Aã kareta akusiwa pejẽ ajupa, Janejare'e koty rewarà kõ rõmõ. Akuwa jimomorijau wasua rewarà mõ pejisyry penena kõ pe wyi pejimosãsãi peo. Ajaate kejõ yvy kõ pè peiko ky'y. Põtu yvy pè, Karasia yvy pè, Kapatosi yvy pè, Asia yvy pè, Pitijã yvy pè. A'e a'e yvy kõ pè peiko ky'y, napenenai mãe kõ rõmõ. Kee a'e ikusiwa pejẽ:

2 Janejare'e pepyteporopa oupewarà kõ rõmõ tapeiko ky'y. Ajawyi pemowaite wekoa rupi rõmõ'ĩte penereko, o'Ãg kasia rupi, ãwisõ Jesu Kiristu taperovija katu. Ãwisõ Jesu mãnõa rupi pepy'aky'a'opa mãe kõ rõmõ tapeiko teve. A'evoa rõmõ Janejare'e pepyteporopa amãtejẽ karamoeve wemikuwa rupi.

Janejare'e ikõ tapenereko katu okatuaya rupi nẽ. Tapepy'amopiryvypy katu teve ikõ penereko nẽ. Age'e ywesõ ta'evo penereko.

3 Janejare'e simoe'e ipi, Janerõvijã Jesu Kiristu Ruu. A'e tè janeporijauesaa rupi janepy'amotee janerereko ipi. Kee janerereko. Jesu Kiristu omãnõ janerekovijarerà rõmõ. Ajaire Janejare'e omomoera omãnõ mãe kõ pytery pe wyi imopõ'ã mijẽ. Oiko mijẽ iko ky'y. Ipoeraa rupi Janejare'e janeiko karuarua rã ome'ẽ jane ky'y. Kee e'ipa jane: “Poroereko karuarutà epyri Jesu rewarà mõ”, e'ipa jane. Ajawyi sikuwa aje ywete a'evotà jaiko mã'ẽ.

4 Aje, janerereko katua rã simoa'u jaiko. Janeupewarà wemime'ẽ kõ omokatupa amãtejẽ wena pè janerenone. Awyje nopa'ãi mã'ẽ tè emime'ẽ rã. Ãmõ, nijupa'ãi mã'ẽ teve emime'ẽ rã.^a 5 Janejare'e janerereko jẽtà okasia rupi janerereko ipi, jajirovija ee remẽ. Janerereko jẽtà, ajaate janerereko katua omojikuwaokatà janeupe, janereraa wena pè tijaiko karuaru opyri.

6 A'evoa rã rè tapenory jẽ peiko ipi. Akuwa age'e pejimomorijau rã'ĩte peiko. Wãisõ pejimomorijaua kõ. Peãgyo rã'ĩte ãwijã rè peiko. Ajamã'ẽ a'evo ipe peiko remẽ, tapejimokasi jẽ peiko ãmẽ, a'e pejẽ. 7 Pejimomorijaua rupi Jesu rè pejirovija jẽ peiko remẽ, pejikuwatà Jesu rè pejirovija e'e mãe kõ rõmõ peiko.

Yvy karakuri rè tè poromosã'ãgatà tapekuwa sa'u. Jesu rè ojirovija e'e mãe kõ yvy karakuri e'e vo. Yvy karakuri jaapy tata pupe remẽ, ojiky'a'opa katu ipi. Iky'akwerà kõrijõ tè ojityku tata rè. Karakuri ãmẽ nojitykui. Ãmẽ ywesõ ikatuay wetetà. A'evo ve jajimomorijau remẽ, jajikuwa Jesu Kiristu rè jajirovija e'e mãe kõ rõmõ. Karakuri wyi wete epy wete mã'ẽ vo Jesu Kiristu rè jirovijaa. Karakuri jaapy paire, opa jẽ kuwa. A'evo rõwã jane, jajirovija e'e Jesu rè remẽ. Ajawyi kãramõ Jesu owyjy mijẽ uu ojikuwa remẽ, kee e'ità Janejare'e peupewarà mõ: “Haa! Ere ojirovija e'e mãe kõ tè ãwĩ kõ. Ojimomorijau tesõ kupa remẽ, opyta jẽ tesõ ereve iko kupa. Ajawyi areko karuaru kõtà epyri!” e'ità peupewarà mõ. Ãmẽ sõsi tekou katua opyri ome'ẽtà pejẽ ky'y.

