คาน 12
วาย อัน ตี เฌาพรา วี กาลาง ดี อาโมวแซ ฆาย อาโรน ต็อห, 2 “โป็ง อาตึร นี ฮาว นา อาต, มาเฆียน นี, อึณ ดี โลว แบน มาเฆียน ดอ โฆว ดัง แคง ซีนัม เบ, เซ ตีห เบ อาคราว เบ. 3 บาย โลว ต็อห ปาย ตี ดี เฆ ดูอี อีซาเรลัะ บอ พึง. มาเฆียน นี, ฮี ฌัม ฆึร ซีแง, อีมาย ดอน อี อี มูห ฆีณ อึณโฮม, อัน โลว ร็อห ฆอน มาบู อู โดว, แตห เฆ โฮม อู กาง อู โดว. 4 เซ อึณ มึห กาง อี ตู มึห ดูอี กืน, เซ เฆ ตู โตต ดี โฮม ฆอน มาบู อู โดว ตึอน, แตห เฆ บาง ดูอี อี กอย กาตัด กาง เฆ, แตห เฆ โฮม รึม ฮาบ ยัง มาบู อู โดว ตึอน, แตห เฆ โตต, แกวะ แตห อึณ กาโลย. 5 เบ โลว ร็อห มาบู อาโล็ง อู โดว, อาซาก อัน อี โนะ อู ซีนัม. เซ อาว มึห ฆอน มาบู, ปึอน ดึห ฆอน มาแป กาดาง. โดว ปี ร็อห เบ ยี โลว แตห อึณ มูห โดว อี โปลม คัะ. เซ อึณ มึห โดง เช คอ อี แจก, อาว ปึอน ดึห. 6 เบ แฮะ ฮอต ร็อห อู โดว ปาย ตี เบ วี โลว ลึมลา ยอด ซีคยา โดว อัน ตี, แตห อึณ กอ ฌัม ซีแง ฆึร ดี อึณพวน แคง มาเฆียน นี. ซีแง อัน ตี บา ดี อับ, เบ ดูอี อีซาเรลัะ บอ มืง, เบ โลว ง็อห โดว ปี ร็อห เบ แคง กาง ดอน กาง, แตห เบ ง็อห อู กาง อู โดว. 7 ดอ ง็อห เบ โดว ตึอน, เบ โลว ดึห หนาม อัน อี แจก, พ็อห ดี มา มาโลห กาง, บอ นา แดง บอ ดี โคบ มาโลห, โอย บลาก. โลว พ็อห ดี กาง ดอน กาง อี มูห โดง ฮาบ ดูอี มาบู ปี ง็อห เฆ ตึอน. 8 แคง หมึร ตี, เฆ ดูอี ดอน อี โลว ฮาบ ยัง มาบู ตาด แดง เงา. เบ บอ โลว โฮม คามูน อี ตู มึห ซีนัม บรัห. โลว ฮาบ บอ เดา ซ็อง. 9 แกวะ โฮม ยัง อีม. แกวะ ดัง. เบ โลว ตาด ยัง แดง เงา, บอ ฆีณ บอ เปลา บอ ดอน โมยว อี กอย แคง วัต. 10 แกวะ อูน ดี โฮม ปา แคหณา. เซ อึณ กาโลย, เบ โลว โดะ แคง เงา, แตห อึณ กาซึม. 11 ดอ โฮม เบ มาบู ตี, เบ โลว ชึบ ครึง ปี ตา เบ ดอ ฮาว เบ โดบ อึณเตณ. เบ บอ โลว ชึบ คูดีณ เบ, โฆ็ง อึณกรวน เบ. ปาย ตี เบ โลว ปีครัน เบ โฮม บอ โฮม แฮ แฮ. ดอ โฮม เบ ปาย ตี อึณ มูห อาคราว ดอ กาโลห เฌาพรา กาง เบ, แกวะ แตห เบ กาดูห ดูก.”
