Poromoripe mãe kõ mojikuwapa
4
Tapeenu katu ikõ eayvu nẽ, eremiau kõ. Uve mirà kõ, “Janejare'e 'Ãg tè emo'eoka”, e'i teywete owari rõmõ mãe kõ. Ijatyray ãwĩ rapijarerà kõ mirà kõ pyterà rupi ekoi ipi. Janejare'e ayvu mojenuarà rã'ãga kõ tè ãwĩ rapijarerà kõ. Ajawyi “aje” tapejẽ e'ã aepo e'i mãe kõ pè ipi. Tapeã'ã rã'ĩ esa. Kee tapejẽ rã'ĩ ikuwa: “Janejare'e ayvu rupi tè põkõ aepo e'i mijã? Ãjãg ayvu rupi tè põkõ?” tapejẽ ikuwa esa. 2 Tapejapyaka katu rã'ĩ ikõ jane kõ ayvu rè ikuwa ipi nẽ. Janejare'e 'Ãg tè omo'eoka mã'ẽ kee e'ità: “Janejare'e Remimuurerà tè Jesu Kiristu. Ojimojane uu jane kõ pytery pè Janerõvijã ywete rõmõ”, e'ità. 3 Ajamã'ẽ Janejare'e 'Ãg nomo'eokari mã'ẽ kee e'i: “Nojimojanei Jesu. Ojimojane maevo sõ tite janepytery pè”, e'i mã'ẽ. Kiristu ãpã tè aepo omo'eoka kõ. A'e vãea rã ojenupa jypy remeve pejẽ. A'e jane kõ pytery pè ekoipa ky'y. [A'e tè poromoripe poroereko ky'y.]4 Janejare'e pewarà tè itõkõ pejẽ, eãkarãgwerà kõ. Pepy'a pupe i'Ãg ekoi. Ajawyi poromo'e rã'ãga mãe kõ opota ipe pemoripe remẽ, Janejare'e 'Ãg napemoripeoka'ãi ijupe kõ. I'arà kõ gyty peiko, Janejare'e 'Ãg kasia rupi. A'e ywesõ ikasiay ãjãgai rõvijã wyi. 5 A'e poromo'e rã'ãga mãe kõ wekoa rupi tè oporegeta otekokuwa e'ã rõmõ ipi. Ajawyi noerovijai Janejare'e mãe kõ tè wenu katu ijayvu kõ ipi, ojevoarà tè kupa rewarà mõ. 6 Jane ãmẽ Janejare'e koty rewarà kõ rõmõ jaiko. Ijayvu rupi katu japoregeta ipi. Ajawyi Janejare'e okuwa mãe kõ tè wenu janeayvu ipi. Janejare'e noerovijai mãe kõ ãmẽ nojapyaka tari janeayvu rè jamome'u remẽ ipi. A'evoa rupi jakuwa Janejare'e 'Ãg rupi oporegeta mãe kõ, aje ywete mã'ẽ rupi oporegeta mãe kõ ipi. Ãwĩvo ve jakuwa teve ava mõ oporegeta janemoripe remẽ ipi.
“Poroauvaya jarà tè Janejare'e”, e'i mã'ẽ
7 Tapeenu katu ikõ eayvu nẽ, eremiau kõ. Kee a'e pejẽ. Tapejiauvay ojee peiko. Janejare'e tè oinõ jiaupa janeupe. Ajawyi tãwĩvo peiko, a'e tè jiauvaya oinõ ypy rewarà mõ. A'evo jaiko teãmã, Janejare'e ãkarã kõ rõmõ jaiko remẽ. Janejare'e sikuwa mãe kõ tè jane ãmẽ. 8 Noporoaui mãe kõ nokuwai Janejare'e ipi. Poroauvay mã'ẽ tè Janejare'e. A'e ywesõ poroauvay ipi. 9 Kee Janejare'e omojikuwa janerauvaya janeupe. Wa'yry wyjaveay mã'ẽ omuroka ike yvy pè janepytery pè janerereko katuarà rõmõ, ãwisõ janereko pyau nopa'ãi janewyi mã'ẽ rupi tè tijaiko ky'y. 10 Jane tè siauvay rewarà mõ rõwã Wa'yry omuu. Aje a'e tè janerauvay rewarà mõ tè omuu, tomãnõ janeupewarà mõ, janeaiwererà repykarà mõ. [Nisikuwaive Janejare'e remeve a'evo ekoi.]
11 Ajawyi kee a'e pejẽ, eremiau kõ. Ãwitõ janerauvay Janejare'e, tãwĩvo ve tijajiauvay ojee jaiko. 12 Nomã'ẽytyi ajamã'ẽ Janejare'e rè ipi. Ajamã'ẽ jajiauvay ojee jaiko remẽ, janepy'a pupe ekoi ipi. Ãwĩ vo tè ojikuwa jiauvaya janeupe ipi remẽ.
13 Jakuwa Janejare'e revejẽ jaiko. Jakuwa teve janerevejẽ ekoi. O'Ãg omuu janepy'a pupe rewarà mõ tè aepo jakuwa. 14 Ore yveve oromã'ẽ ee rewarà mõ oromojenu eewarà ipi. “Tuu Wa'yry omuu tomãnõ rã'ĩ pirujẽ jane kõ aiwererà repykarà mõ”, oro'e imojenu ipi. 15 Ajawyi ava mõ, “Janejare'e Ra'yry tè Jesu”, e'i remẽ, Janejare'e eeve ekoi ipi. Ãmõ, Janejare'e reve ekoi ipi. 16 Jakuwa janerauvaya. “Erau sipõ Janejare'e mijã?” nija'ei ãmẽ ijupe. “Aje ywete erauvay”, ja'e kõrijõ tè.
Poroauvay mã'ẽ tè Janejare'e. Ajawyi ava mõ jiauvaya rupi ekoi remẽ, Janejare'e revejẽ ãmẽ ekoi. Ivo ve Janejare'e, eevejẽ teve ekoi. [Jiauvaya rupi ojikuwa.] 17 Janejare'e poroauvayoka ojee ipi. Ãwitõ Jesu poroauvay, ãwĩvo ve jane. Ajawyi kãramõ Jesu uu mijẽ ivo mãe kõ moe'yi nivoi mãe kõ wyi remẽ, nijajimonyi'ãi ovake, [poroauvay teãmã poroereko rewarà mõ]. 18 Ava mõ jiauvaya rupi ekoi remẽ, nojimonyi Janejare'e rovake ipi. Moma'e rè nijajimonyi'ãi a'evo jaiko remẽ. Noporoau ywe'ei mã'ẽ tè ojimonyi ipi. “Emomorijau 'atà tè maevo”, e'i oupe rewarà mõ ojimonyi. Noporoau ywe'ei rewarà mõ opy'a pè aepo e'i.
19 Janejare'e ypy janerauvay. Ajawyi tè jane ivo ve jajiauvay ojee jaiko. 20 Ava mõ, “Aauvay Janejare'e”, e'i paire katu, ojikõ'õ jẽ opyriwarà Jesu koty rewarà mõ rè remẽ, iwarità tè aepo e'i. Emã'ẽ. Ojisa ijupe mã'ẽ noauive ipi. Tysi tõ nomã'ẽytyi ee mã'ẽ noau'ãi teve kupa! 21 Kee e'ipa Jesu Kiristu janeupewarà mõ: “Ava mõ wauvay Janejare'e remẽ, ikoty rewarà kõ toauvay kõ ve ipi”, e'ipa jane.