Aã kareta Janejare'e 'Ãg omotekokuwa Juwão tokusiwa Jesu koty rewarà kõ pè maekwerà. Jesu remimo'ekwerà tè Juwão. Okusiwa ypy mã'ẽ tè aã kareta. Okusiwa remẽ, ayvu e'ekwerà rewarà tè okusiwa. Jesu tè opyteporo Juwão imono okoty rewarà kõ motekokuwaarà rõmõ toiko. Aã kareta okusiwa remẽ, ika'akuwa tesõ Juwão ky'y. Wemikusiwarerà omono Jesu koty rewarà kõ pè tomã'ẽ ee ojimotekokuwa rõmõ, pirujẽ taa taa rupiwarà kõ pè. “Eãkarãgwerà kõ” e'i ijupe kõ okusiwa remẽ. Kee jaa okusiwa okareta rè: “Oromã'ẽ ee mã'ẽ tè oromome'u orokupa. Ãmõ, orereminuwerà teve oromome'u orokupa, tapekuwa”, ejaa (1Juw. 1.3).

Kee e'i Juwão ikusiwa Janejare'e poroauvaya rè: “Kee Janejare'e omojikuwa janerauvaya janeupe. Wa'yry wyjaveay mã'ẽ omuroka ike yvy pè janepytery pè janerereko katuarà rõmõ, ãwisõ janereko pyau nopa'ãi janewyi mã'ẽ rupi tè tijaiko ky'y. Jane tè siauvay rewarà mõ rõwã Wa'yry omuu. Aje a'e tè janerauvay rewarà mõ tè omuu, tomãnõ janeupewarà mõ, janeaiwererà repykarà mõ”, e'i ikusiwa Juwão (1Juw. 4.9-10).