8 Aje, peauvay Jesu ereko ipi, ãwisõ napemã'ẽi 'ete ipe ee remẽ. Pejirovija ywete teve ee peiko ipi. Ajawyi penoryvay ee peiko ipi. Manyvo napereko'ãi penorya imomewapa ky'y. 9 Janejare'e penereko katu peaiwererà wyi penereko ipi, aje pejirovija Jesu Kiristu rè remẽ. Ajawyi tè penoryvay ee peiko ky'y.

10 Karamoe remeve Janejare'e omojikuwaoka sa'u janerereko katua rã wayvu mojenuarà kõ pè, ãwisõ tomojenu amãtejẽ kupa. Penereko katua rã omojenu amãtejẽ ãmẽ kupa. Nokuwa katui epe wemimojenua kupa, manyvo jaa teipõ. Ojipy'amogeta wete ipe ee ãmẽ kupa. Kee e'i epe oupe ãmẽ kupa: “Manyvotà põ mirà kõ rereko katua rã?” e'i oupe ãmẽ kupa. 11 “Janejare'e Remimuurerà ojimomorijautà omãnõ”, e'i imojenu kupa. “Ajaire Janejare'e omomoeratà. Ãmẽ sõsi Jõvijã wasu rõmõ omojikuwaokatà ky'y”, e'i imojenu kupa. Kiristu 'Ãg tè ãwĩvoa omojikuwaoka ijupe kõ tomojenu kupa. Wemimojenua rè ojipy'amogeta wete jẽ ipe kupa. “Manyvotà sipõ ãwĩvoa?” e'i ikuwa e'ã kupa. “Manyvo remẽ teve põ ãwĩvotà?” e'i oupe kupa.

12 A'evoa rã rè Janejare'e 'Ãg omotekokuwa kõ amãtejẽ remẽ, kee e'i ijupe kõ: “Kãramõ penenawery pè tè a'evotà”, e'i. Janeupewarà mõ a'evoa omojikuwaoka ijupe kõ tomojenu kupa. Aekwerà rupi katu tè age'ewarà Janejare'e ayvu mojenuarà kõ omojenu janeupe, Janejare'e ayvu e'eay Jesu rewarà. Emimojenuwerà rupi pekuwa penereko katua ky'y. Aje ywete emimojenuwerà kõ. Janejare'e 'Ãg kasia rupi tè omojenu kupa. Yva pe wyi omuu maekwerà kasia rupi omojenu kupa, janemotekokuwaa rõmõ. A'evoa rè Janejare'e remĩgwai yvapewarà kõ ipe nokuwa katui ipi.

13 Aje, Jesu Kiristu uu tarà mijẽ ojikuwa Jõvijã wasu rõmõ. A'evo remẽ janereraatà wena kyty, opyri tijaiko karuaru ky'y. Ajawyi a'evoa rã rè ywesõ tapeja'a peiko. Ja'ave rõwã ikõ tapeiko e'ã nẽ. Tapejireko katu ikõ Janejare'e rekoa rupi katu peiko nẽ. Jesu vãea rã tapeãrõ peiko ipi. “Aje ywete ikatuay wete ererekotà uu mijẽ remẽ”, tapejẽ. 14 Janejare'e taperovija katu ipi, ijãkarãgwerà kõ rõmõ. Jesu napekuwaive remẽ itõkõ, penemimota ai rupi tè peiko ipi mijã. Aekwery vo rõwã tapeiko ky'y. 15 Ivo katuay ikõ tapeiko ipi nẽ. Ãwitõ Janejare'e aiwererà naikoi 'ete ee, ãwĩvo ve tapeiko, emipyteporokwerà kõ rõmõ. 16 Kee jaa ojikusiwa Janejare'e ayvu: “Nuvei 'ete eaiwererà ere mã'ẽ teãmã ije. Ajawyi ereruparà kõ rõmõ tapeiko”, e'i ikusiwa mã'ẽ.^b

