“Kee Jesu koty rewarà kõ rõvijãgwerà kõ toiko ipi”, e'i mã'ẽ
5
Age'e akusiwatà imotekokuwa Jesu koty rewarà kõ rõvijãgwerà kõ pè.a Kee a'e pejẽ. Ãwitõ jõvijã kõ tè pejẽ, ãwĩvo ve ije. Ije ywete amã'ẽ Kiristu rè ojimomorijau omãnõ remẽ. Ajawyi eremisakwerà tè amojenu erokwa ipi. A'e kãramõ Jõvijã wasu rõmõ ojikuwa tarà mijẽ uu. A'evo remẽ ije ve ipyri aikotà. Ãmẽ sõsi ipyri eroryvaytà ipyriwarà rõmõ aiko ãmẽ ky'y. 2 Janejare'e pepyteporopa wãkarãgwerà kõ rerekoarà kõ rõmõ tapeiko. Ãwitõ kaneiru jarà oja'a katu weima kõ rè ipi, ãwĩvo ve tapeja'a katu Jesu koty rewarà kõ rè ipi, a'e pejẽ. Janejare'e tè pemoja'aoka ee kõ.b Ajawyi “hoõ” tapejẽ. “Apota aja'a ee kõ, a'evoa rõmõ Janejare'e tè epyteporo rewarà mõ”, tapejẽ. Kee tapejẽ e'ã: “Napotai aja'a ee kõ”, tapejẽ e'ã ipi. Kee tapejẽ: “Apota katu imokasi kõ, ãwisõ totekokuwavay Jesu rekoa rè kupa”, tapejẽ teve ipi. Karakuri rewarà mõ kõrijõ tè rõwã tapeja'a ee kõ ajamã'ẽ. 3 Ãmõ, kee a'e pejẽ. Pemotekokuwa kõ remẽ, tapejimokasi ai e'ã ee kõ ajamã'ẽ. Jõvijã aiwerà rõmõ tapeiko e'ã ee kõ. Aje, Janejare'e rekoa rupi kõrijõ tè tapeiko eeve kõ. Ãmẽ tè peja'a ee mãe kõ okuwatà manyvo Janejare'e opota tijaiko ipi. Omã'ẽ pene kupa remẽ, peneruparà rõmõ ekoità ãmẽ kupa. 4 Jesu Kiristu tè pemoja'aoka okoty rewarà kõ rè. Penõvijã ywete tè a'e. Ajawyi a'e renone ikõ tapeja'a katu ikoty rewarà kõ rè ipi nẽ, a'e pejẽ. Ãmẽ tè ovãe remẽ, ãkãnytarà ikatuay mã'ẽ ome'ẽtà pejẽ ãmẽ, pemoe'ea rõmõ. Mãerã tè iserenyny karuarutà ãmẽ neapyte 'aryvo, peja'a katu ikoty rewarà kõ rè peiko ipi rewarà mõ. [Awyjepa rã'ĩ aepo a'e jõvijãgwerà kõ pè.]5 Kee a'e teve kõnomĩokyry kõ pè. Taperovija katu ikõ penõvijãgwerà kõ ayvu ipi nẽ, a'e pejẽ.
Kee a'e teve pirujẽ pejẽ. Tapejierõarõ e'ã ikõ Jesu koty rewarà kõ reve peiko ipi nẽ, a'e pejẽ. “Ije ywesõ” tapejẽ ywe'e tite e'ã ojiupe ipi. “Emoe'e kuwasi kupa mijã”, tapejẽ e'ã teve ipi. Aje, poropãtavõa rè ywesõ tapeja'a ipi. Kee jaa Janejare'e ayvu ojikusiwapa: “Janejare'e nopotai poroapyrasa mãe kõ ipi. Ajamã'ẽ noporoapyrasai mãe kõ rè oja'a katu ipi”, e'i maekwerà.c
6 Ãmõ, kee a'e pejẽ. Janejare'e po pè kõrijõ ikõ tapejime'ẽ ipi nẽ, ikasiay rewarà mõ. Ãmẽ sõsi pemoe'età penereko ky'y. Pemoe'ea 'arà remẽ tè pemoe'età penereko ajamã'ẽ.d 7 Ãmõ, kee a'e pejẽ. Pejipy'amopirai tekoua rè ipi remẽ, a'evoa tapemome'u Janejare'e pè ipi, oja'a katu pene ipi rewarà mõ.
8 Ãmõ, tapemãrãmoa'u katu ikõ peiko ipi nẽ. Ja'ave rõwã ikõ tapeiko e'ã nẽ, peãpã tè ãjãgai rõvijã rewarà mõ. Ãwitõ jawarà ka'aporà rõvijã wata ojivy jivy wemijatarà moa'u ipi, ãwĩvo tesõ ãjãgai rõvijã pemoa'u ipi. 9 Tapejimomãatã jẽ ikõ Janejare'e rerovijaa rupi ãjãgai rõvijã wyi ipi nẽ, a'e pejẽ. Pejimomorijau peiko remẽ, kee jaa rè tapeja'a. Pejẽ rõmõ'ĩ rõwã pejimomorijau peiko ipi. Pirujẽ Jesu koty rewarà kõ ãwĩvo ekoi ipi. Ãmõ yvy yvy pewary ve ãwĩvo ekoi. Ajawyi tapejimokasi jẽ Jesu rè peiko, ãwĩvo peiko remẽ, a'e pejẽ. 10 Pejimomorijau remẽ, pejimomorijau ke'ĩatutà tè. Pejimomorijau karuaru rõwãtà ajamã'ẽ. A'evo paire Janejare'e pyri peiko karuarutà, Kiristu revejẽ peiko ky'y rewarà mõ. A'evoa rõmõ Janejare'e pepyteporopa. A'e poroereko katu okatuaya rupi ipi. Penauvay ipi. Pemokatutà pejimomorijau paire. Pemokasità tapejimomãatã jẽ penereko. 11 Jõvijã wasu e'eay rõmõ Janejare'e oiko karuaru. Õ'õ, awyje katu a'evo ekoi.
Kareta moawyjepaa
12 Aã eayvu Sirasie pè akusiwaoka peupewarà mõ maekwerà. Eretãrã vo ywete Sirasi, Jesu koty rewarà rõmõ. Temirovija ywete rõmõ ekoi. Aã eremikusiwarerà amonotà pejẽ pemotekokuwaa rõmõ. Kee a'e teve pejẽ: Penereko katua rupi pekuwa aje ywete Janejare'e poroereko katu ipi, a'e pejẽ. Penaua rupi ikõ tapejimokasi jẽ pejimomãatã ipi nẽ, a'e pejẽ.
13 Janejare'e remipyteporokwerà kõ Papironif taa wãnà kõ opota ojimory pene eremikusiwarerà rupi. Era'yry vo mã'ẽ ve opota ojimory pene eremikusiwarerà rupi, Maku eu ijupe mã'ẽ.g 14 Tapejimory katu ikõ ojee ipi nẽ, Jesu koty rewarà kõ rõmõ. A'evo tapeiko jẽ peiko ipi.
Janejare'e tapepy'amopiryvypy katu ikõ penereko ipi nẽ, Kiristu revejẽ peiko mãe kõ rõmõ.