วาย อัน ตี เฌาพรา วี ต็อห ดี อาโมวแซ, 2 “แม โลว กาลาง ดี เฆ ดูอี อีซาเรลัะ, แตห เฆ วี วัห ฮาว โดบ อึณเตณ โดง โลว ว็อะ เฆ, แตห เฆ เบลห ทึบ บีก เฆ, กอย กาตัด มืง ปีฮาฮีโรด อี มูห ดี กาแต มืง มีกโดน ฆาย อึม ดีโหนง ตึอน. เฆ โลว คยัะ ดี โคบ อึม อี ลาย กาซืร ดี มืง บาลัะเซโพน. 3 คูนดีคัม พาโรว ตึอน ดี ทาง, เฆ ดูอี อีซาเรลัะ ดี ฮาว วีน ดี แล แคง โดง กาฮ็อห, เฆ ยี ตู นับ อึณเตณ โดง โลว ว็อะ เฆ, อึณเตณ อี แตห เฆ เลห แคง โดง กาฮ็อห ตึอน. 4 โอว ดี วี แตห คูนดีคัม พาโรว วี กาปลูะ น็อห, แตห อัน เลห ฮาว โดบ เบ. ดอ แป โอว คูนดีคัม พาโรว บอ เฆ ดา ซึก อัน, โอว ยี ดี บยัะ อาพูง ดังโคว โอว. ปาย ตี เฆ ดูอี แอฆึบ ดี บอ นับ, โอว มูห อัน เฌา อี อึบ โตต.” เฌาพรา แฮะ ฮอต กาลาง ปาย ตี เฆ ดูอี อีซาเรลัะ วี คยัะ โดง ปี ต็อห อัน เฌา.

5 วาย อัน ตี เฆ ดูอี เฮา วี กาลาง ดี คูนดีคัม พาโรว ลอง เฆ ดูอี อีซาเรลัะ แฮะ ฮอต เลห แคง มืง แอฆึบ. คูนดีคัม พาโรว บอ เฆ อามู อามาด อัน แฮะ วี กาปลูะ น็อห. เฆ ต็อห, “เอ แฮะ รึร กาเซา. เอ แฮะ ควาง เฆ ดูอี อีซาเรลัะ เลห ฮาว. ดอ ตี นี เอ อาว ฮู มึห หมาย อี โบง ฆาน เอ.” 6 ปัน ตี คูนดีคัม ตึอน แตห ดูอี อึณปราย ลักเลา ปี ป็อะ อัน, แตห อัน แยต ดา ซึก, แตห เฆ โดบ ดูอี อีซาเรลัะ. 7 ลักเลา ปี ป็อะ ดา ซึก อัน, อึณ มึห เดา มาย็อห หลาง. อึณ มูห ลักเลา อี หมึอม หลึอม โตต. แดง ตี, อัน บอ ดึห ลักเลา อัน แบน โมยว แบน โมยว. ดา ซึก อี ป็อะ ลักเลา เฆ ตี, เฆ มืร อึบ ดา ซึก แบน พึง แบน พึง. 8 เฌาพรา วี แตห คูนดีคัม พาโรว มึห น็อห จีจีว, แตห อัน ซี โดบ เฆ ดูอี อีซาเรลัะ. เฆ ดูอี อีซาเรลัะ ยี มึห น็อห กรึอม น็อห ตาง, ฮาว โดบ อึณเตณ. 9 เฆ ดูอี แอฆึบ บอ ดา ซึก เฆ บอ มังปร็อง บอ ลักเลา บอ ดูอี อี ป็อะ ลักเลา ตึอน, เฆ บอ พึง วี โดบ ดี ปัน เฆ ดูอี อีซาเรลัะ. เฆ วี ครับ ดูอี อีซาเรลัะ โดง คยัะ เฆ ทึบ บีก ดี โคบ อึม ดีโหนง อี มูห โดง กาตัด มืง ปีฮาฮีโรด. อึณ มูห โดง กาซืร มืง บาลัะเซโพน.

