“Jesu ywesõ ikatuay wete Janerõvijã ywete rõmõ ekoi ipi”, e'i mã'ẽ
2
Janejare'e ãkarãgwerà kõ rõmõ tè pejẽ peiko. Ajawyi kee tapeiko ãmẽ. Pirujẽ nivoi tekoua tapeitypypyipa. Waria. Ivoa rã'ãga. Jimõarõa. Koivo kõ rè moregeta teitete ai. Wãisõ ajaate oo. 2 Janejare'e ayvu rè kõrijõ tè ikõ tapeja'a katu peiko ipi ky'y nẽ. Ãwitõ janesakyrĩ remẽ janey susury e'eay rè ywesõ jaja'a jaiko ipi, a'evo ve Janejare'e ayvu rè ywesõ tapeja'a peiko ky'y. A'e rupi pejimotekokuwapatà Janejare'e rekoa rè ãmẽ peiko ky'y. 3 Janerõvijã ywete reko katua peã'ãma esa.a Aje ywete pekuwapa ikatuaya.“Takuru ikatuay mã'ẽ vo 'ejẽ Jesu ekoi”, e'i mã'ẽ
4 Pejo ikoty ãmẽ, Penõvijã ywete tè a'e rewarà mõ. Agyvo Janerõvijã ywete. Ãwitõ takuru kõ nomãnõi mã'ẽ tè, a'evo ve nomãnõi mã'ẽ tè ekoi. Ãwitõ takuru tetã rõmõ jainõ remẽ, takuru ikatuay mã'ẽ tè japyteporo inõ ipi. Nikatui mã'ẽ ãmẽ nijaraai. Ãwĩvo ve Janejare'e ikatuay wete mã'ẽ wesa imuu Janerõvijã ywete rõmõ toiko. A'evo ipe remẽ, nivoi mãe kõ nopotai oõvijã rõmõ toiko. “Nikatui” e'i ywe'e tite ijupewarà mõ kupa. Janejare'e ãmẽ kee e'i: “A'e ywesõ ikatuay wete”, e'i ijupewarà mõ. Ajawyi a'e Janejare'e omuu Janerõvijã ywete rõmõ toiko. 5 Pejirovija Jesu Kiristu rè remẽ, Janejare'e oja'atà pene ãmẽ. Pe'ĩypyte mã'ẽ rõmõ janereinõ janerereko, o'Ãg rena rõmõ tijaiko. Agyvo jaiko Jesu Kiristu remipyteporokwerà kõ rõmõ jaiko. Jamoe'eoka Janejare'e jane kõ pè jaiko ipi. Japoregeta teve ijupe jane kõ pewarà mõ jaiko ipi. A'evo jaiko remẽ, Janejare'e oryvaytà janere iko ãmẽ ipi. Ajawyi a'evo ikõ tapeiko ãmẽ nẽ, a'e pejẽ.
6 Janerõvijã ywete pewarà mõ kee ojikusiwapa amãtejẽ Janejare'e ayvu rõmõ karamoe remẽ:
“[Aesapa mirà kõ Rõvijã ywete, a'e ywesõ ikatuay wete mã'ẽ.]
Ãwitõ tetã reinõgarà kõ takuru tetã oinõtà remẽ,
takuru ikatuay mã'ẽ ypy wesa tetã momãatãa rõmõ.
A'evo ve ikatuay wete mã'ẽ aesapa mirà kõ Rõvijã ywete rõmõ toiko.
A'e erena Jerusarẽ taa pè ekoità, Sião yvytyry pè ekoità.
Ava mõ sõ ojirovija ee oõvijã rõmõ remẽ,
nojirovija pãnẽ'ãi ãmẽ ee”, e'i maekwerà.b
7 Aje, Jesu rè ojirovija mãe kõ tè pejẽ ky'y. Ajawyi epy wete mã'ẽ rõmõ tè Jesu pejẽ. Na'evoi nojirovijari ee mãe kõ. A'e kõ pewarà mõ kee jaa ojikusiwapa amãtejẽ:
“‘Aã takuru nikatui’! e'i ywe'e tite tetã reinõgarà kõ oinõ ypy takuru tetã rõmõ remẽ.
