1 เฌาพรา วี ต็อห ดี อาโมวแซ, 2 “เซ เฆ ดูอี มึห ฆอน ฆีณ อี มูห ฆอน อีมาย, ฆอน ตี ดอน วี เบ โลว หลู ดี โอว. ฆอน ฆีณ อี มูห ฆอน อีมาย บอ ฆอน ฆีณ อี มูห โดว ซัดดาวา อาโล็ง, โอว เฌาพรา หมาณ, แตห ดอน อี บอ ดอน โดว แบน โกรว โอว.”

3 วาย อัน ตี อาโมวแซ วี กาลาง ดี ดูอี กืน ต็อห, “ดอน ซีนัม, เบ โลว โหลห เซเซ ซีแง ดอ เลห เบ แคง มืง แอฆึบ. เบ แฮะ ฮอต เลห แคง มืง แอฆึบ, อาว ฮู แบน หมาย ดูอี เฮา. อึณ มูห ปวน เฌาพรา อี ตาง. อึณ แฮะ แตห เบ เลห แคง มืง ตึอน. ดอน ซีนัม, ฮี ฌัม ซีแง โลว โหลห เบ อาคราว ดอ เลห เบ แคง มืง แอฆึบ, แกวะ แตห เบ โฮม คามูน อี ฮับ เบ ซีนัม บรัห. 4 อาตึร นี อึณ มูห มาเฆียน อี จืร มาเฆียน อาบีบ. มาเฆียน อาบีบ นี เบ แฮะ เลห ฮาว แคง มืง แอฆึบ. 5 คา อาต เฌาพรา ยี แฮะ ฮอต ดัว กาดีก ซัดฌา ดี ฆูณ ดัง เบ. อัน แฮะ ฮอต ต็อห, อัน ดี แตห เบ ฮาว ฌัม แคง มืง กานัณ ตึอน. มืง ตี มูห โดง กอย เฆ ดูอี เฮทีด, เฆ ดูอี อาโมวรีด, เฆ ดูอี ฮีวีด บอ เฆ ดูอี เยบูซีด. แคง มืง ตี กาดาย แฮะ บอด, แตห เบ มึห เฮ บอ เบล ดอน โมยว, แตห เบ มึห ปี ดี โลว เบ ดอน โมยว. เบ ฮี ตัห ฌัม แคง มืง กานัณ ตึอน, ดอน ซีนัม ฮี ฌัม มาเฆียน อาบีบ นี, เบ โลว โบง ปี ดัม โอว เบ โบง ดอ ตี นี. 6 อาดา บู ซีแง เบ โลว โฮม คามูน อี ตู มึห ซีนัม บรัห. ฮี ฌัม ซีแง อึณบู, เบ โลว โบง บลอย, แตห เบ โหลห เฌาพรา. 7 อาดา บู ซีแง ตี เบ โลว โฮม คามูน อี ตู มึห ซีนัม บรัห. เบ ดูอี บอ มืง, แกวะ แตห อึณ มึห อาเซ อี เบลห อูน ซีนัม บรัห ตึอน แคง กาง อัน. 8 ซีแง โบง เบ บลอย ตี เบ โลว แค, แตห ฆอน เบ นับ เหมา อึณ ปาย ปี โบง เบ บลอย ตี. เบ โลว ต็อห, เฌาพรา แฮะ แตห เอ เลห แคง มืง แอฆึบ.” 9 บลอย ตี, อึณ ดี แตห เบ โหลห เซเซ ปี โบง โอว ดี เบ. อึณ ปี วัน ปี ปัก ดูอี ดี แด เฆ, แกวะ แตห เฆ ปีว. อึณ บอ ปี เฌ ปี ปัก ดูอี ดี กาต็อห เฆ, แตห เฆ โหลห เซเซ โฆรห เฌาพรา. ปาย ตี เบ บอ โลว กาลาง เซเซ ลอง ดารา เฌาพรา ฌึร ตี, แกวะ แตห เบ ปีว ดอ เหมา. ปาย ตี เบ บอ โลว โหลห แคะ ตาง ปวน เฌาพรา ดอ ตึย อัน ดี เบ, แตห เบ เลห แคง มืง แอฆึบ. 10 นา อาต นี ฮาว, ดอน ซีนัม ดอน ซีนัม ฮี ฌัม อาคราว อัน, เบ โลว โบง บลอย ตี, โบง แคะ ปี ต็อห โอว ดี เบ.

11 วาย อัน ตี เบ บอ โลว โบง ปอ อู โมยว. เฌาพรา แฮะ ดึอม ดัว กาดีก ซัดฌา ดี เบ บอ ดี ฆูณ ดัง เบ คา อาต. อัน แฮะ ต็อห ดี แตห เบ กอย แคง มืง กานัณ ตึอน, แตห อึณ แบน มืง เบ. เฌาพรา ดี บอ โบง ปาย ตี. 12 เซ เบ แฮะ ฮอต ตัห ฌัม มืง ตึอน, เบ วี โลว หลู ดี เฌาพรา. ฆอน ฆีณ เบ, เซ อึณ มูห ฆอน อีมาย, เบ โลว อาบ ดัว ดี เฌาพรา, แตห อึณ แบน ฆอน เฌาพรา. บอ ฆอน ฆีณ โดว ซัดดาวา เบ, เซ อึณ มูห อาโล็ง, เบ โลว หลู ดี เฌาพรา. 13 เซ อึณ มูห มาโลว อาโล็ง, เบ โลว ดึห ฆอน มาบู, แตห อัน กาดาง ฆอน มาโลว ตึอน. เซ เบ ยี ตู มึห ฆอน มาบู แตห อัน กาดาง ฆอน มาโลว, เบ โลว ฆลอก โกม อัน, แตห อึณ กาลาต. บอ ฆอน อีมาย เบ, อี มูห ฆอน ฆีณ, เบ โลว ดึห มาบู กาดาง ดอน อี.