10 คูนดีคัม พาโรว แฮะ รีน ดี ฌัม โดง กอย เฆ ดูอี อีซาเรลัะ. เฆ บอ ยึร ดูอี แอฆึบ แฮะ ตัห โดบ ดี ปัน เฆ, เฆ บอ โยว กาเซา. เฆ วี ดัด ตาง, หมาณ แตห เฌาพรา จอย เฆ. 11 เฆ วี ต็อห ดี อาโมวแซ, “เซ แม ซี แตห เย ยัม แคง โดง กาฮ็อห นี, แม ตู โลว แดะ เย เลห แคง มืง แอฆึบ ตึอน. บอ แคง มืง แอฆึบ ปึอน ดีบ ดูอี ยัม. เหมา อึณ ปาย ปี จัร แม แตห เย เลห แคง มืง แอฆึบ? ดอ ตี นี เย บอกาเฆลียด บอ โลว ยัม. 12 คา อาต เย แฮะ ฮอต ต็อห ดี แม, แกวะ แตห แม แดะ เย ฮาว. เย ซี แบน หมาย เฆ ดูอี แอฆึบ. เซ เย กอย แคง มืง แอฆึบ, แบน หมาย เฆ, อึณ หมึอม หลึอม กอย เย แคง โดง กาฮ็อห นี อี ดี แตห เย ยัม ดอ ตี นี.” 13 อาโมวแซ วี ต็อห, “แกวะ โยว. แตห เบ กอย ซีคยา โดง กอย เบ นี. เบ ดี บอ ยึร เหมา เฌาพรา ดี ปาย ดี จอย เบ. อาตึร นี อัน ดี คยอด เบ อู เฌณ, แตห เบ เลห แคง ดูก ตาง นี. เฆ ดูอี แอฆึบ ปี ยึร เบ ดอ ตี นี, เบ ตู วี ยึร ดอ เหมา. 14 เฌาพรา ดี กาโฆห กาดาง เบ. เบ ยี ตู โลว โบง มาเซ. แตห เบ มึห น็อห เยน.”

15 เฌาพรา วี ต็อห ดี อาโมวแซ, “เหมา อึณ ปาย ปี ดัด แม แคะ ตี, หมาณ ดอน โมยว ดี โอว? แตห แม กาลาง ดี เฆ ดูอี อีซาเรลัะ, แตห เฆ วี ยีต ฮาว ปอ อู โปละ. 16 แตห แม โจะ อึณกรวน แม. โซ็ง แดง อึม ดีโหนง นี, แตห อึม วี กาย็อห, อาว ฮู ฮาว. แฮะ ฮอต, เฆ ดูอี อีซาเรลัะ ดี บอ ปึอน ดี ฮาว กาโลห อึม ดีโหนง นี, ตู แตห เปลา เฆ อัม ณัะ. 17 ดอ กาโลห เบ ดี นี, โอว ดี แตห เฆ ดูอี แอฆึบ มึห น็อห ซี คูงครัห โดบ เบ. ปัน ตี โอว ดี บยัะ อาพูง ดังโคว โอว, แตห เบ ยึร ปี ดี โบง โอว ดี คูนดีคัม พาโรว เฆ ดา ซึก อัน. แตห เบ วี ยึร ปี ดี โบง โอว ดี ลักเลา บอ ดา ซึก อี ป็อะ ลักเลา. 18 โอว ดี บอ บยัะ ปวน โอว, แตห เฆ ดูอี แอฆึบ กอ นับ, โอว มูห เฌาพรา อี มึห ปวน ตาง หลึอม โตต.”

19 วาย อัน ตี อามู อามาด เฌาพรา อี แฮะ ดึอม ฮาว ดี อาต เฆ ดูอี อีซาเรลัะ แตห อัน ปึอน ดี แยต เฆ ฮาว โดบ อึณเตณ ปี โลว ฮาว เฆ, อัน วี กาโทะ โดง กอย อัน, ฮาว กอย ดี ปัน เฆ ดูอี อีซาเรลัะ. บอ ร็อง อึณอูะ ตึอน, อาว ฮู กอย นา อาต, วี ฮาว กอย ดี ปัน เฆ. 20 ปาย ตี บอ อามู อามาด เฌาพรา บอ ร็อง อึณอูะ ตึอน, ฆาย กอย กาแต ดูอี แอฆึบ บอ ดูอี อีซาเรลัะ. อึณอูะ ตึอน แตห อึณ แบน อับ ว็อง ดี โดง กอย เฆ ดูอี แอฆึบ. อึณ ยี แตห อึณ บลาง ดี โดง กอย เฆ ดูอี อีซาเรลัะ. ปาย ตี เฆ กอย ลาย ยาน. แคง หมึร ตี เฆ ดูอี แคง พึง อู พึง อาว ปึอน ฮาว ลึบ โดง กอย ปอ อู พึง.

