยี ตู วี มึห เซา ปอ โมยว, ดูอี อี โบง ปาย ตี โลว ดัว แคะ ปี หมาณ อีมาย อัน. อัน บอ โลว ดัว แคะ ปี หมาณ เฆ ดา ตาง อี ซูงพยาด อามู ตี. 23 เซ อีบึณ ตึอน ยี เซา โกบ มัห อี ดี อัน, ดูอี โบง เซา ตี, อัน โลว คัม แคะ กืน หมาบ อัน. เซ อี แฮะ ชึม อาซาก, บอ อัน โลว ชึม อาซาก อัน. 24 เซ อัน โบง งาย อี อับ, บอ งาย อัน วี โลว อับ. อาเซ แตห หราง อี กาบัก, โลว วี แตห บอ หราง อัน กาบัก. อาเซ โบง แด อี เซา, แตห บอ แด อัน วี เซา แคะ ตี. อาเซ บอ ดูห เปลา อี, แตห บอ เปลา อัน วี แบน เซา แคะ ตี. 25 อาเซ โบง แตห อี บลูห ดี เงา, อัน วี โลว คัม บลูห ดี เงา. อาเซ โบง แตห อึณ แบน บึบ ดี อี, บอ อัน โลว วี แบน บึบ. ปาย ตี อัน โลว วี คัม หมาบ อัน.

26 เซ อึณ ยี มึห ดูอี มัห หมาย อัน, อึณ บอ มูห อีมาย อีบึณ, เซ อัน บอ โบง แตห งาย อัน อับ, ดา กาณา โลว แตห หมาย อัน ฮาว เลห โดง กอย อัน. แคะ ปี ชึม อัน ฆาน ปี โบง หมาย อัน ตี, อึณ วี แบน ง็อห งาย อัน ตึอน. 27 เซ อัน วี มัห หมาย อัน, แตห หราง อัน กาบัก, อัน บอ โลว แตห หมาย ตี เลห โดง กอย อัน โกบ โบง อัน นา ตู หมึอม ดี หมาย อัน.

28 เซ อึณ ยี มึห มัก อาโล็ง ตูห ดูอี อู วี แตห อัน ยัม, บอ มูห อีมาย, บอ มูห อีบึณ, เบ โลว ดึห มาว วึณ ดี มัก อาโล็ง ตึอน, แตห อัน กอ ยัม. ยัง อัน อาว ปึอน ฮาบ. ดา กาณา มัก อาโล็ง ตึอน ยี ตู มึห หมาบ โกบ มัก อาโล็ง อัน แฮะ ตูห แตห ดูอี ยัม. 29 เซ มัก อาโล็ง ตึอน ยี แฮะ ดึอม ตูห ดูอี, เซ ดา กาณา อัน แฮะ ฮอต นับ ลอง อัน ตี, อัน ยี ตู ปัก รีด มัก อาโล็ง ตึอน, เซ มัก อาโล็ง อัน วี ตูห ยัม ดูอี ปอ อู วี, เบ โลว ง็อห แวน มัก อาโล็ง ตึอน, ดึห มาว วึณ ดี อัน, แตห อัน ยัม. บอ ดา กาณา อัน, เบ โลว แตห อัน ยัม. 30 เซ เฆ วอแว ดูอี ยัม ตึอน ยี หมาณ รึอน ดี ดา กาณา มัก, แตห อัน วี ดัว แคะ ปี หมาณ เฆ, แตห อัน วี ลอด ยัม. 31 เซ มัก อาโล็ง ตึอน บอ ตูห ฆอน อีมาย ฆอน อีบึณ อี เฮา แตห เฆ ยัม, เบ บอ โลว โดบ ดารา ฌึร ตี ดอน โมยว. 32 เซ มัก อาโล็ง ยี ตูห หมาย อี, อึณ บอ มูห อีมาย บอ มูห อีบึณ, เซ มัก อาโล็ง ตูห แตห อัน ยัม, ดา กาณา มัก อาโล็ง ตึอน, อัน โลว ดัว รึอน โอย ฆึร โบ็ง ดี ดา กาณา หมาย ตึอน. วาย อัน ตี เบ ยี โลว ดึห มาว วึณ แตห มัก อาโล็ง ยัม. 33 เซ อึณ มึห ดูอี อู วี, อัน บอ วึห กาเดา กาดาย, อัน บอ ฆึห กาเดา อึม คึม, อัน ยี ตู วี ปูน. แฮะ ฮอต ปัน ตี เซ มัก อาโล็ง บอ มาโลว โจห แคง กาเดา ตึอน, 34 ดา กาณา อึม คึม โลว ดัว รึอน ดี ดา กาณา โดว ซัดดาวา. ปัน ตี โดว อี ยัม ตึอน ยี แบน โกรว ดา กาณา อึม คึม.

35 เซ มัก อาโล็ง วี ตูห มัก อาโล็ง ปอ อู โดว, โบง แตห อัน กอ ยัม, ดา กาณา มัก อาโล็ง ปอ อู โดว, อัน โลว ย็อง มัก อาโล็ง อัน. แฮะ ฮอต, ง็อห ปี ปึอน อัน บอ โดว ซัดดาวา อี แฮะ ยัม, อัน โลว กาซาง แตห ดา กาณา มัก วี ปึอน อู วี อู กาแต. 36 เซ ดอน อี ยี นับ, มัก อาโล็ง ตึอน แฮะ ดึอม โบง ปาย ตี มาแล ดา กาณา ยี ตู ปัก อูน ซีคยา อัน, อัน โลว วี ดัว วีว มามัก อีม. โดว มัก อี แฮะ ยัม ตึอน ยี วี แบน โกรว อัน.” แคะ ตี เฌาพรา แฮะ เบลห อูน ดารา ลอง ลาย กาลูต กามัห.