12 เฌาพรา แฮะ ฮอต กาลาง ปาย ตี อัน วี ต็อห, “แคง หมึร นี โอว ดี ลึบ แคง กาง ดอน กาง แคง มืง แอฆึบ บอ มืง. โอว ดี ง็อห ยัม ฆอน อีมาย ดอน อี อี มูห ฆอน ฆีณ. บอ ดูอี บอ โดว ซัดดาวา อี กอย ดอน มาน ดอน มืง, เฆ ฆอน ฆีณ ดี บอ ยัม. โอว มูห เฌาพรา อาคาคัร. โคว, โอว ดี โบง แตห เฆ ดูอี แอฆึบ กอ นับ, เฌา ปี กรึบ เฆ แบน โมยว แบน โมยว, เฆ แฮะ ชึม, อาว มึห ปวน. 13 หนาม มาบู ปี พ็อห เบ ดี กาง เบ, อึณ ดี แบน ลักซานา ดี โอว. ดอ ง็อห โอว เฆ ดูอี แอฆึบ, เซ โอว ยึร หนาม ดี มาโลห กาง, โอว ดี กาโลห กาง ตี. ปาย ตี อึณ ดี แบน ดูก ตาง ดี เฆ ดูอี แอฆึบ. เบ ยี ตู กาดูห ดูก มาเซ.
14 ซีแง ดี โบง โอว ฌึร ตี, อึณ มูห ซีแง ปี โลว โหลห เบ เซเซ. ดอน บาน ดอน ฌาด ฮาว นา อาต, เบ โลว โหลห ซีแง ตี, โบง บลอย, แตห เบ โหลห ซีแง กาโลห โอว กาง เบ. 15 ดอ โบง เบ บลอย ตี, อาดา บู ซีแง เบ โลว โฮม คามูน อี ตู มึห ซีนัม บรัห. ฮี ฌัม ซีแง ดอ โฆว อัน, เบ โลว แวน โตต ซีนัม บรัห คามูน อี กอย แคง กาง เบ. บู ซีแง ตึอน ดอ โบง เบ บลอย ตี, อาเซ โฮม คามูน อี มึห ซีนัม บรัห, เบ โลว แวน วี ตี, แกวะ ฮู มาด อัน มูห ดูอี อาโมยว อีซาเรลัะ. 16 ซีแง ดอ โฆว อัน, บอ ซีแง กาแดะ, เบ โลว ตัห กาฌูะ กรึบ โอว. เบ แกวะ โบง ฆาน มาเซ แดง มึง ปี ดี โฮม. แคะ ตี เบ โลว โบง.
17 ปาย ตี เบ โลว โบง บลอย ตู โฮม คามูน บรัห. โคว, เบ โลว โหลห ซีแง ปี ตึย โอว เบ ดอน อี, แตห เบ เลห แคง มืง แอฆึบ. ปาย ตี อึณ ดี แบน บลอย ปี โลว โบง ฮาว เบ นา อาต ดอน ฌาด ดอน บาน. 18 เซ อึณ ฌัม มาเฆียน ดัง แคง ซีนัม กามาย, ฮี ฌัม ซีแง ฆึร ดี อึณพวน, แคง หมึร เบ โลว จูห ดี โฮม คามูน อี ตู มึห ซีนัม บรัห, แตห อึณ กอ ฌัม ซีแง อา ฆึร ดี เหลห แคง หมึร. อาดา บู ซีแง ตี, เบ โลว โฮม คามูน อี ตู มึห ซีนัม บรัห. 19 ดอ บู ซีแง ตี อาว ปึอน อูน ซีนัม บรัห แคง กาง เบ. เซ อึณ ยี มึห ดูอี อี โฮม คามูน อี มึห ซีนัม บรัห, เบ โลว ซูต เลห ดูอี ตี แคง มืง เบ. อาเซ ตู โดบ ปี จัร โอว ตี, อึณ บอ มูห ดูอี อีซาเรลัะ อู ซีณ ดอ ฆึอด อัน, อึณ บอ มูห ดูอี อาโมยว เฮา อี ลึบ กอย รึม โดบ เบ, เบ โลว ซูต เลห ดูอี ฌึร ตี ดอน อี. 20 เบ บอ กอย ดี เหมา, ดอ ฌัม อาคราว บลอย ตี, เบ แกวะ โฮม มาเซ อี มึห ซีนัม บรัห.” ปาย ตี เฌาพรา กาลาง ดี อาโมวแซ ฆาย อาโรน ตึอน.
