1 วาย อัน ตี อาโมวแซ บอ เฆ ดูอี อีซาเรลัะ ต็อห โหมว ดาคึย ดี เฌาพรา. อัน ต็อห,

“โอว ดี ต็อห โหมว ดาคึย อี อืบ เฌาพรา. เฌาพรา แฮะ ตาง หลึอม โตต.

บอ มังปร็อง บอ เฆ ดูอี อี ป็อะ มังปร็อง ตึอน, เฌาพรา แฮะ แวน แคง อึม ดีโหนง.

2 เฌาพรา แฮะ แตห โอว มึห โปลม. อัน มืร แฮะ แตห โอว ต็อห โหมว ดาคึย.

อัน แฮะ คยอด โอว. อัน เฌา มูห เฌาพรา ปี กรึบ โอว. โอว ดี บอ อืบ อัน.

อัน มูห เฌาพรา ปี กรึบ ฆูณ ดัง โอว คา อาต. โอว ดี วี กาลาง ลอง นา หมึอม ปี โบง อัน, แตห ดอน อี นับ.

3 เฌาพรา มูห ดา ซึก. อัน จืร อัน เฌา.

4 อัน แฮะ ฮอต แวน เฆ ดา ซึก คูนดีคัม พาโรว, แตห เฆ บอกาเฆลียด กอ ยัม แคง อึม ดีโหนง ตึอน. บอ ลักเลา อัน แฮะ ชึม. เฆ ดา กาณา ดา ซึก, เฆ อี มึห โปลม หลึอม อี, เฌาพรา แฮะ แตห เฆ โลง ยัม แคง อึม ดีโหนง เรณ.

5 อึม ตาง ตึอน แฮะ อึณปูน โตต. เฆ แฮะ เจต แคง กาดัม อึม, แตห อึณ ปี มาว อี นับ ดี เจต โลง.

6 อึย แม เฌาพรา, แม มึห ปวน ตาง กาเซา, แตห แม แป ดี อึบ โตต. แม แฮะ แป ดี ปยาต แวน รันซู เย.

7 ปวน ตาง แม อี แป ดี อึบ โตต ดอน โมยว, อึณ แตห แม บอ ปยาต แวน โตต เฆ อี ต็อห ดี กาโฆห ดี แม. แม แฮะ แตห เฆ ยึร แคะ รู น็อห แม, แตห เฆ ชึม, แตห อึณ ปี เงา กาซึม เหรียง กาฮ็อห.

8 แม แฮะ ฮึห เลห พึอม แม แคง ฆูงมูห แม. แฮะ ฮอต, อึม อาว ฮู แหล. อึณ จ็อง, กอย ซืร, แบน ปี แรง จา อี โปลม. อึม ลึก ตึอน บอ แบน ปาย ตี อู เฌณ.

9 ยี มูห เฆ รันซู, เฆ วี กาแคณ ต็อห, ‘โอว ดี คูงครัห เฆ, แตห โอว กอ ครับ เฆ. โอว ดี กาซาง โกรวกราม เฆ. อึณ ดี แตห โอว มึห น็อห ดาคึย โกบ แฮะ ปึอน โกรวกราม เฆ ดอน โมยว. โอว ดี ทอด มาปัวะ ลาง โอว, แตห โอว ง็อห แวน เฆ.’

10 อึณ ยี มูห แม เฌาพรา, ดอ ฮึห แม พึอม แม, แม แตห อึม ดีโหนง วี อึณปูน เฆ, แตห เฆ วี ยัม. เฆ บอ เจต โลง แคง อึม ปี ฮีน จัน.

11 อึย แม เฌาพรา, เฆ ดูอี ต็อห, อึณ มึห เฌาพรา แบน กาดัง แบน กาดัง. อึณ ยี ตู มึห เฌาพรา อี ปี แม เฌา. อู กาดัง มืร อาว มึห. แม เฌาพรา แฮะ มึห ปวน ตาง กาเซา, แตห แม แป ดี อึบ โตต. แม ยี บอด กาเซา, ตู โบง นา ตู หมึอม. แม เฌาพรา อู กาดัง มึห อาพูง ดังโคว ตาง, แตห ดูอี แบน น็อห โยว. แม มืร นับ ดี โบง นา หมึอม อาม กาเซา. อาว ปี อาเซ.

