Kiristu rè jajirovija mãe kõ rõmõ jajimomorijau remẽ, nivoi jaiko mã'ẽ rè nijaja'a'ãi ãmẽ ipi. 2 Ajawyi awyje Janejare'e remimota rupi katu tapeiko ky'y, a'e pejẽ. Penemimotarà rupi rõwã tapeiko ky'y. Janejare'e noerovijai mãe kõ remimotarà rupi rõwã teve tapeiko. 3 A'e kõ vo ywete itõkõ peiko mijã, Janejare'e napekuwaive remẽ. Peporai remẽ itõkõ peka'uay wete ipi mijã. Peka'u py'y py'yi peiko ipi mijã. Ãmõ itõkõ, pejimomy'aa rè ywesõ peja'a ipi mijã, penemimota ai rupi peiko rewarà mõ. Pepararakai tè peiko ipi mijã. Ãmõ, penemimoãtãgwerà kõ pemoe'e rã'ãga pejarà rõmõ ipi mijã. A'evo pejimojaiweray tesõ peiko ipi mijã. Na'evoi peiko ky'y. Janejare'e remimota rupi katu tè peiko ky'y. 4 Ajawyi Janejare'e noerovijai mãe kõ omã'ẽ pene remẽ, kee e'i kupa: “Manyvore sipõ janevo rõwã ekoi kupa ky'y?” e'i kupa. “Janevo kuwasi ekoi kupa mijã”, e'i penewarà mõ kupa. Ajawyi penojai tè kupa ky'y. 5 Kãramõ aepo e'i mãe kõ ojimome'utà Janejare'e rovake, poromoe'yi remẽ. A'e 'arà mẽ pirujẽ mirà kõ ojimome'utà ovake. Nokãjãive mãe kõ. Ãmõ, okãjãma mãe kõ ve. 6 Ãwĩvotà jaiko rewarà mõ Janejare'e ayvu e'eay Jesu rewarà ojenupa omãnõ maekwerà kõ pè. Ipirà kõ omãnõ ijaiwererà repy rõmõ. Pirujẽ mirà kõ a'evo omãnõ ipi. Ajamã'ẽ Janejare'e opota a'e kõ opyri toiko karuaru. Ajawyi wayvu e'eay omojenuokapa ijupe kõ, ãwisõ tojirovija ee kupa ky'y.

7 Ke'ĩ pirujẽ oiko mãe kõ opatà. Ajawyi tapejireko katu jẽ Janejare'e rovake peiko ipi. Ja'ave rõwã jaiko remẽ, nijaporegetai sõ ijupe ipi. Ajawyi ja'ave rõwã tapeiko e'ã ipi. 8 Tapejiauvay peiko, a'e pejẽ. Ta'evoay peiko. Aje poroauvay peiko remẽ, napeja'a'ãi nivoi penereko maekwerà rè ãmẽ ky'y. “Awyjepa” pejẽtà pemoaiarerà kõ pè ãmẽ ipi.^a

9 Ãmõ, kee a'e pejẽ. Pevoarà kõ ovãe pepyri ipi remẽ ikõ tapemomyta pepyri ipi nẽ. Kee tapejẽ e'ã: “Napotai opyta epyri”, tapejẽ e'ã ikõ nẽ. 10 Janejare'e janereinõ iteetejẽ ãmõ ãmõ rupi tè tijaiko. Ajawyi iteetejẽ janeremikuwa kõ ome'ẽ janeupe okatuaya rupi, ãwisõ tijajimokasi ojeevejẽ jajipãtavõ. Ajawyi kee a'e pejẽ. Penemikuwa rupi tè toporopãtavõ peiko ipi, pejãvijõ jẽ. A'evo peiko remẽ, Janejare'e orytà pene ãmẽ. 11 Ma'e. Ayvu mojenuarà rõmõ peiko remẽ, ãmẽ si Janejare'e ayvu tè tapemojenu erokwa ipi. Poropãtavõarà rõmõ peiko remẽ, Janejare'e kasia rupi tè a'evotà peiko ipi. Ãmẽ a'e a'evo peikoa rè omã'ẽ mãe kõ omoe'età Janejare'e penewarà mõ ãmẽ. Kee e'ità ãmẽ kupa: “Haa! Ene ywesõ nekatuay wete, Janejare'e”, e'ità ijupe imoe'e Jesu Kiristu koty rewarà kõ rewarà mõ kupa. A'e ywesõ ikasiay wete mã'ẽ rõmõ ekoi ipi! A'e ywesõ ikatuay wete mã'ẽ rõmõ ekoi teve ipi! Oiko karuarutà Jõvijã wasu rõmõ iko! Õ'õ, awyje katu ãwĩvo jamoe'e karuaru jaiko ipi.