21 ปัน ตี อาโมวแซ แดะ เฆ ดา ตาง ดูอี อีซาเรลัะ แตห เฆ ตัห ฌัม โดง กอย อัน. อัน วี ต็อห ดี เฆ, “แตห เบ ฮาว อู เฌณ, ร็อห ฆอน มาบู ฆอน มาแป, แตห อึณ ฆลึม อาดา อึณโฮม เบ. แตห เบ ง็อห โดว อัน ตี. 22 แฮะ ฮอต ง็อห, เบ โลว ดึห เดา ฮูโซบ, ปัก อึณโป็ง, จึบ แคง หนาม ตึอน, พ็อห ดี มา มาโลห กาง เบ, บอ นา แดง บอ ดี โคบ มาโลห บอ อา บลาก. ปัน ตี แกวะ ฮู แตห ดูอี อี กอย แคง กาง เบ วี เลห ฮาว นา เรต กาง, แตห อึณ กอ ฌัม ปา แคหณา ซีณวัห. 23 แคง หมึร เฌาพรา ดี วีน ดี แล แคง มืง แอฆึบ, ง็อห ยัม เฆ ดูอี แอฆึบ. ดอ ยึร อัน หนาม ปี พ็อห เบ ดี มาโลห กาง เบ, อัน ดี กาโลห กาง ตี. อึณ ดี มึห อามู อามาด เฌาพรา อู กาดัง, อัน ดี ตัห ง็อห ยัม ดูอี. เฌาพรา ยี ตู แตห อามู อามาด อัน ตึอน ลึบ แคง กาง เบ, ตู แตห อัน ง็อห ยัม เบ.
24 แตห เบ วี โหลห ซีคยา ลอง อัน ตี, แตห เบ วี โดบ โบง ปาย ตี. บอ เบ, บอ หลูกหลาน เบ, บอ เฆ ดูอี อี ดี ฆึอด ดี ปัน เบ, เบ โลว โบง บลอย ตี เซเซ. 25 เซ เบ ฮาว ลึบ แคง มืง ปี ดึอม ต็อห เฌาพรา ดี ดัว ดี เบ, เบ บอ โลว โบง บลอย ตี. 26-27 ดอ อัน ตี เซ ฆอน เบ ดีหมอด เบ ลอง ซีเพา อัน ตี, เบ โลว ต็อห ดี เฆ, ‘ปี โฮม เอ ปาย นี, อึณ มูห โกบ โหลห เอ อาคราว ดอ มึอน ดอ กาโลห เฌาพรา กาง เอ. ดอ ฮาว อัน แคง มืง แอฆึบ ตึอน, อัน แฮะ ง็อห ยัม ฆอน ดูอี แอฆึบ. อัน ยี ฮาว กาโลห กาง เอ, ตู โบง มาเซ แคง กาง เอ ดอน กาง.’” อาโมวแซ แฮะ ฮอต กาลาง โฆรห ตี ดี เฆ ดูอี อีซาเรลัะ, เฆ วี โฆม ฆึบ ดี อาต เฌาพรา. 28 แฮะ ฮอต ปัน ตี เฆ ดูอี อีซาเรลัะ โบง ซีคยา ปี ต็อห เฌาพรา ดี อาโมวแซ ฆาย อาโรน, ปี จัร เฌาพรา เฆ โบง.
29 ซีแง อัน ตึอน แคง หมึร กาแต ซึอม, เฌาพรา ง็อห ยัม เฆ ฆอน อีมาย ดูอี อี มูห ฆอน ฆีณ. อัน กาจูห ดี ง็อห ยัม ฆอน คูนดีคัม พาโรว อี ดี ปลูะ ฆูณ อัน แบน คูนดีคัม. แฮะ ฮอต, อัน ฮาว, แตห อัน กอ ฌัม ดี ดูอี อี กอย แคง กาปึม อี มูห ฆอน ฆีณ. ฆอน ฆีณ ดอน อี อี กอย ดอน นา ดอน โปละ, เฆ บอ ยัม โตต. บอ เฆ ฆอน โดว ซัดดาวา อี มูห ฆอน ฆีณ, เฆ ดอน โดว บอ ยัม. 30 แคง หมึร ตี, คูนดีคัม พาโรว, บอ เฆ อามู อามาด อัน บอ เฆ ดูอี อี กอย แคง มืง แอฆึบ, เฆ บอกาเฆลียด วี ยีต. เฆ บอ ยาม ตาง โกบ แฮะ มึห ดูอี ยัม แคง กาง ดอน กาง. แคง มืง แอฆึบ บอ มืง อาว มึห กาง อี ตู มึห ดูอี ยัม.
31 ดอ อัน ตี คูนดีคัม พาโรว จัร อาโมวแซ ฆาย อาโรน วี ตัห ฌัม โดง กอย อัน. อัน ต็อห, “ฮาว ฮาว, บอ บาย อา วี, บอ เบ ดูอี อีซาเรลัะ ดอน อี. ฮาว เลห โดง กอย เย. ฮาว หลู ดี เฌาพรา ปี กรึบ เบ. ฮาว โบง ปี ดึอม หมาณ เบ. 32 แตห เบ ดึห บอ มามัก เฆ มาบู เบ. แตห บาย ยี ม็องการา แตห ดี โอว.”
33 เฆ ดูอี แอฆึบ บอ จัร ดูอี อีซาเรลัะ, แตห เฆ ปีครัน เฆ ดี เลห ฮาว. เฆ ต็อห, “เซ เบ ตู ฮาว แฮ แฮ, เย โยว เย บอกาเฆลียด ดี บอ ยัม.” 34 ปัน ตี เฆ ดูอี อีซาเรลัะ ดึห อึณปาน ปี อูน เฆ กาแปะ ซีน, แตห อึณ แบน คามูน. เฆ โลว ดึห กาแปะ เฆ อาต ฮับ เฆ ซีนัม บรัห. เฆ บอ ดึห บีก, กาบีด อึณปาน เฆ, ฆอด ฮาว. 35 แฮะ ฮอต, เฆ บอ หมาณ ครึง ตา บอ รึอน เฆ ครีว, แตห เฆ ดูอี แอฆึบ ดัว ดี เฆ, แตห อึณ แบน ปี ดึอม กาลาง อาโมวแซ ดี เฆ. 36 เฌาพรา แฮะ ฮอต โบง แตห เฆ ดูอี แอฆึบ กาปลูะ น็อห เฆ, แตห เฆ กอ อึง ดูอี อีซาเรลัะ. เฆ ดูอี อีซาเรลัะ บอ ปึอน โตต ดอน โมยว ปี หมาณ เฆ. ปาย ตี เฆ ปึอน กืน โกรวกราม เฆ ดูอี แอฆึบ.
37 เฆ ดูอี อีซาเรลัะ มืร ฮาว ดี เปลา, เลห แคง มืง ราเมเซด, ฮาว โดบ อึณเตณ อี ฌัม มืง ซูโคด. อึณ บอ มึห เฆ อีมาย กาบัก เดา แซน วี บอ อีบึณ เฆ ฆอน. เฆ บอกาเฆลียด ฮาว ดี เปลา เลห แคง มืง แอฆึบ ตึอน. 38 อึณ บอ มึห ดูอี เฮา กืน, อี ฮาว โดบ เฆ. เฆ บอ แวด ฮาว บอ โดว ซัดดาวา เฆ กืน กาเซา, บอ มามัก เฆ มาบู เลห ฮาว โตต. 39 เฆ บอ ดึห กาแปะ ปี กาวัร เฆ แคง มืง แอฆึบ, โบง คามูน อี ตู มึห ซีนัม บรัห. เฆ ตู มึห ซีนัม บรัห โกบ ตู ดัน อึณปราย เฆ ปี ดี โฮม ดอ จัร ดูอี แอฆึบ เฆ เลห แคง มืง แอฆึบ ตึอน.