17 Emã'ẽ. Peporegeta Janejare'e pè remẽ, “Papa” pejẽ ijupe ipi. Ajawyi tapemomojy wete jẽ ikõ ike yvy rupi peiko jẽ remeve nẽ. A'e tè kãramõ poromosã'ãga remẽ, janerekoawerà kõ rupi katu janemosã'ãgatà. Ivo mãe kõ pè “ivo” e'ità. Nivoi mãe kõ pè ãmẽ “nivoi” e'ità. Ojevo jẽ nivoi mãe kõ wemavopa kõ kõrijõtà ity oo. Ajawyi Janejare'e tapemomojy jẽ ereko, ike yvy pè peiko jẽ remẽ, a'e pejẽ. 18 Penãmõi kõ oiko te'ĩte iko ipi mijã. Eruparà kõ rõmõ a'evo teve peiko ipi mijã. Ajamã'ẽ Janejare'e pemomoioka aekwerà wyi tapeiko ky'y. Pepyypa oupewarà kõ rõmõ tapeiko. Karakuri rõwã ome'ẽ pemomoia repy rõmõ. Epykwerà opa mã'ẽ rõwã ome'ẽ. Pekuwa a'evoa. 19 Ta'yry Kiristu tẽ tesõ omãnõ peaiwererà repykarà mõ. Nuvei 'ete ijaiwererà ee mã'ẽ tẽ tesõ omãnõ.^c A'evoa rupi Janejare'e pemomoioka peneko aiwerà wyi tapeiko. Epy wete pemomoia rã ijupe. 20 Janejare'e tè Kiristu omuroka pemomoia rã repykarà mõ. Yvy jinõ e'ãve e'ipa amãtejẽ. Ajaate uu ojisaoka penereko katuarà rõmõ ky'y. 21 A'evoa rupi tè pejirovija ywete Janejare'e rè ky'y. A'e tè omomoeraoka Jesu omãnõ maire. Jõvijã wasu rõmõ omono ajaire ky'y. Ajawyi tapejirovija jẽ ikõ Janejare'e rè peiko ky'y nẽ, a'e pejẽ. Kee tapejẽ: “Aje ywete Janejare'e janererekotà wena pè opyri tijaiko karuaru”, tapejẽ. A'evoa rè tapeja'a jẽ ipi.

22 Aje, Janejare'e ayvu aje ywete mã'ẽ rupi katu peiko ipi. A'evo napepy'a ky'ai ijupe peiko ky'y. Pejiauvay peiko ipi, ikoty rewarà kõ rõmõ. Ajawyi kee a'e pejẽ pemokasia rõmõ. Age'e ywesõ ikõ tapejiauvay peiko nẽ, a'e pejẽ. Pepy'a pupe ve tesõ ikõ pejiauvay peiko nẽ, a'e pejẽ. 23 Kee rewarà mõ. Penuu tè Janejare'e ky'y. Nomãnõ'ãi mã'ẽ Penuu. Oiko karuaru mã'ẽ tè. A'e tè peikoa ipyau mã'ẽ ome'ẽ pejẽ, wãkarãgwerà kõ rõmõ. Wayvu rupi ome'ẽ, poromoigo mã'ẽ rupi, nopa'ãi mã'ẽ rupi. 24 Ajare kee jaa ojikusiwapa amãtejẽ: