1 วาย อัน ตี เฆ ดูอี อีซาเรลัะ บอกาเฆลียด ฮาว เลห แคง มืง เอลีม ตึอน. บอ อา มาเฆียน ดี ฆึร ดี พัน ซีแง วาย แฮะ เลห เฆ แคง มืง แอฆึบ, เฆ แฮะ ตัห ฌัม โดง กาฮ็อห อู โปละ. เฆ แตห โดง กอย เฆ ตี จืร โดง กาฮ็อห เซอีน. โดง กอย เฆ ตี, อึณ กอย กาแต มืง เอลีม ฆาย นอน ซีนาย. 2 ดอ กอย เฆ โดง กาฮ็อห เซอีน ตี, เฆ ดูอี แบน น็อห ตู อึง อาโมวแซ ฆาย อาโรน บอ ปึณ ดี ฆาย. 3 เฆ วี ต็อห ดี ฆาย, “เซ เฌาพรา แตห เย บอกาเฆลียด ยัม แคง มืง แอฆึบ ตึอน, อึณ หมึอม หลึอม ดูก ปี โลว กาดูห เย ดอ ตี นี. ดอ กอย เย แคง มืง แอฆึบ เย ปึอน โฮม แพ ยัง แบน โมยว แบน โมยว. เย บอ มึห ปี ดี โฮม ซีแงห, แตห วัต เย ฆึห. บาย ยี แฮะ แยต เย ตัห ฌัม โดง กาฮ็อห นี, แตห เย บอกาเฆลียด ดี บอ ยัม โกบ ตู มึห เย ปี ดี โฮม.”

4 เฆ แฮะ ฮอต ต็อห ปาย ตี เฌาพรา วี ต็อห ดี อาโมวแซ, “โอว ดี แตห ปี ดี โฮม โลง แคง ฆางหราว, แตห อึณ ปี ฆลาย โจห. ดอน ซีแง ดอน ซีแง เฆ ดูอี กืน โลว เลห ดึห อูน ปี ดี โฮม ตี. แตห เฆ ดึห อูน แคะ ปี ปึอน เฆ โฮม อาดา อู ซีแง. ปาย ตี โอว ดี เทว น็อห เฆ, โยว เฆ ดี โทม โดบ ปี จัร โอว เฆ โบง. 5 ฮี ฌัม ซีแง อึณเดา, ดอน อี โลว ดึห อูน อา บูน หลึอม ดอน ซีแง แตห อัน อูน ปี ดี โฮม อัน ตี.”

6 ปัน ตี อาโมวแซ ฆาย อาโรน วี กาลาง ดี เฆ ดูอี อีซาเรลัะ, “อาตึร แคง หมึร เบ ดี นับ ซีคยา, อึณ มูห เฌาพรา อี ตึย เบ เลห แคง มืง แอฆึบ. 7 ฮี ฌัม แคหณา ซีณวัห, เบ ดี บอ ยึร อาโรง บลาง เฌาพรา, แตห เบ นับ, เฌาพรา แฮะ โทม โฆรห ตู หมึอม ปี ต็อห เบ ดี อัน. ยาย อา วี ตู ปึอน โบง มาเซ. ยาย โบง แคะ ปี จัร เฌาพรา ยาย โบง. โคว, อาว มูห เบ กาลาง นา ตู หมึอม ดี ยาย. โฆรห เบ ตึอน, เบ แฮะ กาลาง ดี เฌาพรา. 8 แคง หมึร เฌาพรา ดี แตห เบ ปึอน ดี ฮาบ ยัง. ซีณวัห อัน ดี วี ดัว เบ โฮม บอ คามูน, แตห เบ ปึอน ดี โฮม แพ, โฮม แคะ ปี ม็อก เบ. วาย อัน ตี เบ ดี บอ นับ, ดอ ต็อห เบ โฆรห อี ตู หมึอม ตึอน, เบ แฮะ ต็อห โฆรห ตี ดี เฌาพรา.”

9 อาโมวแซ ฆาย อาโรน แฮะ ฮอต กาลาง ปาย ตี ดี ดูอี กืน, อาโมวแซ วี จัร อาโรน บาง เฆ ดูอี กืน, แตห เฆ ตัห กอย ดี อาต เฌาพรา, แตห เฆ นับ เฌาพรา แฮะ โทม ปี กาลาง เฆ ดี อัน.

10 ดอ กาลาง อาโรน ดี ดูอี กืน, เฆ บอกาเฆลียด ยอด นา โดง กาฮ็อห ตึอน. เฆ บอ ยึร อาโรง บลาง เฌาพรา อี แฮะ หมึอม โยว กาเซา แฮะ กาปลูห แคง อึณอูะ. 11 ปัน ตี เฌาพรา วี กาลาง ดี อาโมวแซ ต็อห, 12 “โอว แฮะ โทม นา ตู หมึอม ปี ต็อห เฆ ดูอี อีซาเรลัะ. แตห แม กาลาง ดี เฆ, ‘อาตึร แปร หณัม อับ, เบ ดี ปึอน ดี ฮาบ ยัง. แคหณา ซีณวัห, เบ ดี ปึอน โฮม แพ คามูน. ดอ ยึร เบ ฌึร ตี ดอน โมยว, เบ ดี นับ, โอว มูห อัน เฌา อี มูห เฌาพรา ปี กรึบ เบ.’”

