คาน 17
ลอง อึม เลห แคง มาว
1 วาย อัน ตี เฆ ดูอี อีซาเรลัะ บอ พึง เลห แคง โดง กาฮ็อห อี จืร เซอีน ตึอน. เฆ วี ฮาว ดอน นา ดอน โปละ ปี ตึย เฌาพรา เฆ ฮาว. แฮะ ฮอต, เฆ วี ตัห ฌัม อู โปละ อี จืร เรพีดีม. โดง คยัะ เฆ ตี อาว มึห อึม เดียง. 2 ปัน ตี เฆ วี ตัห ปึณ ดี อาโมวแซ ลอง อัน ตี. เฆ ต็อห, “แตห แม ดัว เย เดียง อึม.” อาโมวแซ วี ต็อห ดี เฆ, “เหมา อึณ ปาย ปี ปึณ เบ ดี โอว ลอง อัน ตี? เหมา อึณ ปาย ปี เทว เบ เฌาพรา โยว อัน นับ ตู นับ ดี จอย เอ?”
3 เฆ ดูอี กืน ยี แบน ซี เดียง กาเซา อึม. โคว, เฆ วี ปึณ อาโมวแซ ต็อห, “เหมา อึณ ปาย ปี ตึย แม เย เลห แคง มืง แอฆึบ? เหมา อึณ ปาย ปี โบง แม, แตห บอ เย บอ ฆอน เย บอ โดว ซัดดาวา เย โลว ยัม? เย บอกาเฆลียด ดี บอ ยัม โกบ ตู มึห เย ดี เดียง อึม.”
4 อาโมวแซ วี ซาคึร ดี เฌาพรา ต็อห, “มาเซ ปี ดี โลว โบง โอว ดี ดูอี เฆ นี? เฆ แฮะ หงา ดี ดึห มาว วึณ โอว, หงา ดี ง็อห ยัม โอว.”
5 เฌาพรา วี ต็อห ดี อัน, “แตห แม ฮาว แยต ดี อาต เฆ ดูอี กืน. แตห แม บอ แดะ ดา ตาง มัง อี, แตห เฆ โดบ แม. บอ อึณกรวน แม, ปี ดึอม ดึห แม ดอ มัห แม อึม แคง แบลง นีลา ตึอน, แม โลว ดึห. 6 โอว ดี กอย ดี อาต แม ดี โคบ มาว ตาง อี กอย แดง นอน ซีนาย. ดอ อัน ตี แตห แม มัห มาว ตึอน, ตา อึณกรวน แม. ปัน ตี อึม ดี เลห แคง มาว, แตห ดูอี ปึอน ดี เดียง.” ปัน ตี อาโมวแซ วี โบง ปาย ตี แตห เฆ ดา ตาง แคง มืง อีซาเรลัะ บอ ปึอน ดี ยึร. 7 วาย อัน ตี เฆ ดูอี แตห โดง ตี จืร มาซา. มัง อี เฆ บอ ต็อห, โดง ตี, อัน จืร เมรีบา. แคง โฆรห แฮแบร “มาซา” เฆ ต็อห, “เทว, โยว อัน นับ ดี จอย.” โฆรห “เมรีบา” ตึอน, เฆ ต็อห, “ปึณ.” เฆ ดูอี อีซาเรลัะ แตห โดง ตี จืร ปาย ตี. โคว, โดง กอย เฆ ตี, เฆ แฮะ เทว เฌาพรา, โยว อัน นับ ตู นับ ดี จอย เฆ. เฆ มืร แฮะ ต็อห “เย ตู นับ โยว เฌาพรา กอย ตู กอย รึม โดบ เย.”
ลอง เฆ ดูอี อีซาเรลัะ แป เฆ ดูอี อามาเลก
8 ดอ กอย เฆ ดูอี อีซาเรลัะ ดี มืง เรพีดีม ตึอน, เฆ ดา ซึก มืง อามาเลก วี ตัห กาโฆห ดี เฆ. 9 อาโมวแซ วี ต็อห ดี อาโยวซูอา, “แตห แม ร็อห ดูอี มัง อี, แตห เฆ ฮาว กาโฆห ดี ดูอี อามาเลก ตึอน. แคหณา โอว ดี กอย นา กาแดะ นอน. โอว ดี วี โฆ็ง อึณกรวน ปี ดัว เฌาพรา ดี โอว.”
10 อาโยวซูอา วี โบง ปี จัร อาโมวแซ อัน โบง. อัน วี เลห กาโฆห ดี เฆ ดูอี อามาเลก. บอ อาโมวแซ, บอ อาโรน บอ อาฮูรา วี ฮาว โฮะ นา แดง กาแดะ นอน. 11 ดอ โจะ โซ็ง อาโมวแซ แด อัน, เฆ ดูอี อีซาเรลัะ แป เฆ ดูอี อามาเลก. ดอ เบลห โลง อัน แด อัน, เฆ ดูอี อามาเลก วี แป เฆ ดูอี อีซาเรลัะ. 12 อาโมวแซ ยี แกร ดี ดีหลัห. ปัน ตี เฆ วี ดึห มาว ตาง, แตห อาโมวแซ ตูต นา แดง. แฮะ ฮอต, อาโรน ฆาย อาฮูรา วี กอย ดี โคบ อาโมวแซ, อู วี อู บลาก, วี ปา แด อัน, แตห แด อัน กอย นา แดง, แกวะ แตห อัน เบลห โลง แด อัน. เฆ วี โบง ปาย ตี แตห อึณ กอ ฌัม อาคราว เฆต ซีแง. 13 ปาย ตี อาโยวซูอา วี แป เฆ ดูอี อามาเลก, ดอ ตัห ลาย กาโฆห เฆ.
14 วาย อัน ตี เฌาพรา ต็อห ดี อาโมวแซ, “แตห แม แดม อูน ลอง อัน ตี แคง บับ, แตห ดูอี โหลห, แกวะ แตห เฆ ปีว. เบ โลว กาลาง ดี อาโยวซูอา, แตห อัน นับ ซีคยา ปี ดี โบง โอว. โอว ดี โบง แตห เฆ ดูอี อามาเลก ชึม โตต, แกวะ แตห อาเซ วี โหลห เฆ ดอ เหมา.”