Ojireko mãe kõ rewarà
3
Imẽma mãe kõ, kee a'e pejẽ. Ikatuay ikõ pemẽnà pereko ipi nẽ, penerekoarà rõmõ, pe'arà kytywarà rõmõ. Janejare'e ayvu rupi sõ noikoive pemẽnà remẽ, ikatuay jẽ ãmẽ pereko. Ivo katuay peiko eeve remẽ, nevo ve Janejare'e rè ojirovijatà maevo kãramõ. Neporegetaa rupi rõwã a'evotà ekoi. Ivo katuay peiko mã'ẽ rupi tè.a 2 Kee e'ità peupewarà mõ ãmẽ: “Wãivĩ e'eay tè ererekwarà ipi. Ivo katuay ereve ekoi ipi. Janejare'e rè ojirovija rewarà mõ a'evo ererekwarà. Tãwĩvo ve ije ãmẽ aiko”, e'ità ãmẽ pejẽ. 3 Uve wãivĩ mõ opirà rova'arà mogãtarõa rè ywesõ oja'a mã'ẽ. Ajawyi wapira mõjãa rè ywesõ oja'a ipi. Ãmõ, opo'yry rè ywesõ oja'a. Ãmõ, oyru katuay mã'ẽ rè ywesõ oja'a. A'e kõ vo rõwã tapeiko.b 4 Ke'ĩatu tè mã'ẽ rõwã a'e ãmẽ. Ikatusa rupi tapeiko. Pepy'a katua rupi tapeiko. Mãerã tè a'evo tapeiko. Ãwĩvo peiko remẽ tè Janejare'e orytà pene iko. A'evo jaiko mã'ẽ ywesõ opota Janejare'e ipi.5 A'evo wãivĩgwerà karamoe remẽwarà kõ, Janejare'e rè ojirovija katu mãe kõ. A'e kõ ivo katuay omẽnà kõ reve ekoi ipi. Ivo katuay wete mijẽsi ekoi kupa. 6 Tãmõ Aparão rerekwarà amyry a'evo ekoi, sa'i Sara eu erà pè mã'ẽ.c “Erõvijã” e'i omẽnà pè ipi. A'e reruparà mõ peikotà, ivo peiko remẽ. Ãmõ, napejirokyjei remẽ tè eruparà mõ peikotà. [Aepo a'e kõrijõ eayvukasia rõmõ, imẽma mãe kõ pè.]
7 Ãmõ, erekwapa mãe kõ pè kee a'e teve. Ikatu ikõ penerekwarà kõ pereko ipi nẽ, a'e pejẽ. Tapeja'a katu ikõ ee kõ ipi nẽ, pejẽ ywesõ pekasi iwyi kõ rewarà mõ. Taperõarõ e'ã ikõ penerekwarà kõ ereko nẽ. Janejare'e remipyteporokwerà kõ teve penerekwarà kõ. Ãwitõ emipyteporokwerà kõ tè pejẽ, ipyri peiko karuaru mãe rã kõ rõmõ, ãwĩvo ve penerekwarà kõ. Ajawyi nivo'ãi perõarõ kõ remẽ. Nivoi pereko kõ remẽ, Janejare'e nojapyaka'ãi peayvu rè ãmẽ, peporanu ijupe remẽ. [Aepo a'e eayvukasia rõmõ, erekwapa mãe kõ pè.]d
Ivo tekoua rewarà
8 Kee a'e pirujẽ pejẽ. Jesu py'a rupi katuwarà rõmõ tapeiko, pe'ĩypyte rõmõ, a'e pejẽ. Ava mõ ijãgyo remẽ, peporijauesa ikõ ãmẽ ipi nẽ. Ory remẽ, ivo ve penoryvay ikõ ee peiko nẽ. Pejiauvay ikõ peiko nẽ, Jesu koty rewarà kõ rõmõ. Ojimomorijau mãe kõ peporijauesa ve ereko ipi. “Ije ywesõ”, tapejẽ tite e'ã poroerõarõ ipi. 9 Ava mõ sõ pemojaiwe penereko remẽ, tapeovaja e'ã. Ijayvu ai sõ pejẽ remẽ, tapeovaja e'ã ikõ ãmẽ nẽ. Kee tapejẽ kõrijõ ijupewarà mõ: “Hoõ, Janejare'e toereko katu kõ, owaray toiko kupa”, tapejẽ kõrijõ ãmẽ. A'evo Janejare'e opota tapeiko ipi. A'evo peiko remẽ, owaray penerekotà. 10 Kee jaa ojikusiwapa Janejare'e ayvu rõmõ:
“Pepota penory peiko remẽ, kee tapeiko ipi.
Tapeporegeta teitete e'ã ikõ peiko ipi nẽ. Tapewari e'ã teve ikõ peiko ipi nẽ.
11 Tapejimosãtãmy ikõ nivoi mãe kõ wyi peiko ipi nẽ.
Ivo katu ikõ tapeiko mirà kõ rerekoarà rõmõ peiko nẽ.
Mirà kõ py'amopiryvypy katua rè ikõ tapeposiko ipi nẽ.