A'e takuru ywesõ sikaepo ikatuay wete mã'ẽ tetã momãatãa rõmõ”, e'i maekwerà.c
A'evo ve Jesu ywesõ sikaepo ikatuay wete mã'ẽ Janerõvijã ywete rõmõ ekoi. 8 Kee e'i teve Janejare'e ikusiwaoka amãtejẽ Jesu pewarà mõ: “Jajipyãkãmota mã'ẽ vo 'ejẽtà tè a'e takuru”, e'i.d Jesu ayvu noerovija tari mãe rã kõ pewarà mõ tè aepo e'i amãtejẽ, ojimoape kõrijõ Janejare'e ayvu renu tare'ã mãe rã kõ pewarà mõ. A'e kõ Janejare'e remiemavo kõ rõmõtà ekoi, noerovija tari ijayvukwerà rewarà mõ.
9 Pejẽ ãmẽ Janejare'e remipyteporokwerà kõ rõmõ peiko ky'y, pe'ĩypyte mã'ẽ rõmõ. Oupe oporanu mãe kõ rõmõ peneinõ. Okoty rewarà kõ rõmõ penereko ãmẽ, eruparà mõ tapeiko, ijupewarà kõ rõmõ tapeiko. Pãtõnusu rupi wata mã'ẽ vo 'ejẽ tè pejẽ peiko mijã. Ajamã'ẽ pemoẽ okoty, aryvo rupi wata mãe kõ vo 'ejẽ tapeiko ky'y, ãwisõ ekoa ikatuay wete mã'ẽ tapemojenu erokwa.e 10 Emiporijauesa kõ rõwã pejẽ mijã. Ikoty rewarà kõ rõwã teve pejẽ mijã. Age'e okoty rewarà kõ rõmõ penekyipa penereko ky'y. Wemiporijauesa kõ rõmõ teve penereko ky'y.f
“Janejare'e rekoa rupi katu ikõ tapeiko ipi nẽ”, e'i mã'ẽ
11 Tapejapyaka katu ikõ eayvukasia rè nẽ, ejimorypa eremiau kõ. Napenenai mãe kõ rõmõ tè pejẽ ike yvy pè peiko, Janejare'e rena tè penena e'e rewarà mõ. Ajawyi ikõ peneko aiwerà rupi tapeiko e'ã peiko ipi nẽ, a'e pejẽ. Upi sõ peiko tite remẽ, ipojytà pejẽ ãmẽ ky'y. Napeja'a'ãi Janejare'e rè ãmẽ peiko ky'y. Napeiko'ãi teve Jesu reve ãmẽ peiko. 12 Ivoe'e mã'ẽ rõmõ ikõ tapejikuwa jane kõ rovake peiko ipi nẽ, Janejare'e nokuwai mãe kõ rovake. Nivoi mã'ẽ omo'y jẽ tarepe maevo pene kupa. Ajamã'ẽ ava noerovija'ãi ijayvu ai kõ penewarà mõ, ivo peikoa ojikuwapa rewarà mõ. “Ivo ekoi kupa”, e'i kõrijõtà pene omãjã ãmẽ kupa ky'y. Maevo aepo e'i maekwerà kõ ve ojirovijatà Janejare'e rè ajaire penewarà mõ. Ajawyi Janejare'e uu mijẽ poromoe'yi remẽ, a'e kõ omoe'età Janejare'e penewarà mõ ky'y, ovake ywete.
“Jõvijãgwerà kõ tapemomojy ipi”, e'i mã'ẽ
13 Janerõvijã ywete opota ivo jaiko ipi. Ajawyi ikõ tapemomojy penõvijãgwerà kõ ipi nẽ, a'e pejẽ. Jõvijã wasu kõ ywesõ tapemomojy ikõ ipi nẽ, a'e ywesõ mirà kõ wyi ijayvukasi mã'ẽ rewarà mõ. 14 Kovenatu kõ ve tapemomojy peiko, jõvijã wasu tè opyteporo kõ nivoi mãe kõ momorijauarà kõ rõmõ toiko kupa rewarà mõ. Ivo mãe kõ moe'earà rõmõ teve opyteporo kõ toiko kupa. Ajawyi a'e kõ ikõ tapemomojy peiko ipi nẽ, a'e pejẽ. 15 Janejare'e opota a'evo tijaiko ipi. A'evo jaiko remẽ tè, e'i teywete mãe kõ manyvo ne'i'ãi nivoi mã'ẽ mo'y janere ipi. 16 Ãmõ, kee a'e pejẽ. Ãwitõ jõvijã ãkarãgwerà kõ wemimotarà rupi tè ekoi ipi. Ovote ojireko iko kupa ipi. A'evo ve jajireko tè jaiko, Jesu koty rewarà kõ rõmõ. Ajamã'ẽ kee tapejẽ tite e'ã: “Nimanyvoi nivoi aiko remẽ”, tapejẽ tite e'ã ikõ peiko nẽ, Janejare'e remĩgwai kõ rõmõ tè pejẽ peiko rewarà mõ. Ajawyi oterẽ jẽ emimota rõmõ tè peiko. 17 Pirujẽ mirà kõ ikatuay tapereko ereko ipi. Janevoarà kõ tapeauvay Jesu koty rewarà kõ rõmõ peiko. Ãmõ, Janejare'e tapemomojy wete teve peiko. Ãmõ, jõvijã wasu yvy pewarà tapemoe'e teve peiko. A'evo tapeiko ipi ãmẽ.