13 ซีแง อัน ตี บา ดี อับ, มา อาโบร็ง กืน แฮะ ตัห แบน พึง แบน พึง, ตัห กอ โนะ แคง โดง คยัะ ดูอี ตึอน. ปา แคหณา ซีณวัห, อึม ดีงาน บอ โจห กอย ดอน โปละ, วี โรบ โดง คยัะ เฆ ตึอน. 14 วาย แฮะ ฮีด แฮะ เฮณ อึม ดีงาน, เฆ ดูอี วี ยอด, อึณ มึห กาฮึง ดีแตด ดีเหรว อู โมยว กอย โนะ แดง กาฮาต. อึณ บอ ปี แฆด มาฆา. อึณ มืร ปี กาฮึง เบรีย. 15 ดอ ยึร เฆ ดูอี อีซาเรลัะ อัน ตี, เฆ วี ลาย ดีหมอด ต็อห, “มาเซ อึณ มูห?” เฆ ต็อห ปาย ตี โคว, เฆ ตู นับ ปี มูห.

อาโมวแซ วี ต็อห ดี เฆ, “อาตี แฮะ มูห ปี ดี โฮม ปี ดัว เฌาพรา ดี เบ. 16 เฌาพรา แฮะ จัร เบ ดอน อี, แตห เบ ฮาว ดึห อูน แคะ ปี ปึอน โฮม เบ, แตห เบ กอ แพ. แตห เบ ดึห, อู วี กาบัก อู แบล ดี อู ควาก อาดา ดอน อี อี กอย แคง อึณโฮม เบ.”

17 เฆ ดูอี อีซาเรลัะ โบง ปี จัร เฌาพรา เฆ โบง. มัง อี เฆ ดึห อูน กืน, มัง อี บอ ดึห อูน อี แจก. 18 แฮะ ฮอต เฆ วี เฆา ปี ดึห อูน เฆ ดอน วี. อาเซ แฮะ ดึห กืน, อัน ตู วี มึห ดี กาโลย. อาเซ แฮะ ดึห อูน อี แจก, อัน ตู โลว ปอ อึณ ปัว. ดอน อี มึห แคะ ปี โลว อัน.

19 อาโมวแซ วี ต็อห ดี เฆ, “แกวะ อูน ปี ดี โฮม ตี, แตห อึณ กอ ฌัม แคหณา.” 20 ดูอี มัง อี ยี ตู โทม ปี ต็อห อัน. เฆ บอ แฆบ อูน มัง กาล็อะ, แตห อึณ กอ ฌัม ปา แคหณา ซีณวัห. ปี แฆบ อูน เฆ ตึอน, อึณ วี แบน อึณปรัต กอ โนะ แคง ซีลัยะ. อึณ บอ กาจูห ดี อูห อัม. ปัน ตี อาโมวแซ วี รู ดี เฆ ลอง อัน ตี.

21 อาดา เดา ซีแง เฆ ดูอี เลห ดึห อูน ปี ดี โฮม ฌึร ตี ดอน ซีแง, แตห เฆ ปึอน แคะ ปี โลว เฆ. วาย แฮะ วี ทอง ซีแง, วี แกร ดี กาฮัวะ, ปี ดี โฮม ตึอน วี ลาต, อาว ฮู ปึอน ดึห อูน. 22 ดอน เฌณ, ดอ ฌัม ซีแง อึณเดา, เฆ ดูอี เลห ดึห อูน อา บูน, แตห อึณ แบน อาดา อู วี โอย แบล. เฆ ดูอี อี มูห ดา ตาง, เฆ วี ตัห กาลาง ลอง อัน ตี ดี อาโมวแซ. 23 อาโมวแซ วี ต็อห ดี เฆ ดา ตาง, “เฌาพรา แฮะ จัร เบ ดึห อา บูน ปาย ตี. แคหณา อึณ ดี มูห ซีแง ดีเหลา, ซีแง ปี โลว โหลห เบ เฌาพรา. โคว, แตห เบ โคว แคะ ซี โคว เบ. แตห เบ ดัง แคะ ซี ดัง เบ. แตห เบ มึง อูน อี ซี ฆีด อาตึร, แตห เบ วี ปึอน ดี โฮม แคหณา.”