21 ดอ อัน ตี อาโมวแซ โซ็ง แด อัน แดง อึม ดีโหนง ตึอน. เฌาพรา แตห คูน ตาง ตัห นา เลห ซีแง, แตห อึณ บูด แคง หมึร. แฮะ ฮอต, คูน โบง แตห อึม กาย็อห. อึม แฮะ ฮีด, แตห อึณ แบน อึณเตณ. 22 เฆ ดูอี อีซาเรลัะ บอ ปึอน ฮาว ซีคยา กาโลห อึม ตึอน. โคว, อึณ แฮะ แบน กาดาย กาฮ็อห ดี กาแต อึม. อึม ยี กอย ดี โคบ อึณเตณ โดง ดี ว็อะ เฆ, แตห บอ อา บลาก ปี แรง อึม ตาง.

23 เฆ ดูอี แอฆึบ บอ คูงครัห นา ปัน. เฆ บอ ลึบ แคง กาดัม อึม ตึอน. บอ มังปร็อง บอ ลักเลา บอ ดูอี ป็อะ ลักเลา ตึอน, เฆ บอกาเฆลียด แฮะ ฮาว โดบ. 24 ดอ ฌัม ซีณวัห ว็อง, แปร หณัม วัห, เฌาพรา อี กอย แคง อึณอูะ ฆาย ร็อง เงา ตึอน, อัน บอ ยอด ดูอี แอฆึบ. อัน วี โบง แตห เฆ ซีนัน ซีนืง, กาฟัร กาเฟียน. 25 อัน โบง แตห กาเลณ ลักเลา เฆ วี เลห, แตห อึณ หณาบ ฮาว. ดอ อัน ตี เฆ ดูอี แอฆึบ วี ต็อห, “เฌาพรา ปี กรึบ เฆ ดูอี อีซาเรลัะ, อัน แฮะ ตัห กาโฆห ดี เอ กาดาง เฆ. แตห เอ ฮาว เตา เลห โดง กอย เอ นี.”

26 ปัน ตี เฌาพรา วี ต็อห ดี อาโมวแซ, “แตห แม โซ็ง แด แม แดง อึม ดีโหนง. แตห อึม วี อึณปูน เฆ ดูอี แอฆึบ บอกาเฆลียด. บอ เฆ, บอ ลักเลา บอ ดูอี อี ป็อะ, แตห เฆ ชึม.” 27 เฌาพรา แฮะ ฮอต กาลาง, อาโมวแซ วี โซ็ง แด อัน นา แดง อึม ดีโหนง. ปาย ตี ดอ แฮะ วัห แปร, อึม วี ฮาว โดง บรีม อัน. เฆ ดูอี แอฆึบ วี ต็อห ดี เลห เตา. เฌาพรา ยี แตห อึม ตาง ตึอน วี อึณปูน เฆ อู เฌณ. 28 ดอ วี แหล ฮาว อึม ตึอน โดง บรีม, อึณ บอ อึณปูน ลักเลา บอ เฆ ดูอี อี ป็อะ ลักเลา บอ เฆ ดา ซึก อาโมยว แอฆึบ, เฆ แฮะ โดบ ดูอี อีซาเรลัะ ฮาว แคง กาดัม อึม. แฮะ ฮอต, เฆ บอกาเฆลียด บอ ยัม. อู วี มืร อาว ฮู ฆีด.

29 เฆ ดูอี อีซาเรลัะ ยี แฮะ ปึอน กาโลห อึม ดีโหนง ตึอน, ฮาว แดง กาดาย กาฮ็อห. อึม แฮะ แบน แรง, กอย ดี โคบ เฆ บอ อา บลาก. 30 ซีแง อัน ตี เฌาพรา แฮะ คยอด เฆ ดูอี อีซาเรลัะ, แกวะ แตห เฆ ดูอี แอฆึบ วี อึบ เฆ. เฆ ดูอี อีซาเรลัะ วี ยึร โดว โบ็ง ดูอี ยัม อี กอย บาง อึม ดีโหนง ตึอน. 31 เฆ ดูอี อีซาเรลัะ แฮะ ยึร แคะ ตาง ปวน เฌาพรา. แฮะ ฮอต, เฆ วี โยว เฌาพรา, วี หณึม บึง เฌาพรา. เฆ บอ วี หณึม อาโมวแซ อี ต็อห, อัน มูห ดูอี ปี จัร เฌาพรา โบง ฆาน เฌาพรา.