18 Temĩgwai kõ, kee a'e pejẽ. Taperovija katu ikõ penõvijã kõ peiko ipi nẽ. Tapemomojy kõ teve peiko ipi. Ikatu peupe mãe kõ kõrijõ tè rõwã ikõ tapemomojy ipi nẽ. Oja'a katu pene mãe kõ kõrijõ tè rõwã teve. Penõvijã nikatui mã'ẽ tapemomojy jẽ teve peiko ipi. 19 Kee tapejẽ: “Janejare'e remimota rupi aikotà”, tapejẽ ipi. Ãmõ kõ sõ pemomorijau remẽ, tapejimoane'e jẽ ivo peikoa rè peiko ipi. Pekuwa Janejare'e opota a'evo tijaiko mã'ẽ. Ivo peiko penereko ai epe kupa remẽ, Janejare'e tè penereko katutà okatuaya rupi ãmẽ. Orytà pene iko ãmẽ. 20 Nivoi ekoi mã'ẽ jamomorijau teãmã ipi. Nojikõ'õi omomorijaua rè remẽ, “Nivoi mã'ẽ tè ene”, taoty jẽ ijupe. Nijamoane'e jẽ'ãi apijarà. Ajamã'ẽ ivo peikoa rewarà mõ sõ pemomorijau ipe kupa remẽ, tapejikõ'õ e'ã ee peiko. A'evo peiko remẽ, aje Janejare'e tè pemoe'età penereko.
“Tijajipy'amogeta Jesu Kiristu ojimomorijau omãnõ maekwerà rè”, e'i mã'ẽ
21 Kiristu kõrijõ tè ivo ekoi mã'ẽ. Emã'ẽ. Ojimomorijau jẽ tesõ penekovijarerà rõmõ omãnõ. A'evo ojisaoka pejẽ, manyvo tapeiko pejimomorijau remẽ. Eruparà rõmõ tapeiko ãmẽ. A'evoa rõmõ Janejare'e pepyteporo, Kiristu reruparà mõ tapeiko. 22 Nuvei 'ete Kiristu aiwererà mõ ee. Aje ywete mã'ẽ rè kõrijõ tè oporegeta ipi.g 23 Temimojaiwe rõmõ ipe wereko kupa remẽ, noovaja kõi. A'evo ve omomorijau kupa remẽ, “Ajipytà pene”, ne'i. Noovaja kõi. Nipui kõrijõ ijupe kõ. Janejare'e rè kõrijõ tè ojirovija opãtavõarà rõmõ, a'e ivo katu tè poromosã'ãga ipi rewarà mõ.h 24 Ipowyi tesõ janeaiwererà janere mijã. Ajamã'ẽ Jesu wekyipa janewyi ky'y. A'e repy rõmõ omãnõ yvyra jipokana rè. Janerekovijarerà rõmõ omãnõ, ãwisõ janeaiwererà tikasi e'ã janere ky'y. Ãwisõ ivoa rupi kõrijõ tè tijaiko teve. Ojimomorijaua rupi janerereko katupa ãmẽ ky'y, ayay tesõ ijupe mã'ẽ rupi. 25 Ãwitõ kaneiru kõ oo tite wemimotarà rupi oopa rõmõ, a'evo ve penemimota aiwerà rupi peiko tite remẽ mijã. Age'e pejivypa Jesu kyty peiko ky'y, pene oja'a katu mã'ẽ kyty.i