12 Ivo ekoi mãe kõ rè Janerõvijã ywete oja'a iko ipi.
A'e kõ oja'o ojiporijauesaoka ijupe remẽ, ojapyaka ãmẽ ee kõ iko ipi.
Nivoi mãe kõ rè ãmẽ nojapyakai ipi.
Ojirova kõrijõ iwyi kõ ipi”, e'i maekwerà.e
Kiristu koty rewarà kõ rõmõ jajimomorijaua rewarà
13 Pejimokasiay ivoa rupi peiko remẽ, ava mõ napemojaiwe'ãi penereko. 14 Ajamã'ẽ ivoa rupi peiko rewarà mõ sõ pemomorijau ipe kupa remẽ, Janejare'e owaray penereko jẽtà ãmẽ. Ajawyi tapekyje e'ã ikõ pemomorijauarerà kõ wyi peiko ipi nẽ. Tapejimonyi e'ã ikõ iwyi kõ peiko ãmẽ nẽ.f 15 Aje ywete Jesu Kiristu ywesõ ikõ tapemomojy Penõvijã ywete rõmõ ipi nẽ, pepy'a pupe ve. Kee a'e teve pejẽ. Tapetekokuwavay amãtejẽ peayvu rã rè kee e'i pejẽ kupa remẽ: “Manyvore põ Kiristu rè nejirovija ywete?” e'i oporanu pejẽ kupa remẽ. Tapemotekokuwa kõ ikõ peiko ãmẽ nẽ. Ikatusa rupi ikõ tapemotekokuwa kõ ereko nẽ. Taperõarõ kõ e'ã ikõ pemotekokuwa kõ remẽ ereko nẽ.g 16 Ãmõ, tapejireko katu amãtejẽ ikõ ivo tekoua rupi peiko ipi nẽ. Ãmẽ tè kee napejẽ tite'ãi: “Nivoi sipõkõ aiko mijã!” napejẽ tite'ãi. Ãwĩvo peiko remẽ si, peãpã kõ oporegeta teitete sikaepo pene remẽ, ovote ojimosĩoka ywetetà owariawerà rè kupa, ivo peikoa ojikuwatà ijupe kõ rewarà mõ. 17 Pemomorijau ipe kupa remẽ, Janejare'e pemoe'e jẽtà penereko, emimota rupi tè sikaepo a'evo peiko remẽ. Nivoi peiko rewarà mõ rõwã pemomorijau kupa. Ajawyi tapejimosĩoka e'ã a'evoa rè peiko. Nivoi peiko remẽ tè kuwa pejimosĩoka kuwa peiko. 18 Emã'ẽ.
Kiristu ywe'e ipe ojimomorijau omãnõ.
Pirujẽ janeaiwererà repykarà mõ omãnõ.
Ãwĩvo ivo katu mã'ẽ pe'ĩ'yte omãnõ nivoi mãe kõ pewarà mõ.
A'evo penerojivyrĩ Janejare'e kyty, mãerã tè rõmõ tapeiko.
A'evo ojuka Jesu kupa remẽ, ipirà omãnõ.
Ajaire Janejare'e 'Ãg omomoera mijẽ remẽ, i'ãg omojivyrĩ mijẽ imoige eãgwerà pupe imomoera.
A'e sõsi nomãnõ'ãi mã'ẽ rõmõ opoera iko ky'y.
19 Omãnõ remẽ Kiristu oo taywerà kõ mogeta, jimopã'ãga pè tui kupa remẽ. 20 Karamoe remẽwarà kõ raywerà kõ omogeta, Janejare'e ayvu noerovijai maekwerà kõ raywerà kõ. Karamoe remẽ tãmõ Noe ekoi remẽ itõkõ Janejare'e wãrõ puku ipe tojirova weko aiwerà kyty wyi kupa mijã. Nawiu Noe oinõ upa remẽ, wãrõ puku jẽ. Ojinõma remẽ, ijayvu werovija mãe kõ kõrijõ tè oike ipupe. Nijatyi kupa. Kejõ. 8 rõmõ kõrijõ tè oike kupa.h A'e kõ kõrijõ tè opyta, yy poru ãmõ kõ weroikepa remẽ. 21 Aekwerà rè jaja'a remẽ, janejãmorĩa rè jaja'a ve. Jajimojãmorĩoka remẽ, janepirà ky'a'oa rõmõ rõwã a'evoa. Aje ywete, janepy'a kyty wyi, kee ja'e Janejare'e pè: “Neupewarà rõmõ aikotà”, ja'e. A'evo ekoi mã'ẽ kee e'i kuwa: “Awyje Janejare'e pewarà mõ taiko”, e'i kuwa. Ajawyi janemoigooka karuarutà opyri. Jesu Kiristu opoera mãnõa wyi rewarà mõ a'evo janererekotà opyri ky'y. 22 A'e itõkõ oẽma oo yva kyty, Janejare'e rena kyty. Uu pyri tè ekoi ky'y, Jõvijã wasu rõmõ. Yvapewarà kõ 'arà kyty ekoi. Ãmõ, ija mãe kõ 'arà kyty ekoi teve. Pirujẽ ikasiay mãe kõ 'arà kyty ekoi, nomã'ẽytyi ee mãe kõ 'arà kyty. Ãwĩ ãwĩ kõ nikasi ovake.i