12 Kee a'e jẽ pejẽ, eremiau kõ. Pejimomorijauvay remẽ ikõ tapejiapy'a e'ã ipi nẽ. Kee tapejẽ e'ã: “Manyvore sipõ?” tapejẽ e'ã teve. Pejimomorijau ipe remẽ, tapejimokasi jẽ Janejare'e rè pejirovija. Ãmẽ si pejikuwatà Jesu koty rewarà e'e kõ rõmõ peiko ky'y. Ajawyi tapejiapy'a e'ã, a'e pejẽ. 13 Tapenory katu kõrijõ Jesu reruparà mõ peiko, pejimomorijau ipe remẽ. Ãwitõ Kiristu ojimomorijauvay, a'evo ve pejẽ peiko. Ajawyi tapenory katu jẽ peiko, a'e pejẽ. Ãmẽ sõsi penoryvay wetetà kãramõ, Jõvijã wasu rõmõ ojikuwa uu mijẽ remẽ. 14 Ava mõ sõ penereko ai Kiristu rewarà mõ remẽ, “aje ipõ” tapejẽ ywe'e tite e'ã ijupe kõ. Tapenory katu jẽ peiko ãmẽ, Janejare'e 'Ãg ikasiay mã'ẽ tè penevejẽ ekoi rewarà mõ. 15 Ajamã'ẽ pejimomorijau remẽ, napotai nivoi peiko rewarà mõ pejimomorijau. Ma'e. Porojuka peiko rewarà mõ. Ãmõ, pemona peiko rewarà mõ. Ãmõ, mirai mõ peiko rewarà mõ. Ãmõ, poromovyvyrai teywete poroereko rewarà mõ. Wãi wãisõ iteetejẽ rewarà mõ rõwã tapejimomorijau peiko. Ãwĩ rapijarerà ojimosĩoka kuwa iko ãmẽ. Ojimomorijau teve kuwa iko ãmẽ. 16 Ajamã'ẽ Kiristu koty rewarà rõmõ sõ pejimomorijau remẽ, tapejimosĩoka e'ã pejimomorijaua rè ãmẽ. Janejare'e kõrijõ tapemoe'e peiko. A'evo peiko remẽ pejikuwatà ikoty rewarà e'e kõ rõmõ.

17 Ãmõ, kee a'e pejẽ. Ke'ĩma poromoe'yiarà ovãe iko. A'evo remẽ Janejare'e pirujẽ mirà kõ omosã'ãgatà ãmẽ. Okoty rewarà kõ ypy omosã'ãgatà. Jane ypy. Tysi tõ ijayvu e'eay noerovijai mãe kõ pè ipojytà tè, omosã'ãga kõ remẽ. 18 Kee jaa ojikusiwapa Janejare'e ayvu rõmõ:

19 Ajawyi kee a'e pejẽ, pemokasia rõmõ. Pejimomorijau Janejare'e remimota rupi remẽ, ivo tapeiko jẽ. Tapejime'ẽ peneinõgarerà po pè ãmẽ, a'e noity'ãi 'eteay okoty rewarà kõ ipi rewarà mõ. Wereko katu kõ wayvu rupi katu ereko kõ ipi.