12 แม แฮะ โจะ แด อาอัห แม, แฮะ ฮอต, เฆ รันซู แม แฮะ หราย อู เฌณ. อึณ ปี กาดาย แฮะ หณอด เฆ.

13 แม แฮะ คยอด เฆ ดูอี ปี ร็อก แม, แตห เฆ เลห แคง ดูก. โกบ ร็อก กาเซา แม ดี เฆ ดูอี ตี, แม ดี บอ ตึย เฆ ฮาว ดาคึย. ปวน ตาง แม ดี บอ ตึย เฆ, แตห เฆ กอ ฌัม โดง กอย แม เฌาพรา, อี มูห โดง หมึอม, โดง บอด กาเซา.

14 เฆ ดูอี อาโมยว เฮา, เฆ ดี โทม ลอง แปะ แฮะ โบง แม. เฆ ดี โยว บอ แบน น็อห ดียูห ดีเยณ โกบ ยึร เฆ ลอง อัน ตี. เฆ ดูอี พีลีที, เฆ ดี โยว กอ แบน น็อห เตียะ ดี เฆ.

15 เฆ ดูอี อี อึบ มืง เอโดม, เฆ ดี โยว กาเซา ตืก. เฆ ดา ตาง แคง มืง โมวอาบ, เฆ ดี โยว แบน น็อห ดียูห ดีเยณ. เฆ ดูอี แคง มืง กานัณ, เฆ ดี ดีหลัห, อาว ฮู มึห โปลม โกบ โยว กาเซา เฆ.

16 เฆ ดูอี ฌึร ตี ดอน โมยว, เฆ ดี แบน เกห บอ โยว, เซ เฆ ยึร ลอง อัน ตี. ปวน แม เฌาพรา ดี โบง แตห เฆ บอกาเฆลียด กอย ซีต็อง ปี มาว, ตู ยัะ โบง มาเซ, แตห เฆ ดูอี อาโมยว แม เฌา ตัห ฮาว กาโลห ปวน มืง เฆ. อึณ มูห เฆ ดูอี ปี จึห แม เฌา, แม ดี แตห เฆ กาโลห มืง อี เฮา, แกวะ แตห เฆ ฌัม ดูก มาเซ.

17 แม ดี ตึย เฆ ฌัม แดง นอน ปี ร็อห แม, ปี ดี ดัว แม ดี เฆ แตห อึณ แบน คาฆูน ดี เฆ, แตห อึณ แบน โดง กอย เฆ เซเซ. โดง ตี, อึณ บอ มูห โดง บอด โดง กอย แม เฌา. แม เฌา แฮะ อึณปราย โดง ตึอน, แตห เฆ ดูอี กอย ปี เฮ อี แฮะ ฮอต ซัม, อี กอย อู โปละ ตี เซเซ.

18 อึย แม เฌาพรา, แม ดี อึบ เซเซ เฆ ดูอี อาโมยว แม, ดอน โจว ดอน บาน.” แคะ นี เฆ แฮะ ต็อห โหมว ดาคึย.

19 ปาย ตี เฆ มังปร็อง คูนดีคัม พาโรว บอ ลักเลา อัน บอ เฆ ดูอี อี ป็อะ ลักเลา ตึอน, เฆ บอกาเฆลียด แฮะ ฮอต ลึบ แคง อึม ดีโหนง ตึอน, เฌาพรา วี แตห อึม วี ตัห, วี อึณปูน เฆ, แตห เฆ กอ ยัม โตต. เฆ ดูอี อีซาเรลัะ, เฆ ยี ปึอน ฮาว ซีคยา กาโลห อึม ดีโหนง ดอ เฮณ อัน.