14 นา อาต ฮาว, เซ ฆอน เบ ดีหมอด เบ ลอง ปี โบง เบ ฌึร ตี, เซ เฆ ต็อห, ‘มาเซ อึณ มูห ซีเพา อัน?’ เบ โลว วี ต็อห ดี เฆ, ‘คา อาต แฮะ เหลณ, ฆูณ ดัง เอ แฮะ กอย แคง มืง แอฆึบ, แบน หมาย อี เฮา. เฌาพรา ยี ตึย เอ เลห แคง มืง แอฆึบ ตึอน. อัน บอ บยัะ ปวน อัน ดี เฆ. 15 อาคราว ดอ อัน ตี คูนดีคัม พาโรว ตึอน ตู ซี แตห เฆ เลห แคง มืง อัน. ปัน ตี เฌาพรา ง็อห ยัม ฆอน ฆีณ แคง มืง แอฆึบ บอ มืง. บอ ฆอน อีมาย ดูอี บอ ฆอน อาโล็ง โดว ซัดดาวา, เฌาพรา แฮะ ง็อห แวน โตต. โคว อัน ตี, เอ วี โลว หลู ฆอน ฆีณ ดูอี บอ ฆอน ฆีณ โดว ซัดดาวา, แตห อึณ แบน โกรว เฌาพรา. เซ อึณ ยี มูห ฆอน อีมาย ดูอี อี มูห ฆอน ฆีณ, เอ บอ ปึอน ดี ดึห มาบู, กาดาง ฆอน ดูอี.’

16 “เซ เบ กาลาง ปาย ตี ดี ฆอน เบ ลอง อัน ตี, อึณ ดี บอ แตห เฆ โหลห เซเซ ลอง ปี โบง โอว เฌาพรา ดี เบ. ปาย ตี ปี โบง โอว, อึณ ดี บอ แบน ปี วัน ปี ปัก ดูอี ดี แด เฆ, แกวะ แตห เฆ ปีว. อึณ บอ ปี เฌ ปี ปัก ดูอี ดี กาต็อห เฆ, แตห เฆ โหลห ซีคยา ลอง เฌาพรา ดอ ตึย อัน ดี เบ, แตห เบ เลห แคง มืง แอฆึบ.” อาตี ดอน โมยว, เฌาพรา แฮะ กาลาง ดี อาโมวแซ. แฮะ ฮอต, อาโมวแซ วี กาลาง ดี ดูอี อีซาเรลัะ.

17 คูนดีคัม พาโรว ตึอน แฮะ ฮอต แตห เฆ ดูอี อีซาเรลัะ เลห แคง มืง อัน, ฮาว โดบ อึณเตณ. วาย อัน ตี เฌาพรา ตู ตึย เฆ ฮาว โดบ อึณเตณ อี ฌัม มืง พีลีที. อึณเตณ ตี อึณ ซืร, อาว โต็ง. เฌาพรา แฮะ ทาง, เซ เฆ ฮี ยึร รันซู, เซ เฆ บอ โลว กาโฆห ดี ดูอี เฮา, เฆ นับ ดี วี บยอง น็อห, วี เวณ มืง แอฆึบ ตึอน. 18 โคว, เฌาพรา ตึย เฆ ฮาว โดบ อึณเตณ อี กาโลห โดง กาฮ็อห. แฮะ ฮอต, อึณ บอ ฮาว ฌัม ดี อึม ดีโหนง เรณ ตึอน. ดอ ฮาว เฆ โดบ อึณเตณ, เฆ ยี ฮาว ปี ดูอี อี ฮาว กาโฆห ดี อี.

19 อาโมวแซ มืร แฮะ ดึห กาอาง อาโยว ตึอน, แตห อัน ตึย บอ กาอาง ตี ฮาว เลห แคง มืง แอฆึบ. ดอ มึอน อาโยว ตึอน แฮะ แตห เฆ ดูอี อีซาเรลัะ ดัว กาดีก ซัดฌา ดี อัน. อัน แฮะ ต็อห, “เซ เฌาพรา จอย เบ แตห เบ เลห แคง ดูก ตาง, แตห เบ บอ ดึห โดว โบ็ง โอว, แตห อัน เลห แคง มืง นี.” โคว อัน ตี, อาโมวแซ แฮะ ดึห กาอาง อัน, ตึย เลห แคง มืง แอฆึบ.

20 เฆ ดูอี บอกาเฆลียด แฮะ ฮอต เลห แคง มืง ซูโคด ตึอน, เฆ วี ตัห ฌัม นา เรต มืง เอทาม, อี กอย ดี โคบ โดง กาฮ็อห. เฆ บอ คยัะ โดง ตี. 21 ดอ ฮาว เฆ โดบ อึณเตณ กาแต ซีแง, เฌาพรา ตึย เฆ แตห เฆ ยึร อึณอูะ. อารึบ อึณอูะ ตี, อึณ ปี ร็อง จา อี แยต ดี อาต เฆ. แคง หมึร เฌาพรา วี แตห อึณ แบน ปี ร็อง เงา อี แยต ดี อาต เฆ, แตห อึณ บลาง ดี เฆ. ปาย ตี เซเซ เฆ ปึอน ฮาว โดบ อึณเตณ ปี บยัะ เฌาพรา ดี เฆ. 22 ร็อง อึณอูะ ตึอน, อึณ กอย ดี อาต เฆ กาแต ซีแง. บอ ร็อง เงา ตึอน กอย เซเซ แคง หมึร. อึณ ตู วี หราย ดอ เหมา, แตห เฆ ปึอน ดี ยึร เซเซ.