Aã kareta Janejare'e 'Ãg omotekokuwa Peturu tokusiwa mijẽ Jesu koty rewarà kõ pè maekwerà. Jesu remimo'ekwerà tè Peturu. A'e kareta okusiwa mijẽ Jesu koty rewarà kõ pè, iteetejẽ taa wãnà kõ pè upa. Kee e'i ikusiwa ijupe kõ: “Janejare'e omoe'e imojikuwaoka Wa'yry rõmõ remẽ, oromã'ẽ ee. Oroenu teve kee e'i remẽ: ‘Era'yre'e tè ãwĩ. Eremiauvay tè. Eroryvay ee mã'ẽ tè’, e'i imojikuwaoka remẽ. Ikasia renya rè tẽ tesõ oromã'ẽ, a'evo ekoi remẽ”, e'i ikusiwa (2Pe. 1.17). Peturu okuwa Janejare'e ayvu e'e rè rõwã poromo'e mãe kõ uu ipyterà kõ pè. Ajawyi kee e'i teve ikusiwa ijupe kõ: “Oiko ajamã'ẽ kee e'i mãe kõ: ‘Janejare'e ayvu oromojenutà pejẽ pemotekokuwa rõmõ’, e'i rã'ãga mãe kõ”, ejaa (2Pe. 2.1). Ãmõ, kee e'i ikusiwa: “Nojikõtevẽi Janerõvijã ywete ovãea rã rè ajamã'ẽ. Wãrõ jẽ jane kõ tojimosĩoka waiwererà kõ reitypypyipaoka ijupe kupa... Opota jane kõ pirujẽ opyri toiko karuaru iko. Nopotai jane kõ omonooka owyi”, ejaa teve (2Pe. 3.9).