20 ปัน ตี อึณ มูห นาง มีรียัม. อัน มูห อีกัด อาโรน ตึอน. อัน บอ มูห ดูอี บยาน โฆรห เฌาพรา. อัน มืร ดึห ฆรึง ดีแตด, กัร. บอ เฆ อีบึณ บอกาเฆลียด, เฆ วี ดึห ฆรึง ดีแตด เฆ, ฮาว โดบ นาง มีรียัม ตึอน. เฆ บอ กัร บอ ฆา ฮาว ลาย กาโดบ. 21 นาง มีรียัม บอ ต็อห โหมว ดาคึย. อัน ต็อห,

“แตห เบ ปาก โหมว ดาคึย, บอ อืบ เฌาพรา. อัน แฮะ ตาง หลึอม โตต. บอ มังปร็อง บอ เฆ ดูอี อี ป็อะ มังปร็อง, อัน เฌา แฮะ แวน, โบง แตห เฆ ยัม แคง อึม ดีโหนง ตึอน.” ปาย ตี นาง มีรียัม แฮะ ต็อห โหมว ดาคึย ลอง แปะ แฮะ โบง เฌาพรา.

22 แฮะ ฮอต ปัน ตี อาโมวแซ วี แยต เฆ ดูอี อีซาเรลัะ เลห โดง กอย เฆ ดี อึม ดีโหนง เรณ ตึอน, แตห เฆ ฮาว ฌัม โดง กาฮ็อห อี จืร ซูรา. เฆ มืร ฮาว โดบ อึณเตณ ตึอน อาดา โอย ซีแง. ดอ อัน ตี เฆ ตู ยึร อึม. 23 แฮะ ฮอต, เฆ วี ตัห ฌัม อู โปละ อี จืร มารา. โดง ตี, อึณ มึห อึม. อึณ ยี ซ็อง. อาว ปึอน เดียง อึม ตี. โคว อัน ตี เฆ ต็อห, โดง ตี จืร มารา.^a 24 ปัน ตี เฆ ดูอี วี ปึณ ดี อาโมวแซ ลอง อัน ตี. เฆ ต็อห, “เหมา อึม ปี ดี เดียง เย?” 25 ปัน ตี อาโมวแซ วี หมาณ กาเซา ดี เฌาพรา. แฮะ ฮอต, เฌาพรา วี บยัะ เฮ อู กาดัง ดี อัน. อัน วี ดึห เฮ ตี, บยัว แคง อึม ตึอน. แฮะ ฮอต อึม วี แบน อึม ซีแงห อู เฌณ, แตห ดูอี ปึอน ดี เดียง อึม ตี.

ดอ กอย เฆ ดูอี อีซาเรลัะ ดี โดง กอย เฆ ตึอน, เฌาพรา มืร จัร เฆ โบง ปี อึง อัน, แตห อัน เทว น็อห เฆ, แตห อัน นับ, โยว เฆ ดี โดบ ซีคยา อัน. 26 อัน ต็อห ดี เฆ, “โอว มูห อัน เฌา ปี กรึบ เบ. เซ เบ บอ โทม ซีคยา โฆรห ปี กาลาง โอว, เซ เบ มืร โทม โบง ปี จัร โอว, เซ เบ โทม โดบ ปี จัร โอว ดี เบ ดอน โมยว, โอว ตู แตห เบ กาดูห ดูก ดี เซา รอฆา ปี ดึอม แตห โอว ดี เฆ ดูอี แอฆึบ. โอว มูห เฌาพรา อี แตห เซา เบ ดอน โมยว หราย โตต.”

27 วาย อัน ตี เฆ ดูอี วี ฮาว ฌัม มืง เอลีม. มืง ตี มึห อึม โตห ฆึร ดี อา โปละ. อึณ บอ มึห เฮ จึก บู ฆึร กาดัง. เฆ ดูอี อีซาเรลัะ วี คยัะ ทึบ บีก เฆ, กอย กาตัด อึม ตี.