40 เฆ ดูอี อีซาเรลัะ แฮะ ฮอต กอย แคง มืง แอฆึบ อาดา พวน มาย็อห ดี โอย ฆึร ซีนัม. 41 ดอ เลห เฆ แคง มืง แอฆึบ, ซีแง อัน ตี บอ โนะ พวน มาย็อห ดี โอย ฆึร ซีนัม กาบรี. อู ซีแง มืร อาว โยม. ซีแง อัน ตี เฆ ดูอี ปี อึบ เฌาพรา, เฆ ดอน ฌึร ดอน ครึร บอ เลห แคง มืง แอฆึบ. 42 แคง หมึร ตึอน เฌาพรา แฮะ บัร ดี ยอด ซีคยา เฆ ดูอี อีซาเรลัะ, ตึย เฆ เลห แคง มืง แอฆึบ ตึอน. โคว อัน ตี ดอน ซีนัม แคง หมึร ตี, เฆ ดูอี อีซาเรลัะ อี ดี ฆึอด นา อาต ฮาว ดอน ฌาด ดอน บาน, เฆ บอ โลว บัร แคง หมึร ตี, แกวะ แตห เฆ อีด, แตห เฆ นัมโหลห เฌาพรา บอ โหลห ซีแง ดอ มึอน. 43 เฌาพรา วี ต็อห ดี อาโมวแซ ฆาย อาโรน, “ปาย ตี โอว จัร เบ โบง บลอย โหลห ดอ กาโลห โอว กาง เบ. โอว ตู แตห ดูอี อาโมยว เฮา โบง บลอย ตี. 44 เซ อึณ ยี มูห ดูอี ปี จึห เบ, อี แฮะ แบน หมาย เบ, อีมาย ดอน อี อี แฮะ ฮอต ซัวะ แวน ฮูน ลัะคานา อัน, อัน แฮะ ปึอน โฮม รึม โดบ เบ. 45 ดูอี อี ตัห กอย รึม โดบ เบ อาดา อู กาจัน บอ ดูอี ปี ฌาง เบ, เฆ ตู ปึอน โฮม บลอย ตี. 46 เบ มืร โลว โฮม บลอย ตี แคง กาง เบ. แกวะ โฮม นา เรต กาง. กาอาง มาบู ปี ง็อห เบ ตึอน, โอว ตู แตห เบ กาบัก. 47 เฆ ดูอี อีซาเรลัะ, เฆ บอกาเฆลียด บอ โลว โบง บลอย ตี. 48 เซ อึณ ยี มึห ดูอี อาโมยว เฮา อี กอย รึม โดบ เบ, เซ บอ อัน ซี โฮม บลอย ตี, อีมาย ดอน อี อี กอย แคง อึณโฮม อัน โลว คัม ดี ซัวะ แวน ฮูน ลัะคานา อัน ดี อาต. แฮะ ฮอต, อัน วี ปึอน ดี โฮม, แตห อัน ปี เฆ ดูอี อีซาเรลัะ ดอน อี อี มูห ดูอี อีซาเรลัะ อู ซีณ ดอ ฆึอด อัน. เซ อึณ ยี มึห อีมาย อี ตู ซัวะ แวน ฮูน ลัะคานา อัน, เบ แกวะ แตห อัน โฮม บลอย ตี ดอ เหมา. 49 เฆ ดูอี อี มูห ดูอี อีซาเรลัะ อู ซีณ ดอ ฆึอด เฆ บอ เฆ ดูอี อาโมยว เฮา อี กอย รึม โดบ เบ, เบ โลว โดบ ดารา ปาย ตี.”