24 เฆ ดูอี วี โบง ปี จัร อาโมวแซ, แฆบ อูน อาดา แคหณา. ซีแง อัน ตี อึณ ยี ตู มึห อึณปรัต. อึณ มืร ตู แบน อูห อัม. 25 กอ ฌัม ซีแง ดีเหลา, อาโมวแซ วี ต็อห, “อาตึร นี แตห เบ วี โฮม ปี แฆบ อูน เบ อาหมึร. โคว, อาตึร วี มูห ซีแง ดีเหลา, ซีแง ปี โลว โหลห เอ เฌาพรา. อาตึร นี, เบ ตู วี ปึอน ยึร ปี ดี โฮม ฌึร ตี แดง กาฮาต ตึอน. 26 เบ โลว ดึห ปี ดี โฮม ฌึร ตี อาดา เดา ซีแง. ยี ฌัม ซีแง อึณบู, อึณ มูห ซีแง ดีเหลา. ปี ดี โฮม ตึอน, เบ ตู วี ปึอน ยึร, ตู วี ปึอน ดี ดึห มาเซ.”

27 ดอ แฮะ ฌัม ซีแง อึณบู, อึณ วี มึห มัง อี, เฆ ต็อห ดี ฮาว เหรต ปี ดี โฮม. เฆ ยี ตู ยึร มาเซ. 28 วาย อัน ตี เฌาพรา วี ต็อห ดี อาโมวแซ, “เบ ตู ซี โทม โดบ ปี จัร โอว เบ โบง. ปัน เหมา เบ ดี วี กาปลูะ น็อห, วี โทม โดบ ปี กาลาง โอว? 29 เบ โลว โหลห เซเซ. โอว แฮะ ดัว เบ มึห ซีแง ดีเหลา ตี. โคว อัน ตี, ดอ ฌัม ซีแง อึณเดา, โอว แฮะ ดัว ปี ดี โฮม ดี เบ, แตห อึณ ฆลึม บอ อา ซีแง. ดอ ฌัม ซีแง อึณบู, ดอน อี โลว กอย โดง กอย อัน. อาว โลว เลห ฮาว ปอ อู โปละ.” 30 ปาย ตี ดอ แฮะ ฌัม ซีแง อึณ บู, ดอน เฌณ ดอน เฌณ, เฆ ดูอี กอย ดีเหลา, ตู โบง มาเซ.

31 เฆ ดูอี อีซาเรลัะ ยี ต็อห, ปี ดี โฮม ตี, อึณ จืร คามูน มานา. ดอ ดึอม ยึร เฆ คามูน ตี คา อาต, เฆ แฮะ ดึอม ต็อห, “อึณ มูห มาเซ?” แคง โฆรห เฆ, “อึณ มูห มาเซ?” วี เลห “มานา.” โคว, เฆ แฮะ แตห อึณ จืร คามูน มานา. คามูน ตี แฮะ ลูย ปี กาอาง พูฆี. อึณ บอ ซีแงห ปี คามูน ปี โบง ดูอี ฮับ งาม มาเพียน. 32 วาย อัน ตี อาโมวแซ วี ต็อห, “เฌาพรา แฮะ จัร เบ, แตห เบ เบลห อูน คามูน มานา ตึอน, อาดา อู กาโละ, แตห บอ หลูกหลาน เบ นับ ลอง อัน ตี, แตห บอ เฆ ปึอน ดี ยึร ปี ดี โฮม เบ, ปี ดัว เฌาพรา ดี เบ. อึณ มูห ปี ดัว อัน, แตห เบ โฮม ดอ กอย เบ แคง โดง กาฮ็อห, ดอ ตึย เฌาพรา เบ เลห แคง มืง แอฆึบ ตึอน.”

33 ปัน ตี อาโมวแซ วี จัร อาโรน ดึห กาโละ อู โบ็ง, แตห อัน อูน คามูน มานา นา แคง, แตห อึณ แบน อู แบล ดี อู ควาก. แตห อัน เบลห อูน ดี อาต เฌาพรา, แตห เฆ ดูอี อีซาเรลัะ ดอน โจว ดอน บาน กอ นับ ลอง อัน ตี.

34 อาโรน วี ดึห กาโละ อู โบ็ง, ฮับ คามูน มานา ตึอน นา แคง, อูน ดี อาต ฌีดืก อี แตห ดูอี นับ ลอง เฌาพรา. อึณ มูห ฌีดืก ปี จัร เฌาพรา เฆ โบง. ปาย ตี อัน โบง, แตห อึณ ปี ปี จัร เฌาพรา ดี อาโมวแซ. 35 อาดา พวน ฆึร ซีนัม, เฆ ดูอี อีซาเรลัะ บอ โฮม คามูน มานา ตึอน. เฆ บอ ตัห ฌัม แคง มืง กานัณ, ฌัม โดง กอย อี เฮา, เฆ อาว ฮู มึห คามูน มานา ตึอน.

36 ดอ มึอน, เฆ ดูอี อีซาเรลัะ ตู เฆา แบน แบล. เฆ มึห ซีลัยะ อู โมยว, ต็อห อึณ มูห เอพา. อู เอพา วี มึห ฆึร โอวมา. อู โอวมา ตี ยี มึห กาบัก อู แบล ดี อู ควาก.